Biblia/Nove Testamento/Galatas/Galatas 1

Galatas

1

Salutation

¹De Paulo, apostolo (non mandate de homines ni per agentia human^[1], ma per Jesus Christo e Deo le Patre, qui le resuscitava ex le mortos), ²e tote le fratres qui es con me, al ecclesias de Galatia. ³Gratia e pace a vos ab Deo le Patre e nostre Senior Jesus Christo, ⁴qui dava se mesme pro nostre peccatos, pro salvar nos ex iste actual mal etate secundo le voluntate de nostre Deo e Patre, ⁵al qual sia le gloria per le seculo del seculos. Amen.

Occasion del epistola

⁶Io me stupeface como vos tanto rapidemente abandonava ille que vocava vos per le gratia de Christo e seque nunc un evangelio differente. ⁷Certemente il non ha un altere evangelio, ma il ha alcunes qui perturba vos e vole distorquer le evangelio de Christo. ⁸Mesmo si nos, tamen, o un angelo del celo, predicarea un evangelio contrari a lo que nos jam predicava vos, que ille sia maledicite^[2]. ⁹Como io diceva antea, e io lo dice de novo, si alicuno predica a vos un evangelio contrari a lo que vos jam recipeva de nos, sia ille maledicite! ¹⁰Esque io nunc essayarea ganiar le approbation del homines o de Deo? O mesmo, esque io essaya gratificar homines^[3]? Si ancora io cercava gratificar homines, io non esserea un servitor de Christo!

Le justification de Paulo de su apostolato

¹¹Ora io vole que vos sape, fratres e sorores, que le Evangelio que io predicava non es de origine human^[4], ¹²pois que io non lo recipeva ni lo apprendeva de alicun fonte human. Al contrario, io lo recipeva directemente per un revelation de Jesus Christo.

¹³Vos certo audiva de mi previe maniera de viver^[5] in le Judaismo, como io persequeva violentemente le ecclesia de Deo e essayava de destruer lo. ¹⁴Io progredeva in le Judaismo multo plus que multe mi contemporaneos in mi nation^[6]. Io esseva extrememente zelante in le traditiones de mi ancestres. ¹⁵Quando, tamen, ille que me habeva eligite desde mi nascentia me vocava per su gratia, ille condescendeva ¹⁶ revelar su Filio in me al fin que io le predica inter le gentiles. Tunc io non me consultava con alicuno, ¹⁷ni ascendeva a Jerusalem pro vider le apostolos qui me precedeva, ma tosto io partiva e iva a Arabia e pois io retornava a Damasco.

¹⁸Pois, depost tres annos, io ascendeva a Jerusalem pro visitar Cephas e obtener informationes ab ille, e io remaneva con ille dece cinque dies. ¹⁹Io, tamen, non videva alcuno del altere apostolos, excepte Jacobo, le fratre del Senior. ²⁰Io assecura vos ante Deo que io non menti circa lo que io scribe vos. ²¹Postea io vadeva a in le regiones del Syria e del Cilicia. ²²Io, tamen, esseva incognite al ecclesias del Judea que es in Christo. ²³Ille solmente habeva audite: “Le homine qui antea persecutava nos nunc proclama le Evangelio del fide que un vice ille essayava destruer”. ²⁴Assi illes glorificava Deo a causa de me.

Notas

1. O “de homines o per homines”.
2. O “sia ille anathema”, implicante: “Sia ille condemnate al inferno”.
3. O “placer a”.
4. O “secundo le homine”.
5. O “conducta”.
6. O “racia”.