Biblia/Vetule Testamento/Job/Job 38

←Job 37

Le Biblia in Interlingua Job

Job 39→

Job

38

Le Senior defia Job

¹Alora le Senior respondeva a Job ex le tromba: ²“Qui es le qui pone in question^[1] mi sapientia con tal parolas ignorante^[2]? ³Prepara te complir un carga difficile quia io ha pro te alcun questiones e tu debera responder me!

⁴Ubi esseva tu, quando io poneva le fundamentos del Terra? Indica me lo, si tu tanto pare saper^[3]! ⁵Qui determinava su dimensiones e extendeva super illo le linea de agrimensura? ⁶Super quo su bases esseva solidate, o qui poneva su lapide angular, ⁸dum le stellas matutin cantava choralmente e tote le angelos^[4] jubilava?

⁸Qui teneva le mar intra su limites quando illo erumpeva como si illo procedeva de visceras, ⁹durante que io lo vestiva de nubes e lo involveva in spisse obscuritate? ¹⁰Quia io lo serrava intra portas reinfortiate e limitava su litores. ¹¹Io lo diceva: ‘Tu venira usque hic e non potera proceder in ultra. Hic tu fer undas debe haltar se!’.

¹²Esque tu unquam commandava al matino de apparer e causava le aurora surger in le oriente? ¹³Ha tu unquam facite que le lumine del die se diffunde usque al confinios del Terra, e succute de illo le impietate del nocte? ¹⁴In le approximar se del lumine le Terra prende su forma como argilla pressate sub un sigillo; illo es vestite de colores brillante. ¹⁵Le lumine disturba le impio e arresta le bracio que se leva pro committer violentias.

¹⁶Ha tu explorate le surgentes ex le quales veni le mares? Esque tu explorava lor abysmos? ¹⁷Esque tu sape ubi se trova le portas del morte? Esque tu videva celle portas tenebrose? ¹⁸Considerava tu le extension del Terra? Indica me lo, tu qui cognosce omne cosa! ¹⁹Unde veni le lumine e a ubi vade le tenebras? ²⁰Pote tu portar illos sur le vias que conduce a lor habitation? ²¹Tu, naturalmente, sape tote isto, quia tu nasceva ante que toto esseva create, e tu experientia es grande^[5].

²²Esque tu visitava le magazines del nive, o vidite le magazines del grandine? ²³Io preparava illos pro le tempores de angustia e pro le dies de battalias e guerras. 3²⁴er qual via se disperge le lumine? Ubi es le habitation del vento oriental? ¹²⁵Qui creava un canal pro torrentes de pluvia? Qui disponeva un via pro le fulgure? ²⁶Qui face cader le pluvia super terras desolate, in un deserto ubi necuno vive? ²⁷Qui manda le pluvia pro satiar le terrenos torrite e lo face germinar con vegetation? ²⁸Esque le pluvia ha un patre? Qui genera le stillas de rore? ²⁹Qui es le matre del glacie? Qui genera le pruina ab le celo? ³⁰Quia le aqua deveni glacie, tanto dur quanto lapides, e le superfacie del aqua gela.

3³¹Pote tu diriger le movimento del stellas - ligar insimul le Pleiades o disligar le cordas de Orion? ³²Pote tu diriger le constellationes in lor saisones o ducer le Ursa con su ursinos trans le celos? ³³Es que tu cognosce le leges del universo? Pote tu utilisar los pro regular le affaires del Terra?

³⁴Pote tu elevar tu voce usque le nebulas e facer pluver^[6]? ³⁵Pote tu emitter le fulmines? Esque illos te dicera: “Ecce nos”? ³⁶Qui poneva sapientia in le corde o impartiva intelligentia al mente? ³⁷Qui, in su sapientia, pote numerar le stellas e qui pote inclinar le jarras plen de aqua del celo ³⁸quando le pulvere se indura in un massa e le blocos de terra se agglutina?

³⁹Esque tu chassa un preda pro le leonessa e satisface le appetito de leones ⁴⁰quando illos jace in lor leoniera e se imbosca expectante lor preda? ⁴¹Qui prepara le preda pro le corvos quando lor pullos vagante clama a Deo quia illos ha fame?

Notas

1. O “obscura”.
2. O “imperite”.
3. O “Si tu ha intelligentia”.
4. O “le filios de Deo”.
5. O “le numero de tu dies es grande”.
6. O “ut un diluvio de aquas te coperi?”.