Biblia/Vetule Testamento/Job/Job 32

Job

32

Elihu responde al amicos de Job

¹Le tres amicos de Job refusava replicar in ultra a ille, quia ille continuava insister que, a su oculos, ille esseva juste.

²Tunc Elihu, filio de Barakel le buzita, del familia de Ram, irasceva multo. Ille esseva irate quia Job refusava admitter de haber peccate e que Deo habeva ration in castigar le. ³Ille esseva alsi irate con le tres amicos de Job, quia illes, per lor incapacitate a responder al argumentos de Job, habeva facite parer Deo in le torto. ⁴Igitur, Elihu habeva expectate ante parlar a Job, quia le alteres esseva plus vetule que ille. ⁵Quando tamen Elihu videva que illes non habeva plus replicas ulterior, ille irasceva multo.

⁶Assi Elihu, filio de Barakel le buzita, diceva: “Io es un juvene homine e vos es seniores. Isto es le ration quia io timeva dicer vos antea lo que io pensa. ⁷Io me diceva: le seniores deberea parlar primo, quia le sapientia veni con un experientia plus longe. ⁸Il es super toto, tamen, le Spirito del Omnipotente que imparti intelligentia al homines. ⁹Le longeves non es necessarimente semper sapiente, ni semper le seniores comprende lo que es juste. ¹⁰Itaque io dice: ‘Audi me, etiam io va ostender vos mi sapientia. ¹¹Io expectava que vos primo termina vostre discursos. Io audiva multo attentivemente vostre argumentos durante que vos cercava le parolas le plus apte pro exprimer los. ¹²Io prestava vos attention, ma nemo inter vos ha confutate Job o respondite vero a su argumentos. ¹³E non dice me: ‘Job es pro nos troppo sapiente. Solmente Deo le pote persuader, non un homine’. ¹⁴Job non adressava su parolas a me, assi io non le respondera secundo vostre argumentos”.

¹⁵Illes es consternate e non pote plus responder; illes ha nihil plus a dicer, ¹⁶e io expectava. Ma nam illes non parla e illes es ibi e non responde plus, ¹⁷io alsi respondera con mi proprie argumentos; io alsi ostendera mi cognoscentia. ¹⁸Io es plen de parolas e le spirito que es in me coerce me. ¹⁹Io es como un barril de vino que ha nulle escappamento, como utres nove preste a disrumper se. ²⁰Io debe parlar ut trovar relevamento: assi lassa me dar mi responsas. ²¹Io essera absolutemente impartial, ni io essayara flattar alicuno. ²²De facto, si io blandiva alicuno, mi Creator tosto me eliminarea.