Biblia/Vetule Testamento/Genesis/Genesis 28

Genesis

28

¹Ita Isaac vocava Jacob e le benediceva. Deinde ille le commandava: “Tu non debe maritar te con alcun de iste feminas cananee. ²Leva te e vade tosto a Paddan-Aram al domo de Bethuel, le patre de tu matre, e marita te con un del filias de Laban, le fratre de tu matre. ³Que le Deo omnipotente te benedice! Que ille te rende fructuose e te da un multitude de descendentes! Alora tu devenira un grande nation. ⁴Que ille da a te e a tu descendentes le benediction que ille dava a Abraham, ut tu va posseder le terra ubi tu viveva qua un residente temporanee”. ⁵Assi Isaac dimitteva Isaac, e ille vadeva a Paddan-Aram, ubi viveva Laban, filio de Bethuel le Arameo e fratre de Rebecca, le matre de Jacob e Esau.

⁶Esau sapeva que su patre, Isaac, habeva benedicite Jacob e mandate le a Paddam-Aram ut inde trovar un uxor, e que ille le habeva de non maritar se con un femina cananee. ⁷Ille sapeva alsi que Jacob habeva obedite a su genitores e vadite a Paddan-Aram. ⁸Il esseva nunc clar que su patre habeva un aversion al local feminas cananee. ⁹Assi Esau faceva un visita al familia de su oncle Ismael e se maritava con una del filias de Ishmael, in ultra al uxores que jam ille habeva. Le nomine de su nove uxor esseva Mahalath. Illa esseva le soror de Nebaioth e le filia de Ishmael, le filio de Abraham.

Le sonio de Jacob a Bethel

¹⁰Intertanto Jacob habeva quitate Beersheba e incipite su viage verso Haran. ¹¹Ille perveniva a un certe loco ubi ille decideva de campar se, quia le sol jam haveva se ponite. Ille prendeva un del lapides e lo poneva apud^[1] su capite. Deinde ille se addormiva in ille loco, ¹²e faceva un sonio. Ille videva un scalon que del terra attingeva le celo. Le angelos de Deo ascendeva e descendeva per illo.

¹³Al culmine del scalon stava le Senior, e ille diceva: “Io es le Senior, le Deo de tu granpatre Abraham, e le Deo de tu patre Isaac. Le terra sur le qual tu dormi, io lo dara a te e a tu descendentia. ¹⁴Tu descendentes essera tanto numerose quanto le pulvere del terra! Illes^[2] se dispergera in omne directiones - a occidente e a oriente, al nord e al sud. e tote le familias del terra essera benedicite per te e per tu descendentes. ¹⁵E ecce, io es con te e te custodiara ubicunque tu vade. Un die io te reconducera a iste terra, ni io te relinquera nisi io complira toto lo que io te promitteva”.

¹⁶Deinde ille se eveliava de su somno e diceva: “Vero le Senior es in iste loco, e io non lo sapeva!”. ¹⁷Ille, tamen, habeva alsi pavor, e diceva: “Que loco terribile es isto! Il es nihil altere que le domo de Deo e le porta del celo!”.

¹⁸Le matino sequente, ille se levava mane. Ille prendeva le lapide que habeva ponite apud su capite e lo erigeva como un columna memorial, sur le qual ille pois effundeva oleo de oliva. ¹⁹Ille appellava ille loco Bethel (que significa “domo de Deo”), quanquam illo esseva previemente appellate Luz.

²⁰Ibi Jacob faceva etiam un voto, dicente: “Si in effecto Deo essera con me e me custodiara durante iste viage, e si ille me providera pan a mangiar e vestimento a vestir me, ²¹e io retorna in securitate al domo de mi patre, alora certemente le Senior essera mi Deo. 28:22 Iste columna memorial que io erigeva devenira un loco pro coler Deo, e io offerera a Deo un decimo de toto lo que ille me da”.

Notas

1. Non necessarimente se intende “sub” su capite como un cossino.
2. Litt. “tu”