Biblia/Nove Testamento/Corinthios/1Corinthios 10

1 Corinthios

10

Apprehender del fallimento de Israel

¹Pois que io non vole que vos ignora, fratres e sorores, que nostre patres esseva totes sub le nube e totes transiva le mar. ²Totes esseva baptisate con^[1] Moses in le nube e in le mar. ³Totes se nutriva del mesme alimentos spiritual, ⁴e totes bibeva le mesme bibitura spiritual. Pois que totes bibeva del mesme rocca spiritual que les sequeva^[2], e le rocca esseva Christo. ⁵Deo, tamen, non agradava le majoritate de illes, pois que illes esseva abattite^[3] in le deserto. ⁶Iste cosas eveniva pro dar un exemplo a nos omnes, de sorta que nos non desira ardentemente lo que es mal como illes faceva. ⁷Assi, va non esser idolatras como lo esseva alicun de illes. Como il es scribite: “Illes se sedeva pro mangiar e biber, e alora illes se levava pro dansar^[4]”. ⁸Vamos non ager in maniera immoral^[5], como alicunes faceva, e vinti tres milles de illes moriva in un sol die, ⁹ni vamos provocar Christo, como alicun de illes faceva, e esseva destruite per le serpentes.^{[6] 10}E vamos non murmurar, como alicun de illes faceva, e esseva occidite per le angelo^[7] destructor^[8]. ¹¹Iste cosas eveniva a illes como exemplos e esseva scribite pro admonestar nos qui vive al termino del etates^[9]. ¹²Assi, ille qui pensa esser firme, face attention a non cader. ¹³Necun tentation superveniva vos que non sia commun a alteres alsi. E Deo es fidel: ille non permittera que vos sia tentate ultra lo que vos pote supportar, ma con le tentation ille vos providera alsi le exito de sorta que vos lo pote supportar.

Evita le festas idolatric

¹⁴Dunque, mi car amicos, fugi del idolatria. ¹⁵Io parla vos como personas sage. Considera lo que io dice. ¹⁶Esque le cuppa del benediction que nos benedice non es le participation^[10] in le sanguine de Christo? Esque le pan que nos frange non es le participation^[11] in le corpore de Christo? ¹⁷Pois que il ha un sol pan, nos, qui es multes, es un sol corpore proque nos omnes participa a ille mesme pan. ¹⁸Considera le populo de Israel^[12]. Esque illes qui mangia le alimentos del sacrificios non es coparticipantes al altar? ¹⁹Esque io intende dicer que le idolos o le alimentos sacrificate a illos ha un signification real? ²⁰No, io intende dicer que lo que le paganos sacrifica a idolos es sacrificate a demonios e non a Deo. Io non vole que vos sia in communion con demonios. ²¹Vos non pote biber al cuppa del Senior e al cuppa del demonios. Vos non pote participar al tabula del Senior e al tabula del demonios. ²²Esque nos essaya provocar le Senior a jelosia? Esque nos es per aventura plus forte que ille?

Vive pro glorificar Deo

²³“Toto es licite”, ma non toto es benefic^[13]. “Toto es licite”, ma non toto es edificante^[14]. ²⁴Non cerca vostre proprie ben, ma le ben del altere personas. ²⁵Mangia toto lo que se vende al mercato del carne^[15] sin facer questiones de conscientia, ²⁶proque le terra e su abundantia^[16] pertine al Senior^[17]. ²⁷Si un persona incredule invita vos e vos accepta vader, mangia tote lo que vos es offerite sin facer questiones de conscientia. ²⁸Si, tamen, alicuno^[18] dice vos: “Isto ha essite sacrificate a idolos”, non mangia lo, a causa de ille qui lo diceva e pro motivos de conscientia - ²⁹Io non intende vostre conscientia, ma illo del altere persona. Proque, de facto, mi libertate deberea esser judicate per le conscientia de un altere persona? ³⁰Si io participa con gratitude, proque es io blasmate a causa del alimento pro le qual io rende gratias? ³¹Assi, sia que vos mangia, bibe, o face alicun altere cosa, face toto pro le gloria de Deo. ³²Non sia motivo de scandalo, ni a judeos, ni a gentiles, ni al ecclesia de Deo; ³³justo como io essaya esser agradabile a omnes in omne cosa, io non cerca mi proprie beneficio, ma le beneficio de multes, de sorta que illes sia salvate.

Notas

1. O “in Moses”, “a Moses”.
2. O “accompaniava”.
3. O “disperdite”.
4. O “indulger in festas pagan”. Citation de Exodo 32:6.
5. O “vamos non fornicar”.
6. Iste conto se trova in Numeros 21:5-9.
7. O “per le destructor”.
8. Iste conto se trova in Numeros 16.41-50.
9. O “le termino de iste seculo”.
10. O “communion”.
11. O “communion”.
12. O “le nation de Israel”. Litt. “Le Israel secundo le carne”.
13. O “conveni”.
14. O “constructive”.
15. O “macelleria”.
16. O “tote lo que illo contine”.
17. Un citation de Psalmo 24:1; un allusion a Psalmos 50:12 e 89:11.
18. Illo es, inter vostre fratres e sorores, qui es invitate alsi o qui sape in re iste invitation.