Biblia/Vetule Testamento/Proverbios/Proverbios 26

Le Proverbios

Capitulo 26

¹Como le nive in estate o le pluvia durante le recolta, assi le honor non se conveni a un persona stulte.

²Como un ave papilionante o como un hirundine que vola, un malediction sin causa non perveni al victima intendite.

³Un flagello pro le cavallo e un brida pro le asino, ma un virga pro le dorsos de personas stulte. ⁴Non responde a un persona stulte secundo su stultessa, de pavor que tu deveni simile a ille. ⁵Responde a un persona stulte secundo su stultessa, de pavor que ille se crede sage. ⁶Mandar un message per mano de un persona stulte es como amputar se un pede o biber veneno! 2⁷Un proverbio in le bucca de un persona stulte es tanto inutile quanto un gamba paralysate. ⁸Attribuer honor a un persona insipiente es como ligar un lapide a un funda. ⁹Un proverbio in le bucca de un persona stulte es como un branca spinose brandite per un persona inebriate. ¹⁰Un empleator qui ingagia un persona stulte o un circumstante es como un archero que tira al hasardo. ¹¹Sicut un can que retorna mangiar lo que ha vomitate assi es un persona stulte qui itera actos stulte. ¹²Il ha plus sperantia pro personas stulte que pro gente que falsemente se crede sage.

¹³Un persona pigre dice: “Il ha un leon in le strata. Si, io es secur que il ha un leon ibi foras!”. ¹⁴Como un ostio que se verte sur su cardine, assi es le persona pigre in su lecto. ¹⁵Un personas indolente pone su mano in le platto ma es troppo pigre a portar lo retro a su bucca. ¹⁶Le persona indolente se crede plus intelligente que septe consilieros sage.

¹⁷Commiscer se in le querelas de litigantes es tanto folle quanto sasir un can errante per su aures.

¹⁸Sicut un persona folle qui lancea brasas ardente o flechas mortal, ¹⁹assi es un persona qui decipe su proximo e pois le dice: “Illo esseva solmente un burla”.

²⁰Sin ligno le foco se extingue, e querelas dispare quando cessa commatrages.

²¹Sicut carbones pro le brasa e ligno pro e foco assi es un persona litigiose pro inflammar altercationes.

²²Le parolas de un commatrage es como morsellos dulce: illos perveni al intimo del corde.

²³Como un revestimento de smalt super un vaso de argilla, assi es parolas fervente con un corde malefic. ²⁴Parolas placente pote dissimular hostilitate, ma illos es deceptive. ²⁵Qui los emplea solmente pretende esser gentil: non los crede. Illos es intendite pro deciper te^[1]. ²⁶Ben que su odio pote esser occultate per le deception, su malitia essera revelate publicamente. ²⁷Si tu prepara un trappa pro alteres, tu mesme essera attrappate in illo. Si tu face rolar un rocca sur alteres, illo retornara a te e te fracassara. ²⁸Un lingua fallace non ama le veritate, e parolas flattante causa ruina.

Notas

1. Litt. “il ha septe abominationes in ille”.