El Castiel de Ruvèigno/03
Cleîma e pruduoti del tirituorio de Ruveîgno
Venti de tramuntana sufia raro, n
ma purassiè del mar i venti doûra,
e peîcio e puoco frido s'uò in gianaro
e sana l'aria qua sa guodo e poûra.
De punente furtunai e marisade
raro i sa vido cume musche bianche,
puoco d'invierno el giasso in li valade
e zì puoi oûna rarità la nio anche.
Pien de zanivari zì fra ruve e speîni,
e d'ugni banda lavarni in canpagna
sa vido senpro virdi cum'i peîni,
e bronbule in zanier bone sa magna.
Qua d'ugni stripa froûti zì bundansa:
piersaghe, piri e feîghi oûn mondo boni,
e antriciuochi e nusiele nda na vansa
ca veîa nda na va cume i maloni.
E zì d'ugni banda uleî e veîde tante
ca d'iessi in Poûia par de la balissa,
e l'uoio sapureî zì al par del Zante
e risarcà el su veîn par la dulsissa.
E fiuri bai ti vidi d'ugni banda
e d'uorto e prà zì pien in primavira,
ca par li fore caminando i manda
uduri boni al nas miteîna e sira.
D'istà, d'invierno usai ca senpro sbula
de frasca in pal e senpro qua i stà e cuva
e i canta tanto biel, e i fa gran gula
d'avili in casa, ca piasir sa pruva.
Puoi li ave lavorenti, ca fa tondo
de sira i favi d'i su bai trunboni
qua stà, e sarcando, a largo li va oûn mondo
e par li fore e par i uorti i soûgi boni.