Biblia/Nove Testamento/Actos/Actos 5

Actos

5

Le Judicio super Ananias e Sapphira

¹Il habeva un homine cuje nomine esseva Ananias e su uxor se appellava Sapphira. Illes habeva vendite un agro que illes possedeva ²e habeva deponite le receptas del vendita al pedes del apostolos. Ananias tamen, de accordo con su uxor habeva retenite pro illes ipse un parte de tal receptas. ³Petro tamen, diceva: “Ananias: Satan te induceva^[1] mentir al Spirito Sancte e retener pro vos ipse parte del receptas del vendita del agro. ⁴Nemo te habeva obligate vender lo e, quando tu lo vendeva, certo tu poteva semper decider quanto donar e quanto retener. Como poteva tu facer un tal cosa? Tu non mentiva a nos, ma al Spirito Sancte. ⁵Quando Ananias audiva iste parolas, ille subito collabeva e moriva. Propter isto, un grande pavor sasiva omnes qui audiva re isto. ⁶Alora veniva homines plus juvene, le involveva in un drappo, portava via le corpore de Ananias e le inhumava. ⁷Circa tres horas plus tarde, su uxor entrava, ma illa non sapeva lo que habeva occurrite. ⁸Petro la demandava: “Dice me, esque vos ambes recipeva iste amonta pro le vendita de vostre agro?” E Sapphira diceva: “Si, justo illo”. ⁹Petro alora, la diceva: “Como poteva tu e tu marito mesmo pensar de facer un tal cosa: convenir insimul de poner a proba le Spirito del Senior? Justo nunc es foras del porta le juvenes qui inhumava tu marito, e illes portara via etiam te”. ¹⁰Subito illa cadeva a terra, morte, e le juvenes entrava, videva que illa habeva morite, la portava via e la inhumava apud su marito. ¹¹Propter isto, un grande pavor sasiva le ecclesia integre e tote le alteres qui audiva quid habeva evenite.

Le apostolos opera signos miraculose

¹²Intertanto le apostolos, de accordo se congregava regularmente in le Templo, in le area nominate Portico de Salomon. Illes operava remarcabile signos miraculose inter le populo. ¹³Le altere credentes, tamen, non hardiva accompaniar se al apostolos, ma omnes habeva le plus alte respecto pro illes. ¹⁴Un numero semper plus grande de personas, homines e feminas perveniva creder al Senior e se addeva a illes. ¹⁵Ita, illes portava infirmos foras in le stratas sur lectieras e mattas a fin que quando Petro transi, al minus su umbra se projecta sur illes. ¹⁶Un multitude concurreva ex le suburbios de Jerusalem e portava lor malades e illes qui esseva affligite per spiritos immunde: cata un de illes esseva sanate.

¹⁷Propter iste situation, le Summe Sacerdotes e omnes qui le susteneva (illo es le partito religiose del sadduceos) reageva con jelosia violente, ¹⁸faceva arrestar le apostolos e les faceva recluder in le prision public. ¹⁹Durante le nocte tamen, un angelo del Senior aperiva le portas del carcere e les faceva sortir. Pois ille les diceva: ²⁰“Vade in le cortes del Templo e predica re iste vita!”. ²¹Illes, assi, arrivava in le cortes del Templo al alba e incipeva subito docer^[2].

Enoios ulterior pro le apostolos

Plus tarde celle matino, le Summe Sacerdotes e su cortesanos arrivava e convocava le Synedrio - illo es le consilio integre del israelitas. Illes ordinava que le apostolos les sia adducite pro esser judicate. ²²Quando tamen, le milites vadeva al carcere, non trovava ibi le apostolos. Assi illes retornava e faceva un reporto. ²³ Illes diceva: “Le portas del carcere esseva serrate e le guardas stava foras, ma quando nos aperiva le portas del prision, nos non trovava alicuno ibi!”.

²⁴Quando le commandante del guardas del Templo e le sacerdotes principal audiva iste reporto, illes esseva grandemente disconcertate e se demandava como tote isto habeva essite possibile. ²⁵Ma alicuno arrivava con le nova que justo celle homines qui habeva essite imprisionate stava nunc in le cortes del templo docente le populo! ²⁶Alora le commandante del guardas del Templo vadeva con le officieros e les adduceva itero ante le Consilio. Illes lo faceva tamen sin emplear le fortia, quia illes timeva esser lapidate per le turba.

²⁷Quando le apostolos esseva adducite, illes stava ante le Consilio e le Summe Sacerdote les interrogava. ²⁸Ille les diceva: “Nos vos prohibeva strictemente de non docer in le nomine de Jesus^[3], nonne? Nonobstante vos impleva Jerusalem con vostre doctrinas e mesmo vos vole render nos culpabile del morte de celle nomine^[4]?

²⁹Ma Petro e le apostolos respondeva: “Nos debe obedir a Deo magis que al homines. ³⁰Le Deo de nostre ancestres suscitava Jesus, quem vos sasiva e occideva suspendente le a un cruce^[5]. ³¹Deo tamen, le exaltava a su dextera qua Duce^[6] e Salvator, pro dar al populo de Israel le opportunitate del repententia e le remission del peccatos. ³²E nos es le testes de iste evenimentos, e mesmo lo es le Spirito Sancte, quem Deo ha date a tote les qui le obedi."

³³Quando illes audiva iste parolas, illes se inragiava e voleva occider les. ³⁴Uno de lor consilieros tamen, cuje nomine esseva Gamaliel (un doctor del Lege multo respectate per le plebe) se levava e requireva que le apostolos sia facite sortir brevemente. ³⁵Deinde ille diceva al consilio: “Homines de Israel, sia multo caute quando vos prende ulle decision re iste homines!³⁶Quia alicun tempore retro surgeva Theuda, qui assereva super se esser un homine eminente. Circa quatro centos homines se jungeva a ille, ma ille esseva occidite, su adherentes esseva disbandate e su movimento dispareva. ³⁷Plus tarde surgeva Judas, le galileo durante le tempore del censimento. Ille attraheva alcunes qua su discipulos, ma etiam ille moriva, e su adherentes se dispergeva. ³⁸Assi, in iste caso io vos dice: “Non plus occupa vos de iste homines, quia si quid illes doce e face proveni simplemente de homines, illo tosto disparera. ³⁹Si tamen illo proveni de Deo, vos lo adversara, frustra de pavor que vos essera trovate pugnar contra Deo”. Illes ergo esseva persuadite de tal parolas, ⁴⁰e convocante le apostolos, illes les faceva flagellar e itero les ordinava non parlar plus in le nomine de Jesus. Deinde illes les dimitteva.

⁴¹Assi le apostolos quitava le camera del Consilio allegrante se, quia Deo les habeva considerate digne de suffrer dishonor propter le nomine de Jesus. ⁴²E omne dies, sia in le cortes del Templo, sia de domo a domo, illes non cessava docer e proclamar le Bon Nova^[7] que Jesus es le Christo.

Notas

1. Litt. “Satan ha implite tu corde”.
2. O “proclama tote le parolas de iste vita”.
3. O “in iste nomine”.
4. Litt. “facer cader sur nos le sanguine de celle homine”.
5. Litt. “a un ligno”.
6. In greco: ἀρχηγός (le conductor principal, principe, le persona qui conduce in omne cosa e assi deveni un exemplo, un predecessor, un pionero, le autor).
7. O “evangelisar”.