Biblia/Nove Testamento/Timotheo/1Timotheo 4

Prime epistola a Timotheo

Capitulo 4

Le ministerio de Timotheo in le tempores a venir

¹Ora le Spirito dice explicitemente que in le tempores a venir, alicunes abandonara le fide e sequera spiritos seductori e inseniamentos^[1] demonic, ²influentiate per le hypocrisia de mentitores, cuje conscientias es cauterisate. ³Illes prohibera le matrimonio e requirera le abstinentia de alimentos que Deo creava e que es a reciper con gratitude per illes qui crede e qui cognosce le veritate. ⁴Pois que tote lo que Deo creava es bon, e nulle alimento debe esser rejectate si illo es recipite con gratitude, ⁵proque illo es sanctificate per le parola de Deo e le precaria.

⁶Si tu presenta iste cosas al fratres e al sorores, tu essera un bon ministro^[2] de Christo Jesus, nutrite del parolas del fide e del bon inseniamento que tu sequeva. ⁷Ma rejecta ille mythos bon solmente pro le personas impie e credule, e exercita te in le pietate. ⁸Pois que le exercitio physic ha certemente valor, ma le pietate es multo plus preciose in omne maniera. Illo comporta promissas non solmente pro iste vita, ma alsi pro le vita a venir. ⁹Certe es iste parola e digne de esser plenmente acceptate. ¹⁰De facto, isto es proque nos fatiga e lucta, proque nos poneva nostre sperantia in le Deo vivente, ille qui es le Salvator de omnes, specialmente del credentes.

¹¹Commanda e insenia iste cosas. ¹²Que nemo disprecia tu juvene etate, ma sia un exemplo pro le credentes in tu maniera de parlar, conducta, amor, fidelitate^[3], e puressa. ¹³Usque a mi retorno, dedica te al lectura public del Scripturas, al exhortation, al inseniamento. ¹⁴Non neglige le dono spiritual que tu possede, que te esseva date e confirmate per parolas prophetic quando le ancianos^[4] te imponeva le manos. ¹⁵Cura iste cosas, absorbe los, de sorta que omnes pote vider tu progressos^[5]. ¹⁶Sia conscientiose^[6] concernente como tu vive e lo que tu insenia. Persevera in isto, proque in facer assi, tu salvara te ipse e illes qui te ascolta.

Notas

1. O “doctrinas”.
2. O “servitor”.
3. O “fide”.
4. O “le presbyteros”, o “le consilio del ancianos”.
5. O “a que tu progressos sia evidente a omnes”.
6. O “Sia attente a te ipse”.