فۆتەی حیجابش هەوا دا نەسەر
|
هیممەت خواهـ کەرد نە قەسر و مەنزەر
|
واتش: دهر دوون خودا نیگەهدار
|
تۆ بمان چەنی چەرخ ڕۆزگار
|
نەفریندا بە دوون دەوران فانی
|
جە داخ خوسرەو جام جیهانی
|
کەس بەسەر نەبەرد جان و جوانی
|
تاسەر نەگێڵا بە کامەرانی
|
ئەر سەد پادشای جیهان گیرەنی
|
ئەگەر پەهلەوان تەخش تیرەنی
|
عاقیبەت بارت چون بار بیدەن
|
دەورانت فانی، ئاخرت ئێدەن
|
خاک ئادەم خوار خوونی خیشم خوون
|
خوسرەو کەردی خوار، شیرین سەرنیگوون
|
یە واتش شیرین هۆرێزا نە جا
|
پادا نە ڕیکاب ڕاهی بینەڕا
|
تیپ کەنیزاندا نە پشت سەر
|
ڕاگەی کەس نەهات مەرگش گرت نە وەر
|
پۆل بازی باز سازان دڵکێش
|
چەنی دەف و چەنگ ئاوەرد وست نە پێش
|
ساز مووکەشان موغنەنی بە سۆز
|
دەنگ تەپڵی باز نەغمەی جگەر سۆز
|
نە پشت شیرین ساز سەرسەری
|
نەوازان نەغمەی چۆپی و چەمەری
|
شیرین فۆتەی شەرم هەوا دا نە سەر
|
بێ پەردەی حیجاب ڕاگەش گرت نە وەر
|
بە سۆز سازان ناڵەی چەنگ و دەف
|
کێشاش نە مابەین سەف ئارا سەف سەف
|
جە بەرق بەیزاش ڕەوشەن بێزنا
|
نوور پەڕ و باڵ خورشید ڕێزنا
|
ئەوڕۆ قاپ قەزای گەردوون گریا واز
|
پەی دین دیدار دیدەی سپی باز
|
فەوج مەلایک ئاماش بە سەیران
|
فریشتان فەرش مەندن بە حەیران
|
ئینسان بی ڕەنجوور، مەلان مەندن ڕەق
|
مەلایک بی مات، مەلەک وات «صدق»
|
هەرکەس دیش دیدار شیرین بەو خاڵان
|
لوا نە جامەی مەجنوون ساڵان
|
بی بە جانشین قەیس کۆی دوجەیل
|
دەیری بی دەهری جە هیجران لەیل
|
کەسێ مەند بە پا، کەسێ سەرنیگوون
|
کەسێ جە هیجران توونا بی وە توون
|
یەکێ شی جە حاڵ، یەکێ شی جە هۆش
|
یەکێ مەرد جە داخ، یەکێ بی مەدهۆش
|
مەردوم جە دینش بەرلوان جە دین
|
شێت و شەیدا بین جە شەوق شیرین
|
شیرین بە سازان سۆز چەنگ و دەف
|
گوزەر کەرد، ویەرد نە مابەین سەف
|
نە مابەین سەف ویارا بە دەو
|
یاوا با گومەز مەزار خوسرەو
|
مواتن شیرین دمای کەمەر لاڵ
|
شەوق و شادیشەن ها نە خەت و خاڵ
|
فۆتەی حیجابش هەوا دان جە سەر
|
سۆز و سازشەن مشۆ بە شەوهەر
|
یاوا بە گومەز، مەرکەب دا قەرار
|
پیا بی جە زین، شیرین بی مدار
|
ئەسپش دا بە دەست کەنیزان ڕەند
|
واتش: بگێران مەرکەبم وە بەند
|
وێش بەواوەیلا ڕواڵا بە دەو
|
یاوا بە گڵکۆی مەزار خوسرەو
|
وێش سەرنیگوون کەرد نە خاک گڵکۆش
|
پشتان بە پەروێز بۆ نیا وە بۆش
|
یەک یەک جە ناڵان مەندەی پەس و پێش
|
جە نەو بە ناخوون کەندش نە جای وێش
|
تا تایێ جە زوڵف مەندەی تێغ تێز
|
بە چەنگ ناخوون هۆرشکەند جە پێز
|
تۆز بەستەی زامان گۆنای غەرق خوون
|
هۆرکەندش جە نەو بە نێش ناخوون
|
ئاڵات ئەڵوان بەرگ ڕەنگا ڕەنگ
|
پارە پارە کەرد بە ئەڵماس چەنگ
|
سەرش دا بە سەنگ نە سای گڵکۆشدا
|
زاری بانگ بەرز بەردش بە ڕووشدا
|
خێزا بە شیوەن نیشت نە سەرینش
|
یاوا بە گەردوون ناڵەی گرینش
|
ئەسر هوونینش بە تاف و دەو دا
|
ڕێزاش بە گڵکۆی خاک خوسرەودا
|
واتش: کەمەر لاڵ فیدای ناوت بام
|
بێدار بەر جە خاو فیدای خاوت بام
|
کەمەر لاڵ کەی سەر هوردەر جە خاو
|
خاو سەرای سەنگ بە تۆ نیەن باو
|
بێدار بەر خوسرەو چ وەخت خاوەن
|
دەوران دنیا بێ تۆ خراوەن
|
هۆرێزە جە خاو، مەر لێڵاوەنی
|
یە چێشەن نە فیکر خەفت و خاوەنی
|
سەر هۆردەر جە خاو دڵ ئازار دەرد
|
بوینە شێرۆی شوومت چێشش کەرد
|
دەنگ خۆش خوانان بڕیش نە ئەیوان
|
نیکیسا دەستش، باربود زوان
|
جام ڕێز شێونا، کیسرا کەرد خراو
|
باد ئاوەر شکست، دەست ئەفشار نە ئاو
|
شەودێز کەردش پەی، گوڵ گووندا تێز
|
سوپا و سەرداران ئاوەردن گورێز
|
خواجە سەرایان کەنیزان ڕەند
|
خاسە غوڵامان بەندی کەرد نە بەند
|
تاجش دان نە سەر نیشتەن نە تەختت
|
داش بە ئاوەدا سیلسیلە و ڕەختت
|
جەهد و جەختشەن، شەیدای شەو و ڕۆ
|
ها نە قەسد قین پەی نامووس تۆ
|
مبۆش بکێشۆ یەکجا پا نە پێش
|
دراز کەردەن دەس جە ئەندازەی وێش
|
ئەو تۆش بە خەنجەر غەڵتان هوون کەرد
|
تاجت بە تاڵان، تەختت نیگوون کەرد
|
تازی تەواران، گێڵانی کەمەند
|
یەدە و بەحرییان کەمەند پێت نەمەند
|
قوشخانان دەربەست، قوشچی بین فیرار
|
میهتەران موفلیس قەتار و نەهار
|
چاوەشان نە بەند، جاڕچییان نە گیر
|
خانان بەد دام، سەرداران ئەسیر
|
سوپات سەرگەردان، سوڵتانان خەمین
|
شاهان نە شیوەن، شەهریار نە شین
|
کورسی نشینان سەندەلی جە زەڕ
|
خاڵی جە خانان تاج تاوس پەڕ
|
مەجلیس مەقامات مەست جام مەی
|
خاڵی جە شادی کەی کەیان کەی
|
ساقیان سەر کۆم جە جام بادە
|
پیاڵان پەشێو، نیگوون فوتادە
|
سوراحی سەرمەست، قەڕابە خەستە
|
شیشە سەرایان شاهی شکەستە
|
بازی باز بێدەنگ، سازان سەرنیگوون
|
خۆش خوانان خامۆش غەڵتان چەنی هوون
|
خراوەن خاپوور دەروازەی پەروێز
|
دەنگ بایەقوش مەیۆ نە جام ڕێز
|
قاپیت قوفڵ قەسد قاتڵ نەگیرەن
|
ناکەسان شیرین پەنەش ئەسیرەن
|
سەر هۆردەر جە خاو چێشت خەیاڵەن
|
پەی تۆ شادی و زەوق شیرین بەتاڵەن
|
مەگەر چێش مبۆ جارێ جە جاران
|
نیگا کەی جە دوور بوینی یاران؟
|
خورۆش خیشمت بنمانیەوە؟
|
شیرین جە زاڵم بستانیەوە؟
|
فیدات بام خوسرەو یە گیر کێنی؟
|
گیرۆدەی پابەند زنجیر کێنی؟
|
یە چ خاوێوەن تۆش کەردەن خەتەر
|
بێزار جە دیدار نازار و دڵبەر؟
|
یە چ خاوێوەن تۆ پێش خەمۆشی
|
جە داد شیرین مات و مەدهۆشی؟
|
بێداد بەر خوسرەو فەسڵ بەهارەن
|
فەسڵ فەزای سەیر، شەوق گوڵزارەن
|
شەونم بە نم نم نەمیر غوزاران
|
بە وێنەی لالە جە لالەزاران
|
سەرزەمین سەفای قەیس قەهارەن
|
خەڵاس جە سەرمای لەیل و نەهارەن
|
گوڵان گوڵاوان، گوڵ و گوڵزاران
|
چەمەندان نە شاخ چەتر چناران
|
مات و مەلوولەن، هەر ڕۆڕۆ شانەن
|
ئارەزووی دیدار دین تۆشانەن
|
خوسرەو دمای تۆ دنیا بۆ بەرباد!
|
نە شێرۆ مانۆ نە شیرین بە شاد!
|
دیدەم فیدای زام جگەر چاکت بام!
|
خاو خامۆشی، یانەی خاکت بام!
|
خوسرەو، وێم بە نەزر خاک گڵکوت بام!
|
فەرهاد، وێم فیدای زام بێ شۆت بام!
|
فەرهادم، فیدای سەرای سەنگت شام!
|
مەکان و ماوای تار و تەنگت بام
|
فیدای تیپ و تەوق شاهـ و خانت بام!
|
سەردارم، بە نەزر سوپا و سانت بام!
|
نەزر و تەخت کەمەر لاڵت بام!
|
فیدای بەیداخان زەڕڕین باڵت بام!
|
فیدای تەنتەنەی فەوج فەڕت بام!
|
وێم نەزر سەرتەڵ سیم و زەڕت بام!
|
نەزر شەجاعەت دلاوەریت بام!
|
فیدای لاڵ بەخشیی باد ئاوەریت بام!
|
فیدای سان سەف سەد هەزارت بام!
|
فیدای تەڵای دەس دەس فشارت بام!
|
سەرگەرد شاپوور هەم شەودێزت بام!
|
بە نەزر شیرین شەکەر ڕێزت بام!
|
نەزر سیلسیلەی تاج و تەختت بام!
|
فیدای زەلیلیی زام سەختت بام!
|
فیدای بەزم و ڕەزم سۆز سازت بام!
|
نیکیسا و باربود خۆش ئاوازت بام!
|
نەزر کەنیزان ئەرامەندەت بام!
|
تیپ غوڵامان پەڕاگەندەت بام!
|
فیدای سەف ئارای شەهریارت بام!
|
سان سیلسیلەی تار و مارت بام!
|
نەزر غەڵتانیی خاک و خوونت بام!
|
سەرتەوق زەڕڕین سەرنیگوونت بام!
|
فیدای بانوان ئەسیر بەردەت بام!
|
دیوان شاهان بەتاڵ کەردەت بام!
|
خوسرەو خورۆشان خیشم جۆش و کۆ
|
سەردار سەرکەش سەرکەشانم ڕۆ!
|
لاڵ پۆش و لاڵ بەخش خاس خەیاڵم ڕۆ!
|
نەوەی کەیکاوس، کەمەر لاڵم ڕۆ!
|
شاهـ شێر شکار غەزیانم ڕۆ!
|
سالار سەرهەنگ کەی کەیانم ڕۆ!
|
دڵدار و دڵبەر دلاوەرم ڕۆ!
|
گەنجوور کۆی گەنج باداوەرم ڕۆ!
|
شەهەنشای شاهان شەهریارم ڕۆ!
|
دەسباز دەسگیر دەس ئەفشارم ڕۆ!
|
سوڵتان سالار بەحر و بەڕم ڕۆ!
|
سەبر سەرداران کڵاو زەڕم ڕۆ!
|
خواجە غوڵامان دوڕ نە گۆشم ڕۆ!
|
کەیانی مەجلیس بادە نۆشم ڕۆ!
|
باش باشقەی عەزیزانم ڕۆ!
|
سەردار ساحێب کەنیزانم ڕۆ!
|
بێدادم گەردوون، کەیقوبادم ڕۆ!
|
شێر زەبەردەست هەی فەرهام ڕۆ!
|
شیرین بەی دەستوور خوسرەو ملاونا
|
فوغان و زاریش تەوەن متاونا
|
دەس بەرد هۆرکێشا دەشنەی تێغ تێز
|
دەستەش مەحکەم کەرد نە قەبر پەروێز
|
نووکش کەرد وەبان، نێشش ونارا
|
سەرکەرد نە باڵا سەر نێش خارا
|
واتش: دەهر دوون خودا نیگەهدار
|
ها مشوون جە ڕەنگ ڕاگەی ڕۆزگار
|
با ڕۆژ ڕەوشەن کەروون بە زوڵمات
|
سەر بەروون نە سای سیاهیی مەمات
|
سەربنیەون نە سای سیای سەنگەوە
|
تەک دەم بە تەکیەی تار و تەنگەوە
|
بەڵێ دمای من گەردت بەرۆ باد
|
چەرخ نیلگوون نەنیشی بە شاد!
|
دمای کەیخوسرەو نەوەی کەیانی
|
نەمانی بە شاد دەوران فانی!
|
یە واتش شیرین شەیدای بێ درێغ
|
ئاما جەرگ وێش بدەرۆ بە تێغ
|
پڕ تاف بەست وە پا، خێزا بە هەوا
|
قەدرێ جە سینەی زەمین بی سیوا
|
بڵند بی بەوتەرز خێزا بە ئاخێز
|
ئاما سەرەندەر پەرێ تێغ تێز
|
سینە و جەرگ وێش بە ئاخێزەدا
|
داش بە نووک تێغ دەشنەی تێزەدا
|
کزەش دا نە جەرگ مەودای موو شکاو
|
دڕیش جەرگ و دڵ تێغ تازە ساو
|
نووک سەرمەودای سەر ساو تازەش
|
مەوداش بەر لوا جە موهرەی مازەش
|
نووک نێش تێز جە سینەش بەرشی
|
منمانا بەرقەی بەرق ئاتەشی
|
گوم بی نە جەرگش دەشنە تا بە مشت
|
کێشا زوانەی زیادیش وە پشت
|
جە قرچەی خەنجەر، لاو مەوج هوون
|
شیرین شی جە حاڵ، کریا سەرنیگون
|
جە تاو دەشنەی ژار ئالوودەی ژار
|
جە زەبر و زۆریی ئێش و نێش خار
|
زیڕناش بە زار، شیرین بە وەر بەرد
|
سەرکەرد نە جەرگش قەترەی زووخ زەرد
|
تک تک زووخ زام قەتران قیرین
|
جۆشاو سەرواز کەرد نە جەرگ شیرین
|
خووناو خوسرەو زووخاو ساڵان
|
کنیاش نە دەروون چون لاو واران
|
خێزا و خورۆشا هوونش بێ مدار
|
جە زام دەشنەی ژار ئالوودەی ژار
|
هوونش خورۆشا نە جەرگ پارە
|
شاناش وێنەی مەوج فڕەی فوارە
|
ئەڵوان بی بەژنش سەر تا وە دامان
|
ئەڵوەدای ئەڵوان جە زووخ زامان
|
فوارەی هوونش سەرکێشا نە ئەوج
|
نە دەور شیرین مەوجیا بە مەوج
|
چون تاف قەڵوەز هاڵان نە دەودا
|
ئاما بە گڵکۆی خاک خوسرەودا
|
شیرین شەیدا کریا سەرنیگوون
|
زنجیرەی زوڵفش ماسیا جە هوون
|
ڕژیا هوون وە بەرگ شمشاد باڵاش
|
ڕەنگین بی ڕەخت و ئاڵات واڵاش
|
پەشتان بی شیرین وە بەژن ئەودا
|
بە خاک سیای گڵکوی خوسرەودا
|
زیڕنا شیرین، ناڵا وە بێکەس
|
کەفت نە هیلاکەت نەزد نیم نەفەس
|
مورغش جە سندووق قەفەس پەروازا
|
جە سەدر سینەش نەغمەش نەوازا
|
جوانا و جەم بی نە چارتینیش
|
ئاما سەر نیا نە نووک بینیش
|
ڕۆح ڕەوانش ڕواڵا بە ڕەم
|
ئەرواش سەر نیا نە سەودای ستەم
|
کاسەی پیاڵان دیدەش پڕ جە هوون
|
باڵای موژگانش سەرکەرد سەرنیگوون
|
بێدەنگ بی جە دەنگ، جە ناڵشت ناز
|
مەدهۆش بی جە هۆش، جە ڕێزان ڕاز
|
قابیز بە قەسدش بە تەعجیل و تار
|
نە سەدر سینەش چنگش دا قەرار
|
بە چەنگاڵ چەنگ قولاپەی عەزاب
|
چەنگ دا نە جەرگش چون قەترەی گوڵاب
|
بە قەسد قاتیل قەبز ڕۆحش کەرد
|
سەبت دەفتەرش بە کاتب سپەرد
|
بەڵگش جە دەرخت ڕێزا جە ڕازان
|
بەندش بی جیا، کنیا چون خەزان
|
فاریغ بی جە نێش دووریی داخ دەرد
|
لاشەی لەتیفش بی وە سەنگ سەرد
|
سەرگوم بی شیرین جە زووخ زامان
|
کێشان جائیزەی نامش جە نامان
|
ئەجەل داش نە دەم بادەی بێ هۆشی
|
سەر بەرد نە خانەی خاو خامۆشی
|
بۆ نیا نە بۆی گیانش جە نەو
|
پشتان بی شیرین بە خاک خوسرەو
|
نەرد زەبوونیش تاین بی نە تاس
|
جە دین دیدار شێرۆ بی خەلاس
|
بی بە داستان پەرێ پیر و پەند
|
نەزم نێکنامیش تا هەزار و ئەند
|
شەرت شیرین مەند تا بە قەرن یام
|
شیرین مەند بە شەرت، شێرۆ بی بەد بەدنام
|