Epistola a Tito Capitulo 1

 1 Paulo, servitor de Deo e apostolo de Jesus Christo per le fide del electos de Deo e le 
   cognoscentia del veritate que es secundo pietate, 

 2 in le sperantia del vita eternal le qual Deo, qui non pote mentir, promitteva ante que le mundo existeva, 

 3 manifestante post in su proprie tempores su parola mediante le predication que me esseva confidite 
   per mandato de Deo, nostre Salvator, 
 
 4 a Tito, mi ver filio secundo le fide que nos es commun, gratia e pace de Deo Patre e de Christo Jesus,
   nostre Salvator. 

 5 Per iste ration io te ha lassate in Creta: perque tu mitte in ordine le cosas que resta a facer, 
   e ordina ancianos per cata citate, como io te prescribeva; 

 6 si on trova qui sia irreprehensibile, marito de un sol femina, habente filos fidel, que
   non sia accusate de libertinage ni insubordinate. 

 7 Pois que un episcopo debe esser irreprehensibile, como economo de Deo; non arrogante, non irascibile, 
   non devote al vino, non contentiose, non cupido de dishoneste lucro, 

 8 ma hospital, amante del ben, judiciose, juste, sancte, temperante, 
 
 9 attachate al fidel Parola le qual le esseva inseniate, a fin que sia capace de exhortar 
   in le sana doctrina e de convincer le contradictori. 

10 Pois que il ha multos rebelle, charlatan e seductor de mentes, specialmente inter illes del 
   circumcision, al quales besonia clauder le bucca; 

11 homines qui subverte integre casas, inseniante cosas que non deberea, per amor de dishoneste lucro. 

12 Un de illes, un lor proprie propheta, diceva: `Le Creteses son tote mendace, mal bestias, ventres pigre'. 

13 Iste testimonio es verace. Ergo reprehende les severmente, a fin que illes sia san in le fide, 

14 non prestar ascolta a fabulas judee ni a commandamentos de homines que volta le spatulas al veritate. 

15 Tote es pur pro qui es pur; ma pro qui es contaminate e incredule nihil es pur; al contrari, 
   tanto lor mentes como lor conscientias son contaminate. 

16 Illes face profession de cognoscer De; ma illes le renega con lor operas, essente abominabile, 
   e rebelle, e incapace de qualcunque bon opera.
1 2 3
Indice Mat Mar Luc Joh Act Rom 1Co 2Co Gal Eph Php Col 1Th 2Th 1Ti 2Ti Tit Phm Heb Jac 1Pe 2Pe 1Jo 2Jo 3Jo Jud Rev