Biblia/Nove Testamento/Thessalonicenses/1Thessalonicenses 5

Prime epistola al Thessalonicenses

Capitulo 5

Le die del Senior

¹Ora, super le question del tempores e del saisones, fratres e sorores, vos non necessita que io vos scribe, ²pois que vos sape multo ben que le Die del Senior venira in le mesme maniera como un fur durante le nocte. ³Ora, quando on dicera: “Il ha pace e securitate”, alora improvisemente le ruina cadera super illes, como dolores del parto a un femina gravide, e illes certemente non escappara. ⁴Ma vos, fratres e sorores, non es in tenebras e ille die non vos surprendera como un fur. ⁵Pois que vos omnes es filios del lumine. Nos pertine ni al nocte, ni al tenebras. ⁶Dunque nos non debe dormir como le alteres, ma debe remaner alerte e sobrie. ⁷Pois que illes qui dormi, dormi de nocte e illes qui se inebria, se inebria de nocte. ⁸Ma pois que nos pertine al jorno, nos debe remaner sobrie e revestir nos con le plastron del fide e del amor, e con le casco de nostre sperantia, illo es: le salvation^[1], ⁹pois que Deo non nos destinava al ira, ma a obtener le salvation per nostre Senior Jesus Christo. ¹⁰Ille moriva pro nos a fin que, sia que nos es alerte o dormi, nos vivera con ille. ¹¹Ergo, incoragia le unes le alteres, como de facto vos jam face.

Instructiones final

¹²Nunc nos pete vos, fratres e sorores, considerar illes que labora inter vos e preside super vos in le Senior e admonesta vos. ¹³Estima les grandemente con amor a causa de lor labor. Vive in pace inter vos. ¹⁴E nos exhorta vos, fratres e sorores, admonesta illes qui non es disciplinate^[2], conforta illes qui es discoragiate, adjuta illes qui es debile, sia patiente con omnes. ¹⁵Guarda a que nemo repaga le mal con le mal, ma semper perseque lo que es bon le unes del alteres, e de omnes. ¹⁶Gaude semper. ¹⁷Preca sin intermission. ¹⁸In toto rende gratias. Isto es le voluntate de Deo pro vos in Jesus Christo. ¹⁹Non extingue le Spirito. ²⁰Non tracta le prophetias con disprecio, ²¹ma examina toto e retene lo que es bon. ²²Abstine vos de omne specie de mal.

Conclusion

²³Ora, que le Deo del pace sanctifica vos completemente^[3], e que vostre spirito, anima e corpore sia conservate integremente irreprehensibile pro le advento del Senior nostre Jesus Christo. ²⁴Completemente digne de fide es ille qui vos voca e ille de facto lo facera. ²⁵Fratres e sorores, preca pro nos alsi. ²⁶Saluta omne fratres e sorores con un sancte basio.

²⁷Io vos implora in le nomine del Senior: que iste epistola sia legite a tote le fratres e sorores.

²⁸Le gratia del Senior nostre Jesus Christo sia con vos.

Notas

1. Citation de Isaia 59:17.
2. O “disordinate”.
3. O “face vos completemente sancte”.