Biblia/Nove Testamento/Actos/Actos 6

Actos

6

Le appunctamento del prime septe diaconos

¹Ora, in ille dies, quando le numero del discipulos cresceva, un murmuration surgeva inter le judeos de lingua grec contra le judeos native qui parlava hebreo, quia in le distribution quotidian de alimentos lor viduas esseva negligite. ²Assi le Dece-duo convocava le multitude del discipulos e diceva: “Il non es juste que nos relinque le predication del parola de Deo pro ingagiar nos in le servicio al tabulas. ³Plus tosto, selige inter vos, fratres, septe homines de bon renomine e plen de Spirito e de sapientia, qui nos pote appunctar al complimento de iste obra necessari. ⁴Ma nos nos devotara al oration e al ministerio del Parola”. ⁵Iste proposition placeva a tote le multitude del discipulos. Illes assi eligeva le sequente homines: Stephano - un homine de grande fide e plen de Spirito Sancte, Philippo, Prochoro, Nicanor, Timon, Parmenas e Nicolas de Antiochia (un converso al judaismo). ⁶Illes esseva facite presentar al apostolos, le quales precava e imponeva lor manos super illes.

⁷Le Parola de Deo continuava diffunder se, le numero del discipulos cresceva grandemente in Jerusalem, e mesmo un grande numero de sacerdotes esseva convertite^[1].

Stephano es arrestate

⁸Ora Stephano, un homine plen de gratia e del potentia del Spirito Sancte faceva prodigios e grande signos miraculose inter le populo. ⁹Ma alcun homines qui pertineva al synagoga del libertos (como illo esseva appellate) comenciava polemisar con ille. A iste disputa con Stephano tosto se jungeva alcun judeos de Cyrene, Alexandria e del provincia de Asia. ¹⁰Ma nemo de illes succedeva contraponer se al sapientia e al spirito de Stephano. ¹¹Assi illes, pro adversar le, recurreva a alcun homines qui, mentiente, diceva: “Nos le audiva dicer parolas de blasphemia contra Moses e mesmo Deo”.

¹²Assi omne illes incitava le furia del plebe contra Stephano, con le resultato que le capites del judeos^[2] le faceva arrestar e portar ante le Consilio. ¹³Illes trovava testes false que diceva: “Iste homine non cessa dicer mal parolas contra iste loco sancte^[3] e contra le Lege. ¹⁴Quia nos le audiva dicer que Jesus le nazareno destruera iste loco e mutara le consuetudes que Moses establiva pro nos”. ¹⁵Tote illes qui sedeva in le Consilio reguardava fixemente Stephano e videva que su facie esseva tanto radiante quanto illo de un angelo.

Notas

1. Litt. “deveniva obediente al fide”.
2. Litt. “le seniores e le scribas”.
3. “le Templo”.