Biblia/Vetule Testamento/Jeremia/Jeremia 26

Jeremia

26

Jeremia escappa del morte

¹In le principio^[1] del regno de Jehoiakim, filio de Josia, rege de Juda, le parola del Senior esseva adressate a Jeremia. ²Ille diceva: “Isto es lo que le Senior dice: Sta in le corte ante le Templo del Senior e proclama al populo que conveni ibi ab tote Juda pro le culto, tote lo que io te commanda dicer. Non omitte mesmo un singule parola de lo que io te dice. ³Forsan illes te ascoltara e cata un de illes relinquera lor mal conducta^[2]. Si illes lo face, io renunciara destruer les como io habeva le intention de facer propter le malitia de lor obras. ⁴Dice les: ‘Isto es lo que le Senior dice: Si vos non me ascolta e non obedi al lege^[3] que io vos dava, ⁵si vos non ascolta mi servitores, le prophetas - que io plure vices mandava a vos, ma que vos nunquam ascoltava - ⁶alora io destruera iste Templo sicut io destrueva Shilo, le loco ubi esseva un vice collocate mi Tabernaculo, e io rendera Jerusalem un objecto de malediction in omne nationes del terra’”.

⁷Le sacerdotes, le prophetas e tote le populo audiva Jeremia dicer tote iste cosas in le Templo del Senior. ⁸Quando, tamen, Jeremia habeva terminate proclamar su message, dicente les tote lo que le Senior le habeva commandate dicer, le sacerdotes, le prophetas e le gente le sasiva e critava: “Tu merita morir! ⁹Que derecto ha tu de prophetisar in le nomine del Senior que iste Templo essera destruite sicut Shilo? Que intende tu quando tu dice que le integre Jerusalem essera destruite e relinquite sin plus habitantes?”. E tote le populo se congregava in le Templo circa Jeremia e le menaciava.

¹⁰Quando le officieros de Juda audiva lo que occurreva, illes se hastava ascender al Templo del Senior ab le palatio regal. Illes se assideva in judicio al entrata del Porta Nove del Templo del Senior. ¹¹Le sacerdotes e le prophetas presentava lor accusationes al officieros del populo dicente: “Iste homine deberea esser condemnate a morte! Vos audiva con vostre proprie aures qual sorta de traitor ille es, quia ille ha prophetisate contra iste citate”.

¹²Alora Jeremia incipeva parlar a proprie defensa coram le officieros e le populo. Ille diceva: “Le Senior me mandava prophetisar tote lo que vos me audiva dicer contra iste Templo e contra iste citate. ¹³Si vos, tamen, cessa peccar e comencia obedir al Senior vostre Deo, ille renunciara destruer vos como ille menaciava facer. ¹⁴Pro lo que me reguarda, io es in vostre manos - face de me tote lo que vos reputa juste a vostre oculos. ¹⁵Si vos, tamen, me occide, sia certe que vos occide un homine innocente. Le responsabilitate de tal acto essera super vos, super iste citate e super omne personas qui lo habita. Quia il es absolutemente ver que le Senior me mandava proclamar omne singule parolas que vos audiva”. ¹⁶Alora le officieros e tote le populo diceva al sacerdotes e al prophetas: “Iste homine non merita le sententia de morte, quia ille ha nos parlate in le nomine del Senior, nostre Deo”.

¹⁷Deinde, ab inter le populo congregate ibi, alcun vetule homines sage se levava. ¹⁸Illes diceva: “Memora quando Micah de Moreshet habeva prophetisate durante le regno de Rege Hezekia de Juda. Ille diceva al populo de Juda: “Isto es lo que le Senior del universo dice: ‘Le monte Sion essera arate sicut un agro, e Jerusalem devenira un cumulo de ruinas! Un spineto crescera sur le colle ubi nunc se trova le Templo^[4]”. ¹⁹Esque Rege Hezekia e tote le populo de Juda le condemnava a morte pro haber dicite tal parolas? No, Rege Hezekia habeva timor del Senior, se repentiva e quereva le favor del Senior. Assi, le Senior renunciava destruer les como ille habeva menaciate facer. Nos, tamen, es sur le puncto de causar un grande mal contra nos ipse. ²⁰Ora, il habeva un altere homine qui habeva prophetisate in le nomine del Senior contra iste citate e contra iste terra, e qui faceva justo como Jeremia. Su nomine esseva Uria filio de Shemaia, de Kiriath Jearim. ²¹Quando Rege Jehoiakim, le officieros e le capites del armea audiva lo que ille diceva, le rege mandava alicuno a occider le. Uria, tamen, audiva de iste planos e escappava espaventate a in Egypto. ²²Alora Rege Jehoiakim mandava Einathan, filio de Acbor, in Egypto insimul a plure altere homines pro capturar Uria. ²³Illes succedeva sasir le e le reportava a Rege Jehoiakim. Le rege, alora, occideva Uria per un gladio e postea le faceva interrar in le sepulcros del gente commun”.

²⁴Igitur, le mano de Ahicam, filio de Shaphan, esseva con Jeremia e ille succedeva persuader le corte a non delivrar le in le manos del populo pro esser occidite.

Notas

1. Le prime anno del regno de Jehoiakim esseva 608 a. C.
2. O “se convertera ab lor vias mal”.
3. O “parola”.
4. Un citation de Michea 3:12.