Biblia/Vetule Testamento/Psalmos/Psalmos 147

Psalmos

147. Alleluia! Lauda le Senior

ˑLe psalmista lauda le Senior, proque Ille es le soverano dominator del mundo e se cura del necessitates de su populo.

¹Alleluia! Lauda le Senior, quia il es bon cantar laudes a nostre Senior! Si, le laude es agradabile e appropriate. ²Le Senior reedifica Jerusalem e congrega le diaspora de Israel.³Ille sana le contritos de corde e cura lor plagas. ⁴Ille numera le multitude del stellas e appella cata un de illos per nomine. ⁵Nostre Senior es magne e su poter es impressionante; su sapientia non ha limite. ⁶Le Senior sustene le opprimitos, ma humilia le peccatores usque a terra.

⁷Offere al Senior un canto de regratiamento! Canta laudes a nostre Deo con le harpa! ⁸Ille coperi le celo de nebulas, provide le terra de pluvia, e produce sur le montes feno e herba. ⁹Ille da nutrimento al animales e al pullos del corvos quando illos le invoca^[1]. ¹⁰Ille non se delecta del fortitude del cavallo, ni se complace del forte gambas del guerrero. ¹¹Le Senior se complace plus tosto, de les qui le time e de les qui spera in su misericordia.

¹²Lauda le Senior, oh Jerusalem! Celebra tu Deo, oh Sion! ¹³Quia ille rende forte le serraturas de tu portas. Ille benedice tu filios qui demora con te. ¹⁴Ille assecura le pace intra tu confinios. Pro te ille provide con abundantia le melior frumento. ¹⁵Ille manda su commandos pro le Terra, su parolas curre velocemente e attinge lor destination. ¹⁶Ille manda le nive que es blanc como le lana, ille expande le pruina que es blanc como cineres. ¹⁷Ille projice su petras de grandine como micas. Qui pote resister al vento frigide que ille manda? ¹⁸Ille emitte su parola e lo liqueface; ille suffla super illos e le aquas flue.

¹⁹Ille annuncia su verbo a Jacobo, su statutos e judicios a Israel. ²⁰Ille non ha facite assi pro alicun altere nation; ille non les manifestava su judicios. Alleluia!

Notas

1. O “quando illos pipa”.