Biblia/Nove Testamento/Corinthios/1Corinthios 11

1 Corinthios

11

¹Sia mi imitatores, justo como io lo es de Christo.

Le copertura del capite del feminas

²Io lauda vos proque vos me rememora in omne cosa e preserva^[1] le traditiones justo como io los transmitteva^[2] a vos. ³Ma io vole que vos sape que Christo es le capite de cata homine, e le homine es le capite de un femina^[3] e Deo es le capite de Christo. ⁴Qualcunque homine qui preca o prophetisa con su capite coperite dishonora su capite. ⁵Ma qualcunque femina qui preca o prophetisa con su capite discoperite dishonora su capite, proque illo es le mesme cosa como haber un capite rasate. ⁶Pois que si un femina non vole coperir su capite, illa deberea accurtar su capillos. Si il es dishonorabile pro un femina accurtar su capillos o de rasar su capite, illa deberea coperir su capite. ⁷Le homine non deberea coperir su proprie capite, pois que ille es le imagine e le gloria de Deo. Le femina, tamen, es le gloria del homine. ⁸De facto le homine non procede del femina, ma le femina del homine. ⁹Ni le homine esseva create a causa del femina, ma le femina a causa del homine. ¹⁰Pro iste ration le femina deberea haber un symbolo de autoritate sur su capite^[4] in consideration del angelos^[5]. ¹¹In omne caso, in le Senior, le femina non es independente del homine, ni le homine es independente del femina. ¹²Proque, sicut le femina procede del homine, assi le homine nasce del femina, e tote le cosas procede de Deo. ¹³Va judicar per vos mesme: Esque il es appropriate pro un femina precar Deo con su capite discoperite? ¹⁴Esque le natura ipse non insenia que si un homine ha capillos longe, isto es un dishonor pro ille, ¹⁵ma si un femina ha capillos longe, isto es su gloria? Proque su capillos la esseva date como su copertura^[6]. ¹⁶Si alicuno intende disputar super iste question^[7], isto es lo que nos practica, e le mesmo face le ecclesias de Deo.

Le Cena del Senior

¹⁷Ora, in dar vos le sequente instructiones, io non lauda vos, proque vos congrega vos non pro le melior ma pro le pejor. ¹⁸Pois que, in prime loco, quando vos congrega vos como ecclesia, io audiva que il ha divisiones inter vos e, in parte, io lo crede. ¹⁹De facto, il es necessari que il ha divisiones inter vos, de sorta que se manifesta inter vos illes qui es approbate. ²⁰Ora, quando vos congrega vos in le mesme placia, vos non mangia realmente le Cena del Senior. ²¹Pois que quando il es tempore de mangiar, cata uno procede con su proprie cena. Assi uno suffre fame e le altere se inebria. ²²Esque vos non ha vostre proprie casas in le quales mangiar e biber? Tanto minusprecia vos le ecclesia de Deo in avergoniar illes qui ha nihil? Que deberea io dicer vos? Esque io deberea laudar vos? Certemente io non laudara vos pro isto!

²³Pois que io recipeva del Senior le mesmo como io inseniava vos, illo es: le Senior Jesus, le nocte in le qual esseva traite, prendeva pan, ²⁴e depost haber rendite gratias, lo frangeva e diceva: “Isto es mi corpore que es pro vos. Face isto in memoria de me”. ²⁵In le mesme maniera, post le cena, ille etiam prendeva le cuppa, e diceva: “Iste cuppa es le nove pacto in mi sanguine. Face isto tote le vices que vos bibe de illo, in memoria de me”. ²⁶Proque tote le vices que vos mangia iste pan e bibe de iste cuppa, vos proclama le morte del Senior usque ille veni.

²⁷Pro iste ration, quicunque mangia le pan o bibe del cuppa del Senior de maniera indigne essera culpabile del corpore e del sanguine del Senior. ²⁸Un persona deberea, assi, examinar se mesme e pois mangiar le pan e biber del cuppa, ²⁹proque qui mangia e bibe sin discerner correctemente^[8] le corpore del Senior, ille mangia e bibe un judicio contra se mesme. ³⁰Isto es proque multes inter vos es debile e malade, e plures moriva^[9]. ³¹Si nos, tamen, examina nos mesme, nos non essera judicate. ³²Quando, tamen, nos es judicate del Senior, ille disciplina nos, de sorta que nos non sia condemnate con le mundo. ³³Assi, fratres e sorores mie, quando vos congrega vos pro mangiar, attende le unes le alteres. ³⁴Si alicuno ha fame, que ille mangia in su casa, a que, quando vos congrega vos, isto non conduce a un judicio. Io dara vos instructiones super altere questiones quando io veni.

Notas

1. O “tene vos firmemente in le traditiones”.
2. O “inseniava”.
3. O “le marito es le capite de su sposa”.
4. Paulo non usa un parola que specifica qual sorta de “copertura” ille intende (un velo, un cappello, etc.). Le termino grec que ille usa hic, exousia, traducite con “symbolo de autoritate” poterea esser: (1) un figura de parlar que substitue le resultato (le derecto in participar al culto) pro le apparentia appropriate que lo rende possibile (le capite coperite); o (2) illo se refere al symbolo exterior (haber le capite coperite) que representa le attitude interior que le femina debe posseder (le respecto date al autoritate masculin in le ecclesia).
5. Paulo non explica iste referentia al angelos, e le question hic es non bastante clar. Isto pare reflecter le conscientia que le angelos es spectatores del vita del ecclesia e es particularmente sensibile al resistentia contra le ordinamento create de Deo.
6. Nulle termino que significa “velo” o “copertura del capite” occurre in le versos 3-14. Que le capillos sia considerate per Paulo como copertura in v. 15 non es necessarimente un argumento que le capillos es le mesmo como le copertura del capite que ille describe in le versos precedente (particularmente v. 10). Paulo releva le similitude del longe capillos con le copertura del capite. Le duo, tamen, non pare esser le mesme cosa (vv. 5, 6, 7, 10, 13). Si le copertura del capite es le mesmo como longe capillos, alora que significa v. 6 (“Pois que si un femina non vole coperir su capite, illa deberea accurtar su capillos”)? Isto indica que le copertura non es le mesmo como le capillos ipse.
7. O “si alicuno intende esser contentiose”.
8. O “recognoscer”, o “honorar”.
9. O litteralmente “dormiva”, un euphemismo pro morir.