Jv/Kakawin Arjunawiwāha/Pupuh 22
Pupuh 22 – Sragdharā 
1.
- a. ry angkat sang daityarāja nda tucapa ta ḍatĕng paṇḍuputra pralabdha
- b. śīghrânĕmbah ri sang hyang surapati kahaḍang höman ing dewasanggha
- c. sangkĕp dening maningkah wara-warah apa tan wāspadâkweh matakwan
- d. tĕkwan dening manĕnggah jaya-jaya tĕkaping garjitângĕṭṭahāsa
2.
- a. mojar sang Pārtha n angkat ng asurapati pilih prāpta sangkĕp sĕnāddha
- b. yatnā ta śrī surendrâparan ulaha lawan byūhaning manglagāna
- c. āpan tūt lambunging Meru ng asurabala sök śīrna tang swarga kāmbah
- d. mundur kapwâkukud byakta ḍatĕnga niyatângāśrayê jöng surendra
3.
- a. aum putrâpan kitênanti mami huwus adan kapwa pakṣânĕkāna
- b. mangkat pwêkang musuh durga yatika pahayun byūhaning manglagāna
- c. sākāmbah denya konĕn makukuda sakarĕng kapwa rakṣan sahāyan
- d. ndan wāswāsĕn purihning mangulih-ulih ikā sānukhānê wwang akweh
4.
- a. ambĕkning wwang mahāwīra tinĕkan anĕkê rakwa tātan prabheda
- b. mangkin durgrahya têkang mṛgapati tinĕkan yan pangantîng guhānya
- c. māti ng mong yan parângdon graha wuhaya pĕjah yan parêng wyāghradeśa
- d. ng wwang yan tan wiśwasêng deśa lagi siga-sigun prāya tan wring bhayanya
5.
- a. ling sang hyang Śakra Citranggada sira sumahur yukti ling śrī surendra
- b. pöhning Kāmandakêka kunĕng ingĕt-ingĕtĕn dṛṣṭa sampun wināswās
- c. kālahningwang tĕkap sang Kṣitisuta nguniweh denikang Meghanāda
- d. kagyat kewran dinon durbala kaparĕpĕkan rimbit akweh tinolih
6.
- a. angkatning śatru mangko parĕngana papagĕn ring hawan śīghra-śīghra
- b. rwêkang lābhâwamānâparimita katulung sākidulning Sumeru
- c. āpan sampun madan sang surawara tumihang tan hanā tan sĕnāha
- d. manggĕh ngwang samprayukâlaha mĕnanga huwus misyana ng dharmayuddha
7.
- a. ling sang Citrānggadânganggĕhi ri surapati mwang watĕk dewasanggha
- b. sāmānyopāya sampun pinapakira kabeh kapwa tâtingkah agyā
- c. rāhasyopāya sang Pārtha juga sira huwus niścaya mwang surendra
- d. tan lokopāya ning śatru parĕngana bhayā kwehnikang cāra sūkṣma