Biblia/Vetule Testamento/Psalmos/Psalmos 111

Psalmos

111. Io rendera gratias al Senior con tote mi corde

Le psalmista lauda Deo pro su meraviliose obras, specialmente le modo in le qual ille provide a su populo e lo libera. Iste psalmo in hebraico es un poema acrostic; post le nota introductori de laude, cata linea comencia con un littera successive del alphabeto hebraic in ordine..

¹Alleluia! Lauda Deo! Io rendera gratias al Senior con tote mi corde in le consilio e congregation del justos. ²Le obras del Senior es magne. Illos es querite de omnes qui los desira ardentemente. ³Tote lo que ille face revela su gloria e majestate; su justitia permane in le seculos del seculos. ⁴Ille face cosas stupefaciente que essera rememorate; le Senior es misericordiose e pietose. ⁵ille da nutrimento a les qui le time; ille se rememora semper de su pacto. ⁶Ille annunciava que haberea facite obras potente pro su populo e les dava le terra^[1] de altere nationes. ⁷Su actiones es characterisate de veritate e justitia; tote su commandamentos es digne de confidentia. ⁸Illos non cambia, es firme pro semper e debe esser executate fidelmente e con integritate. ⁹Ille pagava pro su populo lor complete precio de redemption; ille garantiva que su pacto essera valide pro semper. Su nomine es sancte e inspira respecto. ¹⁰Obedir^[2] al Senior es le principio fundamental del ver sapientia; tote illes qui obedi a su commandamentos cresce in sapientia. Ille recipera laudes pro semper.

Notas

1. O "hereditate".
2. O “le timor del Senior”.