Biblia/Vetule Testamento/Psalmos/Psalmos 103
Psalmos
edit103. Que mi anima benedice le Senior!
edit- Le psalmista lauda Deo pro su misericordia e bon disposition a pardonar su populo.
1Un psalmo de David. Que mi anima benedice le Senior e que toto lo que es in me benedice su nomine sancte! 2Que mi anima benedice le Senior e que illo nunquam oblida tote le ben que ille me face! 3Ille es qui pardona tote tu peccatos, qui sana omne tu infirmitates; 4qui redime tu vita del morte[1] e qui te corona con su misericordia e compassion; 5qui replena de bon cosas tu vita, tanto que tu juventute es renovate como illo de un aquila!
6Le Senior face lo que es juste e exeque justitia pro tote les qui es opprimite. 7Ille revelava su voluntate[2] a Moses, su actos al israelitas. 8Le Senior es misericorde e pietose; ille es longanime e plen de misericordia. 9Ille non semper accusa[3] nos ni ille irasce in eterno. 10Ille nos non tracta como nostre peccatos meritarea, ni ille nos repaga secundo nostre offensas[4]. 11Quia quanto le celos es alte super le Terra, tanto su misericordia prevale super les qui le time. 12Quanto le horizonte oriental dista ab le occidental, assi ille remove ab nos le culpa de nostre actos de rebellion. 13Quomodo un patre ha compassion de su filios, assi le Senior ha compassion de les qui le time. 14Quia ille sape como es le substantia del qual nos es facite; ille comprende que nos es solmente pulvere[5]. 15Le vita de un persona es sicut feno[6]. Assi como un flor in le agro floresce, 16ma quando le vento calide suffla, illo dispare, e nemo poterea mesmo trovar le loco ubi un vice illo cresceva. 17Le misericordia del Senior, tamen, es ab eterno e in eterno pro les qui le time. Ille es fidel mesmo a lor descendentes, 18a les qui serva su pacto e qui es diligente in obedir a su commandamentos.
19Le Senior ha rendite le celos su throno. Ab ibi ille domina super le universo.
20Benedice le Senior, vos omnes, su angelos, vos potente guerreros angelic qui exeque su decretos e obedi a su ordines. 21Benedice le Senior, vos omnes armeas angelic qui le servi, su ministros, qui face su voluntate. 22Benedice le Senior, vos omnes obras sue, in omne locos de su regno. Anima mie, benedice le Senior!