In vista del Piz Bernina

by Gian Fadri Caderas

[ 5 ]

In vista del Piz Bernina.

Bain lossü, Engiadinais,
Ho sieu trun la chera;
Ella guarda nos pajais
Con riainta tschera.

Ell' ais giuvna sco la flur,
Bell' al gnir d'aurora;
Sa curuna ais splendur,
Cha'l solagl indora.

Pür sieu abit sco'l vadret
Del superb Bernina;
Sa divisa ais il dret
D'la bunted divina!

»Figls, unieus, concords vivè!«
Disch cun vusch possaunta,
»D'ödi il cour mê nun maclè,
Ch'ogni bain standschainta!«

[ 6 ]

»Prompt vos maun ad ogn' event
Conservè adüna!
Cunter l'arma del potent
La valleda üna!«

»Dasper vus he miss mieu trun,
Dieu il construiva;
L'atterrer nun po chanun,
Be discordia viva!«

»Ma bandera ho'l signel
Da redenta era;
Benedida füt dal tschel,
Nell' eterna sfera!«

E la chera, dumandais,
Cu la cher' as clama?
»Liberted«, Engiadinais!
Ella saimper ama!

Avuost 1882.