Jv/Kakawin Nāgarakṛtâgama

en - Kakawin Nāgarakṛtâgama or Kakawin Deśawarṇana is the most well known Old Javanese kakawin. This poem was written in 1365 by Mpu Prapañca. This kakawin consists of 98 cantos.

jv - Kakawin Nāgarakṛtâgama utawa uga diarani Kakawin Deśawarṇana iku kakawin Jawa Kuna sing misuwur dhéwé. Kakawin iki ditulis ing taun 1365 déning Mpu Prapañca. Kakawin iki ngandhut 98 pupuh.

Kakawin Nāgarakṛtâgama

#	Asli
Pupuh 1	← Kakawin Nāgarakṛtâgama by Mpu Prapañca Pupuh 1 Pupuh 2 → 64370Kakawin Nāgarakṛtâgama — Pupuh 1Mpu Prapañca Pupuh 1 - Jagaddhita 1. a. Oṃ nāthāya namo 'stu te stutining atpada ri pada bhaṭāra nityaśa b. sang sūkṣmêng tĕlĕnging samādhi Śiwa Buddha sira sakala niṣkalātmaka c. sang śrī Parwatanātha nāthaning anātha sira ta patining jagatpati d. sang hyangning hyang iniṣṭy acintyaning acintya hana taya tĕmahnirêng jagat. ꦎꦀꦤꦴꦡꦴꦪꦤꦩꦺꦴꦱ꧀ꦠꦸꦠꦺꦱ꧀ꦠꦸꦠꦶꦤꦶꦔꦠ꧀ꦥꦢꦫꦶꦥꦢꦨꦛꦴꦫꦤꦶꦠꦾꦯ꧈ ꦱꦁꦱꦹꦏ꧀ꦱ꧀ꦩꦺꦁꦠ꧀ꦭꦼ ꦔꦶꦁꦱꦩꦴꦣꦶꦯꦶꦮꦧꦸꦢ꧀ꦣꦱꦶꦫꦰꦏꦭꦤꦶꦰ꧀ꦏꦭꦴꦠ꧀ꦩꦏꦴ꧈ ꦱꦁꦯꦿꦷꦥꦮ꧀ꦮꦂꦠꦤꦴꦡꦤꦴꦡꦤꦶꦔꦤꦴꦡꦱꦶꦫꦠꦥꦠꦶꦤꦶꦁꦗꦒꦠ꧀ꦥꦠꦶ꧈ ꦱꦁꦲꦾꦁꦤꦶꦔ꧀ꦲꦾꦔꦶꦤꦶꦰ꧀ꦛꦾꦕꦶꦤ꧀ꦠꦾꦤꦶꦔꦕꦶꦤ꧀ꦠꦾꦲꦤꦴꦮꦪꦃꦤꦶꦫꦺꦁꦗꦒꦠ꧀ ꧅ 2. a. byāpi byāpaka sarwatattwagata nirguṇa sira ring apakṣa weṣṇawa b. ring yogīśwara Poruṣêng Kapila Jambhala sakala sira n hyang ing dhana c. śrī Wāgindra sira n hyang ing sakalaśāstra Manasija siring smarāgama d. ring wighnotsaraṇaprayoga Yamarāja sira makaphala ng jagaddhita. ꦧꦾꦴꦥꦶꦧꦾꦴꦥꦏꦱꦮ꧀ꦮꦂꦠꦠ꧀ꦮꦒꦠꦤꦶꦒꦸꦟꦱꦶꦫꦫꦶꦔꦥꦏ꧀ꦱꦮꦺꦰ꧀ꦟꦮ꧈ ꦫꦶꦁꦪꦺꦴꦒꦷꦯ꧀ꦮꦫꦥꦺꦴꦫꦸꦰꦺꦁꦏꦥꦶꦭꦗꦩ꧀ꦨꦭꦱꦏꦭꦏꦭꦱꦶꦫꦴꦤ꧀ꦲꦾꦔꦶꦁꦣꦤ꧈ ꦯꦿꦷꦮꦴꦒꦶꦤ꧀ꦢꦿꦱꦶꦫꦴꦤ꧀ꦲꦾꦔꦶꦁꦱꦏꦭꦯꦴ ꦱ꧀ꦠꦿꦩꦤꦱꦶꦗꦱꦶꦫꦺꦁꦱ꧀ꦩꦫꦴꦒꦩ꧈ ꦫꦶꦁꦮꦶꦓ꧀ꦤꦺꦴꦠ꧀ꦰꦫꦤ ꦥꦿꦪꦺꦴꦒꦪꦩꦫꦴꦗꦱꦶꦫꦩꦏꦥꦭꦁꦗꦒꦢ꧀ꦣꦶꦠ ꧅ 3. a. nāhan doning umastutī padanirâhyun umikĕta kathe nareśwara b. sang śrī nātha ri Wilwatikta haji Rājasanagara wiśeṣa bhūpati c. sākṣāt janma bhaṭāra nātha sira n anghilangakĕn i kalangka ning prajā d. hĕnty angbhūmi Jawâtibhakti manukūla tumuluyi tĕkêng digantara. ꦤꦲꦤ꧀ꦢꦺꦴꦤꦶꦔꦸꦩꦱ꧀ꦠꦸꦠꦷꦥꦢꦤꦶꦫꦴꦲꦾꦸꦤꦸꦩꦶꦏꦼꦠꦏꦠꦺꦤꦫꦺꦯ꧀ꦮꦫ꧈ ꦱꦁꦯꦿꦷꦤꦴꦡꦫꦶꦮꦶꦭ꧀ꦮꦠꦶꦏ꧀ꦠꦲꦗꦶꦫꦴꦰꦤꦒꦫꦮꦶꦯꦺꦰꦨꦹꦥꦠꦶ꧈ ꦱꦴꦏ꧀ꦱꦠ꧀ꦗꦤ꧀ꦩꦨꦛꦴꦫꦤꦴꦡꦱꦶꦫꦤꦔ꧀ꦲꦶꦭꦔꦏꦼꦤꦶꦏꦭꦔ꧀ꦏꦤꦶꦁꦥꦿꦗ꧈ ꦲꦼꦤ꧀ꦠꦾꦁꦨꦹꦩꦶꦗꦮꦴꦠꦼꦨꦏ꧀ꦠꦶꦩꦤꦸꦏꦸꦭꦠꦸꦩꦸꦭꦸꦪꦶꦠ꧀ꦏꦺꦁꦢꦶꦒꦤ꧀ꦠꦫ ꧅ 4. a. ri śākartu śarena rakwa ri wijil nṛpati tĕlas inastwakĕn prabhū b. an garbeśwara nātha ring kahuripan wihaganira namā nuṣādbhuta c. liṇḍung bhūmi kĕtug hudan hawu gĕrĕh kilat awilĕtan ing nabhasgala d. luntur tang himawān ri kāmpudananang kujana kuhaka māti tan pagap ꦫꦶꦁꦯꦴꦏꦠ꧀ꦠꦸꦂꦯꦫꦺꦤꦫꦏ꧀ꦮꦫꦶꦮꦶꦗꦶꦭ꧀ꦤꦽꦥꦠꦶꦠ꧀ꦭꦱꦶꦤꦱ꧀ꦠ꧀ꦮꦏꦼꦤ꧀ꦥꦿꦨꦸ꧈ ꦄꦤ꧀ꦒꦧ꧀ꦨꦺꦂꦯ꧀ꦮꦫꦤꦴꦡꦫꦶꦁꦏꦲꦸꦫꦶꦥꦤ꧀ꦮꦶꦲꦒꦤꦶꦫꦤꦩꦴꦤꦸꦄꦴꦢ꧀ꦨꦹꦠ꧈ ꦭꦶꦟ꧀ꦣꦸꦁꦨꦹꦩꦶꦏ꧀ꦠꦸꦒ꧀ꦲꦸꦢꦤ꧀ꦲꦮꦸꦒꦼꦉꦃꦏꦶꦭꦠꦮꦶꦊꦠꦤꦶꦁꦤꦨꦱ꧀ꦒꦭ꧈ ꦒꦸꦤ꧀ꦠꦸꦠ꧀ꦠꦁꦂꦫꦲꦶꦩꦮꦴꦤꦿꦶꦏꦴꦩ꧀ꦥꦸꦢꦤꦤꦁꦏꦸꦗꦤꦏꦸꦲꦏꦩꦴꦠꦶꦠꦤ꧀ꦥꦒꦥ꧀ ꧅ 5. a. nāhan hinghanirān bhaṭāra girinātha sakala matĕmah prabhūttama b. na lwir sādĕgireka nangsaya wabhūmicawatĕluk umungkulādara c. wiprakṣa triya waiśya śudra caturaśrama sama nipuṇeng samāhita d. hĕntyang durjana marya buddhi kala kewala matakut i wīrya sang prabhū ꦤꦴꦲꦤ꧀ꦲꦶꦔꦤꦶꦫꦴꦤ꧀ꦨꦛꦴꦫꦒꦶꦫꦶꦤꦴꦡꦱꦏꦭꦩꦠ꧀ꦩꦃꦥꦿꦨꦹꦠ꧀ꦠꦩ꧈ ꦤꦭ꧀ꦮꦶꦱꦴꦂꦢꦼꦒꦶꦫꦺꦏꦤꦁꦱꦪꦮꦨꦹꦩꦶꦕꦮꦠ꧀ꦭꦸꦏꦸꦩꦸꦔ꧀ꦏꦸꦭꦴꦢꦫ꧈ ꦮꦶꦥꦿꦏ꧀ꦱꦠꦿꦶꦪꦮꦻꦯꦾꦯꦹꦢꦿꦕꦠꦸꦫꦯꦿꦩꦱꦩꦤꦶꦥꦸꦟꦺꦁꦱꦩꦴꦲꦶꦠꦴ꧈ ꦲꦼꦤ꧀ꦠꦾꦁꦢꦸꦗ꧀ꦗꦂꦤꦩꦪꦾꦂꦧꦸꦢ꧀ꦣꦶꦏꦭꦏꦺꦮꦭꦩꦠꦏꦸꦠꦶꦮꦶꦪꦾꦂꦱꦁꦥꦿꦨꦹ ꧅ ꧐ ꧅ Om nathaya namostu te stutinin atpada ri pada bhatara nityaça, san suksmen tlen in samadi çiwa budda (92b) sira sakala niskalatmaka, san çri parwwatanatha nathanin anatha sira ta patiniɳ jagatpati, san hyan nin hyan inisty acintyanin acintya hana waya tmahnren jagat. Byapi byapaka sarwwatatwagata niguna sira rin apaksa wesnawa, rin yogiçwara porusen kapila jambhala sakala siran / hyan in dana, çri wagindra siran hyan in sakalaçastra manasija siren smaragama, rin wighnotsarana prayoga yamaraja sira makapalaɳ jagaddita. Nahan don umastuti padanirahyun umiketa kate nareçwara, san çri natha ri wilwatikta haji rajasanagara wiçesa bhupati, saksat / janma bhatara natha siran anhilanaken i kalankaniɳ praja, hentyan bhumi jawatibhakti manukula tumuluy i tken digantara. Riɳ çaka rttu çarena rakwa ri wijil/ nrpati tlas inastwaken/ prabhu, an/ garbbheçwara natha rin kawuripan/ withaganiran manusadbhuta, lindun bhumi ktug hudan hawu gerh kilat awiltan in nabhastala, guntur ttan himawan/ ri kampud ananaɳ kujana kuhaka mati tanpagap. Nahan/ hinaniran bhatara girinatha sakala matmah prabhuttama, na lwir sadegirekanaɳ sayawabhumi cawa tluk umungku(93a)l adara, wipra ksatriya waiçya çudra catur açrama sama nipunen samahita, hentyan durjjana maryyabuddi kala kewala matakut i wiryya san prabhu.
Pupuh 2	← Pupuh 1 Kakawin Nāgarakṛtâgama by Mpu Prapañca Pupuh 2 Pupuh 3 → 64370Kakawin Nāgarakṛtâgama — Pupuh 2Mpu Prapañca Pupuh 2 – Sragdharā 1. a. ndan sang śrī Rājapatni prakaśita sira mātāmaha śrī narendra b. sang lwir pāwak bhaṭārī paramabhagawati catraning rāt wiśeṣa c. utsāhêng yoga buddhasmaraṇa ginĕngirān cīwari wṛddhamuṇḍi d. ring śāka dṛṣṭi sāptāruṇa kalahanirān mokta mungsir kabuddhan. ꦤ꧀ꦢꦤ꧀ꦰꦁꦯꦿꦷꦫꦴꦗꦥꦠ꧀ꦤꦶꦥꦿꦏꦯꦶꦠꦱꦶꦫꦩꦴꦠꦴꦩꦲꦴꦯꦿꦷꦤꦫꦺꦤ꧀ꦢꦿ꧈ ꦱꦁꦭ꧀ꦮꦶꦥꦴꦂꦮꦏ꧀ꦨꦛꦫꦸꦥꦫꦩꦨꦒꦮꦠꦶꦕꦠꦿꦤꦶꦔꦿꦴꦠ꧀ꦮꦶꦯꦺꦰ꧈ ꦈꦠ꧀ꦰꦴꦲꦼꦁꦪꦺꦴꦒꦧꦸꦢ꧀ꦣꦱ꧀ꦩꦫꦟꦒꦶꦤꦼꦔꦶꦫꦴꦤ꧀ꦕꦷꦮꦫꦶꦮꦽꦢ꧀ꦣꦩꦸꦟ꧀ꦣꦶ꧈ ꦫꦶꦁꦯꦴꦏꦢꦽꦰ꧀ꦛꦶꦱꦥ꧀ꦠꦴꦫꦸꦟꦏꦭꦲꦤꦶꦫꦴꦤ꧀ꦩꦺꦴꦏ꧀ꦠꦩꦸꦔ꧀ꦰꦶꦠ꧀ꦏꦂꦧꦸꦢ꧀ꦣꦤ꧀ ꧅ 2. a. Ry antuk śrī rājapatnī jinapada kawkas duḥkitang rāt byamoha b. ry ādĕg śrī nātha munggw ing Majapahit tumuluy tuṣṭa manggöng kabhaktin c. rena śrī natha sang śrī Tribhūwana jiwayottunggal dewi gumanti d. Munggw ing rājyerikang jīwanapura sira tāmwang mwang i śrī narendra ꦪꦾꦂꦤ꧀ꦠꦸꦏ꧀ꦯꦿꦷꦫꦴꦗꦥꦠ꧀ꦤꦷꦗꦶꦤꦥꦢꦏꦮ꧀ꦏꦱ꧀ꦢꦸꦃꦏꦶꦠꦔꦿꦴꦠ꧀ꦨꦾꦩꦺꦴꦲ꧈ ꦪꦾꦴꦂꦢꦼꦒ꧀ꦯꦿꦷꦤꦴꦡꦩꦸꦔ꧀ꦒ꧀ꦮꦶꦁꦩꦙꦥꦲꦶꦠꦸꦩꦸꦭꦸꦪ꧀ꦠꦸꦰ꧀ꦛꦩꦔ꧀ꦒꦼꦴꦁꦏꦨꦏ꧀ꦠꦶꦤ꧀꧈ ꦫꦺꦟꦯꦿꦷꦤꦴꦡꦱꦁꦯꦿꦷꦠꦿꦶꦨꦹꦮꦤꦗꦷꦮꦪꦺꦴꦠ꧀ꦠꦸꦔ꧀ꦒꦢꦺꦮꦶꦒꦸꦩꦤ꧀ꦠꦶ꧈ ꦩꦸꦔ꧀ꦒ꧀ꦮꦶꦁꦫꦴꦗꦾꦺꦫꦶꦏꦁꦗꦷꦮꦤꦥꦸꦫꦱꦶꦫꦠꦴꦩ꧀ꦮꦁꦩ꧀ꦮꦔꦶꦯꦿꦷꦤꦫꦺ ꦤ꧀ꦢꦿ ꧅ ꧐ ꧅ Ndan / san çri rajapatni prakaçita sira matamaha çri narendra, san lwir pawak / bhatari paramabhagawati catranin rat / wiçesa, utsahen yoga buddasmarana gineniran / ciwari wrddamundi, rin çaka drsti saptaruna kalahaniran / mokta munsir kkabuddan. Ryyantuk / çri rajapatni jinapada kawkas / duhkitan rat byamoha, ryyadeg / çri natha mungwin majhapakit umuluy / tusta mangon kabhaktin, rena çri natha san çri tribhuwana jiwayottungal dewi gumanti, mungwin rajyerikan jiwanapura sira tamwaɳmwan i çri narendra.
Pupuh 3	← Pupuh 2 Kakawin Nāgarakṛtâgama by Mpu Prapañca Pupuh 3 Pupuh 4 → 64370Kakawin Nāgarakṛtâgama — Pupuh 3Mpu Prapañca Pupuh 3 - śārdūlawikrīḍita 1. a. tĕkwan bhakti sirān makêbu ri sira śrī rājapatniśwari b. satyānūt brata paksa sogata masangskāre dagan sang pĕjah c. tan sah śrī kṛtawarddhaneśwara pitā de śrī narendrādhipa d. sedampaty apagĕh sirêng sugatamārgângde sukhaning jagat ꦠꦼꦏ꧀ꦮꦤ꧀ꦨꦏ꧀ꦠꦶꦱꦶꦫꦴꦤ꧀ꦩꦏꦺꦧꦸꦫꦶꦱꦶꦫꦯꦿꦷꦫꦴꦗꦥꦠ꧀ꦤꦶꦯ꧀ꦮꦫꦶ꧈ ꦱꦠꦾꦴꦨꦹꦠ꧀ꦧꦿꦠꦥꦏ꧀ꦱꦱꦺꦴꦒꦠꦩꦱꦁꦱ꧀ꦏꦴꦫꦺꦢꦒꦤ꧀ꦰꦁꦥ꧀ꦗꦃ꧈ ꦠꦤ꧀ꦰꦃꦯꦿꦷꦏꦽꦠꦮꦢ꧀ꦣꦂꦤꦺꦯ꧀ꦮꦫꦥꦶꦠꦴꦢꦺꦯꦿꦷꦤꦫꦺꦤ꧀ꦢꦿꦴꦣꦶꦥ꧈ ꦱꦺꦢꦩ꧀ꦥꦠꦾꦥꦒꦼꦃꦱꦶꦫꦺꦁꦱꦸꦒꦠꦩꦴꦒ꧀ꦒꦂꦔ꧀ꦢꦺꦱꦸꦏꦤꦶꦁꦗꦒꦠ꧀ ꧅ 2. a. ndan śrī bhūpati sang pitā nṛpati munggw ing singhasāry apagĕh b. sākṣāt hyang wawa ratnasambhawa sirān mānggĕh parārtang jagat c. dhirôtsāha sirê kadṛddhyanikanang rāt satya bhaktyê haji d. lagyānggĕgwani karya sahana kādy akṣātidakṣêng naya ꦤ꧀ꦢꦤ꧀ꦯꦿꦷꦨꦹꦥꦠꦶꦱꦁꦥꦶꦠꦴꦤꦽꦥꦠꦶꦩꦸꦔ꧀ꦒ꧀ꦮꦶꦁꦱꦶꦔ꧀ꦲꦱꦴꦪꦾꦂꦥꦒꦼꦃ꧈ ꦱꦴꦏ꧀ꦱꦴꦠ꧀ꦲꦾꦁꦮꦫꦫꦠ꧀ꦤꦱꦩ꧀ꦨꦮꦱꦶꦫꦴꦤ꧀ꦩꦴꦔ꧀ꦒꦶꦃꦥꦫꦴꦠ꧀ꦠꦁꦂꦗꦒꦠ꧀꧈ ꦣꦶꦫꦺꦴꦠ꧀ꦰꦴꦲꦱꦶꦫꦺꦏꦢꦽꦢ꧀ꦣꦾꦤꦶꦏꦤꦁꦫꦴꦠ꧀ꦰꦠꦾꦨꦏ꧀ꦠꦾꦺꦲꦗꦶ꧈ ꦭꦒꦾꦴꦔ꧀ꦒꦼꦒ꧀ꦮꦤꦶꦏꦪꦾꦂꦱꦲꦤꦏꦴꦣꦾꦤ꧀ꦱꦴꦠꦶꦢꦏ꧀ꦱꦺꦁꦤꦪ ꧅ ꧐ ꧅ Tekwan bhakti siran makebu ri sira çri ra japatniçwari, satyanut / brata paksa sogata masaɳskare dagan san pjah, tan sah çri krtawardaneçwara pita de çri narendradipa, sedampatyapageh sireɳ sugatamarggande sukhanin jagat. Ndan/ çri bhupati san pita nrpati mungwin sinhasaryy apageh, saksat/ hyan wawa ratnasambhawa siran mangeh pararttan jagat(93b) dirotsaha sire kadrddyanikanan rat/ satya bhaktye haji, lagyangegwani karyya sahana kadyaksatidaksen naya.
Pupuh 4	← Pupuh 3 Kakawin Nāgarakṛtâgama by Mpu Prapañca Pupuh 4 Pupuh 5 → 64370Kakawin Nāgarakṛtâgama — Pupuh 4Mpu Prapañca Pupuh 4 – Mahāmālikā 1. a. muwah ibu haji sang narendrānujā de hajīng jiwana b. prakaśita haji rājadewī mahārājasānindita c. sira ta siniwi ring dāha nopamêng paring sadguṇa d. samasa kalawan hajing jiwana lwir sudewyāpalih ꦩꦸꦮꦲꦶꦧꦸꦲꦗꦶꦱꦁꦤꦫꦺꦤ꧀ꦢꦿꦴꦤꦸꦗꦴꦢꦺꦲꦗꦷꦁꦗꦶꦮꦤ꧈ ꦥꦿꦏꦯꦶꦠꦲꦗꦶꦫꦴꦗꦢꦺꦮꦷꦩꦲꦴꦫꦴꦗꦱꦴꦤꦶꦤ꧀ꦢꦶꦠ꧈ ꦱꦶꦫꦠꦱꦶꦤꦶꦮꦶꦫꦶꦁꦢꦴꦲꦤꦺꦴꦥꦩꦺꦁꦥꦫꦶꦁꦱꦢ꧀ꦒꦸꦟ꧈ ꦱꦩꦱꦏꦭꦮꦤ꧀ꦲꦗꦶꦁꦗꦶꦮꦤꦭ꧀ꦮꦶꦱꦸꦂꦢꦺꦮꦾꦴꦥꦭꦶꦃ ꧅ 2. a. priya haji sang umunggw ing wĕngkĕr bangun hyang upendrānurun b. nṛpati wijaya rājasānopameng paramajñottama c. samasarna kalawan nṛpati singhasāry akapakṣāpa ... d. sira wihikan ing thāni yāwat sabhūmi Jawa ꦥꦿꦶꦪꦲꦗꦶꦱꦔꦸꦩꦸꦔ꧀ꦒ꧀ꦮꦶꦁꦮꦼꦔ꧀ꦏꦼꦧꦔꦸꦤ꧀ꦲꦾꦔꦸꦥꦺꦤ꧀ꦢꦿꦴꦤꦸꦫꦸꦤ꧀꧈ ꦤꦽꦥꦠꦶꦮꦶꦗꦪꦫꦴꦗꦱꦴꦤꦺꦴꦥꦩꦺꦁꦥꦫꦩꦘꦺꦴꦠ꧀ꦠꦩ꧈ ꦱꦩꦱꦩꦏꦭꦮꦤ꧀ꦤꦽꦥꦠꦶꦱꦶꦔ꧀ꦲꦱꦴꦪꦾꦂꦏꦥꦏ꧀ꦱꦴꦥ...꧈ ꦱꦶꦫꦮꦶꦲꦶꦏꦤꦶꦁꦡꦴꦤꦶꦪꦴꦮꦠ꧀....ꦱꦨꦹꦩꦷꦗꦮ ꧅ ꧐ ꧅ Muwah ibu haji saɳ narendranuja de hajiɳ jiwana, prakaçita haji rajadewi maharajasanindita, sira ta siniwi riɳ daha nopameɳ pariɳ sadguna, samasa kalawan hajiɳ jiwana Iwir sudewyapalih. Priya haji san umungwin wenker banun hyan upendranurun, nrpati wijaya rajasanopamenɳ paramajnottama, samasama kalawan/ nrpati sinhasaryyakapaksapa…. sira wihikan iɳ thani yawat/ sabhumi jawa.
Pupuh 5	← Pupuh 4 Kakawin Nāgarakṛtâgama by Mpu Prapañca Pupuh 5 Pupuh 6 → 64370Kakawin Nāgarakṛtâgama — Pupuh 5Mpu Prapañca Pupuh 5 - Praharṣinī 1. a. wwantĕn tāri haji ri wilwatikta rājñi b. sang munggw ing lasĕm anuraga ring kahaywan c. putrī śrī narapati ring dahā prakāśa d. sang śrī rājasa duhitêndu dewyanindya ꦮ꧀ꦮꦤ꧀ꦠꦼꦤ꧀ꦠꦴꦫꦶꦲꦲꦗꦶꦫꦶꦮꦶꦭ꧀ꦮꦠꦶꦏ꧀ꦠꦫꦴꦘꦶ꧈ ꦱꦁꦩꦸꦔ꧀ꦒ꧀ꦮꦶꦁꦭꦱꦼꦩꦤꦸꦫꦒꦫꦶꦁꦏꦲꦪ꧀ꦮꦤ꧀꧈ ꦥꦸꦠꦿꦷꦯꦿꦷꦤꦫꦥꦠꦶꦫꦶꦁꦢꦲꦴꦥꦿꦏꦴꦯ꧈ ꦱꦁꦯꦿꦷꦫꦴꦗꦱꦢꦸꦲꦶꦠꦺꦤ꧀ꦢꦸꦢꦺꦮꦾꦤꦶꦤ꧀ꦢꦾ ꧅ 2. a. ndan śrī warddhana duhitêśwari pamungsu b. rājñī munggw ing pajang anopamêng raras rūm c. putrī śrī nṛpati ri jīwana prakāśa d. an sākṣāt anuja tĕkapnirang narendrā ꦤ꧀ꦢꦤ꧀ꦯꦿꦷꦮꦢ꧀ꦣꦂꦤꦢꦸꦲꦶꦠꦺꦯ꧀ꦮꦫꦶꦥꦩꦸꦔ꧀ꦰꦸ꧈ ꦫꦴꦘꦷꦩꦸꦔ꧀ꦒ꧀ꦮꦶꦁꦥꦗꦔꦤꦺꦴꦥꦩꦼꦁꦫꦫꦱꦿꦹꦩ꧀꧈ ꦥꦸꦠꦿꦷꦯꦿꦷꦤꦽꦥꦠꦶ ꦫꦶꦗꦷꦮꦤꦏꦴꦯ꧈ ꦄꦤ꧀ꦰꦴꦏ꧀ꦱꦴꦠꦤꦸꦗꦠꦼꦏꦥ꧀ꦤꦶꦫꦁꦤꦫꦺꦤ꧀ꦢꦿꦴ ꧅ ꧐ ꧅ Wwanten tari haji ri wilwatikta rajni, san mungwiɳ lasem anuraga rin kahaywan, putri çri narapati rin daha prakaça, san çri rajasa duhitendu dewyanindya. Ndan çri warddana duhiteçwari pamunsu, rajñi mungwin pajan anopameɳ raras rum, putri çri nrpati ri jiwana prakaça, an/ saksat anuja tkapniraɳ narendra.
Pupuh 6	← Pupuh 5 Kakawin Nāgarakṛtâgama by Mpu Prapañca Pupuh 6 Pupuh 7 → 64370Kakawin Nāgarakṛtâgama — Pupuh 6Mpu Prapañca Pupuh 6 - śārdūlawikrīḍita 1. a. penan śrī naranātha kapwa ta huwus labdha bhiṣeka prabhū b. sang nātheng matahun priya nṛpati sang rājyêng lasĕm suśrama c. sang śrī rājasa warddhana prakaśitêng rūpādhi wijñêng naya d. tan pendah smarapinggalā patĕmu sang nāthenaḷm ning jagat ꦥꦺꦤꦤ꧀ꦯꦿꦷꦤꦫꦤꦴꦡꦏꦥ꧀ꦮꦠꦲꦸꦮꦸꦱ꧀ꦭꦧ꧀ꦣꦨꦶꦰꦺꦏꦥꦿꦨꦹ꧈ ꦱꦁꦤꦴꦡꦺꦁꦩꦠꦲꦸꦤ꧀ꦥꦿꦶꦪꦤꦽꦥꦠꦶꦱꦁꦫꦴꦗꦾꦺꦁꦭꦱꦼꦩ꧀ꦰꦸꦯꦿꦩ꧈ ꦱꦁꦯꦿꦷꦫꦴꦗꦱꦮꦢ꧀ꦣꦂꦤꦥꦿꦏꦯꦶꦠꦺꦁꦫꦹꦮꦴꦣꦶꦮꦶꦘꦺꦁꦤꦪ꧈ ꦠꦤ꧀ꦥꦺꦤ꧀ꦢꦃꦱ꧀ꦩꦫꦥꦶꦔ꧀ꦒꦭꦴꦥꦠꦼꦩꦸꦱꦁꦤꦴꦡꦺꦤꦊꦩ꧀ꦤꦶꦁꦗꦒꦠ꧀ ꧅ 2. a. sang nāthêng paguhan priya nṛpati sang rājī pratiṣṭhe Pajang b. khyātī śrī nṛpa singhawarddhana surūpānwam suśilāpagĕh c. aśry āwarṇa sanatkumāra saha dewidhā papanggihnira d. bhakti jöng haji māsih awwang anak angde tuṣṭani nāgara ꦱꦁꦤꦡꦺꦁꦥꦒꦸꦲꦤ꧀ꦥꦿꦶꦪꦤꦽꦥꦠꦶꦱꦁꦫꦴꦘꦷꦥꦿꦠꦶꦰ꧀ꦛꦺꦥꦗꦁ꧈ ꦏꦾꦴꦠꦷꦯꦿꦷꦤꦽꦥꦱꦶꦔ꧀ꦲꦮꦢ꧀ꦣꦂꦤꦱꦸꦫꦹꦥꦴꦤ꧀ꦮꦩ꧀ꦰꦸꦯꦶꦭꦴꦥꦒꦼꦃ꧈ ꦄꦯꦿꦾꦴꦮꦟ꧀ꦤꦂꦱꦤꦠ꧀ꦏꦸꦩꦴꦫꦱꦲꦢꦺꦮꦶꦣꦴꦥꦥꦔ꧀ꦒꦶꦃꦤꦶꦫ꧈ ꦨꦏ꧀ꦠꦷꦗꦼꦴꦁꦲꦗꦶꦩꦴꦱꦶꦲꦮ꧀ꦮꦔꦤꦏꦔ꧀ꦢꦺꦠꦸꦰ꧀ꦛꦤꦶꦤꦴꦒꦫ ꧅ 3. a. tĕkwan wṛddhy awĕke narendrā sang umunggw ing wirabhūmy angḍiri b. sang śrī nāgarawarddhani pratīta rājñī kānyakānopama c. ndan rantĕn haji rāja ratw ing Mataram lwir hyang Kumārānurun d. sang śrī Wikramawarddhaneśwara paningkah śrī Narendrādhipa ꦠꦼꦏ꧀ꦮꦤ꧀ꦮꦽꦢ꧀ꦣꦾꦮ꧀ꦏꦺꦤꦫꦺꦤ꧀ꦢꦿꦴꦱꦁꦔꦸꦩꦸꦔ꧀ꦒ꧀ꦮꦶꦁꦮꦶꦫꦨꦹꦩꦾꦁꦣꦶꦫꦶ꧈ ꦱꦁꦯꦿꦷꦤꦴꦒꦫꦮꦢ꧀ꦣꦂꦤꦶꦥꦿꦠꦷꦠꦫꦴꦘꦷꦏꦴꦤꦾꦏꦴꦤꦺꦴꦥꦩ꧈ ꦤ꧀ꦢꦤꦿꦤ꧀ꦠꦼ ꦤ꧀ꦲꦗꦶꦫꦴꦗꦫꦠ꧀ꦮꦶꦁꦩꦠꦫꦩ꧀ꦭ꧀ꦮꦶꦲꦾꦁꦂꦏꦸꦩꦴꦫꦴꦤꦸꦫꦸꦤ꧀꧈ ꦱꦁꦯꦿꦷꦮꦶꦏꦿꦩꦮꦢ꧀ꦣꦂꦤꦺꦯ꧀ꦮꦫꦥꦤꦶꦔ꧀ꦏꦃꦯꦿꦷꦤꦫꦺꦤ꧀ꦢꦿꦴꦣꦶꦥ ꧅ 4. a. wungsu śrī nṛpati Pajang siniwi munggw i pawwanawwan purī b. rājñī śrī surawarddhanī nwamira wāla lwir hajĕngning tulis c. sakweh śrī yaja rāja sapaḍa madudwan nagarātunggalan d. ekhasthāna ri Wilwatikta mangisapwī sang narendrādhipa ꦮꦸꦔ꧀ꦰꦸꦯꦿꦷꦤꦽꦥꦠꦶꦥꦗꦁꦱꦶꦤꦶꦮꦶꦩꦸꦔ꧀ꦒ꧀ꦮꦶꦁꦥꦮ꧀ꦮꦤꦮ꧀ꦮꦤ꧀ꦥꦸꦫꦷ꧈ ꦫꦴꦘꦷꦯꦿꦷꦱꦸꦫꦮꦢ꧀ꦣꦂꦤꦷꦤ꧀ꦮꦩꦶꦫꦮꦴꦭꦭ꧀ꦮꦶꦲꦂꦗꦼꦁꦤꦶꦁꦠꦸꦭꦶꦱ꧀꧈ ꦱꦏ꧀ꦮꦺꦃꦯꦿꦷꦪꦮꦫꦴꦗꦱꦥꦣꦩꦢꦸꦢ꧀ꦮꦤ꧀ꦤꦒꦫꦴꦠꦸꦔ꧀ꦒꦭꦤ꧀꧈ ꦌꦏ ꦱ꧀ꦡꦴꦤꦫꦶꦮꦶꦭ꧀ꦮꦠꦶꦏ꧀ꦠꦩꦔꦶꦱꦥ꧀ꦮꦷꦱꦁꦤꦫꦺꦤ꧀ꦢꦿꦴꦣꦶꦥ ꧅ ꧐ ꧅ Penan / çri naranatha kapwa ta huwus/ labda bhiseka prabhu, saɳ nathen matahun / priya nrpati san rajyen lasem / suçrama san çri rajasa warddana prakaçjten rupa (94a) di wijñen naya, tan pendah smarapingala patemu saɳ nathenalm nin jagat. Saɳ nathen paguhan / priya nrpati san raji pratiste pajan, kyati çri nrpa sinhawarddana surupanwam / suçilapageh, açry awarnna sanatkumara saha dewida papangihnira, bhakti jöɳ haji masih awwan anak ande tustani nagara. Tekwan / wrddyawke narendra san umungwin wirabhumy andiri, san çri nagarawarddani pratita rajñi kanyakanopama, ndan / ranten/ haji raja ratwiɳ mataram / lwir hyaɳ kumaranurun, san çri wikramawarddaneçwara paninkah çri narendradipa. Wunsu çri nrpati pajaɳ siniwi muɳgwi pawwanawwan / puri, rajñi çri surawarddani nwamira wala lwir hajen nin tulis, sakweh çri yaja(1) raja sapada madudwan nagaratungalan, ekhasthana ri wilwatikta manisapwi san narendradipa.
Pupuh 7	← Pupuh 6 Kakawin Nāgarakṛtâgama by Mpu Prapañca Pupuh 7 Pupuh 8 → 64370Kakawin Nāgarakṛtâgama — Pupuh 7Mpu Prapañca Pupuh 7 – Jagaddhita 1. a. warṇan śrī naranātha kastawaniran dinakharasama digjaya prabhū b. bhraṣṭang śatru bangun tamiśra sahane bhūwana rinawasan nareśwara c. tuṣṭā sajjana pangajamam ikanang kujana kumuda satya satwikā d. sthityang ghrāma sabhūmy aweh dhana bangun jala hinaturakĕn ya sakrama 2. a. lwir sang hyang śatamanyu manghudani rāt haji tumulak i dūhkhaning prajā b. lwir hyang pitṛpati kaḍaṇḍaning anārya baruṇa ri katmwaning ḍana c. lwir hyang bāyu sirān tameng sakalaloka makaśaraṇa dūta nityaśa d. lwir pṛthwi ri karakṣaning pura katonanira kadi bhaṭāra candramā 3. a. ring warṇakṛti kāmadewa sakalānurun umulat i rāmyaning puri b. sakweh sang para putrikādika waḍū haji kadi pawibhajyaning ratih c. ndan sang śrī parameśwari swaduhitā nṛpati wijayarājasottama d. mukyāwarṇa susumnadewy anūpameng hayu tuhu sawawe nareśwara 4. a. tĕkwan wṛddi sirān pakānak i sirang nṛpati kusumawarddhanīśwarī b. rājī rājakumāry anindya siniwi pura ri kabalan utamêng raras c. sang śrī wikramawarddhanendra saniruktyanira pangucaping sanāgara d. sākṣāt dewata dewati siran atmwa hlam anukani twasing jagat Warnnan/ çri naranatha kastawaniran dinakharasama digjaya prabhu, bhrastan catru banun tamiçra sahane bhuwana rinawasan nareçwara, tusta sajjana panajamam ikanan kujana kumuda satya satwika, sthityan ghrama sabhumy aweh dana banun/ jala hinaturaken / ya sakrama. Lwir saɳ hyan ça-(94b) tamanyu manhudani rat / haji tumulak i duhkhanin praja lwir hyaɳ pitrpati kadandanin anaryya baruna ri katmwaniɳ dana, lwir hyaɳ bayu siran tamen sakalaloka makaçarana duta nityaça, lwir prthwi ri karaksanin pura katonanira kadi bhatara candrama. Riɳ warnnakrti kamadewa sakalanurun umulat i ramayaniɳ puri, sakweh san para putrikadika wadu haji kadi pawibhajyanin ratih, ndan san çri parameçwari swaduhita nrpati wijayarajasottama, mukyawarnna susumnadewy anupamen hayu tuhu sawawe nareçwara. Tekwan / wriddi siran / pakanak i siran nrpati kusumawarddaniçwari, raji rajakumaryy anindya siniwi pura ri kabalan utamen raras, saɳ çri wikramawarddanendra saniruktyanira panucapiɳ sanagara, saksat / dewata dewati siran atmwa hlam anukani twasin jagat.
Pupuh 8	← Pupuh 7 Kakawin Nāgarakṛtâgama by Mpu Prapañca Pupuh 8 Pupuh 9 → 64370Kakawin Nāgarakṛtâgama — Pupuh 8Mpu Prapañca Pupuh 8 – Sajenising Atikṛti 1. a. wārṇan tingkahikang purādbhuta kuṭanya bata bang umidĕr makandĕl aruhur b. kulwan ḍi dwura waktra mangharĕpakĕn lĕbuh agĕng i tĕngah way edran adalĕm c. brāhmāsthāna matunggalan pathani buddhi jajar inapi kapwa sök caracara d. ngkā tônggwan para taṇḍa tan pĕgat aganti kumĕmit i karakṣaning purasabhā 2. a. lor tang gopura śobhitābhinawa kontĕn ika wĕsi rinūpakāparimitā b. wetan saṇḍingikârja panggung aruhur patigan ika binajralepa maputih c. kānnah lor kidul i pĕkĕn rakĕt ikang yaśa wkasing apañjang adbhuta dahāt d. angkĕg caitra pahömaning bala samūha kidūl ika catuspathāhyang ahalĕp 3. a. alwāgimbar ikang wanguntur an hatur diśi watangan ikāwitāna ri tĕngah b. lor tang weśma panangkilan para bhūjangga khimuta para mantry alinggih apupul c. wetan nggwan para śewa boddha mawiwāda mucap aji sahopakāra wĕki sök d. prāyaścitta ri kālaning grahaṇa phalguṇa makaphala haywaning sabhūwana 4. a. kānnaḥ wetan ikang pahoman ajajar tiga-tiga ri tĕngah kaśaiwan aruhur b. nggwan sang wipra kidul paḍottama susun barat i natar ikābatur patawuran c. nggwan sang sogata lor susun tiga tikang wangunan i pucak ārja môkir-ukiran d. kapwāñjrah racananya puṣpa pinaran nṛpati satata yan hanoma mapupul 5. a. ngkānêng jro kiduling wanguntur ahlĕt palawanan ikana paśewan atathā b. weśmârjâjajar anghapit hawan angulwan i tĕngah ika tañjung angjrah askar c. ndah kulwan mahlĕt mūwah kidul i panggung ika balay aneka medran i tpi d. arddhâlwā ri tĕngah natar nikana maṇḍapa pasatan aśangkya lot mawurahan 6. a. ri jronyeki muwah paśewan akidul dudug angusi wijil kapingrwa ri dalĕm b. tingkahnyêki tinumpa-tumpa mahlĕt palawangan ikanang sapaṇṭa tiningkah c. kapwa wweśma subaddha watwan ika len saka balabag usuknya tan pacacadan d. sök dening bala hajy anangkil agilir makmit an umapekṣa wāra matutur Warnnan tinkah ikan puradbhuta kuthanya bata ban umider mmakandel aruhur, kulwan / di dwura waktra manharpakan lbuh agen i tnah way edran adalm, brahmasthana matungalan pathani buddi jajar inapi kapwa sök caracara, nka (95a) tongwan para tanda tan pgat aganti kumemit i karaksanin purasabha. Lor ttan gopura cobhitabhinawça konten ika wsi rinupakaparimita, wetan / sandin ikarjja pangun aruhur / patigan ika binajralepa maputih, kannah lor kkidul i pken / raket ikaɳ yaça wkasin apanjan adbhuta dahat, anken / caitra pahomaniɳ bala samuha kidul ika catuspathahyan ahalp. Slwagimbar ikan wanuntur an haturddiçi watanan ikawitana ri tnah, lor ttan weçma panankilan / para bhujanga khimuta para mantry alingih apupul, wetan / ngwan para çewa bodda mawiwada mucap aji sahopakara wki sök, prayaçcitta ri kalanin grahana phalguna makaphala haywanin sabhuwana. Kannah wetan ikan pahoman ajajar ttiga tiga ri tnah kaçaiwan aruhur, ngwan san wipra kidul padottama susun / barat i natar ikabatur patawuran, ngwan san sogata lor susun tiga tikaɳ wanunan i pucak arjja mokirukiran, kapwanjrah racananya puspa pinaran / nrpati satata yan hanoma mapupul. Nkaneɳ jro kidulin wanuntur ahlt / palawanan ika (95b) na paçewa atatha, wecmarjjajajar anhapit hawan anulwan i tnah ika tanjun anjran askar, ndah kulwan / mahlt muwah kidul i pangun ika balay aneka medran i tpi, arddalwa ri tnah natar nikana mandapa pasatan açankya lot mawurahan. Ri jronyeki muwah paçewan akidul / dudug anusi wijil kapiɳrwa ri dalm, tinkahnyeki tinumpatumpa mahlt / palawanan ikanaɳ sapanta tininkah, kapwa wweçma subadda watwan ika len / saka balabag usuknya tanpacacadan, sök deni bala hajy anankil agilir / makmit an umapeksa wara matutur.
Pupuh 9	← Pupuh 8 Kakawin Nāgarakṛtâgama by Mpu Prapañca Pupuh 9 Pupuh 10 → 64370Kakawin Nāgarakṛtâgama — Pupuh 9Mpu Prapañca Pupuh 9 – Sragdharā 1. a. nāhan lwirnyang manangkil pangalasan ingaran kwehnya tanpa pramāṇa b. tan palwir nyū gaḍing janggala Kaḍiri sĕḍah panglarang rājadewī c. waiśangkā wwang panewwan kṛtapura sinlir mwag jayeng prang jayāgöng d. angreyok kayw apu wwang jaladhi pasuruhan sāmajāḍi prakirṇa 2. a. nāhan tāḍinya munggwing watangan alun-alun tan pĕgat lot maganti b. taṇḍa mwang gusti wadwā haji muwah ikang amwang tuhan ring yawābāp c. mukyang munggw ing wijil pikalih aḍika bhayangkāryapintāpupul sök d. lor ning dwāre dalĕm nggwanya kidul ika para kṣatriya mwang bhūjanggā 3. a. ngkānêng bāyabya ri paścima midĕr umārêng mṛtyūdeśa yaśākweh b. sar sök de sang sumantry āmawa pinituha ring wirabhṛtyān panangkil c. anyat kannah kidul pāntaran ika lawangan maṇḍapa mwang gṛhâkweh d. sar sök de bhṛtya sa śri nṛpati ri paguhan nītyakālan paśewa 4. a. ngkāne jroning wijil ping kalih arĕja natarnyāratālwātiśobha b. sök weśma mwang witanābhinawa papupulan sang manangkil marêng jro c. wetan têkang gṛhānopama wangunan ikāśry aruhur sôpacara d. nggwan śrī nāthan paweh śewa ring umarĕk umunggw ing witanāprameya Nahan lwirnyan manankil panalasan inaran / kwehnya tanpa pramana, tanpalwir nyu gadin jangala kadiri sdah panlaran rajadewi, waiçanka wwan panewwan / krtapura sinlir mwaɳ jayeɳ praɳ jayagon, anreyok kaywapu wwan jaladi pasuruhan / samajadi prakirnna. Nahan tadinya mungwiɳ watanan alunalun tan / pgat lot maganti, tanda mwan gusti wadwa haji muwah ikan amwan tuhan / rin yawabap, mukyan mungwin wijil / pi kalih adika bhayankaryyapintapu (96a) pul / sök, lor niɳ dware dalm / ngwanya kidul ika para ksatriya mwan bhujanga. Nkanen bayabya ri paçcima mider umaren mrtyudeça yaçakweh, sar sök de san sumantryamawa pinituha rin wirabhrtyan panankil, anyat kannah kidul / pantaran ika lawanan / mandapa mwan grhakweh, sar sok de bhrtya sa çri nrpati ri paguhan nityakalan paçewa. Nkane jronin wijil pin kalih arja natarnyaratalwatiçobha, sok / weçma mwan witanabhinawa papupulan / san manankil maren jro, wetan tekan grhanopama wanunan ikaçry aruhur sopacara, ngwan / çri nathan paweh çewa rin umarek umungwin witanaprameya.
Pupuh 10	← Pupuh 9 Kakawin Nāgarakṛtâgama by Mpu Prapañca Pupuh 10 Pupuh 11 → 64370Kakawin Nāgarakṛtâgama — Pupuh 10Mpu Prapañca Pupuh 10 - Dhṛti 1. a. warṇan warṇa ni sang manangkil irikang witānā satatā b. mantrī wṛddha parārya len para pasangguhan sakaparĕk c. mwang sang pañca ri Wilwatikta mapagĕh dĕmung kanuruhān d. tansah rangga tumĕnggung uttamani sang marĕk wĕki pĕnuh 2. a. kwehning weśapūri kamantryaning amātya ring sanāgara b. doning bhāṣa parāpatih pāra dĕmung sakalan apupul c. anghing sang juruning watĕk pangalasan mahīngan apagöh d. pañcākwehnira mantry anindita rumakṣa kāryya ri dalĕm 3. a. ndan sang kṣatriya len bhujangga ṛṣi wipra yapwan umarĕk b. ngkāne höbning aśokha munggwi hiringing witānā mangadĕg c. dharmmādhyakṣa kalih lawan sang upapatti sapta dulur d. sang tuhw ārya lĕkasnirān pangaran ārya yukti satirun Warnnan / warnna ni saɳ manankil irikaɳ witana satata, mantri wrdda pararyya len para pasanguhan / sakapark, mwaɳ saɳ pança ri wilwatikta mapageh dmuɳ kanuruhan, tansah ranga tumengun uttama ni saɳ mark / wki pnuh. Kweh nin wecapuri kamantryan in amatya riɳ sanagara,doniɳ bhasa parapatih para dmuɳ sakalan apupul, anhiɳ saɳ juruniɳ watek / panalasan / mahinan apagöh, pancakwehnira mantry anindi- (96b) ta rumaksa karyya ri dalm. Ndan / saɳ ksatriya len / bhujanga rsi wipra yapwan umark, nkane höbnin açokha mungwi hiriniɳ witana maaadeg, darmmadyaksa kalih lawan / san upapatti sapta dulur, saɳ tuhw aryya lkasniran / panaran aryya yukti satirun.
Pupuh 11	← Pupuh 10 Kakawin Nāgarakṛtâgama by Mpu Prapañca Pupuh 11 Pupuh 12 → 64370Kakawin Nāgarakṛtâgama — Pupuh 11Mpu Prapañca Pupuh 11 – Jagaddhita 1. a. nā lwir sang marĕkira witāna pinake dalĕm inapi rinangga śobhitā b. ring jro pūrwa sakê wijil pisan adoh piningit ikang umañjingê dalĕm c. ndan sang śrī nṛpati singhawarddhana kidul saha yugāla saputraputrīkā d. lor sang śrī kṛtawarddhaneśwara bangun surapada tiga tang purāpupul 2. a. sakwehning gṛha nora tanpa śaka môkir-ukiran apĕnĕd winarṇana b. mwang têkang batur aśmawiṣṭaka mirah wintu wĕtu pinik rinūpakā c. ñjrah têkang wijiling kulāla pinakottamani hatĕp ikang gṛhādhikā d. tañjung keśara cāmpakādinikanang kusuma caracarāñjrah hing natār Na lwir saɳ mark iɳ witana pinake dalm inapi rinanga çobhita, riɳ jro purwwa sake wijil / pisan adoh pininit ikan umanjine dalm, ndan saɳ çri nrpati sinhawarddana kidul / saha yugala saputraputrika, lor saɳ çri krtawarddaneçwara banun/ surapada tiga taɳ purapupul. Sakweh niɳ grha nora tanpa çaka mokirukiran apned / winarnnana, mwaɳ tekaɳ batur acmawistaka mirah wintuwtu pinik / rinupaka, njrah tekaɳ wijiliɳ kulala pinakottamani hatep ikaɳ grhadika, tanjuɳ keçara campakadinikanaɳ kusuma caracaranjrah hiɳ natar.
Pupuh 12	← Pupuh 11 Kakawin Nāgarakṛtâgama by Mpu Prapañca Pupuh 12 Pupuh 13 → 64370Kakawin Nāgarakṛtâgama — Pupuh 12Mpu Prapañca Pupuh 12 – śārdūlawikrīḍita 1. a. warnan tingkahikang pikandĕl atat hātut kaṇṭaning nāgara b. wetan sang dwija śaiwa mukya sira ḍanghyang brāhmarājādhikā c. ngkānêng dakṣiṇa boddha mukyang anawung sangkā karĕngkannadī d. kulwan kṣatriya mantri punggawa sagotra śrī narendrādhipa 2. a. wetan dan mahlĕt lĕbuh pura narendrêng Wĕngkĕr atyādbhutā b. sākṣāt Indra lawan Saci nṛpati lawan sang narendrêng Dahā c. sang nāthêng Matahun narendra ri Lasĕm munggw ing dalĕm tan kasah d. kannah dakṣiṇa tan madoh kamĕgĕtan sang nātha śobhāhalĕp 3. a. ngkānêng ūttara lor sakêng pĕkĕn agöng kuww ahalĕp śobhitā b. sang sākṣāt ari de nareśwara ri Wĕngkĕr sang makuww āpagöh c. satyāsih ri narendrâdhira nipuṇêng nityâpatih ring Dahā d. khyat ing rāt mangaran bhaṭāra narapaty āngde halĕpning prajā 4. a. wetan lor kuwu sang Gajah Mada patih ring Tikta Wilwādhikā b. mantrī wīra wicakṣanêng naya matanggwan satya bhaktyaprabhū c. wāgmī wāk padu sārjawôpasama dīhotsāha tan lālana d. rāja dhyakṣa rumakṣa ri sthiti narendrān cakrawartting jagat 5. a. nda ngkāne kidul ing purī kuwu kadharmādhyakṣan arddhāhalĕp b. wetan rakwa kaśaiwan ūttama kaboddhākulwan naśryātathā c. tan warṇan kuwu sang sumantry adhikā len mwang sang para kṣatriyā d. dening kwehnira bheda ri sakuwu-kuww āngde halĕpning pura 6. a. lwir candrāruṇa têkanang pura ri Tikta śrī phalanôpama b. tejânggĕhnikanang karang sakuwu-kuww akweh madudwan halĕp c. lwir tārāgraha têkanang nāgara śeṣannekha mukyang Dahā d. mwang Nūṣāntara sarwwa maṇḍalitā rāṣṭrā ngaśrayākweh marĕk Warnnan tinkah ikaɳ pikandel atathattut kantaniɳ nagara, wetan / saɳ dwija çaiwa mukya sira danhyaɳ brahmarajadika, nkaneɳ daksina bodda mukyan anawuɳ sanka karnkannadi, kulwan / ksatriya mantri pungawa sa gotra çri narendradipa. Wetan dan mahlt / lbul pura narendreɳ wenker atyadbhuta, saksat indra lawan saci nrpati lawan saɳ narendreɳ daha, saɳ natheɳ matahun / narendra ri lasem / mungwiɳ dalm tan kasah, kannah daksina tan madoh kamgetan / saɳ natha çobhahalp. Nkaneɳ uttara lor sakeɳ pken agoɳ kuww ahalp / çobhita, saɳ saksat ari de nareçwara ri wenker saɳ makuww apagoh, satyasih ri narendradira nipuneɳ nityapatih rin daha, kyatin rat / manaran / bhatara narapaty ande halp niɳ praja. Wetan lor kuwu saɳ gajahmada patih riɳ tiktawilwadika, mantri wira wicaksaneɳ naya matangwan / satya bhaktyaprabhu, wagmi wak padu sarjjawopasama, dihotsaha tan lalana, raja dyaksa rumaksa ri sthiti narendran cakrawarttiɳ jagat. Nda nkane kidul iɳ puri kuwu kadarmmadyaksan arddahalp, wetan rakwa kaçaiwan uttama kaboddakulwan naçryatatha, tan warnnan kuwu saɳ sumantry adika len / mwan saɳ para ksatriya, deniɳ kwehnira bheda ri sakuwukuww ande halp niɳ pura. Lwir ccandraruna tekanaɳ pura ri tikta çri phalanopama, tejangeh nikanaɳ karaɳ sakuwukuww akweh madudwan halp,lwir ttaragraha tekanaɳ nagara çesannekha mukyaɳ daha,mwaɳ nusantara sarwwa mandalita rastra naçrayakweh mark.
Pupuh 13	← Pupuh 12 Kakawin Nāgarakṛtâgama by Mpu Prapañca Pupuh 13 Pupuh 14 → 64370Kakawin Nāgarakṛtâgama — Pupuh 13Mpu Prapañca Pupuh 13 - Suwadanā 1. a. lwirning nūṣa pranūṣa pramukha sakahawat kṣoni ri Malayu b. nang Jāmbi mwang Palembang Karitang i Tĕba len Dharmāśraya tumūt c. Kaṇḍis Kahwas Manangkabwa Siyak i Rĕkan Kāmpar mwang i Pane d. Kāmpe Haru āthawe Maṇḍahiling i Tumihang Parlak mwāng i Barat 2. a. hi lwas lāwan Samudra mwang i Lamuri Batan Lāmpung mwang i Barus b. yekāḍinyang watĕk bhūmi Malayu satanah kapwāmatĕh anūt c. len tekang nūṣa Tañjungnāgara ri Kapuhas lawan ri Katingān d. Sāmpit mwang Kūṭalingga mwang i Kūṭawaringin Sambas mwang i Lawai Lwir niɳ nusa pranusa pramukha sakahawat / ksoni ri malayu, naɳ jambi mwaɳ palembaɳ karitan i teba len / darmmaçraya tumut, kandis kahwas manankabwa ri siyak i rkan / kampar mwan i pane, kampe harw athawe mandahilin i tumihaɳ parllak / mwan i barat. Hi lwas lawan samudra mwan i lamuri batan lampuɳ mwaɳ i barus, yekadinyaɳ watek / bhumi malayu satanah kapwamateh anut. len tekaɳ nusa tañjuɳ nagara ri kapuhas lawan ri katinan, sampit / mwaɳ kutalinga mwan i kutawarinin / sambas mwan i lawai.
Pupuh 14	← Pupuh 13 Kakawin Nāgarakṛtâgama by Mpu Prapañca Pupuh 14 Pupuh 15 → 64370Kakawin Nāgarakṛtâgama — Pupuh 14Mpu Prapañca Pupuh 14 - Pṛthwī 1. a. Kaḍangḍangan i Laṇḍa len ri Samĕḍang Tirĕm tan kasah b. ri Seḍu Buruneng ri Kalka Saluḍung ri Solot Pasir c. Baritw i Sawaku muwah ri Tabalung ri Tuñjung Kute d. Lawan ri Malano makapramukha ta ri Tañjungpuri 2. a. ikang sakahawan Pahang pramukha tan Hujung Medini b. ri Lĕngkasuka len ri Sai mwang Kalantĕn i Tringgano c. Naśor Paka Muwar ḍungun ri Tumasik ri sang hyang Hujung d. Kĕlang Kĕda Jĕre ri Kañjap i Niran sanuṣa pupul 3. a. sawetan ikanang Tanah Jawa muwah ya warnanĕn b. ri Balli makamukya tang Baḍahulu mwang i Lwā Gajah c. Gurun makamukha Sukun ri Taliwang ri Ḍompo Sapi d. ri sang hyang Api Bhīma Śeran i Hutan Kaḍaly āpupul 4. a. muwah tang i Gurun sanūṣa mangaran i Lombok Mirah b. lawan tikang i Sākṣāk ādinīka Lun kahajyan kabeh c. muwah tanah i Bāntayan pramukha Bāntayan len Luwuk d. tĕkeng Uḍa makatrayādhinikanang sanūṣâpupul 5. a. ikang saka sanūṣa-nūṣa Makasar Butun Banggawi b. Kunir Galiyahu mwang i Salaya Sūmba Solot Muwar c. muwah tikang i Waṇḍan Ambwan āthawā Maloko Wwanin d. ri Seran i Timur makādining angeka nūṣātutur Kadaɳdanan i landa len ri samdaɳ tirm tan kasah, ri sedu buruneɳ ri kalka saluduɳ ri solot / pasir, baritw i sawaku muwah ri tabaluɳ ri tuñjuɳ kute, lawan ri malano makapramukha ta ri tañjuɳpuri. Ikaɳ sakahawan pahaɳ pramukha taɳ hujuɳ medini, ri lnkasukha len ri saimwan i kalanten i tringano, naçor pa-(98a)kamuwar dunun ri tumasikh / ri saɳhyaɳ hujuɳ, klaɳ keda jere ri kañjap i niran / sanusa pupul. Sawetan ikanaɳ tanah jawa muwah ya warnnanen, ri balli makamukya taɳ badahulu mwan i lwagajah, gurun makamukha sukun / ri taliwaɳ ri dompo sapi, ri saɳhyan api bhima Ã§eran i hutan kadaly apupul. Muwah tan i gurun sanusa manaran ri lombok mirah, lawan tikan i saksak adinikalun / kahajyan kabeh, muwah tanah i banatayan pramukha banatayan len / luwuk, tken uda makatrayadini-kanaɳ sanusapupul. Ikaɳ saka sanusanusa makhasar butun / bangawi, kunir ggaliyau mwan i salaya sumba solot / muar, muwah tikhan i wandan ambwan athawa maloko wwanin, ri seran i timur makadinin aneka nusatutur.
Pupuh 15	← Pupuh 14 Kakawin Nāgarakṛtâgama by Mpu Prapañca Pupuh 15 Pupuh 16 → 64370Kakawin Nāgarakṛtâgama — Pupuh 15Mpu Prapañca Pupuh 15 - Śikhariṇī 1. a. nāhan lwir ning deśāntara kacaya de śrī narapatī b. tuhun tang SyangkÂyodhyapura kimutang Dharmanāgarī c. marūtma mwang ring rājapura nguniweh Singhanagarī d. ri Cāmpa Kāmbojānyat i Yawana mitrêka satatā 2. a. kunang têkang nūṣa Madhura tatān ilwing parapurī b. ri denyān tunggal mwang Yawadhārani rakwaikana dangū c. samudra nanggung bhūmi kĕta śaka kalanya karĕngö d. tĕwĕknyan dadyāpāntara sasiki tatwanya tan adoh 3. a. huwus rabḍang dwīpāntara sumiwi ri śrī narapati b. paḍāsthity awwat pāhuḍama wijil angkĕn pratimasa c. sake kotsāhan sang prabhū ri sakhahaywanyan iniwö d. bhūjangga mwang mantrînutus umahalot patti satatā Nahan / lwir niɳ deçantara kacaya de çri narapati, tuhn / taɳ synakayodyapura kimutaɳ darmmanagari, marutma mwaɳ riɳ rajapura nuniweh sinhanagari, ri campa kambojanyat i yawana mitreka satata. Kunaɳ tekaɳ nusa madura tatan ilwiɳ parapuri, ri denyan tungal / mwaɳ yawadarani rakwaikana danu, samudra(1) nanguɳ(2) bhumi(3) kta ça- (98b) ka kalanya karnö, teweknyan dadyapantara sasiki tatwanya tan adoh. Kuwus rabdaɳ dwipantara sumiwi ri asri narapati, padasthity awwat / pahudama wijil anken / pratimasa, sake kotsahan / saɳ prabhu ri sakhahaywanyan iniwö, bhujanga mwaɳ mantrinutus umahalot / patti satata.
Pupuh 16	← Pupuh 15 Kakawin Nāgarakṛtâgama by Mpu Prapañca Pupuh 16 Pupuh 17 → 64370Kakawin Nāgarakṛtâgama — Pupuh 16Mpu Prapañca Pupuh 16 – Wilāsinī 1. a. kramanika sang bhūjanggan umarêng digantara dangū b. hinilahilān swakārya jaga dona tan swang alahā c. wĕnang ika yan pakon nṛpati sing parāna ta kunang d. magĕhakna Śiwagama phalanya tan panasara 2. a. kunang ika sang bhūjangga sugatabratêki karĕngö b. apituwin ajña hajya tan asing paranan tikā c. hinilahila sakulwan ikanang Tanah Jawa kabeh d. taya ring usāna Boddha mara rakwa sambhawa tinūt 3. a. tuhun ikanang digantara sawetaning yawadhara b. i gurun i Bāli mukya kawĕnang parānaktikā c. samāyanirang mahāmuni Bharaḍa rakwa mapagĕh d. lawan ikha sang munîndra kuturan prakāśa karĕngö 4. a. karaṇa ni sang bhūjangga tinitah ri lakwa rasikha b. ikang inutus mangulwana ngawetanakrama huwus c. saji-saji ning lumakwakĕn i sājña sang narapatī d. sawiku sadā yan āngujar aweh rĕṣĕ pning umulat 5. a. irika tang anyabhūmi sakhahĕmban ing Yawapurī b. amatĕh i sājña sag nṛpati khapwa satya ring ulah c. pituwi sing ājña langghyana dinon wiśīrṇa sahana d. tĕkap ikanang watĕk jaladhi mantry aneka suyaśa Krama nika saɳ bhujangan umareɳ digantara danu, hinilahilan / swakaryya jaga dona tan swan alaha, wnan ika yan / pakon / nrpati siɳ parana ta kunaɳ, magehakna çiwagama phalanya tan / panasara. Kunan ika saɳ bhujanga sugatabrateki karnö, apituwin ajña hajya tan asiɳ(4) paranan tika, hinilahila sakulwan ikanaɳ tanah jawa kabeh, taya rin usana bodda mara rakwa sambhawa tinut. Tuhun ikanaɳ digantara sawetaniɳ yawadara, i gurun i bali mukya kawnaɳ paranaktika, samayaniraɳ mahamuni bharada rakwa mapageh, lawan ikha saɳ munindra kuturan / prakaça karnö. Karana ni saɳ bhujanga tinitah ri lakwa rasikha, ikan inutus manulwana nawetanakrama huwus, saji saji niɳ lumakwakn i sajña saɳ narapati, sawiku sada yan anujar aweh rse- (99a) pnin umulat. Irika tan anyabhumi sakhahemban iɳ yawapuri, amateh i sajna saɳ nrpati khapwa satya rin ulah, pituwi sin ajñalanghyana dinon / wiçirnna sahana, tkap ikanaɳ watek / jeladi mantry aneka suyaça.
Pupuh 17	← Pupuh 16 Kakawin Nāgarakṛtâgama by Mpu Prapañca Pupuh 17 Pupuh 18 → 64370Kakawin Nāgarakṛtâgama — Pupuh 17Mpu Prapañca Pupuh 17 – Jagaddhita 1. a. sāmpun rabḍa pagĕhnyadĕg nṛpati ring Yawaḍaraṇi jayêng digantara b. ngkāne śrī Phalatiktanāgara sirān siniwi mulahakĕn jagaddhitā c. kīrṇa ikang yaśa kīrti dharma ginaweniran anukhani buddhining para d. mantrī wīpra bhūjangga sang sama wineh wibhawa tumut akīrti ring jagat 2. a. göngning wīrya wibhūti kagraha tĕkap nṛpati tuhu tuhûttama prabhū b. lilā nora kasangśayāniran anamtami sukha sakaharṣaning manah c. kānyā sing rahajöng ri Janggala lawan ri Kaḍiri pinilih sasambhawa d. astām tang kahañang sakêng parapurā sing arĕja winawe dalĕm purī 3. a. salwāning yawabhūmi tulya nagarī sasikhi ri pangadĕg narādhipā b. mewwiwwang janadeśa tulya kuwuning bala mangidĕr i khaṇṭaning purī c. sang lwirning paranuṣa tulya nika thāniwiṣaya pinahasuka inaris d. lwir ūdyana tikang wanādri sahananya jinajar hira tan panangśaya 4. a. bāryyan māsa ri sāmpuning śiśirikāla sira mahas-ahas macangkrama b. wwantĕn thāny angaran ri sima kidul i jalagiri mangawetan ing purā c. rāmyâpan papunnagyaning jagat i kālaning sawung ika mogha tan pĕgat d. mwang wewe pikatan ri caṇḍi lima lot paraparanira tuṣṭa lālana 5. a. yan tan mangka marêng phalah marĕk i jöng hyang acalapati bhakti sādara b. pantĕs yan panulus ḍatĕng ri balitar mwang i jimur i śilāhrit alĕngöng c. mukyang polaman ing dahe kuwu ri linggamarabangun ika lanenusī d. yan ring Janggala lot sabhā nṛpati ring Surabhaya manulus mare buwun 6. a. ring śākākṣatisūrya sang prabhū mahas ri Pajang iniring ing sanāgara b. ring śākāngganagaryamā sira marê Lasĕm ahawan i tīraning pasir c. ri dwārādripanendu palĕngĕngirêng jaladhi kidul atūt wanālaris d. ngkānêng loḍaya len tĕtör i siḍĕman jinajahira langönya yênitung 7. a. ndān ring śāka śaśangka nāga rawi bhadrapadamasa ri tambwanging wulan b. sang śrī Rājasanāgarān mahas-ahas ri Lamajang angitung sakendriyan c. sakweh śrī Yawarāja sapriya muwah tumut i haji sabhṛtyawāhana d. mantrī taṇḍa sawilwatikta nguniweh wiku haji kawirājya mangdulur 8. a. ngkāng teking maparab Prapañca tumut anglĕngĕng angiring i jöng nareśwara b. tan len sang kawi putra sang kawi samênaka dinulur anānmatêng mangö c. dharmādhyakṣa kasogatan sira tĕkap narapati sumilih ri sang yayah d. sakweh sang wiku boddha mangjuru paḍângatuturakĕn ulahnirêng dangu 9. a. ndān tingkah rakhawīn marĕk ri haji dug raray atutur aśewa tan salah b. pinrihnyê hati rakwa milwa saparā narapatin amalar kasanmatā c. nghing tapwan wruh apet langö pisaningun tĕtĕsa maminta gīta ring karas d. nā hetunya kamārṇa deśa sakamarga ngaranika riniñci tūt hawan 10. a. tāmbening kahawan winārṇa ri Japan kuṭi kuṭi hana caṇḍi sāk rĕbah b. wetan tang têbu pāṇḍawan ri daluwang babala muwah hi kañci tan madoh c. len têkang kuṭi rātnapangkaja muwah kuṭi haji kūṭi pangkajâdulur d. pañjrak maṇḍala len ri pongging i jingan kuwu hañār i samipaning hawan 11. a. prāptêng dharma ring pañcaśara tumuluy ḍatĕng i kapulungân sirâmĕgil b. ndān lampah rakawin lumāryâmĕgil ing waru ri hĕring i tira tan madoh c. anggânggĕhnya tĕkap bhaṭāra kuṭi ring suraya pagĕh mara cinārcakĕn d. nghing rakwan kasĕlang turung mulih amogha matutur atisāmbhramêng mangö Sampun / rabda pagehnyadeg / nrpati riɳ yawadarani jayeɳ digantara, nkane çriphalatiktanagara siran / siniwi mulahaken / jagaddita, kirnnaikaɳ yaça kirtti darmma ginaweniran anukhani buddiniɳ para, mantri wipra bhujanga saɳ sama wineh wibhawa tumut akirtti riɳ jagat. Göɳ niɳ wiryya wibhuti kagraha tkap / nrpati tuhutuhuttama prabhu, lila nora kasançayaniran anamtami sukha sakaharsaniɳ manah, kanya siɳ rahajöɳ ri jangala lawan / ri khadiri pinilih sasambhawa, astam taɳ kahañaɳ sakeɳ parapura sin arja winawe dalm puri. Salwaniɳ yawabhumi tulya nagari sasikhi ri panadeg / naradipa, mewwiwwaɳ janadeça tulya kuwuniɳ bala manider i khantaniɳ puri, saɳ lwir niɳ paranusa tulya nika thaniwisaya pinahasukainaris, lwir udyana tikaɳ wanadri sahananya jinajar hira tan panançaya. Baryyan / masa ri sampuniɳ çiçirikala sira mahasahas macaɳkrama, wwanten thany a- (99b) naran / ri sima kidul jalagiri manawetan iɳ pura, ramyapan / papunnagyaniɳ jagat i kalaniɳ sawun ika mogha tan pgat, mwaɳ wewe pikatan / ri candi lima lot paraparanira tusta lalana. Yan tan manka mareɳ phalah mark i jöɳ hyan acalapati bhakti sadara, pantes / yan panulus dateɳ ri balitar mwan i jimur i çilahrit alnöɳ, mukyaɳ polaman iɳ dahe kuwu ri lingamarabanun ika lanenusi, yan / riɳ jangala lot sabha nrpati riɳ surabhaya manulus mare buwun. Rin çakaksatisuryya saɳ prabhu mahas / ri pajan inirin iɳ sanagara, riɳ çakanganagaryyama sira mare lasem ahawan i tiraniɳ pasir, ri dwaradripanendu palnenireɳ jaladi kidul atut wanalaris, nkaneɳ lodaya len tetör i sideman / jinajahira lanönya yenituɳ. Ndan / riɳ çaka çaçanka naga rawi bhadrapadamasa ri tambwaniɳ wulan, saɳ çri rajasanagaran mahasahas / ri lamajan anituɳ sakhendriyan, sakweh çri yawaraja sapriya muwah tumut i haji sabhrtyawahana, mantri tanda sawilwatikta nuniweh wiku haji kawirajya maɳdulur. Nkan tekiɳ maparab / prapanca tumut aɳ- (100a) lnen anirin i jöɳ nareçwara, tan len / san kawi putra san kawi samenaka dinulur ananmateɳ manö, darmmadyaksa khasogatan / sira tkap / narapati sumilih ri saɳ yayah, sakweh saɳ wiku bodda maɳjuru pacdanatuturakhen ulahnireɳ danu. Ndan tinkah rakhawin mark / ri haji dug / raray atutur açewa tan salah, pinrihnye hati rakwa milwa sapara narapatin amalar kasanmata, nhiɳ tapwan / wruh apet lanö pisaninun / tetesa maminta gita riɳ karas, na hetunya kamarnna deça sakamargga naranika riniñci tut hawan. Tambeniɳ kahawan / winarnna ri japan / kuti kuti hana candi sak rbah, wetan taɳ tebu pandawan ri daluwaɳ babala muwah hi kanci tan madoh, len tekaɳ kuti ratnapankaja muwah kuti haji kuti pankajadulur, panjrak mandala len / ri pongin i jinan / kuwu hanar i samipanin hawan. Prapteɳ darmma riɳ pañcaçara tumuluy / datn i kapulunan siramgil, ndan lampah rakawin / lumaryyamgil iɳ waru ri herin i tira tan madoh, angangehnya tkap / bhatara kuti riɳ suraya pageh mara cinarccaken, nhiɳ rakwan kaslaɳ (100b) turuɳ mulih amogha matutur atisambhrameɳ manö.
Pupuh 18	← Pupuh 17 Kakawin Nāgarakṛtâgama by Mpu Prapañca Pupuh 18 Pupuh 19 → 64370Kakawin Nāgarakṛtâgama — Pupuh 18Mpu Prapañca Pupuh 18 – Sragdharā 1. a. y angkat śrī nātha sakêng kapulungan ikanang rājabhṛtya ngiring sök b. salwāning rājamargâparimita hibĕkan syandanômwat matāmbak c. wwangning wwang pekhaning peka tĕka saha padāti harĕp mwang ri wuntat d. dūdwang wadwā ḍarāt sĕh girimisĕn amĕḍĕp mwang Gajāśwādi kirṇa 2. a. nistanyāśangkya tang syāndana mapawilangan deni cihnanya bheda b. tĕkwan lāmpah nikāpaṇṭa tulis īka dudū ri sang mantrī samantrī c. rakryan sang mantri mukyāpatih i Majapahit sang praṇalen kaḍatwan d. pintĕn māwan śata syandana pulupulutan têki cihnanya nekā 3. a. sang śri nāthêng Pajang kwehni rathanira paḍācihnaning diwaśa śrī b. ndān śrī nāthêng Lasĕm sök rathanira matulis nandaka śweta śobha c. sang śrī nāthêng Daha cihna sadahākusuma syandanābhrātulis mās d. mukyang śrī jīwanendrāsakaṭa samasama cihna lobhêng lĕwih sök 4. a. ndan sang śrī Tiktawilwaprabhū sakaṭanirāśangkya cihnanya Wilwā b. gringsing lobhêng lĕwih lāka paḍa tinulis ing mās kajangnyān rinĕnggā c. salwirning punggawāmwat bini haji nguniweh nareśwari śrī Sudewī d. sakwehning pekabhāryā sakaṭanika sinang pangharĕpning sapaṇṭa 5. a. munggwing wuntat ratha śrī nṛpati rinacanang swarna rātna pradīpta b. anyāt lwirnyâtawing jampana sagala mawālwāhulap söngnya lumra c. kirṇêng wadwā ngiring Janggala Kaḍiri sĕḍah panglarang sök marampak d. āstam têkang bhayangkārya mawa-mawa dudūng bhṛtya munggwing gajāśwa 6. a. ndah praptêng pañjuran mungkur atiki larining syandaneñjing mararyan b. lampahning khawy animpang sumĕpĕr i sawungan manglawad wandhuwarga c. lingsirning Surya mangkat marĕngi ri haliwat śrī narendrān lumampah d. tūt marggâmūrwa śīghrān ḍatĕng î watukiken ri matañjung mararyan 7. a. deśâsimpar kaboddhan kaparĕk i tĕpining margâkaywanya poryang b. pratyekanye galanggang muwah ikang i Baḍung tan madoh mwang barungbung c. tan kāryânger manik towi kawiśaya ri yānatrayânggĕhnya mengöt d. sang dharmādhyakṣa śighran sinĕgĕhanika ring bhojanāpāna tuṣṭtā 8. a. sāmpun prāpte kulur mwang batang i gangan asĕm têki lampah narendrā b. tistis hyang Surya pintĕn ghaṭita pitu sirĕm kāmukhan sanghub awrā c. skandhāwāre tĕngahning harahara dinunung śrī narendrê kamantyan d. prāptāng wyāpāra sāmpun panaḍahira madum sthāna têking wwang akweh Yyankat / çri natha sakeɳ kapulunan ikanaɳ rajabhrtya niriɳ sök, salwaniɳ rajamarggäparimita hibkan / syandanomwat matambak, wwaɳ niɳ wwaɳ pekhaniɳ peka tka saha padati harp / mwaɳ ri wuntat, dudwaɳ wadwa darat / seh girimisen amedep / mwaɳ gajaçwadi kirnna. Nistanyaçankya taɳ syandana mapawilanan deni cihnanya bheda, tekwan lampah nikapanta tulis ika dudu ri saɳ mantri samantri, rakryan saɳ mantri mukyapatih i majhapahit / saɳ pranalen kadatwan, pinten / mawan çata syandana pulupulutan teki cihnanya neka. Saɳ çri natheɳ pajaɳ kwehni rathanira padacihnaniɳ diwaça çri, ndan / çri natheɳ lasem / sök / rathanira matulis / nandaka çweta çobha, saɳ çri natheɳ daha cihna sadahakusuma syandanabhratulis mas, mukyaɳ çri jiwanendrasakata samasama cihna lobheɳ lwih sök. Ndan saɳ çri tiktawilwaprabhu sakataniraçankya cihnanya wilwa, gritisiɳ lobhe lwih laka pada tinulis iɳ mas kajaɳnyan rinenga, salwirniɳ pungawamwat / bini haji nuniweh .. çwari çri sudewi,(101a) sakwehniɳ pekabharyya sakata nika sinaɳ panharpniɳ sapanta. Mungwiɳ wuntat / ratha çri nrpati rinacanaɳ swarnna ratna pradipta, anyat / lwirnyatawiɳ jampana sagala mawalwahulap / söɳnya lumra, kirnneɳ wadwa niriɳ jangala kadiri sdah paɳaraɳ sök marampak, astam tekaɳ bhayaɳkaryyamawamawa duduɳ bhrtya mungwiɳ gajaçwa. Ndah prapteɳ pañjuran / munkur atiki lariniɳ syandaneñjiɳ mararyyan, lampalfniɳ khawy animpan sumeper i sawunan / matilawad / wanduwargga, linsirniɳ suryya mankat marni ri haliwat / çri narendran lumampah, tut marggamurwwa çighran datn i watukiken / ri matañjuɳ mararyyan. Deçasimpar kkaboddan kapark i tpiniɳ marggakaywanya poryyaɳ, pratyekanye galangaɳ muwah ikan i baduɳ tan madoh mwaɳ baruɳbuɳ, tan karyyaner mmanik / towi kawiçaya ri yanatrayangehnya menöt, saɳ darmmadyaksa çighran / sinegehan ika riɳ bhojanapana tusta. Sampun / prapte kulur mwaɳ batan i ganan asem / teki lampah narendra, tistis / hyaɳ suryya pinten / ghatita pitu sirm kamukhan sanhub awra, skandaware tnah niɳ harahara dinunuɳ çri narendre kamantyan, praptan wyapara (101 b) sampun / panadahira madum / sthana tekiɳ wwan akweh.
Pupuh 19	← Pupuh 18 Kakawin Nāgarakṛtâgama by Mpu Prapañca Pupuh 19 Pupuh 20 → 64370Kakawin Nāgarakṛtâgama — Pupuh 19Mpu Prapañca Pupuh 19 – Jagaddhita 1. a. eñjing ry angkatirang narendrā ḍatĕng anghinĕp i Bhayalangö tigang kulĕm b. sah sangkêrika tang kĕdu dawa rame janapada kahalintangan huwus c. rig lampĕs ri timĕs muwah kuṭi ri pogara kahnū lĕbuhnika gĕnĕt d. mwang ring maṇḍala hambulu traya tĕkê Ḍaḍap adulur ikang rawālaris 2. a. wwantĕn dharmā kasogatan prakāśitê madakaripura kastawêng langö b. sīmānugraha bhūpatil sang apatih Gaja Mada racaṇanyan uttama c. yekānung dinunung nareśwara pasanggrahanira pinĕnĕd rinūpakā d. andondok mahawan rikang trasungay andyus i capahan atīrthaśewana Eñjiɳ ryyankatiraɳ narendra datn anhinep i bhayalanö tigaɳ kulm, sah sankerika taɳ kedu dawa rame janapada kahalintanan huwus, riɳ lampes / ri times muwah kuti ri pogara kahnu lbuh nika gnet, mwaɳ riɳ mandala hambulu traya tke dadap adulur ikaɳ rawalaris. Wwanten / darmma kasogatan / prakaçite madakaripura kastaweɳ lanö, simanugraha bhupati san apatih gajamada racalnanyan uttama, yekanuɳ dinunuɳ nareçwara pasangrahanira pinened rinupaka, andondok mahawan / rikaɳ trasunay andyus i capahan atirthaçewana.
Pupuh 20	← Pupuh 19 Kakawin Nāgarakṛtâgama by Mpu Prapañca Pupuh 20 Pupuh 21 → 64370Kakawin Nāgarakṛtâgama — Pupuh 20Mpu Prapañca Pupuh 20 - Śardūlawikrīḍita 1. a. prāptang deśa kasogatan sahana mawwat bhakta pāne hajī b. pratyekanya gapuk sadewi śiṣayêngi iśānabajrâpagĕh c. gantĕn poh capahan kalampitan ing lumbang len kuran we pĕtang d. mwang pañcar prasamāngśaning kuṭi mungguh kapwa tāśrang mamarĕk 2. a. milwang deśa ri tunggilis pabayĕman rowangnya nekâpupul b. rehnyāngśê kuṭi rātnapangkaja hane caccan kabhūktyāpatĕh c. nāhan ta pabalas kasogatan an angśānggĕhnya kuww apagĕh d. bhūktinyan pan akarya kawwalu huwus tingkahnya ngūnī dangū Praptaɳ deça kasogatan / sahana mawwat bhakta pane haji, pratyekanya gapuk sadewi çisayen içanabajrapageh, ganten poh capahan kalampitan iɳ lumbaɳ len / kuran we ptaɳ, mwaɳ pañcar prasamança niɳ kuti munguh kapwa taçraɳ mamark. Milwaɳ deça ri tungilis pabayeman / rowaɳnya nekapupul, rehnyançe kuti ratnapankaja hane caccan kabhuktyapateh, nahan ta pabalas / kasogatan an ançangehnya kuww apageh, bhukti- (102a) nyan pan akaryya kawwalu huwus tinkahnya nuni danu.
Pupuh 21	← Pupuh 20 Kakawin Nāgarakṛtâgama by Mpu Prapañca Pupuh 21 Pupuh 22 → 64370Kakawin Nāgarakṛtâgama — Pupuh 21Mpu Prapañca Pupuh 21 – Śikhariṇī 1. a. byatītêñjing mangkat caritanikanang deśa kawahan, b. ring Lo Paṇḍak Raṇwakuning i Balerah Barubare, c. ḍawöhan lāwan Kapayĕman i Tĕlĕpak ri Barĕmi d. sapāng kaprāptan mwang kasaduran anujwing Pawijungan 2. a. jurang bobo runting mwang i pasawahan teki kahnū b. muwah prāptêng jalādhi patalap ika mwang ri paḍalī c. ring ārĕnnon lawan panggulan i payaman len tĕpasana d. tĕkêng rĕmbang prāptê kamirahan i pinggirning udadi Byatiteñjiɳ mankat / caritan ikanaɳ deça kawahan, riɳ lo pandak ranwakuniɳ i balerah barubare, dawöhan lawan kapayeman i telpak / ri barmi, sapan kapraptan / mwaɳ kasaduran anujwiɳ pawijunan. Juraɳ bobo runtiɳ mwan i pasawahan teki kahnu, muwah prapteɳ jaladi patalap ika mwaɳ ri padali, rin arnnon lawan pangulan i payaman / len tepasana, tkeɳ rmbaɳ prapte kamirahan i pingir nin udadi.
Pupuh 22	a. ndatan wicaritan kalangwan ikanang ranu masurawayan lawan tasik b. riy angkatira sah ḍatang ri wĕḍi ri guntur asĕnĕt i samīpaning hawan c. kasogatan i bajrākāngśa ri talaḍwaja tĕlas apagĕh cinarcakĕn d. dulurnya ri Patuñjungan kasĕlang i bala turung umulih marêng kuṭi 3. a. yatêka hinalintangan muwah amūrwa matut alas i tīraning pasir b. araryan irikang palumbwan aburu kṣaṇa lumaris i lingsiring rawi c. bhawiṣya hilintanging lwah i rabut lawang anuju surudnin ampuhan d. lurah ri balater linakwanira lālana mamĕgil i tīraning pasir 4. a. ring eñjing ahawan kunir basini sākṣaṇa ḍatĕng i saḍeng sirâmĕgil b. pirang wĕngi kunĕng lawasnira jĕnĕk mamĕng-amĕng i sarampwan ang1ĕngöng c. ri sahnira wawang tĕkê kuṭa bacok narapatin awilāśa ring pasir d. jĕnĕk lumihat ing karang kinasut ing ryak asira-sirat anghirib jawuh 5. a. tuhun rakhawi tan marê kuṭa bacok dumadak anut i simpanging hawan b. angūttara sakê saḍeng mahawan ing balung anuju ri tūmbu len habĕt c. muwah ri galagah ri tanpahing angāntya mĕgil i rĕṇĕs apty anangkilā d. amoghā kapapag narendrā mahawan Jayakṛta ri wanagriyâlaris I dampar i patuñjunan / nrpati lalana mahawan i tiraniɳ pasir, amurwwa hnu tut / hni ratarata nika magnet timbah iɳ ratha, araryyan i samipaniɳ talaga seh çarasija tarate pada skar, jnek mihat i posikiɳ makara riɳ wway ahnin i dalmnya waspada. Ndatan wicaritan kalanwan ikanan ranu masurawayan lawan tasik, riyankatira sah dataɳ ri wdi ri guntur asnet i samipaniɳ hawan, kasogatan i bajrakança ri taladwaja tlas apageh cinarccaken, dulurnya ri patuñjunan / kaslan i bala turun umulih mareɳ kuti. Yatekha hinalintanan / muwah amurwwa matut alas i tiraniɳ pasir, (102b) araryyan irikaɳ palumbwan aburu ksana lumaris i linsiriɳ rawi, bhawisya hilintaniɳ lwah i rabut / lawan anuju surud nin ampuhan, lurah ri balater / linakwanira lalana mamegil i tiraniɳ pasir. Rin eñjin ahawan kunir basini saksana datn i saden siramgil, piraɳ wni kuneɳ lawasnira jnek / mamnamn i sarampwan aɳlnöɳ, ri sahnira wawaɳ tke kura bacok / narapatin awilaça riɳ pasir, jnek lumihat iɳ karaɳ kinasut iɳ ryyak asirasirat anhirib / jawuh. Tuhun rakhawi tan mare kuta bacok / dumadak anut i simpanin hawan, anuttara sake sadeɳ mahawan iɳ balun anuju ri tumbu len habet, muwah ri galagah ri tanpahin anantya mgil i rnes apty anankila, amogha kapapag / narendra mahawan / jayakrta ri wanagriyalaris.
Pupuh 23	Pupuh 23 – Wangśasthā 1. a. ri ḍoni bĕṇṭong puruhan lawan bacĕk b. pakhis haji mwang Padangan sĕcang c. ri jāti gumlar kawahān śilā bhango d. angūttarêng dewarame tĕkê ḍukun 2. a. muwah lumāmpah ḍatĕnging Pakāmbangan b. rikā mĕgil sang prabhū sākṣanān laku c. ḍatang tangsil wwitaning lurah ḍaya d. linakwan aglis ḍatĕnging jurang ḍalĕm 3. a. ikang wahan dug mangalor sakeng tasik b. ri sandĕng andĕ nikha durggāmā rupök c. lumud jawuh sĕngkanikān paḍâlĕyö d. aneka tang syāndana sak silih pagut Ri doni bentoɳ puruhan lawan bacek, pakhis haji mwaɳ padanan / scaɳ, ri jati gumlar kkawahan çila bhano, anuttareɳ dewarame tke dukun. Muwah lumampah datniɳ pakambanan, rika mgil / saɳ prabhu saksanan laku, dataɳ tansil / wwitaniɳ lurah daya, linakwan aglis / datniɳ juraɳ dalm. Ikaɳ wahan dug manalor sakeɳ tasik, ri sanden ande nikha durgga- (103a) ma rupök, lumud jawuh sengkanikan padalyö, aneka taɳ syandana sak / silih pagut.
Pupuh 24	Pupuh 24 - Śikhariṇī 1. a. tuhun maglis dug ri palayangan awarṇâlayang adoh b. ri bāngkong konang tan parana mamĕgil śīghra lumaris c. paḍâmrih prāpta ring śaraṇa tikanang wwang maśaraṇa d. waneh śīghra prāptêng surabhaṣarabādning wwang angiring 2. a. sirĕpning ngwai mandālangalang i tĕkānyêng alang-alang b. ri caṇḍyān dĕgnyaṇḍĕl sapinika waneh puh bĕsur angel c. bhawīṣyang yānângūttara turayan ang deśa kahawan d. paḍâśrwângkatnyâgyâtaki-tāki tĕkā ri Patukangan Tuhun maglis / dug / ri palayanan awarnnalayan adoh, ri baɳkoɳ konaɳ taɳ parana mamgil / çighra lumaris, padamrih prapta riɳ çarana tikanaɳ wwaɳ maçarana,waneh çighra prapteɳ surabhasarabadniɳ wwan aniriɳ. Sirpniɳ nwai mandalanalan i tkanyen alanalaɳ, ri candyan degnyandel / sapi nika waneh puh besur anel, bhawisyaɳ yana nuttara turayan an deça kahawan, padacrwankatnyagyatakitaki tka ri patukanan.
Pupuh 25	Pupuh 25 - Śārdūlawikrīḍita 1. a. tangeh yan caritan pratingkah ikanang swabhṛtya mantry adulur b. warṇan têki ḍatangnirê patukangan sang śrī narendrâpupul c. ngkānêng sāgaratīra kulwan ikanang tālākṛp alwâratā d. lor parṇahnya sakêng pakuwwan irikānggwan śrī narendrâmĕgil 2. a. sakweh sang para mantry amañcanāgarômunggwing pakuwwan kabeh b. mwang sang dhyakṣa pasangguhān rasika sang wangśâdhirājomarĕk c. tansah sang hupapatty anindita ḍang āścāryôttarânôpama d. śaiwāpañji mapañji sāntara widagḍêngi āgama wruh kawī Taneh yan caritan / pratinkah ikanaɳ swabhrtya mantry adulur, warnnan teki dataɳnire patukanan / saɳ çri narendrapuphul, nkaneɳ sagaratira kulwan ikanaɳ talakrp alwarata, lor parnnahnya sakeɳ pakuwwan irikangwan / çri narendramgil. Sakweh saɳ para mantry amancanagaromungwiɳ pakuwwan kabeh, mwaɳ saɳ dyaksa pasanguhan / rasika saɳ wançadirajomark, tansah san hupapatty anindita dan açcaryyottaranopama, çaiwapanji mapanji santara widagden agama wruh kawi.
Pupuh 26	Pupuh 26 - Kṛti 1. a. ndān mūkya dhipatīn pakuwwan apagöh sang arya śūrādhikāra b. sakwehning jajahan sakê Patukangan sampun ḍatang tan masowe, c. kapwâsrang mahatur-hatur paḍā sinūngan wastra buddhinya tuṣṭā d. tuṣṭanyângdani tuṣṭa ri nṛpati santuṣṭan jĕnĕk ring pakuwwan 2. a. wwantĕn rūpaka laryalaryan anĕngah sangke hujungning samudra b. waiśmâneka kikis tinap natar ikālwāpiṇḍa nūṣa sakêng doh c. mārggānyêki linantaran lĕyĕp awarṇânggung katon denikang ryak d. kīrti sang arya towi pasnāhe prāptya sang śrī narendrā Ndan mukya dipatin pakuwwan apagöh san aryya çuradikara sakweh niɳ jajahan / sa (103b) ke patukanan / sampun dataɳ tan masowe, kapwasraɳ mahaturhatur pada sinunan wastra buddinya tusta, tustanyandani tusta ri nrpati santustan / jnekj riɳ pakuwwan. Wwanten / rupaka laryyalaryyan annah sanke hujuɳnin samudra, waiçmaneka kikis tinap natar ikalwapinda nusan / sakeɳ doh, margganyeki linantaran / lyep awarnnanguɳ katon denikaɳ ryyak, kirtti san aryya towi pasnahe praptya saɳ çri narendra.
Pupuh 27	Jv/Kakawin Nāgarakṛtâgama/Pupuh 27 Nka çri natha maranlipur huyan i tiksaniɳ dinakara, saksat dewata dewatin saha khasihniratikatikan, wwaɳ ri jro sawan apsarin wahu sakeɳ wihaya madulur, moktaɳ klesa hidep nika mulat awarnna tibra kawnan. Tan tungal / tikanaɳ wiläça ginawe narendrakasukhan, siɳ wastwasuna tustacitta rikanaɳ pradeça winanun, baryyan karaktan / çramaçrama maweh jner nin umulat, singih dewa manindarat / juga siran lumanlan i jagat.
Pupuh 28	Jv/Kakawin Nāgarakṛtâgama/Pupuh 28 Pira teki lawasnira ri patukanan, para mantri ri bali ri madura dataɳ, ri balumbun andelan ika karuhun, sayawaksithi wetan umark apuphul. Pada bhakty ahatur pada masirasi(104a)ran, bawi mesa kbo sapi hayam asu sek, saha wastra pinundut adulur / hasusun, manahiɳ mulat adbhuta kadi tan i rat. Sakatembay in enjan atiki caritan, naranatha siradadar i bala kabeh,milu salwir ikaɳ para khawi sinunan, pada tusta ti para jana manalm.
Pupuh 29	Jv/Kakawin Nāgarakṛtâgama/Pupuh 29 Ndan saɳ kawy aparab / prapanca juga çokha tanari siwuhön, de saɳ kawy upapatti sogata mapañji krtayaça pjah, mitrangeh rasike kalanwan asih aɳdulur atakitaki, lagyamulyani kirtti pustaka tinumbas inapi tinnöt. Cittankwi rasikan katmwawarasanateramahasahas, nyama wruh ri parananiɳ mahas akirttya tilara kakawin, nunin matya jmah muwah sisip ikiɳ lara pinahalalu, mati pwa datninhulun / lwes aweh skel analahasa. Nahan karananiɳ wawaɳ sah umareɳ kta milu rumuhun, tal tungal halalaɳ dawa ri pacaron / kahawan i bunatan, prapteɳ toya runun / walandinanujwi tarapas amgil, enjiɳ laryy ahawan / lmah ban irikaɳ ksana datn i kta.
Pupuh 30	Jv/Kakawin Nāgarakṛtâgama/Pupuh 30 Rintar saɳ çri narapati n anulwan / muwah teki warnnan, çighra prapteɳ kta pili- (104b) pilih pañca ratrin pananti, sweccamarnna jalanidi n amangih muwah laryyalaryyan, ndatan dady alupa rin anukhane parapan ginöɳ twas. Kwehniɳ mantri kta pada mark nayya majña san aryya, wirapranadinikha milu saçewa boddopapatti, mwaɳ sakweh niɳ jajahan aniriɳ sök / dataɳ tan hinundaɳ, kapwawwat / bhojana sahana tustan / sinunan / suwastra.
Pupuh 31	Jv/Kakawin Nāgarakṛtâgama/Pupuh 31 Ri sahnira sakeɳ kta meweh ikaɳ swabhrtyaniriɳ, bañu hnin ikanaɳ hawan / wki dataɳ ri sampora sök, muwah ri dalman / tke wawaru riɳ binor hop / glisan, gban krp i glam / tke kalayu rajakaryyeniwö. Ikaɳ kalayu darmma sima sugatapratistapagöh, mahottama sujanma wandu haji saɳ dinarmmeɳ danu, nimittan i pakaryya karyya haji darmmakaryyadika, prasidda mamgat sigika wkas i sudarmmenulah. Ikaɳ widi widana sakrama tlas / gnep sankepan, makadyan upabhoga bhojana halp nikanopama, amatyagana samyasanghya çagiri dataɳ riɳ sabha, mrdanga padahatri megeliglan mahinan dina. Narendra ri huwusni karyyanira sestani twas ginöɳ, asiɳ sakapark / (105a) pradeça pinaran danondok dateɳ, piraɳ wni lawasnirerika pararttha mangöɳ sukha, surupa bini hajy ulihnira wiçesa kanyanulus. Ri sahnira sakeɳ kalayw i kutugan kahenwalaris, ri khebwan agen aglis engal amgil / ri kambaɳ rawl, sudarmma sugatapratista racananya çobhah halp,anugraha nareçwara san apatih pu naladika. Haturhatur i saɳ patih lwu halpnikanindita, byatita panadah narendra rikanaɳ prabhatocapen, umankat ahawan / ri halses i ba raɳ ri patuñjunan, anunten i patentenan tarub i lesan asrwalaris.
Pupuh 32	Jv/Kakawin Nāgarakṛtâgama/Pupuh 32 Cighran / datn i pajarakan pataɳ dina lawas narapatin amgil, nkaneɳ harahara kidul iɳ sudarmma sugatasana makuwukuwu, mantri wiku haji karuhun san aryya sujanottama parn umark, kapwanaturaken upabhogha bhojana wineh dana padakasukhan. Rintar narapatin alaris / wanaçrama ri sagara ktan usirn, senkan / hawanira manidul pakalyan i buluh kta kahaliwatan, mwaɳ mandala hikan i gde samantara ri sagara kta kadunuɳ, çobhabhinawa ri tnah i wa- (105b) naçri racananyan amulanunaken. Ndatan pijer umark i jön narendra rakawin / jnek anapi lanö, lanlaɳ lalita lali laleda lulwi lala meneh akalis in ulah, tamtam / tan atutur i tutur nikan tut i tatani san atakitaki, jañjan / jumalajah i jajar ni bañjar ikanaɳ yaça cinaracara. Prapteɳ pathani ri tpiniɳ tpas / tpus ika tpun atetel atöb, secca macamaca cacahanyan anracana bhasaracana kakawin, kwehniɳ yaça pada dinunam / wilapa dadakan / saha parab inamer, pancaksara ri wkasan iɳ pralapa sinamarsamar awtu lanö. Bwat / ranten atulis atulis katha patiga watw inasaban aruhur, jrah nagakusuma kusumanya riɳ natar i tira nikha pinarigi, andwaɳ karawira kayumas mnur / ccaracaranya saha kayu puriɳ, mwaɳ nyu gadin akunin ahandap ahwah i padunyan amuhara lanö. Tan neh yadi caritan ikaɳ wanaçrama lanönyan asmu siluman, tinkahnika ri dalm i heɳ mahogra tkap iɳ yaça pada hineduk, mwaɳ kweh parakaki nuniweh parendan atuhararay ahayu waged, oktaɳ mala kalusa mihat banun / wihikan iɳ çiwapada sakala.
Pupuh 33	Jv/Kakawin Nāgarakṛtâgama/Pupuh 33 (106a) nrpati mahas / rin açrama wawaɳ sinegeh sgehan, tkapira saɳ maharsi mapalingih açabda rsep, asun upabhoga salwir i bhinuktinire patapan, nrpati mals / yathakrama rin arttha lwes kasukhan. Panucapucapniran / gumunita rasaniɳ kawikun, pada mawarah. ri sesini manahnira tan rinnöt, wkasan acankrama lnen asiɳ kalanön pinaran, uhara ri tusta saɳ tapatapin / lumihat kawrian. Ri huwusiraɳlnön majar i saɳ sutapan muliha, vri wijiliralaris / hlahla lumihat kawkas, tapitapi siɳ raranwam ahajöɳ padakaryy anaraɳ, smara manurun mamañcana sireki hidepnyan aku.
Pupuh 34	Jv/Kakawin Nāgarakṛtâgama/Pupuh 34 Yyantuk narendra kari suksan açramoruk, priɳny kuçabeh abalut / ri matalupa ken, rigöɳ tanis / serh ikayam alas nikajrit, luh tusiɳ tal analh syu n ikan pasambat. Asrt lari nrpatin aglis apan tumampa, wehniɳ yaçarja kamargga tlas kalalwan, çighran dataɳ sira rin aryya saratry ananti, ñjiɳ manuttara bhawisya dataɳ ri gendiɳ. Saɳ mantry amañcanagari karuhun / san aryya, sinhadikara nuniweh para çaiwa bodda, apwa hatur ttadah anindita sopacara, 106b) mas / wastra nama pamals / nrpatin / suke twas. Arddalawas / nrpati tansah ananti masa, olahnireɳ sakuwukuww atikaɳ linolyan, yyankatniran hawan i lohgaway iɳ sumandiɳ, boraɳ banör barmi tut / hnu nuny anulwan.
Pupuh 35	Jv/Kakawin Nāgarakṛtâgama/Pupuh 35 Tuhun i datön nire pasuruhan manimpan anidul / ri kapañanan, nuluy atut damargga madulur tikaɳ ratha dateɳ rin andoh wawaɳ, uwah i kdu plukh / lawan i hambal antya nikaɳ pradeçenituɳ, jhathiti ri sinhasaripura rajadarmma dinunuɳ narendramgil. Kunen ika saɳ prapañca kari kulwan iɳ pasuruhan pijer lalana, kuti manaran / rindarbaru ri bhuh pradeçanikanaɳ pradeça hujuɳ, yata pinaran / tinakwanaken ança punpunanika ri saɳ sthapaka, likita tinonaken / rasika supraçasti winacamanun / waspada. Ikan i hepit / yathaswa salbak / wukirnya wisayança saɳ hyaɳ kuti, atnah i markkaman / sawah i balunhura sawah muwah riɳ hujuɳ, asanikanaɳ praçasti magawe hyunin kawi madoha sankeɳ pura, ri taya nikaɳ purakrttha t-her ddaridra musiraɳ kutindarbaru. Karananin açru mankat i huwusnira mpu masgeh bhawisyaɳ (107a) laris, maluy i kaçewakan / datn i sinhasari matutur manankil / mark, nrpati huwus mamuspa ri dalm / sudarmma sakatustaniɳ twas ginöɳ, hana ni kduɳ bhiru ri kacuranganan / mwan i burɳ lanonyenituɳ.
Pupuh 36	Jv/Kakawin Nāgarakṛtâgama/Pupuh 36 Ri huwusiran panarccana mijil / ri heɳ pinupul iɳ balakrama mark, ara wiku çai sogata sari aryya naligih iniri. Krama çubhakala sahnira ri sinhasari manidul mare kagnenan, humaturaken kabhaktin i bhatara darmma sawatek / wateknira tumut, dana paribhoga bhojana dulurni puspanira sopacara mahalp, saha wasanawawan / watan apanruhun padaha garjjitaɳ nwan umulat. Nirekhi tan adoh, awicaritan / sdeɳni panadah narendra tumkani sesta ri hati, bala haji siɳ sasambhawa wineh suwastra magawe rsepniɳ umulat.
Pupuh 37	Jv/Kakawin Nāgarakṛtâgama/Pupuh 37 Warnnan / pratinkah ikanaɳ sudarmma racananya tanpasirinan, waratiçobhiten saha mekale yawa ruhurnikaparimita, ri jro natar nika tinumpatumpa tinataɳ yaçar jja ri tpi, sök sarwwa puspa bakularjja nahi kusumadya warnna (107b) siluman. Prasada mungwi tnah asmu kadbhuta halp nika hyan aruhur, lwir meru parwwata çiwapratista çiwawimbha mungu ri dalm, sotan / bhatara girinathaputra pinakesti dewa sakala, angehniran tuhatuha narendra khinabhaktyan i sabhuwana. Wwanten / kteka kidul iɳ sudarmma ri dalm / pratista katilar, naɳ bhapra gopura padaruhur kkasugatan / bataɳ nika danu, ri jronya danka turunan baturnya kari purwwa kulwan anana, nhiɳ purnna sanghyarikha len pamujan atitah bataban aruhur. Naɳ lor batur ni turunanya çesani lmahnya sampun arata, rah nagapuspa tanemanya len tan i natar mmasmy asalaga, heɳ niɳ gupunten ikanaɳ pabhaktan aruhur lmahnya katilar, alwa natarnya dukutenj hnunya sukten hibek lumulumut. Lwir stry agrin anranehi ragi molm ikanaɳ cawinten awnes, morawra camara nika kusut / mapusek oli lot kapawanan, nyu danta lagi luluren / tapas nika pucanya tan kram asamun, moghalume sah i tapihnya taɳ çara gadiɳ tan aryyakusikan. Anrs twasiɳ mihat i reh nikan taya makosada- (108a) nya kawnana, nhin çri hayamwuruk inanti he twa ni tuwuhnya jiwana muwah, apan siramupus i kottaman / tama rin uttamanukani rat, masih rin atpada lanawlas i manemu duhkha dewa sakala. Warnnan / muwah lari nareçwareñjin umareɳ sudarmma ri kidal, ampun manamya ri bhatara linsir anuluy / dataɳ ri jajaghu, sampun muwah mark i saɳhyan arcca jinawimbha sonten amgil, enjiɳ maluy / musir i sinhasari tan alh mararyyan i burɳ.
Pupuh 38	Jv/Kakawin Nāgarakṛtâgama/Pupuh 38 Ramya nika bur talaga mumbul ahnin abhiru,candi çila minekala ri madya nika rinacana,sök / yaça mungwi pingir ikha len / kuçuma caracara,lot paraniɳ macankrama lanaɳjneki rin umara. Tan wuwusen lanö nika tuhun narapati caritan, tistisin arkka mankat ahawanj tgatgal aruhur,ramya dukut nikatetel atandes akiris hahijo, lwanya sasagaranak analun juran ikha dinelö. Cri naranatha lalana yaya rathanira malaris, prapta ri sinhasari tumame wgilanira huwus,. ndan rakawi ywa mampir i siraɳ sugata muniwara, sthapaka ri sudarmma tuwi go- (108b) tra sawala dununen. Wrdda halintan i çaçi sahaçra tuwuhira huwus, satya suçila satkula kadaɳ haji suyaça, purnna tameɳ kriya mara tan ankadara panagara, kyati ri mpunku huttama kasadpadanira satirun. Cighra kahançama ywa si wulatnira wawan asgeh, du lakhi bhagya san kawi san amrih amark i haji, saɳ wnan açrayan masiha ri kadan amlas arp, masku kadiɳ panipyan aparanta pasgeha temun. Ddon/ rakawin parahyun ataña krama ni tuhatuha, çri naranatha saɳ pada dinarmma satata pinark, mukya bhatara riɳ kagnenan/ karuhuna wuwusen, purwwakathanniran giripatiçwarasuta caritan.
Pupuh 39	Jv/Kakawin Nāgarakṛtâgama/Pupuh 39 Tuhun/ padukha mpunkwi munguh sirojar, udu diwya takwan/ rakawyanne twas, mahotsaha singih khawi wrdda buddi, purih nin kaçastrajan ande stutin rat. Nda saɳ tabya teki nhulun/ majarosen, maçucyawway iɳ saptatirtthe çwacitta, namas te girindraya sambah ri saɳhyaɳ, ndatan dadya kotpata teki mpaçabda. Ksama tah manah san kawindran/ rumenwa, ikaɳ wwan rnö sughyan akweha mitya, ndan angegwa- (109a) ne jana saɳ wrdda teka, pilih nyunaɳ sughyadika tañ calana.
Pupuh 40	Jv/Kakawin Nāgarakṛtâgama/Pupuh 40 Nuni çakabdi deçendu hana sira mahanatha yuddekawira, saksat/ dewatmakayonijatanaya tkap/ çri girindraprakaça, kapwars/ bhakti sakweh parajana sumiwi jöɳ nirattwaɳ tumunkul, çri rangah rajasa kyati naranira jayeɳ çatru çuratidaksa. Deçagöɳ wetaniɳ parbwata khawi pnuh iɳ sarwwabhogatiramya, kuww angehnyan kamantyran/ manaran i kutha rajenadeh wwaɳ nika bap, yeki ngwan/ çri girindratmajan umulahaken darmma mangön kaçuran, tustaniɳ sadu nastanin ahita ya sthityanin rat/ subhakti. Ri çakabdi krta çankara sira tumke çri narendraɳ kadinten, saɳ wiranindita çri krtajaya nipuneɳ çastra tatwopadeça, çighralah göɳ bhayamrih malajen anusup ajaran/ parçwaçunya, sakwehniɳ bhrtya mukyaɳ para pajurit asiɳ kari riɳ rajya çirnna. Ryyalah saɳ çri narendreɳ kadiri girigirin taɳ sabhumi jawars, praptanembah pada wwat/ sahanahana wijil niɳ swadeçan pasewa, tungal taɳ jangala mwaɳ khadiri samasamanekana (109b) thatiçanta, nkan tembenin dapur mwaɳ kuwu juru tumameɳ samya mande sukhen rat. Mankin/ wrddyameweh taɳ prabhawa wibhawa riɳ çri girindratmasunu, enak/ tandel nikaɳ yawadarani sumiwi jöɳ niran catranin rat, ri çakasyabdi rudra krama kalahaniran mantuk iɳ swarggaloka, kyanin rat/ saɳ dinarmma dwaya ri kagnanan/ ç çewabodden usana.
Pupuh 41	Jv/Kakawin Nāgarakṛtâgama/Pupuh 41 Bhatara san anusanatha wka de bhatara sumilih wiçesa siniwi, lawasniran amukti rin rat apageh tikaɳ sayawabhumi bhakti matutur, çakabdi tilakadri çambhu kalahan/ bhatara mulih iɳ girindrabhawana, sireki winanun/ pradipa çimbha rikaɳ sudarmma ri kidal. Bhatara wisnuwarddana kteka putranira saɳ gumanti siniwi, bhatara narasinha rowanira tulya madawa sahagrajamageh i rat, siranilanaken/ duratmaka manama lingapati mahi çirnna sahana, ars sahananiɳ paraɳmukha ri jöɳ nireki tuhu dewamurtti sakala. I çaka rasa parwwatenduma bhatara wisnwanabhiseka saɳ suta siwin, samasta para samya riɳ kadiri jangalomarkh amuspa riɳ urasabha, na- (110a) renda krtanagarekan abhisekanama ri siran huwus/ rakaçita, pradeça kutaraja mankin atiçobhitanaran i sinhasari nagara. Cakabda kanawawaniksithi bhatara wisnu mulih iɳ çuralaya pjah, dinarmma ta sire waleri çiwawimbha len/ sugatawimbha mungwiɳ jajaghu, samantara muwah bhatara narasinhamurtti sira mantuk iɳ surapada, hanar sira dinarmma de haji ri wenker uttama çiwarcca mungwi kumitir. Khathakna muwah narendra krtanagaranilanaken/ katunka kujan, manama cayaraja çirnna rikanaɳ çakabda bhujagoçaçaksaya pjah, nagasyabhawa çaka saɳ prabhu kumon dumona rikanaɳ tanah ri malayu, lwes mara bhayanya sanka ri khadewamurttinira nuni kalahan ika.
Pupuh 42	Jv/Kakawin Nāgarakṛtâgama/Pupuh 42 Cakabda yama çunya suryya diwaça nrpati muwah amati durjjana, ikaɳ mahisa rankah atyaya katunkanika pinalh iɳ sanagara, rin angawiyanarkka çaka sira motusan kana ri bali curnnitan, ndatan dwa kawnaɳ ratunya kahanaɳ tka i narendra sakrama. Samankana nikaɳ digantara padanabhaya mark i jöɳ nareçwara, ikaɳ sa- (110b) kahawat/ pahaɳ sakahawat malayu pada manunkul adara, muwah sakahawat gurun sakahawat/ bakulapura manaçrayomark, ndatan linen i sunda len/ madura pan satanah i yawa bhakti tan salah. Tuhun/ nrpati tan/ pramada luput iɳ mada makin atiyatna riɳ naya, apan tetes iɳ kewehiɳ bhuwanaraksana gawayen i kalaniɳ kali, nimittaniran aɳ rgep/ samaya len/ brata mapageh apaksa sogata, tumirwa san atitaraja rin usana magehakna wrddiniɳ jagat.
Pupuh 43	Jv/Kakawin Nāgarakṛtâgama/Pupuh 43 Liɳ niɳ çastra narendra pandawa rika dwapara nuni prabhu, gogendu tri lawan/ çakabdi diwaçanyantuknireɳ swahpada, ndah santuknira tembayiɳ kali tkaɳ rat/ murkka harohara, nhiɳ saɳ hyaɳ padabhijna daraka rumaksaɳ loka dewaprabhu. Nahan hetu narendra bhakti ri pada çri çakyasinhasthiti, yatnagegwan i pancaçila krtasaskarabhisekakrama, lumra nama jinabhisekanira saɳ çri jñanabajreçwara, tarkka wyakaranadiçastran inaji çri natha wijñanulus. Ndan/ ri wrddanireki matra rumgep/ sarwwakriyadyatmika, mukyaɳ tantra su- (111a) bhuti rakwa tinnöt kempen/ rasanye hati, puja yoga samadi pinrihiran amrih sthityanin rat kabeh, astam/ taɳ ganacakra nitya madulu ddann eniwöhiɳ praja. Tan/ wwanten karnö khadi nrpati sakweh sa(1) natita prabhu, purnnen sadguna çastrawit/ nipuna riɳ tatwopadeçagama, darmmestapageh iɳ jinabrata mahotsaheɳ prayogakriya, nahan hetuni tusni tusnira padaikaccatra dewaprabhu. Riɳ çakabdi jakaryyama nrpati mantuk/ riɳ jinaindralaya, sankai wruhnira riɳ kriyantara lawan/ sarwwopadeçadika, saɳ mokteɳ çiwabuddaloka talahan/ çri natha liɳ siɳ sarat, rinke sthananiran dinarmma çiwabuddarcca halp/ nottama. Lawan/ riɳ sakgala pratista jinawimbhatyanta riɳ çobhita, tkwan narddanareçwari mwan ika saɳ çri bajradewy apupul, saɳ rowaɳ nira wrddi riɳ bhuwana tungal/ riɳ kriya mwaɳ brata, hyaɳ werocana locana lwiriran ekarcca prakaçeɳ praja.
Pupuh 44	Jv/Kakawin Nāgarakṛtâgama/Pupuh 44 Tatkala çri narendra krtanagara mulih riɳ budda bhawana, trasaɳ rat/ duhkha harohara khadi maluya rehnyan kaliyuga, wwanten/ sama- (111b)ntaraja prakaçita jayakatwan nama kuhaka, nkaneɳ bhumi khadiryyapti sumiliha wiçesamrih khirakhira. Nuni lunhanira çri krtajaya rikanaɳ çakabdi manusa, ajña çri parwwatadindrasuta jayasabhan angantyana siwin, riɳ çakastekana çastrajaya muwah umungwiɳ bhumi kadiri, riɳ çaka trinisan/ çankara haji jayakatwaɳ natha wksan. Sakweh niɳ natha bhakti wkani wka bhataradrindratanaya, astam/ ri çri narendra krtanagara tkeɳ nusantara manut, manke pwe line saɳ bhupati haji jayakatwan murkka wipatha, keweh nin rat/ rinaksen kali niyata hayunya tan dadi lana. Pandani wruhnireɳ çastra panawaçani kotsahan haji danu, mogha wwanten/ wka çri nrpati malahakhen/ çatrwamahayu rat, ndan mantwangehnira dyah wijaya panlah in rat/ mastawa sira, ardda mwaɳ twaɳ tatar mmamrpi haji jayakatwaɳ bhrasta sahana.
Pupuh 45	Jv/Kakawin Nāgarakṛtâgama/Pupuh 45 Ri pjah nrpa jayakatwan awa tikaɳ jagat alilaɳ, masa rupa rawi çakabda rika nararyya sira ratu, siniwiɳ pura ri majhapahit/ tanuraga jayaripu, tinlah nrpa krtarajasa jayawarddana nrpati. Satewek nrpa krtara-(112a)jasa jayawarddana siniwi, sayawaksithi maluy atutur atisadaran umark, pada harsajan umulat/ ri payugala nrpati catur, duhita nrpa krtanagara pada tulya surawadu.
Pupuh 46	Jv/Kakawin Nāgarakṛtâgama/Pupuh 46 Ndan saɳ çri parameçwari tribhuwana namagrajanindita, tansah dyah duhita prakaçita mahadewyanulus/ riɳ hajöɳ, prajña paramitakya saɳ makajayendra dewyanindyeɳ raras, dyah gayatry anuraga wunsu pinakadin/ rajapatniɳ puri. Ndan rakwekin atmwamintiga siran/ wwaɳ sanak arddapar, apan rakwa bhatara wisnu mamisan/ parnnahniran tan madoh, lawan/ çri narasinhamurtti wka ri dyah lmbu tal/ suçrama, saɳ wireɳ laga saɳ dinarmma ri mirn boddapratistapagöh.
Pupuh 47	Jv/Kakawin Nāgarakṛtâgama/Pupuh 47 Dyah lmbu tal/ sira maputra ri saɳ narendra, na donniran rsep amiɳtiga len suputri, na lwir pawornni pakurn haji saikacitta, sajñanirajña kinabehan aweh suken rat. Riɳ çaka sapta jana suryya narendra warnnan, mastwaken atmajaniran siniwiɳ kadinten, çrindreçwaribunira wira widagda wijna, rajabhiseka jayanagara tan hanoli. Riɳ ça-(112b)ka matryaruna linaniraɳ narendra, drak pinratista(1)jinawimbha sireɳ puri jro, antahpura ywa panlah rikanaɳ sudarmma, çaiwapratista sira teki muwah ri simpiɳ.
Pupuh 48	Jv/Kakawin Nāgarakṛtâgama/Pupuh 48 Ndah kawkas darendra jayanagara prabhu ri tiktawilwanagari, mwaɳ nrpaputrikantenira maibu saɳ prawara rajapatny anupama, saɳ rwa padotameɳ hayu banun/ rwaniɳ ratin anoraken/ surawadu, natha ri jiwanagrajanira nrpe daha sira pamunsu siniwi. Riɳ çakakalla mukti guna paksa rupa madumasa tapwa caritan, çri jayanagara prabhun umankat anhilanaken musuh ri lamajaɳ, bhrasta pu namti sak sakulagotra ri pajarakan/ kutanya kapugut, wrinwrin ars tikaɳ jagat i kaprawiranira saɳ narendra siniwi. Riɳ çakakala windu çara suryya saɳ nrpati mantuk iɳ haripada, çighra siran dinarmma ri dalm purarccanira wisnuwimbha parama, len ri çila ptak/ mwan i bubat pada pratima wisnumurtty anupama, riɳ sukhalila taɳ sugatawimbha çobhitan amoghasiddi sakala.
Pupuh 49	Jv/Kakawin Nāgarakṛtâgama/Pupuh 49 Tuhun/ riɳ çakabdendu bana dwi rupa, nrpe jiwana kyati mata narendra, gumanti rikaɳ tiktamalura rajni, pita çri narendra rikaɳ sinhasari. Pa-(113a)ninkahnira çri maharajapatni, sira teki mangalya rin rat wiçesa, suta mantu len potrakan/ raja rajni, siraɳratwaken/ mwaɳ rumakseɳ sakaryya. Rin agnipwari çaka taɳ çatru irnna, sadeɳ mwaɳ ktalah dinon iɳ swabhrtya, twekniɳ jagadraksana bwatnya sumrah, ri saɳ mantryanamaɳ madatyanta wijña. Muwah riɳ çakabdesu masaksi nabhbhi, ikaɳ bali nathanya duç çila niccha, dinon iɳ bala bhrasta sakweh naça, ars salwir i dusta mandoh wiçathta. Dan acaryya ratnança na liɳnirojar, tuhujar niɳ saɳ wrdda pojarniranras, katon kottaman/ çri narendrerikan rat, apan dewawançathawa dewamurtti. Ikaɳ wwa rumenwi katha çri narendra, nda yan trpti cittanya membuh kabhaktin, awas papakarmmanya maryyanaweça, ikaɳ duhkha rogadi mawas winaça. Muwah padukha mpunku mopaksamojar, ikiɳ panreno masku inanya manka, tumemwaɳ hita wrddyani panditatwa, phalaniɳ mucap/ kasthawan saɳ wiçesa. Huwusniɳ sgeh sakraman arjjawanliɳ, rakawyamwitanolihekiɳ swakaryya, tkaɳ ratri sonten/ mgil/ ri pakuwwan, ksaneñjiɳ manankil ri jöɳ narendra.
Pupuh 50	Jv/Kakawin Nāgarakṛtâgama/Pupuh 50ya len / rathaçwa, nkanen nandakawana kananatidurgga, kaywanyadbhutatara kaça munja kirnna. Medran taɳ bala balabar huwus manenko, lawan / syandana madan anrapet / rankot, kedran taɳ wana wanaranya kagyat awri, awrg / paksinika mapaksa mura khegu. Huɳ niɳ bhrtya mawurahan matunwatunwan, ghurnnaɳwarnna paçurakiɳ tasik / gumenter, untabnyagni nika dudug rin antarala, saksat kandawawana de hyan agni nuni. Tonton taɳ mrga malayu ndatan wri ratnya, kewran / wibhrama marbut harp marampak, apan mingata balabar kkarsnikengi, etunyakukud umusi tnah matimbun. Kwehnya lwir ggawaya ri gobrajaprameya, lwir goh riɳ wrsabhapuranbek / prakirnna, wok sengah gawaya lulaya çalya cihna, godeya plawaga widala gandakadi. Satwasiɳ sahana riken alas / pralabda, kapwatut manah ika tan hana wiroda, kadyahem / pinakajurunya taɳ mrgendra, nkane sandin ika çiwa mark tan engi.
Pupuh 51	Jv/Kakawin Nāgarakṛtâgama/Pupuh 51 Ksamakna patakwanin hulun i saɳ mrgendradipa, gati nrpatin \|Pupuh 51	Jv/Kakawin Nāgarakṛtâgama/Pupuh 51 toh (114a) naya ndyaɳ gegen, anantya juga matya riɳ panadgan/ malaywa kuneɳ, mwan alagana denya tulya hayuyun / dinoh tan murud. Awarnna kadi mankanojar ikanaɳ çrgalomark, ikaɳ harina krsnasara ruru cihna mojar wwawa, yan i bwat i patikta tan hana muwah nayagegon, khalena saka riɳ malaywamalarolihan unsirn. Ikaɳ gawaya serabha wrsabha len taraksamuwus, ada wipatha koɳ knas tuhutuhun / mrgalpadama, ndatar lkasaniɳ susiran alayu manantya kunaɳ, si manlawana darmma gegwana malar tumemwanayu. Mrgendra sumawur kalih pada wuwusta yuktiyagegon, nda yan wruha mabhedakhen sujana durjjanannuɳ dlen, yan iɳ kujana wahya solaha malaywa manswa kunaɳ, apan wipalan anga patyana tkapnya tanpadon. Tuhun pwa yan i saɳ tripaksa rsi çaiwa bodda tuwi, malaywa jugan enakanirinane siran / pandita, kunan pwa kita yat kapangiha tkan narendraburu, anantya pati khewalawwata huripta haywagigu. Apan / nrpati yogya panhanutane huripwiɳ dadi, bhatara giripatyamurtti ri sira (114b) n / wiçesa prabhu, awas hilana papaniɳ pjahha deniramatyana, lwih saka ri kottamanin alabuh ri saɳ hyaɳ ranu. Syapeka musuhakwa ri bhuwana yan pade medani, tathapi ri sira tripaksa mariris / nwan andoh wawaɳ, pitowi haji yan ta katmwa niyataku kawwat / hurip, ndatan muwaha satwajati phalaniɳ pjah denira.
Pupuh 52	Jv/Kakawin Nāgarakṛtâgama/Pupuh 52 Kadi mojara kumwa kitan papupul, wkasan parn anhada yan / h\|Pupuh 52	Jv/Kakawin Nāgarakṛtâgama/Pupuh 52ka sahastra kaduk maburu, pinagut nin açrnga maluy malayu. Tucapa mamawaçwa parɳ maburu, tinujunya waraha sdeɳ mapupul, kasihan karawaɳnyan aneka pjah, rinbut saha putra tatan / pabisa. Manalandani teki karuɳnya maso, saka pat lima bhinna magoɳ maruhur, ampah ta tutuknya mabaɳ ri mata, pada rodra sihuɳ nika tulya curik. Ikanaɳ çwana mamuk kinaratnya pjah, hana rantas iganyaɳ gulunya pgat, rinbut muwah alwani malwan anaratnya pjah, hana rantas iganyaɳ gulunya pgat, rinbut muwah alwani malwan arok, papagutnya banun laga rodra jmur.
Pupuh 53	Jv/Kakawin Nāgarakṛtâgama/Pupuh 53 Tucapan aburwanut harina manjanan silih uhuh, sasikhi winanswan / ginayur aɳgayor geyuh alon, laku nika pan / ke- (115a) noru rudira drawadrs anbek, dudun asakit / kne pada pinada mawyat aniba. Apulih ikaɳ balatri saha tumbak akral anusi, atunah ikaɳ knas timuta manjanan / lwan ika bap, apuliha hikaɳ wisana gawayadi satwa magalak, bubar alayu bala nrpati kagyat alwan iniwud. Hana manusir juraɳ suket alindunan / tahen agoɳ, dudun umanek mareɳ pan arbut / ruhur kaburayut, kasihan ikaɳ musir kkayu rumankarankal umaluy, kaparpekan / wtisnya winisana kagyat akidat. Sana para mantry aneka saha wahanaçran apulih, amatan anula maɳduk anuligy amandem anujah, karananikaɳ wisabi malayu grbegnya gumrh, tinut inusinuyalwan ika kirnna çirnna rinbut. Wiku haji çaiwa bodda hana milw anumbak aburu, ginluran iɳ taraksa malajon tinut manudidiɳ, lali rin upakriya nga nika tan suçila ta kuneɳ, tumut aniwo kawahyan alupan huwus / krtawara.
Pupuh 54	Jv/Kakawin Nāgarakṛtâgama/Pupuh 54 Warnnan / çri naranatha sampun umanek / riɳ syandananindita, çobhatyanta ruhurnya patya tikanaɳ sapyamatek nirbhaya, (115b) munsi madyanikaɳ wanantara manut / burwan sin ande takut, etunyalaradan / mgat bala parandoh taɳ çawanyalayu. Karyyaɳ sukara krsnaçara ruru cihnadinya mangoɳ bhaya, tandaɳ çri nrpatin / mawahana turanga nut / riyatryalayu, mantri tanda bhujanga kapwa san umungwin açwa milw aburu, bhrastaɳ satwa dinuk / tinumbak iniras kinris pjah tanpagap. Arddalwa marata lmah tuwin alas / rnkod ri sornyapadaɳ, etunyan harinatidurbbala tinut / saglisnya deniɳ kuda, tustambek / nrpatin pararyyan anadah mantri bhujangomark, majar solahiran / pakolih irikaɳ solihnirande guyu.
Pupuh 55	Jv/Kakawin Nāgarakṛtâgama/Pupuh 55 Awicaritan gati nrpati yan/ maburu jnök i ramyaniɳ giriwana, hanan umulih mareɳ kuwukuwu maluy amawa ri saɳ para nrpawadu, kadi lariniɳ macaɳ krama hanan kadi tumkani rajyaniɳ ripukula, wruhira ri dosaniɳ mrga tatar/ wyasana siran ahinsadarmma gin- gö. Caritan ulahniran madan umantuka manen i kalanwaniɳ swanagara, krama çubhakala mankat ahawan/ bañu hanet i banir/ muwah talijunan, amgil i wdwawdwan irikaɳdina (116a) mahawan i kuwaraha ri cloɳ, mwan i dadamar ggarantan i pagör talaga pahañanan/ tkekha dinunuɳ. Rahina muwah ri tambak i rabut wyuha ri balanak linakwan alaris, anuju ri pandakan/ ri bhanaragin amgil i dateɳ nire padamayan, maluy anidul/ manulwan n umare jajawa ri suku saɳ hyan adri kumukus, mark i bhatara darmma saha puspa pada padaha garjjita wwan umulat.
Pupuh 56	Jv/Kakawin Nāgarakṛtâgama/Pupuh 56 Ndan tinkah nikanaɳ sudarmma rin usana rakwa karnö, kirtti çri krtanagara prabhu yuyut nareçwara sira, tekwan rakwa siranadistita çarira tan hana waneh, etunyaɳ dwaya çaiwa bodda saɳ amuja nuni satata. Cihnaɳ candi ri sor kaçaiwan apucak kaboddan i ruhur, mwaɳ ri jro çiwawimbha çobhita halpniraparimita, aksobhyapratime ruhur mmakuta tan hanolyantika, sanke siddiniran/ winaça tuhu çunyatatwaparama.
Pupuh 57	Jv/Kakawin Nāgarakṛtâgama/Pupuh 57 Hana mata karnö tepek/ saɳ hyan aksobhyawimbhan/ hilaɳ, prakaçita pada padukha çri mahagurwi rajadika, sutapa çuci çuçila boddabrata çrawananindita, anupama bahuçisya sampun maciryyan mahapandita. Sira (116b) ta mahas atirtha seccamgil/ riɳ sudarmma dalm, pranata mark i saɳ hyan arccatibhaktyandaranastuti, yatan amuhara çalyani twasniraɳ sthapakanançaya, ri wnananira bhaktya ri hyaɳ çiwarccatana naksama. Muniwara mawarah sire tatwa saɳ hyaɳ sudarmmeɳ danu, mwan i hananira saɳ hyan aksobhyawimbhatisuksme ruhur, ryyulihiran umaluy/ muwah manhinep/ riɳ sudarmmomark, salahaça kawnan siran ton/ ri muksa hyaɳ narccalilaɳ. Pilih anala çararkka rakwa çakabde hyan arccan hilaɳ, ri hilanira sinamber iɳ bajraghosa sucandi dalm, pawarawarahiraɳ mahaçrawakawas/ ndatan ançaya, pisaninu waluya darmma tkwan kadohan huwus. Aparimita halpni tinkah nika swarggatulyanurum, gupura ri yawa mekala mwaɳ balenyaçaka pwadika, ri dalm inupacara sek nagapuspandeɳ, prasama wijah arumpukan/ çarasnaɳ stri dalm nagari. Pira kharika lawas narendran/ sukhacankramapet lanö, ri wulu dada tataka mendah pakisnyaɳjrah i jro banu, pinaraniran amurwwa sanke sudarmmanken arkkapanasan, mwan umara ri pakalwanan/ tut juraɳ (117a) seccaniɳ twas ginöɳ.
Pupuh 58	Jv/Kakawin Nāgarakṛtâgama/Pupuh 58 Warnnan i sahnira riɳ jajawa riɳ padameyan ikaɳ dinunuɳ, mande cungran apet kalanön/ numahas iɳ wanadeçalnöɳ, darmma karsyan i parçwanin acala pawitra tikaɳ pinaran, ramya nikan panunaɳ luralurah inikhötnira bhasa khiduɳ. Sampuniraɳlnen eñjin atihan ikanaɳ ratha sampun adan, mankat anulwan i jöɳnin acala mahawan sakhamargga danu, prapty amgil/ ri japan nrpati pinapag iɳ balasanghya dataɳ, sin kari ri pura monen i parkhan ikan pada harsa mark. Kala dawuh tiga taɳ diwaça ri panadah nrpatin mapupul, mukya nareçwara rama haji khalih umungwatitah pinark, saɳ nrpati matahun ri paguhan i hiriɳ nrpatin tan adoh, kapwa sadampati soway i panadahirekana tan/ wuwusen.
Pupuh 59	Jv/Kakawin Nāgarakṛtâgama/Pupuh 59 Narapati mankat eñjin awan sakathan lumaris, rakhawi lumaryyanimpan i rabut tugu lan/ paniriɳ, sumeper iɳ pahyanan/ katemu taɳ kulawandwapupul, pada masgeh mupaksamaknalpanikan dununön. Nrpati halintan i banasara mwan i sankan adoh, datn i pamingir iɳ pura pilih ghatita rwa huwus, sakahnu sök lebuh nika gajaçwa padatyasusun, ki- (117b) mutaɳ maraɳ kbo gaway apandarat ardda pnuh. Khadi tinitah lari sakrama yan padulur, nrpati pajaɳ saha priya sabhrtya siran rumuhun, nrpati ri lasem ri wuntatira manka ta muwah tan adoh, rathanira khapwa çobhita maweh sukhaniɳ lumihat. Narapati ri daha nrpati ri wenker umungwi wugat, nrpati ri jiwane wuri sabharttr sabhrtya tumut, makapamkas/ ratha nrpati kirnna sapanta pnuh, piran iwu khapwa sayuda tikaɳ bhata mantry aniriɳ. Tucapa tikaɳ wwan iɳ lbuh atambak i tembin atip, atetel ayöm ananti ri halintana saɳ nrpati, daradara taɳ wadu mtu maren lawan atry arbut, hana kahuwan salampur i ghanasnikha yar palayu. Ikanan ado grhanya marbut/ khayukaywaruhur, makaburayut ri paɳ nika raratuha manwam atöb, hana tirisan liraɳ ywa pinaneknika tan panaha, sahaja lalin katon/ pijer anona jugaɳ kinire. Ri datniraɳ narendra kalaçanka humuɳ mabaruɳ, sahana nikaɳ wwan iɳ lbuh umendek ars mararm, ri kahaliwatniratrik/ tikanaɳ maniriɳ rin unta- (118a) t, gaja kuda garddabhostra gulunan/ gumuluɳ tan arn.
Pupuh 60	Jv/Kakawin Nāgarakṛtâgama/Pupuh 60 Ikan adarat/ bala peka marampak, pipikupikul nika kirnna ri wuntat, mirica kasumba kapas kalapa wwah, kalar asem pinikul saha wijyan. I wuri tikaɳ mamikul abwat, khapasah arepwan arimbit anuntun, kirikirik iɳ tnen i kiwa beñcit, pitik itik iɳ kisa mewed arankik. Sasiki pikulpikulanya maghantah, khacu kacubuɳ bun upih khamal anwam, tapi kukusan harudaɳ dulan uswan, lwir amurutuk/ çaranya ginuywan. Nrpati parɳ datn i pura warnnan, tlas umulih ri dalmira sowaɳ, atutur i solah-hulahnira nunten, asin anukana para swa ginöɳ twas.
Pupuh 61	Jv/Kakawin Nāgarakṛtâgama/Pupuh 61 Lunhaɳ kala nrpati tan alawas riɳ rajya, praptaɳ çakha dwi gaja rawi bhadraɳ masa, nka ta cri natha mara ri tirib / mwaɳ sompur, burwan sasok / hyalas ika dinwan lwaɳnyakwe. Ndan ri çakha tri tanu rawi riɳ weçaka, çri natha muja mara ri palah sabhrtya, jambat siɳ ramya pinaraniran / lanlitya, ri lwaɳ wentar mmanuri balitar mwaɳ jimbe. Janjan sanke (118b) balitar anidul tut / margga, senkan / poryyaɳ gatarasa tahenyadoh wwe, ndah prapteɳ lodaya sira piraɳ ratryanher, çakte rumnin jalaqi jinajah tut pingir. Sah sanke lodaya sira mananti ri simpiɳ, swecchanambyamahajona ri saɳ hyaɳ darmma, sakniɳ prasanda tuwi hana dohnya nulwan, na hetunyan / banunen anawetan matra.
Pupuh 62	Jv/Kakawin Nāgarakṛtâgama/Pupuh 62 Mwaɳ tekaɳ parimana tapwa pinatut wyaktinya lawan praçasti, hetunyan tinapan / samapa dinepan / purwwadi sampun tinugwan, ndan saɳ hyaɳ kuti riɳ guruɳgurun inambil / bhumya saɳ hyaɳ suqarmma, gontoɳ wisnu rare kabajradaraneka paɳhli çri narendra. Yyantuk / çri narapaty amargga ri jukuɳ jo yanabajran / pamurwwa, prapta raryyan i bajralaksmin amgil / ri çurabhane sudarmma, enjiɳ yyankatiran / pararyyan i bkel / sonten dateɳ riɳ swarajya, sakweh saɳ maniriɳ muwah tlas umantuk / riɳ swaweçmanya sowaɳ.
Pupuh 63	Jv/Kakawin Nāgarakṛtâgama/Pupuh 63 Enjiɳ çri natha warnnan/ mijil apupul aweh sewa riɳ bhrtya mantri, aryyadinyaɳ markh/ mwaɳ para patih atatha riɳ witanan palingih, nka saɳ ma-(119a) ntryapatih wira gajamada mark sapranamyadarojar, an wanten/ rajakaryyalihulihn ikanaɳ daryya haywa pramada. Ajña çri natha saɳ çri tribhuwana wijayottungadewi…. çradda çri rajapatni wkasana gawayen/ çri narendreɳ kadatwan, siddaniɳ karyya riɳ çaka diwaça maçirah warnna riɳ bhadramasa, sakweh çri natha rakwawwata tadah irinen de para wrddamantri. Nahan liɳ saɳ sumantri tka subhaya maweh tusta ri çri narendra, sonten praptomark taɳ para dapur aputih sujyanadinya wijña, mwaɳ mantry asiɳ wineh thanya suruhana makadyaryya ramadiraja, tan len göɳ niɳ byayanu sinadasada ginosti harp/ çri narendra. Byatitan meh tkaɳ bhadrapada ri tilmniɳ çrawano teki warnnan, sakwehnyaɳ citrakara nikanikel amanun/ sthana sinheɳ wanuntur, dudwaɳ malad/ wawan bhojana bukubukuran/ mwaɳ tapel saprakara, milwaɳ pande dadap/ kañcana rajata padewer mmatambeh swakaryya.
Pupuh 64	Jv/Kakawin Nāgarakṛtâgama/Pupuh 64 Ndah praptaɳ çubhakhala sampun atitah tekaɳ sabhanindita, nkane madya witana çobhita rinenga lwir prisadyaruhur, tungal taɳ mabatur çi- (119b) lasaka rinaktarjja wuwuɳ hinyasan, saçryapan/ pada mungwi sanmukha nikaɳ sinhasanatyadbhuta. Kulwan mandapa sapralamba winanun/ sthana narendrapupul, lor tekaɳ taratag/ pinik mider amurwwatumpatumpa wugat, striniɳ mantri bhujanga wipran inaha talphanya sampun pepek, nkane daksina bhrtyasanghya taratagnya sankya kirnnasusun. Ndan tinkah ni gawe narendra wkasiɳ sarwwajñapujadika, sakweh saɳ wiku bodda tantragata saksiɳ mandala lekana, mukya sthapaka saɳ purohita masadpade sudarmme nadi, labdawega çuçila satwika tetes/ riɳ çastratantratraya. Sanke wrddaniran/ sahaçramasa riɳ swotpatti mangöɳ tutur, wwanten hinanireɳ swakaya khimutaɳ satçisya makweh mark, nka mpunkwiɳ paruha prasidda patanan lampahnireɳ mandala, mudra mantra japanut udara minustyande tepetniɳ hidep. Tangal piɳ rwawlas maninjem irika swah sutrapateniwö, mwaɳ homarccana len pariçrama samapte praptaniɳ swah muwah, saɳ hyaɳ puspa yinoga ri wni linakwan/ supratistakriya, pöh niɳ dyana samadi siddi kinnaken de (120a) mahasthapaka.
Pupuh 65	Jv/Kakawin Nāgarakṛtâgama/Pupuh 65 Eñjiɳ purnnamakala kalani wijilnira pinark i madyaniɳ sabha, ghurnnaɳ kahala çanka len padaha ganjaran i harp açankya maɳdulur, riɳ sinhasana çobhitaruhur/ manusa kahananiran/ winursita, sakweh saɳ para sogatanwam atuha tlas apuphul/ hamuja sakrama. Nka ta çri nrpatin/ parɳ mark amuspa saha tathanaya dara sada, milwaɳ mantry apatih gajamada makadinika pada masomahan mark, mwaɳ mantryakuwu riɳ pamingir atawa para ratu sahaneɳ digantara, sampunyan/ pada bhakty amursita palingihan ika tinitah yathakrama. Cri natheɳ paguhan sirekhi rumuhun/ humaturaken anindya bhojana, saɳ çri handiwa handiwa lwir i tapel niran amawa dukula len/ serh, çri natheɳ matawun tapelnira sitawrsabha hanam aminda nandini, yekametwaken artha bhojana mijil/ saka ri tutuk apurwwa tan/ pgat… Saɳ çri natha ri wenker apned awawan/ yaça pathani tadahniradika, sarwwendah racananya mulya madulur danawitarana wartta riɳ sabha, çri nathen tumapel tapelnira kan endah araras açarira kami-(120b)ni, kapwa teki matungalan/ dina siran pawijil i kawicitraniɳ manah. Mukya çri narapatyapurwwa giri mandara wawanira bhojanadbhuta, kalanyan/ pinuter tapel/ wiwuda daityagana mider ars twasiɳ mihat, lmboratyaya göɳnya kahinawa polaman anbek aliwran aɳdulur, kadyagrah mawer tkapni bañuniɳ tasik amewehi ramyaniɳ sabha. Ndan nanken dina salwiriɳ tapel asing lwih adika niwedya donika, striniɳ mantry upapatti wipra dinuman/ sakari nikha duweg matungalan, mwaɳ saɳ ksatriya wandawa nrpati mukya sira rinawehan sasambhawa, len sankeɳ wara bhojanederider edran i sabala narendra riɳ sabha.
Pupuh 66	Jv/Kakawin Nāgarakṛtâgama/Pupuh 66 Eñjiɳ rakwa khapiɳ nem iɳ dina bhatara narapati sabhojanakrama mark, mwaɳ saɳ ksatriya saɳ padadika pnuh yaça bukubukuran rinembat asusun, darmmadyaksa kalih sirekhin awawan/ banawa pada winarnna bhawakha khiduɳ, göɳnya lwir tuhu phalwa goɳ bubar agenturan anirin aweh rsepnin umulat. Rakryan/ saɳ mapatih gajamada rikaɳ dina muwah ahatur niwedyan umark, (121a) stryangöɳ çokha tapelnirarjja ri hebiɳ bhujagakusuma rajaçaçranawilt, mantryaryyasuruhan/ pradeça milu len/ para dapur ahatur niwedyan aniriɳ, akweh lwirni wawanya bhojana hanan/ plawa giri yaça matsya tanpa pgatan. Atyadbhuta halpni karyya naranatha wkas i wkasiɳ mahottama dahat, apan riɳ dina sapta tan pgat tikaɳ dana waçana sabhojanaparimita, lumre saɳ catur açrama pramukha saɳ dwija milu para mantry asankya kasukhan, kahyunhyun/ jurusamyamalwan tkap i larih ika lwir ambut umili. Sar sök tekhan aninhaninhali sakeɳ daçadikh atetel atri tanpa ligaran, tinkah niɳ pasabhan/ lawan san ahatur ttadah atiki tinonyan açran arbut, çri rajya rikanaɳ witana manigel bini bini juga taɳ maninhali mark, kapwa lingih atindih aglar anbek hana lali rin ulah kawönan umulat. Sasiɳ karyya maweha tusta rikanaɳ para jana winanun nareçwara huwus, naɳ widwamacanah raket raket ananti sahana para gitada pratidina, anyat/ (121b) bhata mapatra yudda sahajaɳ maglaglapan anghyat aɳdani paceh, mukyan dana ri salwiriɳ manasi tan pgat amuhara harsaniɳ sabhuwana.
Pupuh 67	Jv/Kakawin Nāgarakṛtâgama/Pupuh 67 Yawat/ mankah lkas narendra magawe çraddaniwö saɳ paratra, tawat tan/ pakawandya kandaniɳ sukhe çri rajapatnin kinaryya, astwandadyakna ryyanugrahanire swasthanyadeg/ çri narendra, saɳ çri rajasanagarastu jayaçatrwahinanaɳ candra suryya. Eñjiɳ kala dataɳ mamuja para boddanuraken saɳ pinuja, prajñaparimita tmahniran umantuk/ ri mahabuddaloka, saɳhyaɳ puspa çarira çighra linarut/ sampun mulih sopakara, sakweh caru gañjaran tuwi dinum/ lumrerikaɳ bhrtyasanghya. Lila çudda manah narendra ri huwusni karyya noraɳ wikhalpa, anhiɳ darmmanireki pinrih i kamal pandak/ ri dadyanya purnna, tkwan/ sampun abhumiçudda rikanaɳ çakagni spatarkka nunten, saɳ çri jñanawidin lumakwani t-her/ mabrahmayajñan pamuja.
Pupuh 68	Jv/Kakawin Nāgarakṛtâgama/Pupuh 68 Nahan tatwanikaɳ kamal/ widita deniɳ sampradaya sthiti, mwaɳ çri pañjalunatha riɳ daha te- (122a) wekniɳ yawabhumy/ apalih, çri airlanghya sirandani ryyasihiran/ panak/ ri saɳ rwa prabhu. Wwanten bodda mahayanabrata pgat/ riɳ tantra yogiçwara, saɳ mungwiɳ tnah i çmaçana ri lmah citrenusir niɳ jagat, saɳ prapteɳ bali toyamargga manapak/ wwainiɳ tasik nirbhaya, kyatiɳ hyaɳ mpu bharada woda ri hatitadi trikalapageh. Rahyaɳ tekhi pinintakasihan amarwaɳ bhumi tan langhyana, inanyeki tlas/ cinihnanira toyeɳ kundi sankeɳ lanit, kulwan/ purwwa dudug rin arnnawa maparwaɳ lor kidul tan madoh, kadyadoh mahlet/ samudra tewekiɳ bhumi jawa rwa prabhu. Nkai riɳ tik/ tiki wrksa rakwa sutapararyyan/ sankeɳ ambara, naɳ deçeɳ palunan tikaɳ pasalahan/ kundi praçasteɳ jagat, kandeg/ deni ruhur nikaɳ kamal i puñcaknyanawit/ ciwara, na hetunya sinapa dadyalita tekwan/ mungwiri pantara. Tugwangöh nika tambayiɳ jana padars mintareɳ swasana, etunyan/ winanun sudarmma waluyaɳ bhumi jawatungala, sthityaraja sabhumi kawruhananin rat (122b) dlaha tan lingara, cihna çri nrapatin jayeɳ sakhalabhumin/ cakrawartti prabhu.
Pupuh 69	Jv/Kakawin Nāgarakṛtâgama/Pupuh 69 Prajñaparimitapuri ywa panlahnin rat/ ri saɳhyaɳ sudarmma, prajñaparamitakriyenulahaken/ çri jñanawidyapratista, sotan/ pandita wrdda tantragata labdaweça sarwwagamajña, saksat/ hyaɳ mpu bharada mawak i sirande trpti ki twas narendra. Mwaɳ taiki ri bhayalanö ngwanira saɳ çri rajapatnin dinarmma, rahyaɳ jñanawidinutus/ muwah amuja bhumi çudda pratista, etunyan manaran/ wiçesapura kharambhanya pinrih ginöɳ twas, mantryagöɳ winkas/ wruherikha dmuɳ bhoja nwam utsaha wijna. Lumra sthananiran pinuja winanun/ caityadi riɳ sarwwadeça, yawat/ waiçapuri pakuwwana kabhaktyan/ çri maharajaptni, anken bhadra siran pinujaniɳ amatya brahma sakwehnya bhakti, mukti swargganiran/ mapotraka wiçesaɳ yawabhumyekhanatha.
Pupuh 70	Jv/Kakawin Nāgarakṛtâgama/Pupuh 70 Irikan anilastanah çaka nrpeçwara warnnanen, mahasahas i simpin saɳhyaɳ darmma rakwa siralihen, saha widiwidanasiɳ lwir / niɳ, (123a) saji krama tan kuraɳ, prakhaçita san adyaksamujaryya rajaparakrama. Rasika nipuneɳ widya tatwopadeça çiwagami, sira ta manadistane saɳ çri nrpa krtarajasa, duweg inulahaken taɳ prasada gopura mekala, prakaçita san aryyanama kruɳ prayatna wineh wruha. Nrpatin umulih sanke simpiɳ wawaɳ daten iɳ pura, prihati tkap iɳ griɳ saɳ mantryadimantra gajamada, rasika sahakari wrddyaniɳ yawawani riɳ danu, ri bali ri sadeɳ wyaktinyantuknikanayaken / musuh.
Pupuh 71	Jv/Kakawin Nāgarakṛtâgama/Pupuh 71 Try anin ina çaka purwwa rasikan/ pamankwakn i sabwatiɳ sabhuwana, pjah irika çakabda rasa tanwinaça naranatha mar salahaça, tuhun i kadiwyacittanira tan/ satrsnam asih i samasta bhuwana, hatutur i tatwaniɳ dadin anitya punya juga taɳ ginöɳ pratidina. Kunaɳ i pahem narendra haji rama saɳ prabhu kalih sireki pinupul, hibu haji saɳ rwa tansah awawanuja nrpati karwa saɳ priya tumut, gumunita saɳ wruheɳ gumunadosaniɳ bala gumantyane san apatih, linawelawön datan hana katrptiniɳ twas amanun/ wiyoga sumusuk. Nr- (123b) pati sumimpen iɳ naya tatan kagantyana kta sumantri mapatih, ri taya nikaɳ gumantya yadi kewehanya tikanaɳ jagat pahalalun, nhin ikan amatya sadwajara sarwwa karyya satate narendra pilihen, pituhanen iɳ mucap kirakira wruheɳ parawiwoda tanpa nusara.
Pupuh 72	Jv/Kakawin Nāgarakṛtâgama/Pupuh 72 Manka hinaniɳ pahömnira gupta, pöhnyalap/ knaniran pawiweka, wrddamantri pinilih ta san aryya, atmaraja makanama pu tandi. Tansah indika narendra san aryya, wira mandalika nama pu nala, sadwasadu hitanigraha wijña, mañcanagara manama tumenguɳ. Tusnin adiguna wira susatya, nityasadipatinin bala mandon, naɳ digantara manama riɳ dompo, bhrasta denira sek anaɳlwan i çatru. Rwa ta wastuniɳ wangadisumantri, astapadda hajo donika tan len, mawwate sarusitiɳ wyawahara, ndan makerina sumantry upapati. Saɳ pati dami tikaɳ yuwamantri, saɳ hinatyan i dalm/ pura tansah, mwaɳ patih tikan anama pu singha, saksya riɳ sabha wkas naranatha. An mankana titah naranatha, trpti langeɳ hapagöh tikanaɳ ra- (124a) t, satya bhakti nika mankin atambeh, keçwaran haji dumeh nika manka.
Pupuh 73	Jv/Kakawin Nāgarakṛtâgama/Pupuh 73 Ndan / nrpa tiktawilwapuraraja mankin atiyatna niti rin ulah, riɳ wyawahara tan hana khasinhin in hati sapöhnin agama tinut, tan dadi paksapata yat aweh wibhuti saniruktya riɳ jana kabeh, kirtti giɳönniran wruh in anagatadi tuhu dewamurtti sakala. Nka tikanaɳ sudarmma haji suk ni saɳ tuhatuha nareçwara danu, salwirika turuɳ pinahuwusnirenapi rinaksa pinrih iniwö, siɳ katayan / praçasti winkas / praçastyana ri saɳ widagda rin aji, sthitya phalanya tanpa tmaha wiwada tumuse satusnira hlem. Kwehnikanaɳ sudarmma haji kaprakaçita makhadi riɳ kagnenan, lwir nikanaɳ manadi tumapel / kidal / jajagu wedwawedwan i tudan, mwaɳ pikatan bukul jawajawantan antaraçaçi kalaɳ brat i jaga, len balitar / çilahrit i waleri babeg i kukap ri lumban i pagör.
Pupuh 74	Jv/Kakawin Nāgarakṛtâgama/Pupuh 74 Mukyantahpura sagalathawa ri simpiɳ, mwaɳ cri rangapura muwah riɳ buddi kuncir, prajnaparamita puri hanar panambeh, mwaɳ tekaɳ ri bhayalano duweg kinaryya. (124b) na taɳ darmma haji wilaɳ saptawinça, riɳ sapta dwija rawi caka bhadramasa, kapwamatya nipuna taɳ wineh matungwa, lawan / sthapaka wiku rajya çastrawijna.
Pupuh 75	Jv/Kakawin Nāgarakṛtâgama/Pupuh 75 Ndan saɳ mantri wineh wruha rika kabeh san aryya wiradikara, darmmadyaksa rumaksa salwir ikanaɳ darmme dalm tan pramada, dirotsaha nitya kuminkin i swastha pararttha saɳ çri narendra, tan / mukti phalaniɳ swakaryya ri genany utpatti saɳ hyaɳ sudarmma. Len taɳ darmma lpas padekana rinaksadegnya de çri narendra, çaiwadyaksa sira wineh wruha rumaksa parhyanan / mwaɳ kalagyan, boddadyaksa sireki raksaka ri sakwehniɳ kuti mwaɳ wihara, mantri her haji taɳ karsyan iniwonyan / rakseka saɳ tapaswi.
Pupuh 76	Jv/Kakawin Nāgarakṛtâgama/Pupuh 76 Lwir ni darmma lpas / pratista ciwa mukya kuti balay i kanci len kapulunan, roma mwaɳ wwatan içwaragrha phalabdi tajuɳ i kuti lamba len / ri taruna, parhyanan kuti jati candi lima nilakusuma harinandanottama suka, mwaɳ prasada haji sadaɳ muwah i pangumulan i kuti sangrahe jayadika. Tan karyya sphatikeyan i jaya manalwi haribhawana candi (125a) wunkal i pigit, nyu dante katude sranan / kapuyuran jayamuka kulanandane kanigara, rmbut lan wuluhen muwah ri khinawoh mwan i sukhawijayathawa ri kajaha, campen / mwaɳ ratimanmathaçrama kula kalin i batu putih tekha pameweh. Lwirniɳ darmma kasogatan kawinayanu lpas i wipularama len kuti haji, mwaɳ yanatraya rajadanya kuwunatha surayaça jarak / lagundi wadari, wewe mwaɳ packan / pasarwwan i lmah surat i pamanikan / sranan / paniktan, panhapwan / damalaɳ tpas / jita wannaçrama jnar i samudrawela pamuluɳ. Baryyaɳ namrtawarddani wtiwtih kawinayan i patemwan iɳ kanuruhan, wental / wenker i hanten iɳ banu jiken / batabata pagagan / sibok / padurunan, mwaɳ pindatuha len / tlaɳ surabha mukyanika ri sukalila tapwa pameweh, tan warnnan tikanaɳ mananwaya ri pogara ri kulur i tankil adi nika sön.
Pupuh 77	Jv/Kakawin Nāgarakṛtâgama/Pupuh 77 Nahan muwah kasugatan / kabajradaran akrameka wuwusen, i çakabajra ri nadi tada mwan i mukuh ri samban i tajuɳ, lawan tan amrtasabha ri baɳbaniri boddi (125b) mula waharu, tampak / duri paruha tandare kumudaratna nandinagara. Len taɳ wunanjaya palandit ankil asah iɳ samicyapitahen, nairanjane wijayawaktra magnen i poyahan / bala masin, ri krat lemah tulis i ratnapankaja panumbanan kahuripan, mwaɳ ketaki talaga jambale junul i wisnuwala pameweh. Len tekaɳ budur wwirun i wunkulur mwan i manangun i watu kura, bajrasana mwan i pajambayan / ri samalanten iɳ simapura, tambak laleyan i pilangu poh aji ri wankali mwan i beru, lmbah dalinan i panadwan adi nika riɳ pacaccan apagöh.
Pupuh 78	Jv/Kakawin Nāgarakṛtâgama/Pupuh 78 Lwir niɳ darmma lpas karsyan i sumpud / rupit / mwaɳ pilan, len tekaɳ pucanan / jagaddita pawitra mwaɳ butun tan kasah, kapwa teka hana pratista çabha len linga pranalalapupul, mpunku sthapaka saɳ mahaguru panenguh ni sarat / kotama. Yekiɳ darmma lpas / rinaksa mapagöh riɳ swakramanyeɳ danu, milwaɳ sima ta pratista pinakadinyan / swatantra sthiti, banwan tunkal i siddayatra jaya len siddahajöɳ lwah (126a) kali, twas / waçista palah padar sirinan adinyaɳ kacewankuran. Wanjaɳ bajrapure wanora makduk hanten / guha mwaɳ jiwa, jumput / çobha pamuntaran / baru kaboddançan / prakaçottama, kajar ddana hana turas / jalagiri centiɳ wkas / wandira, wandayan gatawaɳ kulampayan i taladinya kasyankura. Darmmarsi sawunan / blah juru siddaɳ sranan waduryyaglan, gandatrp haraçala nampu kakadaɳ hajyan gahan riɳ jagat, sima nadyabhaye tiyaɳ pakuwukan / sima kiyal/ mwaɳ çuci, tan karyyaɳ kawiri barat / kacapanan / ywangehnya simapagöh. Len sankerika wança wisnu kalatiɳ batwan kamansyan batu, tangulyan / dakulut galuh makalaran / mukya swatantrapagöh, len taɳ deça mdaɳ hulun / hyan i paruɳ lunge pasajyan kelut, andel mad paradah gɳön panawan adinyan luput riɳ danu. Tan warnnan tikanaɳ kalagyan anlat / riɳ sarwwa deçeɳ jawa, lawan taɳ kuti sapratista milu taɳ tanpa pratistapagöh, ndan / bhedanya kasanghikan / sthiti kabhuktyanyan sake nagara, (126b) mwaɳ kasthapakan ungwaniɳ lumagi lagy amrih kriya mwaɳ brata. Len taɳ mandala mula sagara kukub / purwwasthitinyeniwö, tan karyyaɳ sukayajna kasturi caturbhasmeka liɳ saɳ rsi, katyagan / caturaçrame pacira bulwan / mwaɳ luwan / nwe kupaɳ, akweh lranya manaçrayeɳ thani lawan / jangan / prasiddeɳ jagat.
Pupuh 79	Jv/Kakawin Nāgarakṛtâgama/Pupuh 79 Sampun taɳ sarwwadeçeɳ jawa tinapak adegnyeki nunin linakwan, darmma mwaɳ sima len/ wança hilahila hulun hyaɳ kuti mwaɳ kalagyan, sakwehniɳ sapramana pinagehaknasiɳ nispramana gin-gwan, mantuk/ riɳ deça bhrtyan sinalahakn i saɳ naryya ramadiraja. Cri natheɳ wenker otus manapaka rikanaɳ deça sakwehnya warnnan,çri natheɳ sinhasaryy otus anapaka ri göɳniɳ dapur saprakara, kapwagögwan/ patik/ gundala siran umiwö karyya tan lambalamba, hetunyaɳ yawabhumy atutur in ulah anut/ çaçana çri narendra. Nka taɳ nusantare baly amatehati sacaraniɳ yawabhumi, darmma mwaɳ çrama lawwan/ kuwu tinapak adeg/ nyeki sampun tininkah, saɳ boddadyaksa mungwi badahu- (127a) lu badahalwaɳ gajah tan pramada, wruh ri kwehniɳ sudarmme kasugatan inutus/ çri narendran/ rumaksa.
Pupuh 80	Jv/Kakawin Nāgarakṛtâgama/Pupuh 80 Lwir nikanaɳ kasogatan i bali kadikaranan/ muwah kuti hañar, lawan i purwwanagara muwah wihara bahun adirajya kuturan, nöm tikanaɳ kabajradaran uttama nhin i wihara taɳ kawinayan, kirnna makadin aryya dadi rajasanmata kutinya tan wicaritan. Milwa tikaɳ sudarmma ri bukhit/ sulaɳ lmah i lampun anyawasuda, kyatyanaran tathagatapura grhaswadara supraçastin amatöh, bhyoma rasakka çaka diwaçanya suk/ nrpati jiwaneçwara danu, wrdda sumantry upasakan abhumiçudda t-her apratistan inutus. Salwir ikaɳ swatantra tuhu sapramana pagöh tkap narapati, kirtti san adi sajjana çakawakhanya ya rinaksa mogha tinnöt, manka junga swabhawa san inuttama prabhu wiçesa digjaya wibhuh, nyama muwah rinaksa sahanani kirttinira deni saɳ prabhu hlem. Mwaɳ makadon/ katona taya ni duratmaka rikaɳ sabhumi kacaya, hetu nikaɳ pradeça tinapak/ tinutlas awalr samudra jinajah, (127b) sthityaniraɳ tapaswi sahaneɳ pasir wukir alas/ pradeça kasnet, trptyamiwö tapa brata samadyanambyakn i haywaniɳ sabhuwana.
Pupuh 81	Jv/Kakawin Nāgarakṛtâgama/Pupuh 81 Göɳnyarambha nareçware pageha saɳ tripakse jawa, purwwacaranireɳ praçastyalama taɳ rinaksan iwö, kotsahan haji yatna donira wineh patik gundala, tan wismrtyanireɳ caradigama çiksa len/ çaçana. Nahan karana saɳ caturdwija padanusir kottaman, wipra mwaɳ rsi çaiwa bodda tgepiɳ swawidyatutur, sakweh saɳ catur açrama pramukha saɳ catu bhasma sök, kapwa teka tumunkul iɳ brata widagda riɳ swakriya. Nka sakwehnira saɳ caturjjana padasthitiɳ çaçana, mantri mukya san aryya karwa nipuneɳ kabhuphalakan, kryan/ kryan/ ksatriya wança len wali suçila yatneɳ naya, milwaɳ weçya sabhumi çudra jnek swakaryyapagöh. Yekaɳ janmi catur sujanman umijil/ sakeɳ hyaɳ widi, liɳniɳ çastra wnaɳ sagatyanika de narendreɳ pura, kapwekapageh iɳ swaçila kimutaɳ kujanma traya, naɳ candala meleca tucca pada yatna riɳ swakrama.
Pupuh 82	Jv/Kakawin Nāgarakṛtâgama/Pupuh 82 An ma- (128a) nka lwir nikaɳ bhumi jawa ri panadeg/ çri natha siniwi, nora sandeha ri twasniran umulahaken/ kirttyanukani rat, tkwan/ çri natha karwamwan i hajin agawe saddarmma kuçala, mwaɳ penan/ çri narendra pranuha tumut i buddi çri narapati. Cri nathe sinhasaryyanaruka ri sagada darmma parimita, çri natheɳ wenker iɳ çurabhana pasuruhan/ lawan tan i pajaɳ, buddadistana tekaɳ rawa ri kapulunan/ mwaɳ locanapura, çri nathe watsarikaɳ tigawani magawe tusteɳ para jana. Sakwehniɳ mantri sampun/ krtawara sinunan simasirasiran, caitya prasada tapwaɳ ginaway ika lawan lingadi satata, bhaktiɳ hyaɳ bhakti ri pitrgana samasamatwaɳ riɳ muniwara, dana mwaɳ kirtti punyenulahakn ika solah saɳ prabhu tinut.
Pupuh 83	Jv/Kakawin Nāgarakṛtâgama/Pupuh 83 An manka kottaman / çri narapati siniwiɳ tiktawilwaikanatha, saksat / candreɳ sarat / kastawaniran agawe tustaniɳ sarwwaloka, lwir padmaɳ durjjana lwir kumuda sahana saɳ sajanasih tke twas, bhrtya mwaɳ koça len / wahana ga- (128b) ja turagadinya himper samudra. Mankin / rabdekana yawadarani kapawitranya riɳ rat / prakaça, nhiɳ jambudwipa lawan / yawa ktan inucap / kottamanyan / sudeça, deniɳ kweh saɳ widagden aji makamukha saɳ dyaksa saptopapatti, mwaɳ panjyaɳ jiwa lekan tanar asin umunup karyya kapwatidaksa. Mukyaɳ çri brahmaraja dwijawara mamahakawy anindyaɳ gamajna, hentyaɳ tarkkadi kawruhniraɳ nipuna mahakawya naiyeyikadi, mwaɳ danhyaɳ bhamanatibrata kuçala tameɳ weda sad karmma çudda, astam / çri wisnu cakte samajapa makhadon / wrddyaniɳ rat / subhiksa. Hetunyanantara sarwwajana tka saken anyadeça prakirnna, naɳ jambudwipa khamboja cina yawana len / cempa kharnnatakadi, goda mwaɳ syanka taɳ sankanika makahawan / potra milwiɳ wanikh sök, bhiksu mwaɳ wipra mukyan hana tka sinunan / bhoga tustan pananti. Ndan anken phalguna cri nrpati pinaripujeniwö riɳ swarajya, praptaɳ mantri sabhumi jawa juru kuwu len dyaksa sarwwopapatti, milwaɳ balyadi nusantara sahana saha prabhrtin tan pgat sökh, bya- (129a) pari mwaɳ wanin / ri pken anebek atip / sarwwa bandanya kirnna. Tinkahnin pujan idran / bhrisadi saha mrdangenarak niɳ wan akweh, piɳ pitwanken dinaimbuh sasikhi saha niwaidyan dunuɳ riɳ wanuntur, homa mwaɳ brahmayajnenulahaknira saɳ çewa boddan pamuja, amwit in astami krsna makaphala rikaɳ swasthana çri narendra.
Pupuh 84	Jv/Kakawin Nāgarakṛtâgama/Pupuh 84 Praptaɳ diwaça khapiɳ padblas i wijil / çri narapati warnnan, tinkahnira midereɳ nagara marasuk / bhusana kanakadi, cobhabhra pinikul iɳ jampana mahawan lantaran atuntun, mantri saciwa bhujarigadinika manango dadar iniri sök. Ghurnaɳ padata mrdanga trutika duduɳ çanka tarayan atri, sinraɳ ni paselur iɳ bhattagana manuccaranan abhiwada, çlokhastutinira sankeɳ parapura de saɳ nipuna kawindra, cihna nrpati gahan / lwi raghusuta krsnanjaya subhagen rat. Sampun / nrpati manek / riɳ manimaya sinhasana suminabhra, çoddodani sakala lwirnira wahu sailke jinapada cobha, byakta trisura surendran umark i himbaɳniran arja hyaɳ, apan / pada linewih bhusananika sotan waɳ adika mu- (129b) lya. Tihkah ni lakunira çri nrpati pajaɳ sapriya pinakagra, sinhasananira sampun / lpas inarak niɳ balagana kirnna, mantri pajaɳ atawa mantri ri paguhan / rowan ika sapanta, laksarwuda marasuk / bhusana saha bhrtya dwaja patahadi. Manka nrpa ri lasem / sapriya ri wugat / lampahira sabhrtya, vmwaɳ çri nrpa ri kadinten / sayugala samatya bala ri wuntat saçri, çri jiwanapurarajni ri wuri saha bhrtyagana sabhartta, çri bhupati pamkas mantry adika sayawawanni maniri sök, Ton taɳ para jana sar sök / pnuh ariweg tanpa sla manonton, pingir nikanaɳ lbuh ajajar taɳ sakatha pinanguɳ, dwaranapi sawawa lwir dwaja nuniweh pangun ika rinenga, sök / stry anwam atuha dudwaɳ manebek umungwiɳ bacinah atimbun. Buddinya daradaran kapwa suka banun / wahuwahu manonton, tan warnnan ulah ikenjiɳ nrpati kinastryan mijil i wanuntur, wipradi sira maweh amrta warakundyadi wawan ikapned, mantri para pamget kapwa mark amuspanjali parn asraɳ.
Pupuh 85	Jv/Kakawin Nāgarakṛtâgama/Pupuh 85 Tangal niɳ cetra tekaɳ balagana mapuluɳ rahya (130a) hem apupul, mantri mwaɳ tanda len / gusti sahana nuniweh wadwa haji tumut, milwaɳ mantryakuwu mwaɳ juru buyut athawa wwaɳ riɳ parapuri, astam / saɳ ksatriya mwaɳ wiku haji karuhun / sakweh dwijawara. Doniɳ höman ri tan lamlama ni sabala saɳ çri natha rin ulah, kapwanuttajariɳ raja kapakapa sadanken / cetra winaca, haywanambah ri tan lakwan ika maneketeɳ wastradyarana, dewaswadinya tatan purugen ika maran / swasthaɳ pura sada.
Pupuh 86	Jv/Kakawin Nāgarakṛtâgama/Pupuh 86 Akara rwaɳ dina muwah ikaɳ karyya kewwan / narendra, wawwan / lor niɳ pura tgal anamaɳ bubat kaprakaça, çri nathanken mara makahawan / sthana sinhapadudwan, sabhrtyanorakn ideran atyadbhutaɳ wwaɳ manonton. Ndan tinkahniɳ bubat arahararddarata tandes alwa, madya kroçakaranikan amurwwanutug / rajamargga, maddyardda kroca kta panalornyanutug pingiriɳ lwah, kedran deniɳ bhawana kuwuniɳ mantri sasök mapanta. Bwatbwat / mungwiɳ tnah aruhur atyadbhutadegnya çobha, stambhanyakweh hinukir anatha parwwa tinkahni- (130b) kapned, skandaware nikata nika kulwan / raket lwir pure jro, ngwan / çri nathan dunun i tkaniɳ cetramasan pamanguɳ.
Pupuh 87	Jv/Kakawin Nāgarakṛtâgama/Pupuh 87 Pratinkahniɳ panguɳ majajar analor paçcima muka, ri sandiɳ lor mwaɳ daksina haji para ksatriya pinikh, sumantri darmmadyaksa ktan umarp / wetan atatha, harpnyarddalwa lwir nika sadawataniɳ lbuh agöɳ. Rrika ngwan / cri nathan parahita maweh netrawisaya, hanan / praɳ tandiɳ praɳ \|- valign="top" valign="top" Pupuh ikan atembok kanin adu, akanjar len prp / mwaɳ matalitali moghandani ni suka, hanan pat / mwaɳ tri kaɳ dina lawasira çighran umulih. Yyulih çri nathekaɳ bubat aspi panguɳnya dinawut, samanka taɳ praɳ tandin an inura mankin / sukhakara, ri panlwaɳniɳ cetra nrpatin umiwö çrama sahana, wineh wastra mwaɳ bhojana pada sukhan mamwit umulih.
Pupuh 88	Jv/Kakawin Nāgarakṛtâgama/Pupuh 88 Salwir ikaɳ buyut / wadana teki tan wawan umantuk amwit i dalm, aryya ranadikara dinuluniɳ kadipati rin enjin umark, aryya mahadikara juru panca tanda pinakadi riɳ padlegan, rowan ikan padamwit i sdaɳ na- (131a) reçwara siran tinankil apupul. Nkan pawuwus narecwara ri wenker ojar i parandyanadi wadana, e khita haywa tan tuhu susatya bhaktyasih aniwyanatha ri haji, sthitya khiteɳ kaweçyan i sinandane hajenaniɳ pradeça ya gnen, setu damargga wandira grhadi salwir ikanaɳ sukirtti pahayun. Mukya nikaɳ gaga sawah asiɳ tinandur iɳ kawrddya raksan amern, yawat ikaɳ lmah pinakaramaken / pageha tanpa dadya waluha, hetu nikaɳ kulina tan atundunen amaradeça yan pataruka, naɳ pratigundalanya ya tuten / ri gonanikanaɳ pradeçan usirn. Cri krtawarddaneçwara hamaywani kagenan iɳ pradeça gawayen, ndan wilanen mahanasar ikan pramadanika riɳ pjah çaçi sada, milwa ta yomapeksa hananiɳ duratmaka makadyanidra lawana, wrddyani drwya sang prabhu phalanya sadananiran / rumaksa bhuwana. Cri nrpa tiktawilwanagareçwaranupasaman suminten amuwus, samya naranya rakwa kadadinya teki katkanya haywa wisamma, yan hana rajakaryya palawaɳ makadi nika tan hanan / nlwata, yan pa- (131b) sgeh muwah wruhanaha swadehanika samyalaksana gegen.
Pupuh 89	Jv/Kakawin Nāgarakṛtâgama/Pupuh 89 Mwaɳ rasaniɳ pratigundala panadegirebu hajika tuten, enjina yan padananratnana sabhinuktinikan pasgeh, yan hana murkka tikaɳ sin-gehan agawe lara sahasika, tut sasinambat ika sinawakanika tajaraken / ri kami. Apan ikaɳ pura len / swawisaya sinha lawan gahana, yan / rusakaɳ thani milwan akuran upajiwa tikaɳ nagara, yan taya bhrtya katon wayanika para nusa tkanrweka, etunikan / pada raksan apageha kalih phalaniɳ mawuwus. Nahan ujarnira riɳ para wadana sahur nika sapranata, eka hatur nika tan / salah anuta saliɳ naranatha kabeh, mantry upapattyananankal athaca para handyan ateki mark, thog tumiban ghatita traya panadahireky apupul caritan. Uttarapurwwa witanna kahananira çobha rinanga huwus, riɳ tri witana matut / padu mara wadanadyapupul / tinata, prapta tika tadah uttama wawan ika sarwwa suwarrnnamaya, çighra tika humarp / harpakn atitah ri harp / nrpati. Lwirni (132a) tadahnira mesa mahisa wihaga mrga wök / madupa, mina lawan tikan andah ajarin aji lokapurana tinut, cwana kara krimi musika hilahila len / wiyuɳ nalpa dahat, çatrw awamana hurip / ksaya cala nika rakwa yadi purugen.
Pupuh 90	Jv/Kakawin Nāgarakṛtâgama/Pupuh 90 Praptaɳ bhojana makadon rikaɳ wwan akweh, sankep sarwwarajatha bhojananya çobha, matsyasankya sahana rin (Bogen) darat / mwan i wwai, raprp / drak / rumawuh anut kramanuwartta. Manduka krimi kara musika çrgala, kweh çakterika winahan tamahnya tusta, deni wwaɳ nika dudu riɳ sadeçadeça, sambeknyeki tinuwukhan / dumeh ya tusta. Lwir niɳ pana surasa tan / pgat mawantu, twak nyu twak / çiwalan / harak hano kilaɳ brm, mwaɳ tampo sin adika taɳ hane harp / sök, sarwwa mas/ wawan ika dudw anekawarnna. Rombeh mwaɳ guci tikanaɳ prakirrnna lumra, arddakweh sajen ika datwanekawarnna, tanpantyaɳ larih aliwer banun way adrs, sambeknyangapan umutah waneh byamoha. Prahprah nrpatin aweh khasukan / pamukti, yan waɳ çakta pa- (132b) da pinaran / larihnya limpad, tan dadyamidi rin alah tlas kasenkwan, riɳ wwaɳ mana lagi werwer ginuywan. Ramyaɳ gitada paniduɳ nikan maganti, kirtti çri nrpati linanwakenyan anras, mankin tusta san aninum / samenake twas, sowenyalaha wkasan maguywaguywan.
Pupuh 91	Jv/Kakawin Nāgarakṛtâgama/Pupuh 91 Jurwiyanin / cucud saha buyut nikan amaceh maceh, prapta manrtta riɳ çwaran umambil i sadulur ika, solahulah nikamuhara guyw anukani lumihat, etunikhan wineh waçana taɳ para wadana kabeh. Ri wkasan kinon / marka milwalariha ri harp, mantry upapatti kapwa dinulurnyan alarih aniduɳ, manhuri khandamohi paniduɳnira titir inalm, çri nrpatin widagda manulangapi rsp alanö. Gita narendra maɳhlahlandani jner anani, mrak manawuwwan i padapa tulyanika rin alanö, lwir mmadu len / guladrawa rinok / rin amanis anener, wança maghasa tulyanika rin rs anuner i hati. Haryya ranadikara lali yan hatur i narapati, haryya mahadikara ta dulur nika parn amuwus, an / para handyan apti miha- (133a) te siran arakherakhet, a juga linnira t-her umantuk / hadadadakan. Cri krtawarddaneçwara mamanjaki si ra rumuhun, nkana rika witana ri tnah rinacana dinadak, çorinireki gitada lawan / tkesira rahajöɳ, sotan ulah karamyan ikanaɳ guyu juga winanun. Ndaluwaran sireki ri dataɳ narapatin anadeg, gitaniranyat andani girahyasen in umulat, çoranireki suçrama nirukti lituhayu waged, gi ta nikanhiribhirib aweh rsepanin umulat. Cri naranatha tan sipi wagusnira tlas arasuk, asta tkesnirekin upabharyya rahayu sawala, tusnin amatya wança wicaksana tetes in ulah, etuniran pabanwal anibaken ucapan anne. Naɳ nawanatya kapwa tinapaknira tinewekaken, asya makadi tan pat ikaɳ guyu parn aslur, mwaɳ karunamanun tanis aweh skel apuhara luh, etu nikaɳ tumon / pada kamanusan anenanen. Sinhitin arkka linsir irika nrpatin atlasan, nka para handyan amwit umusap / ri padatala haji, liɳ nika muktapapa sinunan sukha kadi tan i rat, tan / wuwusen / stuti- (133b) nya haji sampun umulih hi dalm.
Pupuh 92	Jv/Kakawin Nāgarakṛtâgama/Pupuh 92 Manka tinkahiran/ pamukti sukha riɳ pura tumkani sestiniɳ manah, tatahhan lara dahat/ ndatan malupa riɳ kaparahitan i haywaniɳ praja, anwam/ tapwana kabwatan sira tathapi sugata sakalan/ maharddika, deniɳ jñana wiçesa çudda pamademnira ri kuhakaniɳ duratmaka. Ndatan mahuwusan kawiryyanira len/ wibhawanira dudug/ rin ambara, singih çri girinathamurtti makhajanma ri siran agawe jagaddita, byakta manguh upadrawawihan i sajñanira manasar iɳ samahita, moktan kleça keta katona nuniweh wuwusana tika saɳ sada mark. Nahan hetuni kottaman/ nrpat kaprakaçitaɳ pinujiɳ jagattraya, sakwehniɳ jana madyamottama kanista pada mujaraken/ çwarastuti, anhiɳ sotnika mogha langen atuwuh wukira sira panöbaniɳ sarat, astwanirwa lawas/ bhatara rawicandrama sumelh i bhumimandala.
Pupuh 93	← Pupuh 92 Kakawin Nāgarakṛtâgama by Mpu Prapañca Pupuh 93 Pupuh 94 → 64370Kakawin Nāgarakṛtâgama — Pupuh 93Mpu Prapañca Pupuh 93 – Sragdharā 1. a. sakweh sang paṇḍitang anyaḍaraṇi mangikĕt kāstawan śrī narendrā b. śrī Buddhâditya sang bhikṣwagaway i sira bhogawwali śloka kirṇna c. ring Jambudwipa tônggwānira mangaran i Kañcipurī ṣaḍwihāra d. mwang sang Wiprângaran śrī Mutali sahṛdayâwat stuti śloka śūddha 2. a. astam sang paṇḍitêng bhūmi Jawa saha sang śāstradakṣātiwijña b. kapwāgostyāngikĕt śloka hana wacawacan nggwānirêkin pamārṇa c. mukhyā munggw ing praśāsti stuti nṛpati tĕkap sang Sudharmôpapatti d. sang wruh ring gita gitênikĕtiran angikĕt stotra lumrêng purī jro Sakweh saɳ panditan anyadarani maniket kastawan/ çri narendra, çri buddaditya saɳ bhikswagaway i sira bhogawwali (134a) çloka kirnna, riɳ jambudwipa tongwanira manaran i kañcipuri sadwihara, mwaɳ saɳ wipranaran/ çri mutali sahrdayawat/ stuti çloka çudda. Astam/ saɳ panditeɳ bhumi jawa saha saɳ çastradaksatiwijña, kapwagostyaniket/ çloka hana wacawacan/ ngwanirekin pamarnna, mukya mungwiɳ praçasti stutni nrpati tkap/ saɳ sudarmmopapatti, saɳ wruh rin gita giteniketiran aniket/ stotra lumreɳ puri jro.
Pupuh 94	← Pupuh 93 Kakawin Nāgarakṛtâgama by Mpu Prapañca Pupuh 94 Pupuh 95 → 64370Kakawin Nāgarakṛtâgama — Pupuh 94Mpu Prapañca Pupuh 94 - Jagaddhita 1. a. ambĕk sang maparab Prapañca kapitut mihat i para kawīśwarêng pura b. milwâmarna ri kastawan nṛpati dūra pangikĕtika lumra ring sabhā c. anghing stutya ri jöng bhaṭāra Girinātha pakĕnanika mogha sanmatan d. tan len prārthana haywaning bhuwana mukhya ri pagĕha narendra ring prajā 2. a. ring śākâdri gajāryamâśwayujamāsa śubhadiwasa pūrṇacandramā b. ngkā hīngan ra kawi n pamarṇana kadigwijayanira narendra ring prajā c. kwehning deśa riniñci donika pinustaka mangarana deśawarṇana d. panggil panghwata sanmata nṛpati mengĕta ring alawas atpadêng langö 3. a. nirwyā têki lawasnikâsring angikĕt kakawin awĕtu bhāṣa ring karas b. tĕmbeyanya śakābda ping rwanika lambang i tĕlasika parwasāgara c. nāhan têki caturthi Bhīṣmaśaraṇântyanika Sugataparwawarṇana d. lambang mwang śakakāla tang winaluyan gati nikana mĕwĕh turung pĕgat. 4. a. donya n mangkana wṛddhya yan pangikĕte haji kathamapi tan tame langö b. śloka mwang kakawin kidung stutinike haji makamukha deśawarṇana c. göng bhaktyāsih anātha hetunika pakṣa tumuta sang umastawe haji d. nghing tohnyêki wilajja niścaya yadin guyu-guyun apa deya lampunĕn Ambek saɳ maparab/ prapañca kapitut/ mihat i parakawiçwareɳ pura, milwamarnna ri kastawanrpati dura panikt ika lumra riɳ sabha, anhiɳ stutya i jöɳ bhatara girinatha patnanika mogha sanmatan, tan len/ prartthana haywaniɳ bhuwana mukya ri pageha narendra riɳ praja. Riɳ çakadri gajaryyamaçwayujamasa çubhadiwaça purnnacandrama, nka hingan/ rakawin/ pamarnnana khadigwijayanira narendra riɳ praja, kwehnin deça riniñci donika minustaka manarana deçawarnnana, pangil/ panhwata sanmata nrpati mengeta rin alawas atpadeɳ lanö. Nirwya teki lawasnira çrin aniket/ kakawin awtu bhasa riɳ karas, tembeyanya ça- (134b) kabda pinrwanika lamban i tlas ika parwwa sagara, nahan teki caturtthi bhismaçaranantya nika sugataparwwa warnnana, lambaɳ mwaɳ çakakala taɳ winaluyan gatinikan ameweh turuɳ pgat. Donyan mankana wrddya yan panikete haji kathamapi tan tame lanö, göɳ bhaktyasih anatha hetunikapaksa tumuta san umastawe haji, çloka mwan kakawin kiduɳ stuti nike haji makamuka deçawarnnana, nhiɳ tohnyeki wilajja niçcaya yadin guyuguyun apa deya lampunen.
Pupuh 95	← Pupuh 94 Kakawin Nāgarakṛtâgama by Mpu Prapañca Pupuh 95 Pupuh 96 → 64370Kakawin Nāgarakṛtâgama — Pupuh 95Mpu Prapañca Pupuh 95 – Sajenising Dhṛti 1. a. purih ing awan lanenalĕh ing adyah akikuk i ḍusun b. arĕtu kurang prahāsana kumul kuna ring ujar arūm c. dugaduga sātya sādhu juga sih lalis ika matilar d. mapa karikāpa don wruh ika ring Smarawidhi wiphalā 2. a. karaṇanikānapih wiṣaya tan karaktan ing ulah b. wuta tuli tan wru lagrinīnalĕhning alara katilar c. pawara-warah mahāmuni dudūga rinĕgĕp i hati d. pijĕr angiwö kriyādwaya matangya tan umur atilar 3. a. lĕkas ika tan pahi mwang atapêng giriwana manusup b. agaway umah pahoman asĕnöt jĕnĕk amati tutur c. kamala natarnya len asana tanduran ika maruhur d. kamalasana ywa nāma ni sampun alawas amatĕk Purih in awan/ lanenalh in adyah akikuk i dusun, artu kuraɳ prahasana kumul kuna rin ujar arum, dugaduga satya sadu juga sih lalis ika matilar, mapa karikapa don wruh ika riɳ smarawidi wiphala. Karananikanapih wisaya tan/ karaktan in ulah, wuta tuli tan/ wru lagrininalh nin alara katilar, pawarawarah mahamuni duduga rin-gep i hati, pijer aniwö kriyadwaya matanya tan umur atilar. Ikas ika tan/ pahi mwan atapen giriwana manusup, agaway umah pahoman asnöt/ jnek amati tutur, kamala na-(135a) tarnya len asana tanduran ika maruhur, kamalasana ywa nama ni sampun alawas amatek.
Pupuh 96	← Pupuh 95 Kakawin Nāgarakṛtâgama by Mpu Prapañca Pupuh 96 Pupuh 97 → 64370Kakawin Nāgarakṛtâgama — Pupuh 96Mpu Prapañca Pupuh 96 – 8+8 pada, Wipulāwaktra 1. a. prapañca pracacah pañca b. pracacad pocapan cĕcĕd c. prapöngpöng pipi pucce prĕm d. pracongcong cĕt pacĕh-pacĕh 2. a. tan tata tīta tan tutĕn b. tan tĕtĕs tan tut ing tutur c. titik tantrī tatêng tatwa d. tutun tāmtām titir titih Prapañca pracacah pañca, pracacad/ pocapan/ ceced, prapöɳpöɳ pipi pucce prm, pracoɳcoɳ cet pacehpaceh. Tan/ tata tita tuten, tan tetes/ tan tut iɳ tutur, titik/ tantri tateɳ tatwa, tutun/ tamtam/ titir ttitih.
Pupuh 97	← Pupuh 96 Kakawin Nāgarakṛtâgama by Mpu Prapañca Pupuh 97 Pupuh 98 → 64370Kakawin Nāgarakṛtâgama — Pupuh 97Mpu Prapañca Pupuh 97 - 8+8 pada, Wipulāwaktra 1. a. samalān pu winādāprih b. prih dānā wipulān masa c. tāmā san śara ring gatyā d. tyāga ring rasa sanmatā 2. a. yaśá sang winadānungsi b. sinung dāna wisangśaya c. yan aweh magawe tibra d. bratī wega maweh naya 3. a. matarung tuhu wānyaprang b. prangnya wahhu turung tama c. masa linggara śūnya prih d. prihnya śūra galing sawa Samalan/ pu winadaprih, prih dana wipulan/ masa, tama san/ çara riɳ gatya, tyaga riɳ rasa sanmata. Yaça saɳ winadanunsi, sinuɳ dana wisançaya, yan aweh magawe tibra, brati wega maweh naya. Mataruɳ tuhu wanyapraɳ, praɳnya wahhu turuɳ tama, masa lingara çunya prih, prihnya çura galiɳ sama.
Pupuh 98	← Pupuh 97 Kakawin Nāgarakṛtâgama by Mpu Prapañca Pupuh 98 → 64370Kakawin Nāgarakṛtâgama — Pupuh 98Mpu Prapañca Pupuh 98 – Wikṛti 1. a. yan bwat para kawi maparab winādan atapa brata kṛta juga rin-gĕp b. maitryāsih ing alulut upekṣa ring huwus awarsih ariris ing ulah c. tyāge sukha wibhawa yatan katĕmwa sakahananika nukhani saphalā d. tātan huninga mihat i solahing para wināda cinala ri ni dalĕm Yan bwat para kawi maparab/ winadan atapa brata krta juga rin-gep, maitryasih in alulut upeksa riɳ huwus awarsih ariris in ulah, tyage sukha wibhawa yatan katemwa sakahananika nukhani saphala, tatan hunina mihat i solahiɳ para winada cinala ri ni dalm.

Lihat pula

Untuk terjemahan bahasa Indonesia, kunjungi id:Kakawin Nagarakretagama