عشق میں گل کے جو نالاں بلبل غم ناک ہے

by حسرتؔ عظیم آبادی

عشق میں گل کے جو نالاں بلبل غم ناک ہے
گل بھی اس کے غم میں دیکھو کیا گریباں چاک ہے

داغ بر داغ اشک بر اشک اپنی چشم و دل میں ہیں
کیا بلا گل خیز اے یارو یہ مشت خاک ہے

اے خضر جاؤں کہاں میں کوچۂ مے خانہ چھوڑ
خوش دلی کا مولد و منشا یہ خاک پاک ہے

غرق سر تا پا ہوں بحر بیکران خوں میں میں
آشنا پوچھے ہے تو یہ چشم کیوں نمناک ہے

سرو کی نسبت سے اس قد بلا بالا کو کیا
خشک چوب پا بگل یہ وہ قد چالاک ہے

ہائے کن آنکھوں سے دیکھوں اس رخ روشن پہ خط
چشمۂ خورشید میں یہ کیا خس و خاشاک ہے

کافر و مومن کو رقت غم میں ہے حسرتؔ کے ہائے
کچھ خدا کا ڈر بھی تجھ کو اے بت بیباک ہے