Biblia/Nove Testamento/Timotheo/1Timotheo 3

Prime epistola a Timotheo

Capitulo 3

Qualificationes pro supervisores del ecclesia e del diaconos

¹Certe es iste parola: “Si qualcuno aspira al officio de supervisor del communitate christian^[1], ille desira un bon obra. ²Le supervisor^[2] debe esser irreprehensibile, fidel a su sposa, temperante, disciplinate^[3], respectabile, hospitabile, apte a inseniar, ³non bibule ni violente, ma gentil, non contentiose, non cupide de moneta. ⁴Ille debe governar ben su familia e haber filios obediente e respectuose. ⁵De facto, si uno non sape governar ben su proprie familia, como poterea ille governar le ecclesia de Deo? ⁶Ille non debe esser un neophyto^[4] proque un tal poterea devenir inflate^[5] e cader assi in le judicamento in le qual le diabolo mesme incurreva. ⁷In ultra, ille debe haber un bon reputation^[6] inter illes de foras^[7], de sorta que ille non cade in disgratia e in le trappas del diabolo.

⁸Similemente le diaconos debe esser respectabile^[8], non de lingua duple^[9], non bibule, non cupide de moneta, ⁹tenente se al mysterio del fide con conscientia pur. ¹⁰Istes alsi debe esser primo examinate^[10] e postea vocate al ministerio si illes se demonstra irreprochabile. ¹¹Similemente lor sposas^[11] debe esser dignificate, non diffamatori, disciplinate, fidel in omne respecto. ¹²Le diaconos debe esser fidel al proprie sposa^[12] e governar ben lor filios e lor familia. ¹³Pois que illes qui ben servi como diaconos obtene un reputation excellente e grande confidentia in le fide que es in Christo Jesus.

Le conducta in le ecclesia de Deo

¹⁴Io spera poter venir tosto a visitar te, ma io te scribe iste instructiones ¹⁵in le caso que io retarda, pro facer te saper como on debe comportar se in le familia de Deo, proque illo es le casa del Deo vivente, columna e base del veritate. ¹⁶E plus que certemente^[13] grande es le mysterio de nostre religion^[14]: Ille^[15] esseva revelate in le carne, justificate in le Spirito, vidite per angelos, proclamate inter le Gentiles, credite in le mundo, e assumite in le gloria.

Notas

1. O “episcopato”, (officio de pastor o anciano in le Ecclesia).
2. O “episcopo”.
3. O “dotate de auto-controlo”.
4. O “recentemente convertite”.
5. O “superbe”, “arrogante”.
6. O “un bon testimonio”.
7. Illo es, “illes qui non pertine al ecclesia”, respectate in le societate.
8. O “honorabile”.
9. O “insincer”, deceptor”.
10. O “probate”.
11. O “feminas”. Alcunes traduce “diaconessas”.
12. O “maritos de un sol femina”.
13. O “sin contradiction”.
14. O “del pietate”.
15. Illo es Jesus Christo.