| باربود سا دیش خوسرەو بی سۆزان
|
میزراب دا نە تار مەفتوول بۆزان
|
| نە پەردەی «مەغلووب» نەوای ڕێزئەفگەن
|
بەی تەور دا جواب شیرین ئەرمەن
|
| واتش: بە چەشم، شای نەونەمامان
|
ئەمجار سەد گونا و یەک تۆبە ئامان
|
| ڕوێ جە ئەمرت ئەر من شیم وەبەر
|
سەرم دا بە سەنگ سەوڵ نازپەروەر
|
| سەخت پەشیمانم من جە کار وێم
|
شەرمەندگیی تۆ، شیرین ئاما پێم
|
| پەی ئەی نائەمری لێم سادر بیەن
|
جە پای تەخت تۆ عوزرخوام نیەن
|
| عوزرخوام هەر ئەسر دیدەی گریانەن
|
شەفاخوام قرچەی دڵەی بوریانەن
|
| شەرت بۆ ئەر شیرین لێم بستانی سەر
|
زەڕڕە جە ئەمرت بەرنەشوون وەبەر
|
| شەرت بۆ چێگەولا ڕاز ڕێزەی نەبات
|
بە جەم بکێشون جاڕووی خاکپات
|
| خاس بی، جەی وەرتەر مدا پەیامێ
|
گاهێ مکیاستی دەعوا و سەلامێ
|
| ئیسە تۆ ئەو ڕایچ خۆ وەنەم بەستی
|
مینای شەرت و بەین بە سەنگ شکەستی
|
| بەڵێ تۆ هەی شۆخ دڵ جە خارە سەنگ
|
وێت فەرهادت کوشت هیچ نامای وە تەنگ
|
| منیچ ئەڵبەتە چون ئەو بێچارە
|
مکەری منیچ بە مەرگ ئاوارە
|
| وەختێ باربود دانای دڵ ئەفرۆز
|
واناش ئەی ئاهەنگ ئەی نەزم دڵسۆز
|
| شیرین وێش جە دەر دا بە زەمیندا
|
سەیل بەست ئەسرینش بە ڕووی جەمیندا
|
| بەو تەور کەرد فەریاد ئەو سەرو ئازاد
|
جەو فەریاد خوسرەو ئاما بە فەریاد
|
