Biblia/Vetule Testamento/Michea/Michea 3

Michea

3

Judicio contra le principes de Israel

¹Io diceva: “Audi me, principes de Israel! Vos governatores del nation de Israel! Vos deberea saper lo que es juste. ²Totevia, vos odia lo que es bon e ama lo que es mal. Vos excoria le pelle de mi populo e avelle le carne de lor ossos. ³Vos ede le carne de mi populo, vos spolia lor pelle e frange lor ossos. Vos lo hacha como carne in un marmita. ⁴Tunc vos hardi clamar adjuta al Senior in tempores de necessitate! Vermente expecta vos que ille exhaudi vos? De post tote lo que vos faceva, ille non mesmo reguardara vos!

⁵Isto es lo que le Senior ha dicite re le prophetas qui disviava mi populo: “Si alicuno les da satis a mangiar, illes offere un oraculo de pace. Si, tamen, alicuno non les da alimentos, illes es preste declarar guerra a tal persona. ⁶Propter isto le nocte cadera e vos recipera nulle visiones; toto se obscurara e vos non potera plus leger presagios. Le Sol se ponera super iste prophetas, e le lumine solar se mutara in obscuritate super lor capites. ⁷Le prophetas se avergoniara; le lectores de presagios^[1] essera humiliate. Tote illes se coperira le bucca, quia illes non recipera plus oraculos divin”.

⁸Io, tamen, es plen del fortitude^[2] date per le Spirito del Senior, e es fortemente ingagiate verso le justitia e le virtute. Isto me habilita confrontar me con Jacobo e denunciar su rebellion e con Israel su peccato. ⁹Audi isto, principes del familia de Jacobo, vos rectores del nation de Israel! Vos odia le justitia e perverte tote lo que es juste. ¹⁰Vos edifica Sion super crimines sanguinose, e Jerusalem super iniquitates^[3]. ¹¹Su rectores se face de bon grado corrumper quando illes debe decider casos legal, su sacerdotes pro docer se face pagar, e pro pecunia su prophetas lege presagios. Totevia, illes assere confider in le Senior e dice: “Le Senior es in nostre medio: disastros non accidera super nos!”. ¹²Propter vos, ergo, Sion essera arate como un campo, Jerusalem devenira un cumulo de ruinas, e le monte del Templo devenira un colle incombrate de brossas.

Notas

1. “divinatores”.
2. O “corage”.
3. O “injuste violentia”.