Biblia/Nove Testamento/Thessalonicenses/2Thessalonicenses 1

Secunde epistola al Thessalonicenses

Capitulo 1

Salutation

¹Paulo, Sylvano, e Timotheo, al ecclesia del Thessalonicenses que es in Deo nostre Patre e in le Senior Jesus Christo. ²Gratia e pace a vos de Deo le Patre e le Senior Jesus Christo!

Action de gratias

³Nos debe semper regratiar Deo pro vos, fratres e sorores, como il es juste, proque vostre fide floresce grandemente e le amor de cata uno de vos pro le alteres abunda semper plus. ⁴Isto es le ration pro le qual nos semper vanta^[1] nos de vos inter le ecclesias de Deo a causa de vostre perseverantia e fide in tote le persecutiones e afflictiones que vos suffre.

Incoragiamento in le persecutiones

⁵Isto es un proba del juste judicio de Deo, a que vos sia recognoscite digne del regno de Deo, pro le qual de facto vos suffre. ⁶Pois que il es juste pro Deo retribuer con afflictiones illes qui afflige vos, ⁷e a vos qui es affligite dar reposo insimul a nos quando le Senior Jesus apparera ab le celo con su potente angelos. ⁸Con flammas de foco ille se vindicara de illes qui non recognosce Deo^[2] e non obedi al evangelio de nostre Senior Jesus. ⁹Illes essera punite con le destruction eterne, bannite ex le presentia del Senior e del gloria de su potentia, ¹⁰quando ille venira pro esser glorificate inter su sanctos e admirate de tote illes qui ha credite in ille - e de facto vos credeva a nostre testimonio. ¹¹Isto es le ration pro le qual nos semper preca pro vos, a que nostre Deo face vos digne de su vocation e exaudi con potentia omne vostre bon desiro e omne obra del fide; ¹²a fin que le nomine de nostre Senior Jesus sia glorificate in vos, e vos in ille, secundo le gratia de nostre Deo e le Senior Jesus Christo.

Notas

1. O “gloria”.
2. Allusion a Jeremia 10:25; Psalmo 79:6, e Isaia 66:5.