Biblia/Nove Testamento/Mattheo/Mattheo 23

Mattheo

23

Vos omnes es fratres e sorores

¹Tunc Jesus diceva al turbas e a su discipulos: ²“Le expertos in le Lege e le phariseos es le interpretes official del Lege de Moses^[1]. ³Ergo presta attention a quecunque illes vos dice e face lo. Non seque tamen lor exemplo^[2], quia illes non mitte in practica lo que illes doce. ⁴De facto, illes impone oneres grave e insupportabile sur le spatulas del homines, e illes non leva un sol digito pro alleviar un tal fardello. ⁵Tote lo que illes face es pro esser admirate del gente. Illes porta large phylacterios^[3] e longe fimbrias. ⁶Illes ama placias de honor a banchettos e le sedes melior in le synagogas. ⁷Illes ama reciper salutationes respectuose quando illes ambula in le foros e vole que le gente les appella ‘Rabbi^[4]’. ⁸Vos tamen non permitte que alicuno vos appella ‘Rabbi’, quia vos ha un Magistro solmente e vos omnes es fratres e sorores. ⁹E non adressa alicuno hic sur le Terra como ‘Patre’, quia solmente Deo in Celo es vostre Patre. ¹⁰Nec sia vos vocate ‘Magistro’, quia vos ha un magistro solmente, le Christo. ¹¹Le plus eminente inter vos essera vostre servitor. ¹²Quicunque se exalta essera humiliate e quicunque se humilia essera exaltate.

Septe guai

¹³Guai a vos, expertos in le Lege e vos phariseos, hypocritas! Quia vos claude le porta del Regno del Celo ante homines! De facto vos ipse non entra in illo, ni permitte que alteres entra ibi. ^14[5]

¹⁵Guai a vos, expertos in le Lege e vos phariseos, hypocritas! Vos transversa terra e mar pro ganiar un proselyto, e quando vos le obtene, vos le rende un filio del inferno^[6] le duplo quam vos!

¹⁶Guai a vos, guidas cec, quia vos dice que il significa nihil jurar ‘per le Templo de Deo’, ma il es obligante jurar ‘per le auro in le Templo’. ¹⁷Stultos e cecos! Quid es major, le auro o le Templo, que sanctifica le auro? ¹⁸Vos dice alsi que jurar ‘per le altar’ non es obligante, ma jurar ‘per le donos sur le altar’ es obligante. ¹⁹Quanto vos es cec! Quid es major: le dono sur le altar, o le altar que sanctifica le dono? ²⁰Qui ergo jura per le altar, jura non solmente per illo ma per tote lo que es sur illo. ²¹E quando vos jura ‘per le Templo’, vos jura per illo e per Deo qui sede super illo. ²²E quando vos jura ‘per le Celo’, vos jura per le throno de Deo e per Deo, qui sede sur le throno.

²³Guai a vos, expertos in le Lege e phariseos, hypocritas! Quia vos es diligente in pagar le decima mesmo pro le plus parve renta ab vostre jardin de herbas^[7], ma vos ignora le aspectos le plus importante del lege - justitia, misericordia, e fide. Certo vos debe pagar decimas, ma sin negliger le cosas le plus importante. ²⁴Guidas cec! Vos emplea cribros pro non inglutir culices^[8], ma vos ingluti un camelo!

²⁵Guai a vos, expertos in le Lege e vos phariseos, hypocritas! Vos munda le exterior del calice e del platto, ma intra vos es immunde - plen de aviditate e intemperantia! ²⁶Phariseo cec! Munda primo le interior del calice^[9], ut alsi le exterior pote devenir munde!

²⁷Guai a vos, expertos in le Lege e vos phariseos, hypocritas! Quia vos es simile a sepulcros blanchite con lacte de calce, le quales pare belle externemente, ma internemente es plen de ossos de mortos e omne sorta de pollution. ²⁸In le mesme maniera, foras vos pare juste al oculos del gente, ma intra vos es plen de hypocrisia e iniquitate.

²⁹Guai a vos, expertos in le lege e vos phariseos, hypocritas! Vos edifica sepulcros pro le prophetas e orna le tumbas del justos. ³⁰E vos dice: “Si nos habeva vivite in le dies de nostre ancestres, nos non haberea participate con illes in le effusion del sanguine del prophetas”. ³¹Dicente isto, tamen, vos testifica adverso vos ipse que vos es descendente de illes qui occideva le prophetas. ³²Alora imple le mensura de vostre ancestres! ³³Vos es serpentes, filios de viperas! Quomodo vos potera escappar al judicio del inferno^[10]? ³⁴Propter isto io manda vos prophetas, sapientes e expertos in le Lege. Alcunes inter le quales vos occidera e crucifigera, e alcunes vos flagellara in vostre synagogas e les persequera de citate a citate, ³⁵ut veni super vos tote le sanguine juste effundite sur le Terra, ab le sanguine del juste Abel al sanguine de Zacharia, filio de Barachia, que vos occideva inter le Templo e le altar. ³⁶Io vos dice le veritate: iste generation essera declarate responsabile de omne iste cosas!

Le judicio super Israel

³⁷Oh Jerusalem, Jerusalem, tu qui occide le prophetas e lapida illes que te es mandate! Quotiens io desirava ardentemente congregar tu filios como un gallina congrega su pullos sub su alas, ma vos non lo voleva! ³⁸Ecce, vostre domo ha essite vos relinquite desolate^[11]! 23:39 Quia io vos dice que vos non me videra plus, donec vos dicera: “Benedicte es ille qui veni in le nomine del Senior^[12]!”.

Notas

1. Litt. “sede sur le cathedra de Moses”.
2. O “non face secundo lor obras”.
3. Cincturas de prece judee.
4. Rabbi, ab le lingua aramaic, significa “magistro” o “doctor”.
5. Alcun manuscriptos adde verso 14: “Guai a vos magistros del Lege e vos phariseos. Hypocritas! Sin vergonia vos defrauda viduas de lor proprietates e pretende esser pie in facer publicamente longe orationes. Propter isto vos essera severmente punite. Compara: Marco 12:40 e Luca 20:47.
6. Litt. “Gehenna”.
7. Litt. “mentha e anetho e cumino”.
8. Cfr. Levitico 11:4,23.
9. Alcun manuscriptos non include “del platto”.
10. Litt. “Gehenna”.
11. Alcun manuscriptos non include “desolate”.
12. Psalmo 118:26.