Biblia/Nove Testamento/Thessalonicenses/2Thessalonicenses 2

Secunde epistola al Thessalonicenses

Capitulo 2

Le die del Senior

¹Ora, concernente le retorno^[1] de nostre Senior Jesus Christo e nostre reunion con ille, nos exhorta vos, fratres e sorores, ²non lassar vos facilemente excitar^[2] o perturbar per ulle sorta de inspiration^[3], discurso, o littera pretendite esser mie, como si le die del Senior sia imminente^[4]. ³Que nemo decipe vos in alicun maniera, pois que illo non venira sin que primo veni le apostasia^[5] e non sia manifestate^[6] le homine del anomia^[7], le filio del perdition^[8]. ⁴Ille es le oppositor^[9] qui se exalta super tote lo que es appellate deo o objecto de culto, usque al puncto de seder se^[10] in le templo de Deo e presentar se como Deo^[11]. ⁵Certemente vos rememora que io jam diceva vos iste cosas quando io esseva con vos. ⁶E nunc vos sape lo que le retene a que ille se manifesta a su tempore^[12]. ⁷Pois que le potentia del anomia es jam secretemente in action^[13]. Totevia, ille qui retene lo obstruera usque a su remotion, ⁸e alora essera revelate le homine del anomia^[14]. Ille essera destruite per le Senior con le sufflo de su bucca e liquidate^[15] per le splendor de su advento^[16]. ⁹Le venita del homine del anomia evenira per le efficace obra de Satana, con omne typo de obras potente, signos e false miraculos^[17], ¹⁰e con omne sorta de inique seductiones operate a damno de illes qui es destinate al perdition^[18], proque ille non aperiva lor cordes al amor del veritate pro esser salvate. ¹¹Pro iste ration Deo manda super illes un influentia delusori^[19] de sorta que illes crede a lo que es false^[20]. ¹²Assi, tote illes qui non credeva al veritate, ma se delectava in le mal, essera condemnate^[21].

Appello a remaner firme

¹³Ma nos debe semper regratiar Deo pro vos, fratres e sorores amate del Senior, proque Deo eligeva vos ab le principio pro le salvation per le sanctification del Spirito e le fide in le veritate. ¹⁴Ille vocava vos a iste salvation per le medio de nostre evangelio, a que vos possede le gloria de nostre Senior Jesus Christo. ¹⁵Ergo, fratres e sorores, remane firme e retene le traditiones^[22] que nos inseniava vos, sia verbalmente^[23], sia con un nostre epistola. ¹⁶Ora, que le Senior Jesus Christo ipse e Deo nostre Patre, le qual amava nos e, per gratia, dava nos consolation eterne e un bon sperantia, ¹⁷incoragia vostre cordes e confirma vos in omne cosa bon que vos dice o face^[24].

Notas

1. O “advento”,
2. O “succuter vostre mente”.
3. O “spirito”.
4. O “proxime”, o “jam presente”.
5. O “rebellion”.
6. O “revelate”.
7. O “le homine sin lege”, o “le homine del anarchia”. Altere manuscriptos ha, in vice, le termino “peccato”.
8. O “le homine destinate al destruction”.
9. O “ille es le adversario”.
10. Allusion a Isaia 14:13-14; Daniel 11:36; Ezechiel 28:2-9.
11. O “declarante que ille es Deo”.
12. O “a tempore debite”.
13. O “le mysterio del iniquitate es jam in action”.
14. O “le iniquo”.
15. O “annihilate”.
16. O “le manifestation de su venita”.
17. O “prodigios”.
18. O “qui peri”.
19. O “un spirito que les decipe”.
20. O “in le mendacio”.
21. O “essera judicate” o “damnate”.
22. O “inseniamento”.
23. O “con le parola”.
24. O “in omne bon obra e parola”.