Epistola I al Thessalonicenses Capitulo 3
1 Ergo, non potente plus attender pro saper de vos, nos decideva de remaner sol in Athenas;
2 e mandar vos Timotheo, nostre fratre e ministro de Deo in le propagation
del Evangelo de Christo, pro confirmar vos e confortar vos in vostre fide,
3 a fin que nemo sia succutite per iste tribulationes; pois que vos ipse
sape que pro isto nos esseva vocate.
4 Perque quando ancora nos esseva inter vos, nos prediceva que on haberea de passar
tribulationes como de facto adveniva, e vos lo sape.
5 Ergo etiam io, non potente plus attender, mandava saper de vostre fide, per timor
que le tentator vos haberea tentate, e nostre labor esserea van.
6 Sed nunc que Timotheo retornava a nos e nos portava bon novellas de vostre
fide e de vostre amor, e nos diceva que vos ha un bon memoria de nos e
desidera vider nos, como etiam nos desidera vider vos,
7 per iste ration, fratres, nos esseva consolate concernente vos, in medio
a tote nostre necessitates e afflictiones, mediante vostre fide;
8 perque nunc, nos vive, si vos es firme in le Senior.
9 E quante actiones de gratias nos pote render a Deo, concernente vos, per tote
le gaudio que nos gaude a causa de vos coram nostre Deo,
10 e nocte e die nos ora intensemente pro poter vider vostre facie e completar le manco de vostre fide?
11 Que Deo ipse, nostre Patre, e le Senior nostre Jesus nos prepara le via pro venir a vos;
12 Que le Senior vos multiplica e vos face abundar in caritate reciproca e verso
omnes, como etiam nos abunda de caritate pro vos,
13 pro confirmar vostre cordes, pro esser irreprehensibile in sanctitate
coram Deo nostre Patre, quando le Senior nostre Jesus venira con tote su sanctos.
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud