Biblia/Vetule Testamento/Michea/Michea 2

Michea

2

Judicio contra oppressores opulente

¹Guai a illes qui cogita iniquitates e committe le mal quando illes jace in lor proprie lecto. Quando le lumine matutin se leva illes exeque lor projectos, quia illes ha le potestate de facer los. ²Illes concupisce agros e sasi le domos que illes vole. Illes defrauda unes de lor domos, e priva alteres del terra que illes hereditava. ³Propter isto le Senior dice: ‘Ecce, io prepara disastros pro iste nation^[1]! Illo essera como un jugo sur vostre collo, del qual vos non potera liberar vos. Vos non ambulara plus erecte, quia illo essera un tempore de catastrophe. ⁴In celle tempore vostre inimicos cantara iste canto sarcastic super vos; illes vos irridera con iste lamentation: “Nos faceva bancarupta; illes liquidava le proprietate de mi populo e nemo les lo restitue. Illes assignava nostre agros al conquistator”. ⁵Propter isto nemo te assignara plus terra in le communitate del Senior.

Ver e false prophetas

⁶“Non predica con tal passionate rhetorica”, illes dice con excitation. “Iste prophetas non deberea predicar tal cosas; nos non essera surprendite del humiliation!”. ⁷Esque le familia de Jacobo dice: “Le patientia del Senior non pote esser exhaurite. Ille nunquam facera tal cosas”. Certamente mi commandamentos comporta un recompensa pro illes qui los obedi. ⁸Vos, tamen, mi populo, insurge contra me sicut un adversario. Tu fura un roba ab un amico, ab illes qui transi in pace como illes qui retorna ab un guerra. ⁹Vos evince le viduas de mi populo de lor domos placente. Vos defrauda lor infantes de lor preciose hereditage. ¹⁰Il essera vos, tamen, illes qui essera fortiate partir! Quia iste terra non es secur: le peccato lo destruera completemente! ¹¹Suppone que un propheta mendace dice vos: “Io vos promittera le benediction de vino e bira”, ille esserea le juste predicator pro iste gente!

Sperantia de restauration

¹²“Io certemente congregara vos omnes, oh Jacobo. Io certemente facera convenir le Israelitas relinquente. Io les reportara insimul como un grege in lor oviario, como un grege in le medio del pasturas. Illes essera tanto numerose que illes facera multe ruito. ¹³Vostre conductor infringera le barrieras e les conducera foras; illes erumpera, transira per le porta e partira. Lor rege les precedera: le Senior ipse les conducera.

Notas

1. O “Super iste familia”.