میں نے مانا کام ہے نالہ دل ناشاد کا
میں نے مانا کام ہے نالہ دل ناشاد کا
ہے تغافل شیوہ آخر کس ستم ایجاد کا
ہائے وہ دل جو ہدف تھا ناوک بیداد کا
درد سہتا ہے وہی اب غفلت صیاد کا
نرگس مستانہ میں کیفیت جام شراب
قامت رعنا پہ عالم مصرعۂ استاد کا
مانع فریاد ہے کچھ طبع کی افسردگی
کچھ سکوت آموز ہے پاس ادب صیاد کا
اس قدر دل کش رہا تیرا اگر انداز جور
زخم دل منہ چوم لے گا خنجر بیداد کا
مجلس ماتم بنی آنے سے ان کے بزم عیش
پڑ گیا پھولوں میں میرے غل مبارک باد کا
تو نہ کر ترک ستم ظالم ستم ہو جائے گا
جاں سے جائے گا خوگر لذت بیداد کا
درد ناکام ہجوم آرزو کا ہے مآل
تلخئ حسرت نتیجہ شوق الفت زاد کا
حسرت افزا ہے بہت میرے دل ویراں کا جال
کون ہے فرماں روا اس ملک غیر آباد کا
لطف ہی آتا رہا ہے سعی باطل میں مجھے
ہے یہاں افسوس کس کو محنت برباد کا
کھینچ کر لے چل مجھے شوق اسیری سوئے دام
کام ایسا کر کہ جس سے جی بڑھے صیاد کا
کس کو شکوہ ہجر کا اور کس کو حسرت وصل کی
لطف پروردہ ہے میرا دل کسی کی یاد کا
یہ ادائے دلربایانہ یہ انداز حیا
کس طرح پھر کام کرتی ہے نظر جلاد کا
وحشتؔ اس بت نے تغافل جب کیا اپنا شعار
کام خاموشی سے میں نے بھی لیا فریاد کا
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|