Biblia/Nove Testamento/Mattheo/Mattheo 24

Mattheo

24

Le destruction del Templo

¹Ora, durante que Jesus sortiva del cortes del Templo e se allontanava, su discipulos le accedeva ut ostender le le edificios del Templo. ²Ma ille les respondeva: “Esque vos vide tote iste cosas? Io vos dice le veritate: non essera hic relinquite lapide sur lapide que non sia destruite”.

³Plus tarde, durante que Jesus sedeva sur le Monte del Olivetos, su discipulos le accedeva privatemente e diceva: “Dice nos: quando iste cosas evenira? E qual essera le signo de tu venita e del consummation de iste epocha?”. ⁴Jesus les respondeva: “Vide que nemo vos induce in error^[1]. ⁵Multes, de facto, venira in mi nomine, dicente: “Io es le Christo”, e illes inducera multes in error. ⁶Vos audira de guerras e menacias de guerra. Non sia turbate proque isto debe occurrer, ma nondum essera le fin. ⁷Quia nation surgera contra nation, e regno contra regno. Il habera fame e tremor de terra in plure locos. ⁸Tote iste cosas essera solmente le prime dolores del parto.

Le persecution del discipulos

⁹Tunc vos essera traite^[2], patira multe tribulationes e essera occidite. Tote le gentes odiara vos propter mi nomine. ¹⁰Multes essera scandalisate de me, traira e odiara le unes le alteres. ¹¹Surgera multe false prophetas e illes decipera multes. ¹²Le iniquitate abundara ubicunque tanto que le amor de multes se refrigidara. ¹³Qui tamen perseverara usque al fin essera salvate. ¹⁴Nonobstante tote isto, le bon nova del Regno essera predicate in le mundo integre e de isto tote le gentes essera testes. Tunc venira le consummation.

Tempores de grande tribulation

¹⁵Le die venira in le qual vos videra le abomination del desolation del qual parlava le propheta Daniel^[3], le objecto sacrilege ponite stante in le Loco Sancte - que le lector presta attention a isto! ¹⁶Tunc qui es in Judea fugi al montes; ¹⁷qui se trova in le terrassa de su domo non descende pro prender alco ¹⁸e qui es in le agros a laborar non retorna a domo pro prender su mantello. ¹⁹Guai a illas qui es pregnante o allactante in celle dies! ²⁰E preca que vostre fuga non eveni in hiberno o in un die de Sabbato. ²¹Quia tunc il habera un tribulation tanto grande que un simile jammais occurreva desde le initio del mundo e jammais plus occurrera. ²²De facto, nisi un tal tempore de calamitate esseva accurtate, non un singule persona superviverea.

²³Tunc si qualcuno vos dice: “Ecce hic le Christo!”, o “Ille es ibi!”, non le crede. ²⁴Quia false christos e false prophetas surgera e operara grande signos e prodigios ut inducer in error, si possibile, etiam le electos. ²⁵Ecce, io vos lo prediceva.

²⁶Si ergo alicuno vos dice: “Ecce, ille es in le deserto”, non sorti a vider; o “Ille se cela hic^[4]” non lo crede. ²⁷Quia sicut le fulgure veni ab oriente e pare usque a occidente, ita il essera le venita del Filio del Homine. ²⁸Ubicunque se trova un cadavere^[5], ibi se congrega le vultures^[6].

Le arrivata del Filio del Homine

²⁹Immediatemente post le tribulationes de celle dies, le Sol se obscurara e le Luna non dara plus su lumine; le stellas cadera del celo e le potestates del celo essera succutite. ³⁰Tunc parera in celo le signo del Filio del Homine e tote le tribos del Terra essera in lucto. Illes videra le Filio del Homine veniente in le nubes del celo con fortia e gloria magne. ³¹Ille mandara su angelos con un grande colpo de trompa, e illes congregara su electos ab omne direction - ab le confinios le plus lontan del Terra e del Celo.

Le parabola del fichiero

³²Ora apprende un lection ab le fichiero: quandocunque su ramos deveni tenere e nasce su folios, vos sape que le estate es prope. ³³Ita vos alsi: quando vos videra tote iste evenimentos, vos potera saper que su retorno es prope, justo al porta. ³⁴Io vos dice le veritate: iste generation non preterira donec tote iste cosas essera complite. ³⁵Celo e Terra cessara de exister, ma mi parolas permanera^[7].

³⁶Tamen, nemo sape le die o le hora quando tote iste cosas evenira, non mesmo le angelos in le Celo o le Filio ipse^[8]. Solmente le Patre lo sape.

Le deber de vigilar

³⁷Quando le Filio del Homine retornara, il essera sicut il esseva in le dies de Noe. ³⁸In celle dies, ante le diluvio, le gente mangiava e bibeva in gaudiose banchettos, se maritava e esseva date in maritage, usque a celle die in le qual Noe entrava in le arca. ³⁹Le gente non comprendeva lo que il esseva sur le puncto de evenir, donec veniva le diluvio e omnes esseva necate. Il essera justo assi al venita del Filio del Homine. ⁴⁰Il habera tunc duo homines laborante insimul in un agro: uno essera sumite e uno relinquite. ⁴¹Il habera duo feminas molente grano con un molino: una essera sumite e una relinquite.

⁴²Vigila ergo, quia vos non sape in qual die vostre Senior venira. ⁴³Ma comprende isto: si le proprietario de un domo habeva sapite exactemente a qual hora del nocte le fur veniva, ille haberea vigilate e non se haberea lassate furar. ⁴⁴Dunque etiam vos sia preste, quia vos non cognosce le hora in le qual le Filio del Homine venira.

⁴⁵Un servitor fidel e prudente es ille quem le domino pote dar le responsabilitate de gerer le altere servitores de su familia, ut ille les da le alimentos in tempore. ⁴⁶Beate es le servitor quem le domino trova active al labor quando ille retorna. ⁴⁷Io dice vos le veritate: su domino le facera administrar tote su proprietates. ⁴⁸Si tamen celle servitor es mal e pensa: ‘Mi domino se absentara pro longe tempore”, ⁴⁹e ille incipe percuter su con-servos e mangiar e biber con inebriatos, ⁵⁰alora le domino de celle servitor venira in un die quando ille non le expecta e a un hora que ille ignora, ⁵¹e le facera lacerar a colpos de flagello e le destinara al fato del hypocritas. In celle loco il habera plorar e stridor de dentes”.

Notas

1. O “seduce”, “decipe”.
2. O “delivrate”.
3. Vide Daniel 9:27; 11:31; 12:11.
4. Litt. “In le cameras interne”.
5. O “le corpore”.
6. A significar: iste signos indica que le fin es proxime.
7. O “non preterira”.
8. Alcun manuscriptos non contine: “o le Filio ipse”.