El Castiel de Ruvèigno/02
El Tirituorio de Ruveîgno pupulà in tenpi anteîchi
Cume i pissi del mar ca nu faviela, b
cusseî, deî gneînte i screîti de la zento
ch'in anteîco uò vissoû in sta tiera biela,
e nuve pena s'uò dal seînquesento.
Ma poûr, sa a chi ga pias li ruobe anteîche
a scuri sa matisso la canpagna,
qua e là sapando a fondo e a streîche
pruve el truvaravo in val e in muntagna.
Nà purassiè nu zì ca pere screîte,
ruveîne sipileîde e viece d'ani,
e case darucade anche in pioûn seîti
catà s'uò çierto fate d'i rumani.
E d'ugni banda furni e turci oûn mondo,
matoni e cupi e loghi ca sa bagna,
de' muorti mulimenti e vasi in fondo
spisso sa cata e s'uò catà in canpagna.
In Vistro e Valpulari tante ancura
sa vido de ste ruobe in alto e in basso,
e Mondelarche par oûna sipoûltura
de tante arche ca là zì in pera e sasso.
E cu i badeî scavando puoi la tiera
a Montemierla e i loghi de Murassi,
viece munide là s'uò catà, e fiera
gran zì stà, e brente s'uò culmà e brentassi.
Stanpà su ste munide li figoûre
de la gran Ruma gira e Inparaturi.
Nda gira oûn mondo biele, ciare e scoûre,
e d'i grighi, in anteîco gran signuri.
Tuochi da marmo lavuradi ancura
de cese anteîche a l'Eîstria e a la Furtoûna
catà s'uò zutu tiera e puoi da zura
de li laste screîte, qua e là pioûn d'oûna.
Doûta sta ruoba a nui fa çierta pruva
ch'intu li fore nostre uò vissoû zento
anteîca, e d'i rumani ancu sa truva
li urme ch'i uò lagà da fora e drento.
E cu furtoûna g'uò vultà li spale
a Ruma, del gran mondo la parona,
d'i buschi e monti zì calà in li vale
zento d'ugni stripa, c'a ningoûn pardona.
Spasamo fiva pena i sa vadiva,
ca seîngani pariva ca urlisso,
e lengue mai sintoûde i favaliva,
nà sa saviva ca linguazo i visso.
E peîci e grandi spaguradi i ziva
e chi da qua e là al mar cum'el malano,
e qui ch'intu li fore nostre stiva
sul s'cuio s'uò salvà de Muntalbano.