Biblia/Nove Testamento/Jacobo/Jacobo 4

Epistola de Jacobo

Capitulo 4

Passiones e orgolio

¹Unde veni le conflictos e le lites que il ha inter vos? Nonne hinc: ex vostre concupiscentia que battalia intra vos^[1]? ²Vos concupisce e vos non pote haber; vos assassina e invidia e non pote obtener; vos litiga e combatte. Vos non ha, proque vos non quere; ³Vos quere e non recipe, proque vos quere malmente^[2], tanto que vos pote dispender lo in vostre placeres^[3].

⁴Adulteros! Esque vos non sape que le amicitate con iste mundo es inimicitate con Deo? Quicunque ergo vole esser amico de iste mundo se face inimico de Deo. ⁵Pensa vos que il es in van que le Scriptura dice: “Le spirito que Deo faceva habitar in nos ha un desiro ardente^[4]”? ⁶Ma ille da un gratia major, nam ille dice: “Deo oppone resistentia al personas superbe, ma al humiles ille accorda su gratia^[5]”. ⁷Submitte vos ergo a Deo, ma oppone resistentia al diabolo e ille fugira de vos! ⁸Approxima vos igitur a Deo e ille se approximara a vos. Mundifica vostre manos vos, peccatores! Purifica vostre cordes, vos de animo duplice! ⁹Senti vostre miseria, luge e plora! Que vostre rider se converte in lucto e vostre gaudio in tristessa. ¹⁰Humilia vos coram Deo, e ille exaltara vos!

¹¹Fratres, non parla mal le un del alteres. Ille qui parla contra un confratre o judica un confratre parla contra le Lege e judica le Lege. Ma si tu judica le Lege, tu non es un complitor del Lege, ma su judice. ¹²Uno solmente es le legislator e judice - ille qui ha le poter de salvar e de facer perir - del altere latere, qui es tu pro judicar tu proximo?

¹³Audi nunc, vos qui dice: “Hodie o deman nos vadera in ille citate, nos remanera ibi un anno, nos commerciara e facera profitos”. ¹⁴Vos ignora como potera esser deman vostre vita! Vos es solmente un sufflo de vapor que appare per breve tempore e pois evanesce. ¹⁵Vos deberea dicer, in vice: “Si le Senior vole, alora nos vivera e facera isto o illo”. ¹⁶Ma ora vos vangloria vos in vostre superbia. Omne vangloria es mal. ¹⁷Assi, dunque, quicunque sape como facer le ben e non lo face, es culpabile de peccato.

Notas

1. O “in le membros de vostre corpore”.
2. Sovente on quere de Deo lo que solmente satisface nostre desiros egoistic. Per exemplo, on quere plus de tempore, plus de moneta, plus de energia pro facer le cosas que nos desira, ma que Deo non desira pro nos. Quid nos necessita peter es plus de desiro pro lo que ille promitte e commanda. Nos necessita alsi minus desiro pro lo que es contrari a su voluntate pro nos (cfr. Mattheo 7:7-11).
3. o “passiones”.
4. Nulle cognite texto biblic es phrasate exactemente assi. Illo poterea esser un inseniamento general del Scriptura o un citation de un antique traduction del texto hebraic que hodie non existe plus.
5. Un citation de Proverbios 3:34.