Biblia/Vetule Testamento/Reges/1Reges 13

1 Reges

13

¹Justo alora un propheta veniva de Judea con un message del Senior pro Bethel, durante que Jeroboam stava apud le altar, preste a offerer un sacrificio. ²Le propheta incipeva critar contra l’altar con iste message del Senior: “Oh altar, altar! Isto es lo que le Senior ha dicite: ‘Ecce, un homine appellate Josia nascera pro le dinastia davidic. Ille sacrificara super te le sacerdotes ipse que super te sacrifica in iste sanctuario. Osteos human essera comburite super te!”. ³Ille mesme die le propheta dava un signo pro comprobar su message. Ille diceva: “Isto es le signo que le Senior ha promittite: Le altar se findera e le cineres que es super illo cadera a terra”.

⁴Quando le rege audiva le homine de Deo que habeva parlate contra le altar in Bethel, Jeroboam levava su mano ab le altar e le extendeva contra ille, dicente: “Attrappa ille homine!”. Alora le mano que ille habeva extendite contra ille subito deveniva paralysate e ille non poteva plus retraher lo. ⁵Intertanto le altar se findeva e le cineres se effundeva de illo juxta le signo que le propheta habeva predicite in le message del Senior. ⁶Le rege respondeva al homine de Deo: “Depreca le Senior tu Deo e ora pro me ut mi mano sia restablite!”. Assi le propheta orava al Senior e le mano del rege esseva restablite como illo lo habeva essite antea. ⁷Inde le rege diceva al propheta: “Veni con me al palatio, prande e io te dara un remuneration^[1]”. ⁸Le propheta, tamen, diceva al rege: “Mesmo si tu me dava le medietate de tote lo que tu possede, io non vaderea con te, ni io mangiarea o biberea alco in iste loco. ⁹Quia le Senior ipse me commandava de non mangiar o biber alco durante que io es hic, e de non retornar a domo ab le mesme via per le qual io veniva”. ¹⁰Assi ille quitava Bethel e retornava a domo per un altere itinere.

¹¹Ora, il habeva un vetule propheta qui habitava in Bethel. Quando su filios retornava a domo le reportava tote lo que le homine de Deo habeva facite durante ille die. E illes contava a lor patre tote le parolas que ille habeva dicite al rege. ¹²Lor patre les peteva: “Per qual via ille vadeva?”. Su filios le monstrava le via que le propheta que veniva de Judea habeva prendite. ¹³Alora ille diceva a su filios: “Cito, insella le asino pro me”. Quando illes insellava le asino pro lor patre, ille lo montava. ¹⁴Assi ille vadeva perquirer le homine de Deo e le trovava sub un terebintho. Ille le peteva: “Es tu le propheta que veniva de Judea?”. Ille le respondeva: “Io lo es”. ¹⁵Alora ille diceva al homine de Deo: “Veni a domo con me pro un bon prandio”. ¹⁶Ma ille replicava: “No, io non pote retornar, ni venir con te, ni mangiar o biber aqua in iste loco. ¹⁷Quia le Senior ipse me commandava de non mangiar o biber alco durante que io es hic e de non retornar a domo ab le mesme via per le qual io veniva”. ¹⁸Ma le vetule propheta le diceva: “E io es un propheta simile a te. Un angelo del Senior me dava iste commando: “Conduce le con te a tu domo a que ille pote mangiar e biber”. Ille, tamen, mentiva. ¹⁹Assi le propheta retornava con ille. Ille prandiava in su casa e bibeva aqua.

²⁰Deinde, justo quando illes sedeva e mangiava, un commando del Senior perveniva al vetule propheta que faceva retornar le, ²¹e ille exclamava verso le homine de Deo que veniva de Judea: “Isto es lo que le Senior dice: Tu non obediva al parola^[2] del Senior e non custodiava le mandato que te prescribeva le Senior tu Deo. ²²Tu retornava a in iste loco e mangiava e bibeva mesmo si io te habeva clarmente prescribite de non facer lo. A causa de isto, tu corpore non essera interrate in le sepulcro de tu ancestres”.

²³Assi, depost que ille habeva mangiate e bibite, le vetule propheta insellava pro ille su proprie asino, ²⁴e le homine de Deo partiva. Il eveniva, tamen, que, durante que ille viagiava, sortiva un leon e le occideva. Su corpore remaneva assi a jacer sur le via, con le leon e le asino que stava juxta illo^[3]. ²⁵Gente que passava videva le cadavere jaciente sur le via e le leon que stava juxta illo; alora illes vadeva e divulgava le facto in Bethel, ubi le vetule propheta habitava.

²⁶Quando le propheta audiva le reporto, ille diceva: “Se tracta de un homine de Deo qui disobediva a lo que le Senior le habeva commandate. Le Senior compliva su parola faciente que le leon le attaccava e le occideva”. ²⁷Inde le propheta diceva a su filios: “Insella pro me un asino”. Assi illes insellava un asino. ²⁸Ille sortiva e trovava le cadavere que ancora jaceva per le via e le asino e le leon que stava juxta ille. Le leon non habeva mangiate ille corpore ni attaccate le asino. ²⁹Assi le propheta deponeva le corpore del homine de Deo sur le asino e le reportava a in le citate del vetule propheta ut planger le e inhumar le. ³⁰Ille deponeva le corpore in su proprie sepulcro e lugeva super ille dicente: “Oh fratre mie!”.

³¹Deinde, le propheta diceva a su filios: “Quando io mori, interra me in le sepulcro in le qual le homine de Deo es inhumate. Juxta su osteos pone mi osteos. ³²Quia le message que le Senior le diceva de proclamar contra le altar in Bethel e contra omne le sanctuarios pagan in le citates de Samaria certemente se complira”.

Un propheta annuncia le fin del dinastia de Jeroboam

³⁴Nonobstante iste evenimentos, Jeroboam non se repentiva de su pessime vias. Ille continuava seliger sacerdotes ab le populo commun. Ille appunctava quicunque voleva devenir sacerdote pro le sanctuarios pagan. 13:34 Iste peccato grave faceva terminar le dinastia de Jeroboam e deler lo del facie del terra.

Notas

1. O “dono”.
2. O “ore”.
3. O “su cadavere”.