Biblia/Vetule Testamento/Proverbios/Proverbios 27

Le Proverbios

Capitulo 27

¹Non vangloriar te del deman, quia tu non sape quid un nove die portara.

²Que alicun altere te lauda, non tu proprie bucca; alicun altere, non tu proprie labios.

³Un saxo es grave e le arena es pesante, ma le resentimento^[1] causate per un persona stulte es mesmo plus grave.

⁴Le ira es cruel e le furor erumpente, ma le jelosia es mesmo plus periculose.

⁵Melior es le correction manifeste quam le amor celate!

⁶Vulneres ab un amico sincer es melior que multe basios ab un inimico.

⁷Un persona cuje appetito es jam satisfacite refusa melle, ma mesmo alimentos amar pare dulce al persona famelic.

⁸Sicut un ave que vaga ab su nido, assi es un persona qui vaga ab su domo.

⁹Le consilio de un amico date de tote corde es tanto dulce quanto le perfumo e le incenso.

¹⁰Non abandonar tu amico o le amico de tu patre. Quando un disastro te occurre, non vade peter adjuta a tu fratre. Melior es vader a un vicino quam un fratre procul.

¹¹Sia sage, filio mie, e rende me felice, ut io pote responder a quicunque me provoca sarcasticamente.

¹²Un persona prudente previde periculos e prende precautiones. Le persona naive procede cecamente e suffre le consequentias de su imprevidentia.

¹³Prende un pignore ab alicuno que garanti le debita de un persona extranee. Prende un deposito si ille lo face pro estranieros.

¹⁴Un benediction facite mane in alte voce essera reputate un malediction.

¹⁵Un uxor litigiose es tanto enoiante quanto le guttar constante del pluvia sur le tecto in un die frigide. ¹⁶Stoppar su querelas es como essayar stoppar le vento o essayar retener qualcosa con manos oleose.

¹⁷Sicut le ferro acutia le ferro, assi un amico acutia su amico.

¹⁸Sicut al laboratores qui se occupa de fichieros es permittite mangiar su fructos, assi laboratores qui protege le interesses de lor empleator essera recompensate.

¹⁹Como un facie es reflectite in le aqua, assi le corde de un persona reflecte su ver character.

²⁰Justo como le Morte e le Perdition nunquam es satisfacite, assi lo es le desiderios human.

²¹Como le crucibulo lo es pro le argento e le fornace pro le auro, assi se proba un persona quando es laudate.

²²Non se pote separar un persona stulte ab su stultessa, mesmo si on le mole como grano in le mortero.

²³Presta attention al condition de tu oves e occupa te de tu greges con tote tu corde, ²⁴quia le ricchessas non dura pro semper, e le corona poterea non esser passate al proxime generation. ²⁵Depost que le feno es colligite, un nove messe appare e le herba del colles es colligite, ²⁶tu oves providera lana pro tu vestimento, e tu capras providera le precio de un agro. ²⁷E tu habera bastante lacte de capra pro te ipse, tu familia e tu servientes.

Notas

1. O “le ira de un persona stulte”.