Biblia/Vetule Testamento/Samuel/2 Samuel 11

2 Samuel

11

David committe adulterio con Bat-Sheba

¹In le primavera del anno sequente, le tempore in le qual reges soleva facer bellos, David faceva sortir Joab con su officieros e le armea integre de Israel. Illes batteva le ammonitas e assediava Rabba. David, tamen, habeva remanite in Jerusalem. ²Un vespere, David se levava de su lecto e deambulava sur le terrassa del palatio regal. Ab le terrassa ille videva un femina que se lavava. Iste femina esseva valde belle. ³Ergo le rege mandava alicuno a inquirer re iste femina. Le messagero diceva: “Illa es Bat-Sheba, le filia de Eliam e le uxor de Uria le hittita. ⁴Ita, David mandava alicun messageros a prender la. Illa veniva ad ille e David se jaceva^[1] con illa. Illa habeva justo complite le ritos de purification depost su periodo menstrual. Deinde, illa retornava a domo. ⁵Plus tarde, quando Bat-Sheba discoperiva esser gravide, illa mandava a David un message, dicente: “Io es gravide”.

⁶Alora David mandava a Joab un message que diceva: “Face venir ad me Uria le hittita”. Assi Joab mandava Uria a David. ⁷Quando Uria arrivava, David le peteva re le situation de Joab e le armea israelita e quomodo le guerra progredeva. ⁸Pois David diceva a Uria: “Descende a in tu domo e reposa te^[2]”. Quando Uria quitava le palatio, le rege le mandava mesmo un dono. ⁹Uria, tamen, non vadeva a su domo. Ille nocte ille dormiva ante le entrata del palatio con le guardas del palatio regal. ¹⁰Quando David apprendeva que Uria non habeva vadite a domo, ille le convocava itero e le peteva: “Esque tu non ha justo arrivate de un viage? Quare tu non descendeva a tu domo?”. ¹¹Uria replicava a David: “Le Arca e le armeas de Israel e juda vive in tentas, e Joab e le le homines de mi domino es campate in agros. Como poterea io vader a casa a biber e mangiar e a jacer con mi uxor? Io jura per le sanitate tue e de tu anima que io nunquam facera un tal cosa!”. ¹²Assi David diceva a Uria: “Remane hic ancora un altere die. Deman tu potera retornar al armea”. Alora Uria remaneva in Jerusalem ille die e le die sequente. ¹³Deinde, David le invitava a cena e le faceva inebriar. Mesmo assi David non successava facer retornar Uria a su domo con su uxor. Itero, Uria dormiva al entrata del palatio con le guardas del palatio regal.

David arrangia le morte de Uria

¹⁴Mane David scribeva un epistola a Joab e lo mandava per le mano de Uria. ¹⁵In celle epistola David habeva scribite: “Pone Uria in le fronte del lineas ubi le battalia es le plus aspere e recede de ille, ut ille sia colpate per le inimicos”. ¹⁶Igitur Joab assignava Uria a un loco juxta al muros del citate, in le qual ille sapeva que le homines le plus forte del inimico combatteva . ¹⁷E quando le soldatos del inimico sortiva del citate pro combatter, Uria le hittita esseva occidite insimul a plure altere soldatos israelita.

¹⁸Ita Joab mandava a David un memorandum del battalia. ¹⁹Ille assi diceva a su messagero: “Quando tu fini reportar al rege le datos del battalia, ²⁰si le rege se inragia e te pete: ‘Quare tanto accedeva vos al citate pro combatter? Ignorava vos que ab supra del muros illes haberea tirate contra vos? ²¹Qui abatteva Abilmelech, filio de Jerub-Besheth? Esque non un femina habeva un vice in Thebez jectate super ille ab le muro un mola que le occideva? Quare tanto vos accedeva juxta le muros?’, dice le solmente: ‘Tu servitor Uria le hittita esseva alsi occidite’”. ²²Ergo le messagero partiva pro Jerusalem e communicava a David tote le novas que Joab habeva mandate con ille. ²³Le messagero diceva a David: “Le inimicos prevaleva contra nos e attaccava nos in le agros. Nos, tamen, les fortiava retirar se usque al porta del citate. ²⁴Assi le archeros tirava contra tu servitores ex le muros de supra e alcun del soldatos del rege moriva, includite tu servitor Uria le hittita”. ²⁵Alora David diceva al messagero: “Dice a Joab: ‘Non affliger te propter isto. On non pote previder qui essera occidite in un battalia^[3]. Le proxime vice combatte plus durmente contra le citate e conquire lo’. Incoragia^[4] le con iste parolas”.

²⁶Quando le uxor de Uria apprendeva que su marito habeva essite occidite, illa lugeva pro ille. ²⁷Quando le tempore del lucto terminava, David la introduceva in su palatio e illa deveniva un de su uxores. Deinde illa parturiva un filio, ma lo que David habeva facite multo displaceva al Senior.

Notas

1. O “dormiva”.
2. Litt. “e lava tu pedes”.
3. O litteralmente: “Qui le gladio devorara”.
4. O “conforta”.