Biblia/Nove Testamento/Thessalonicenses/1Thessalonicenses 1

Prime epistola al Thessalonicenses

Capitulo 1

Salutation

¹Paulo, Sylvano, e Timotheo, al ecclesia del Thessalonicenses que es in Deo nostre Patre e in le Senior Jesus Christo. Gratia e pace a vos.

Action de gratias pro le responsa al Evangelio

²Nos semper regratia Deo pro vos omnes quando nos vos mentiona semper in nostre preces. ³Pois que coram nostre Deo e Patre nos rememora le obra de vostre fide, le travalio de amor e le constantia de vostre sperantia in nostre Senior Jesus Christo. ⁴Nos sape, fratres e sorores, amate per Deo, que ille ha vos seligite^[1], ⁵pois que nostre evangelio non esseva annunciate a vos solmente con parolas, ma alsi con potentia, con le Sancte Spirito e con profunde persuasion^[2] (de facto, vos sape lo que nos ha facite inter vos pro vostre amor).

⁶E vos deveniva imitatores nostre e del Senior, quando vos recipeva le Parola con le gaudio que veni del Spirito Sancte, nonobstante multe afflictiones. ⁷Le resultato de isto es que vos deveniva un exemplo pro tote le credentes de Macedonia e de Achaia, ⁸pois que ab vos le Parola del Senior echoava non solmente in Macedonia e in Achaia, ma le fama del fide que vos ha in Deo se diffundeva ubicunque, de maniera que nos non necessita plus parlar re isto. ⁹Pois que illes mesme reporta como vos dava nos le benvenita e como vos esseva convertite a Deo ab le idolos pro servir le Deo ver e vivente ¹⁰e pro attender Su Filio del celo, le qual ille resuscitava ab le mortos, Jesus, qui libera nos ab le ira a venir.

Notas

1. O “vostre election”.
2. O “con grande plenitude”.