گر جفا کی نہ ہو وفا مانع
گر جفا کی نہ ہو وفا مانع
کوئی ظالم نہیں ترا مانع
چارہ گر کے الٰہی ٹوٹیں ہاتھ
ہو گئی درد کی دوا مانع
سامنے تیرے دم نہ نکلا ہائے
حسرتوں کی ہوئی قضا مانع
کیوں نہ الٹی نقاب چہرے سے
حشر کی کیوں ہوئی حیا مانع
کیوں نہ پھیری چھری رکا کیوں ہاتھ
تیرا جلاد کون تھا مانع
چھوڑ کر پردہ ہٹ گیا وہ شوخ
نالہ دیدار کا ہوا مانع
آسمانؔ اس قمر کے آنے کا
ہوا اظہار مدعا مانع
|
This work is in the public domain in the United States but it may not be in other jurisdictions. See Copyright.
|