Biblia/Vetule Testamento/Cantico/Cantico 6

Le Cantico del canticos

6

Le amante perdite es retrovate

[Le juvenettas al amata:] ¹“Quo vadeva tu amante, oh femina de rar beltate? Qual direction ille prendeva? Dice nos, ut nos pote querer le con te”.

[Le amata al juvenettas:] ²“Mi amante descendeva a in su horto, ad su parterre de spices balsamic a pasturar in le horto e colliger lilios”.

Refrain poetic: possession reciproc

[Le amata in re su amante:] ³Io pertine a mi amante, e mi amante me pertine. Ille pastura inter le lilios.

Le renovamento del amor

[Le amante a su amata:] ⁴Tu es belle, amica mie, sicut le citate de Thersa. Si, tanto belle quanto Jerusalem, tanto majestose quanto un armea con su stendardos al vento. ⁵Averte tu oculos de me, quia illos me turba. Tu capillos es sicut un grege de capras que descende del costas de Gilead. ⁶Tu dentes es sicut un grege de oves que sorti del lavatura. Cata uno de illos ha su proprie gemino, e necuno de illos manca. ⁷Tu genas es sicut granatas incarnatin retro tu velo. ⁸On poterea haber mesmo sexanta reginas, octanta concubinas e innumerabile juvenettas, ⁹ma illa es mi columba, mi perfecte, le favorita de su matre, le plus electe de su genitrice. Le juvenettas la videva e la complimentava, le reginas e le concubinas la laudava: ¹⁰“Qui es ista, que surge como le aurora, belle sicut le luna, luminose sicut le sol, tanto majestose quanto un armea con stendardos al vento?”.

Le retorno al vinia

[Le amante a su amata:] ¹¹“Io descendeva a in le horto del nuces pro vider le inflorescentias del valleas, ut inspicer si le vites floresceva e le granatas germinava. ¹²Io non me adverteva que mi forte desiro me faceva sentir sicut le prince de mi populo super su quadriga.

Canto de amor e dansa

[Le amante a su amata:] ¹³[7:1] Verte te, verte te, oh Perfecte^[1]! Verte te, verte a que io pote contemplar te!

[Le amata a su amante:] Quare tu respice le Perfecte como un dansator circa me^[2]?

Notas

1. O “Oh Sulamita”.
2. O “Como le dansa del Mahanaim”.