Jv/Kakawin Arjunawiwāha/Pupuh 23
Pupuh 23 – Kilayu Manĕḍĕng 
1.
- a. sang hyang surapati mĕtu sangka ring kuṭa lawan surabala gumuruh
- b. Airāwaṇagajapatirĕngga r unggunira ratna kadi gunung apuy
- c. bajrāyudha marĕk i sirâpayung garuḍaroma kadi jaladhara
- d. sākṣād aruṇa ring udayādri wimbaning dhanuhnira makara-kara
2.
- a. siddhārṣigaṇa paḍa sumungsung ing gagana ghūrṇita majaya-jaya
- b. lumrā ng surakusuma lawan hudan kṣaṇika tan pajalada tumibā
- c. akweh wihaganira śarīrakampa śubhamanggalani lakunira
- d. wuntu ng bhuwana tĕkapikang mṛdangga kala bheri murawa kumisik
3.
- a. widyādhara samaradhurandarâsurak atiṇḍih asulam i harĕp
- b. lakṣâpapan apapatihan pinaṇḍi ta mapiṇḍa pira-pirang iwu
- c. dewāngśukataru kasurat-surat dwirada matta rinawisan ĕmās
- d. tĕngran ika kadi jaladânghĕmū hudan agöng matĕpi-tĕpi kilat
4.
- a. Citrānggada ri harĕpirâhawan ratha maṇik marakata sagala
- b. piṇḍārwuda pamajanirânapuk paḍa widagdha mamawa kṛtala
- c. tĕngranya paḍa-paḍa mirah dalugdag adawā tĕhĕr awaja galah
- d. digdāha kahiḍĕpanikân ginaṇḍa kanakadrawa makabaranang
5.
- a. ngkānê wuri surapati Citrasena saha bhūṣaṇa mamawa laras
- b. munggw ing sphaṭikaratha rinĕngga bhāswara tĕkapni wĕḍihanira bāng
- c. malyāla curiganira kadganing bala kilatnya pinutĕr ahulap
- d. sātus wwalu kadi śiwaśuddha ring gagana tĕngranika katulajĕg
6.
- a. jyeṣṭātmaja surapati sang Jayānta ratha pastika kahananira
- b. sampun matĕguh inabhimantra matwasa sakêng wĕsi waraṇi makas
- c. pinghe dhwajanira suradārucarma hulu lañcang amukha-mukha mās
- d. sumrāk tĕhĕr anawanakĕn sugandha mṛganābhi panĕpak iriya
7.
- a. rotāpsaragaṇa macaping-caping mamawa tomara pamajanira
- b. anyat tang apalaga manguṇḍa coli śiwapattra hana ri takurang
- c. kapwârukuh awaju sinimbaranya masawit sĕkar aruh-aruhan
- d. mĕttâjĕnu-jĕnu mawĕḍak-wĕḍak kanakacūrṇa kawigaran awū
8.
- a. sang Paṇḍusuta pamĕkasing lumampah ahawan sakaṭa maṇimaya
- b. sang Mātali ngaranira sārasārathi manojawani lakunira
- c. pinghe dhwajanira kadi sarwawarṇa tĕkaping dhanuh angada-hadā
- d. söngning makuṭa kawaca wangkawâsaliwĕrañ juga ri harĕpira
9.
- a. gandharwataruna ri harĕp dhanurdhara paḍātinira sangang iwu
- b. len tang maliman alimunan dudū ng makuda sārwuda mamawa tuhuk
- c. lumrā dhwajanira hĕlar ing wimāna kadi megha marĕk ing aruṇa
- d. kākāṇḍa kadi liḍah ing antakângalad-alad mamalaku bhuwana
10.
- a. sang Citraratha pinakabāhudaṇḍa pinatih surapati marĕka
- b. mwang dewata sapinasuk ing surālaya tumūt ri wuri nṛpasuta
- c. nānāwidha pagĕlar i sañjatanya kadi rĕm kadi kilat awilĕt
- d. lwir parwataśikhara tinolih ing rawi hanan kadi jaladhi pasang
11.
- a. lwiryân gaganacara mĕlĕk sakêng kuṭa makin sumahab aḍarata
- b. mingsor mangusir i sukuning Sumeru kadi sāgara mangawang-awang
- c. sārsök prakaṭa kadi langit rĕbah saha nawagraha makapuratuk
- d. lwir handaru sangang iwu candra bhāskara paḍĕm ri laku surapati
12.
- a. lwir saptabhuwana wahu wartamāna ri panṛṣṭinira Paśupati
- b. kapwâkrama tumitah awaknya ring sajuru kātaratara sumaput
- c. sāsing kahawan atĕmahan lĕbū tĕkaping aśwa ratha gajapati
- d. lwah lungka tĕmahan aratā tĕgal tĕmahan ing wukir alas inidĕk