ہم ہیں سر تا بہ پا تمنا
ہم ہیں سر تا بہ پا تمنا
کیسی امید کیا تمنا
ہو کتنی ہی خوش گوار پھر بھی
ہے دل کے لیے بلا تمنا
دیتے ہو پیام آرزو تم
جب ترک میں کر چکا تمنا
دنیا کو فریب دے رہی ہے
جلوہ ہے سراب کا تمنا
اپنی منزل پہ ہم نہ پہنچے
جب تک رہی رہنما تمنا
مابین نگاہ و جلوۂ حسن
ہے ایک حجاب سا تمنا
الجھا رہا آرزو میں غافل
کیوں خود ہی نہ بن گیا تمنا
آواز تو دو کسے پکاروں
تم ہو مرے دل میں یا تمنا
سیمابؔ مآل شوق معلوم
ام للانسان ما تمنیٰ
|
This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator. | 
|