Biblia/Vetule Testamento/Psalmos/Psalmos 101

Psalmos

101. Io cantara de tu misericordia e de tu justitia

Le rege promitte promover le justitia in su pais e eliminar omne malfactores ab su corte regal.

¹Un psalmo de David. Io cantara de tu misericordia e de tu justitia, Senior. A te, oh Senior, io cantara laudes. ²Io essera diligente in viver un vita irreprochabile - quando venira tu a adjuvar me? In mi proprie domo io gerera mi commercios con integritate. ³Io non mesmo considerara facer lo que es dishoneste. Io odia facer le mal. Io habera nihil a facer con commerciantes dishoneste. ⁴Io habera nihil a facer con personas perverse. Io non tolerera le mal. ⁵Io non supportara quicunque calumnia su vicino in secreto. Io non suffrera quicunque se comporta orgoliosemente e arrogantemente. ⁶Io favorara le gente honeste del pais: necun altere essera permittite viver apud me. Me servira solmente illes qui es irreprochabile. ⁷Gente fraudulente non habitara in mi palatio. Mentitores non essera benvenite in mi presentia. ⁸Mi deber quotidian essera discoperir con recercas minutiose qui in le pais es perverse e dishoneste. Io removera omne malfactores ab le citate del Senior.