toki Wijosa
tan jan Tesa, tan jan Tepo
jan Tepo: o kama pona tawa kalama sin ni. tenpo suno ni la mi toki lon toki Wijosa. jan Tesa li lon, a–
jan Tesa: toki!
j.Tepo: toki toki! –li toki e ijo pi toki Wijosa tawa sina. mi o open: sina seme, jan Tesa o? jan sin li kama lon kalama sin la ona o toki lili e nimi ona e ijo ona. o toki.
j.Tesa: toki! toki! mi jan Tesa. mi sona e toki Inli e toki Epanja e toki pona e toki Wijosa. mi sike e suno lon tenpo sike mute mute.
j.Tepo: mute a.
j.Tesa: kin la, mi olin e soweli e kasi e ilo. e toki kin.
j.Tepo: a pona pona. a, ni la mi o open e toki pi toki Wijosa. toki Wijosa li seme?
j.Tesa: toki Wijosa li toki pi kama sona kepeken toki Wijosa taso. toki Inli li lon ala lon tomo pi kama sona pi toki Wijosa. jan mute pi toki ante li toki lon tomo sama la sona li kama lon.
j.Tepo: a ni li wawa mute. nasin seme la jan li pana e sona kepeken toki Wijosa taso. ona li kama tawa kulupu la ona li sona e toki Wijosa ala. nasin seme la ona li ken kama sona kepeken toki Wijosa taso?
j.Tesa: jan li toki Inli tan ijo lili lili. taso jan pi kama sona li kepeken toki Wijosa kepeken sitelen lili. sitelen toki.
j.Tepo: n. lon, lon. sitelen lili li ken lon toki, li ken pana e sona mute.
j.Tesa: ni li nasin pi kama sona pona.
j.Tepo: lon, ni li pona.
j.Tesa: ni li nasin pona.
j.Tepo: n. tenpo seme la toki Wijosa li kama lon?
j.Tesa: a. tenpo suli pini la open mama pi toki Wijosa li lon tenpo pini pi sike suno pi nanpa luka tu wan. jan mama- jan mama Elis- jan mama wan pi toki Wijosa li toki e ni: "ken la kulupu jan pi toki ante li toki uta kepeken toki ante taso, lon tomo linluwi wan." ni la toki sin li kama lon.
j.Tepo: a ni li wawa mute! a, ni li kama anu seme: toki sin li lon, lon tenpo ni.
j.Tesa: ...li kama lon.
j.Tepo: lon.
j.Tesa: ni li lon.
j.Tepo: n, tenpo seme la sina kama sona e toki Wijosa. tan seme? seme la–?
j.Tesa: a, mi la mi kama sona e toki Wijosa la jan pi nimi lawa- jan lawa li toki [tawa] mi, tan tokiponido sin pi nasin Wijosa kepeken nimi pi toki pona. tenpo ona la mi sona ala e toki Wijosa la mi kama sona e toki Wijosa la mi pana e nasin tawa tokiponido sin pi jan lawa. mi kama sona e toki Wijosa la mi olin kin mute e toki Wijosa, la mi kama sona suli e ona. e nasin, e nimi, e jan, e kulupu. kulupu pi toki Wijosa li pona kin.
j.Tepo: a! ni li lon. toki pona li pona mute tawa mi toki taso ala, li pona suli tawa mi tan ni: kulupu li lon li pona suli!
j.Tesa: kin la kin.
j.Tepo: kulupu li suli. a, o toki e kulupu. seme li musi lon kulupu? seme li sin lon kulupu lon tenpo..?
j.Tesa: a, kulupu Wijosa [la] ijo sin li lon. tenpo pini pi sike suno la ma sin li kama lon. ma sin pi toki Wijosa ante. kulupu lili pi jan Wijosa li wile ante lili e toki Wijosa. jan mute pi toki Wijosa li wile ala e ante suli la kulupu lili li pali e ma sin. ma sin lili. ma wan li jo e nasin sin e nimi sin. ma tu [la] ale li sin. ale li ante.
j.Tepo: a. ni li toki Wijosa ala li toki sin a anu seme?
j.Tesa: lon, lon. sina sona. ni li toki "Wodojk". msa e ni, a a
j.Tepo: a a a! toki Wota anu seme?
j.Tesa: nimi [pi] nasa lili. "Wodojk". en nimi mute li lon ona– li lon Wodojk.
j.Tepo: a, lon.
j.Tesa: ma tu wan li uta taso.
j.Tepo: a!
j.Tesa: sitelen li lon ala. ma tu wan li ma pi toki uta taso. ni li...
j.Tepo: ni li musi.
j.Tesa: jan mute li lon ala, lon ona.
[jan Tepo pi tenpo ante]: a a! tenpo ni la ilo pi awen kalama li kama pakala li awen ala e kalama lili. pakala! a, taso n. tenpo pakala la mi toki sama ni:
jan mute li wile ala kepeken kalama uta lon kulupu suli. jan ale li kute la ni li ken nasa. taso ni li musi [te] toki li kepeken sitelen ala [to] la ona li kama seme?
a ni la jan Tesa li kama toki sama ni:
kulupu pi toki Wijosa la jan mute li pali e kalama musi e sitelen musi, e kalama toki kin. kalama toki sin li kama lon tenpo mute sama kalama sin ni pi toki pona. nimi ona li "Davi Hanu".
ni li ale. kalama li awen.
j.Tesa: a, jan mute [pi] kulupu Wijosa li musi e musi sitelen linluwi "garticphone" pi sitelen pi toki Wijosa. na... n ijo ante...
j.Tepo: a a a, "na".
j.Tesa: a a a!
j.Tepo: [toki pi kalama nasa pi toki ante]
j.Tesa: ni li nimi pi toki pona ala! a a a.
j.Tepo: ni li lon.
j.Tesa: sina pona.
j.Tepo: mi ken weka tan ni lon tenpo kama, a a [taso ona li pali ala e ni a a]
j.Tesa: ni li pona. "toki pona taso!"
j.Tepo: lon.
j.Tesa: tenpo pi toki uta mute li lon ma Wijosa. ni li musi kin tawa mi. toki uta.
j.Tepo: a, lon. a a a, mi o... mi kama sona lili e toki Wijosa. taso mi sona mute ala e kute. mi...
j.Tesa: sina kama sona pona e toki Wijosa! sina pona a!
j.Tepo: ken la mi sona lili...
j.Tesa: a a a.
j.Tepo: mi sona e nimi pi mute ala... a a a.
j.Tesa: a. nimi li suli ali lon toki Wijosa. nasin li suli kin. nasin li suli kin lon toki Wijosa.
j.Tepo: n? nasin seme? n, nasin li sama ni anu seme: sina ken ala...
j.Tesa: n, nasin toki.
j.Tepo: a, lon nasin nimi. nimi li pali e seme, li...
j.Tesa: pona. sina sona.
j.Tepo: lon, lon.
j.Tesa: sina sona. a, mi wile sona e ijo: nimi pi mute seme li lon toki Wijosa? n. mi lukin kama sona e toki ante, sama toki Losupan la mi o pana e nimi mute mute mute nasa tawa lawa mi. ni li pali suli li musi ala.
j.Tesa: mute kin lon toki Losupan. a, toki Losupan li jo e [nimi pi] mute mute mute n, toki Epelanto li jo e nimi pi mute mute. toki Wijosa li jo e nimi mute. toki pona li jo e nimi.
j.Tepo: a a a, nimi pi mute ala!
j.Tesa: ... li lili mute. a, toki Wijosa li jo e nimi ete tawa nimi ku suli pi toki pona.
j.Tepo: n. taso ni li awen lili tawa toki Epelanto anu seme?
j.Tesa: a... o sin? sina pona.
j.Tepo: n. nimi pi toki Wijosa li awen lili tawa nimi pi toki Epelanto anu seme?
j.Tesa: a, sina sona! ni li lon.
j.Tepo: pona, pona... a a ni li lili tawa toki Losupan.
j.Tesa: toki Losupan li pona tawa mi- taso mi sona ala- mi toki ala e toki Losupan. nimi pi mute mute mute la mi ken ala kama sona.
j.Tepo: a lon, lon. kama sona nimi [la] mi ken kepeken ilo. taso, a. ilo li ken pana pona e sona nimi. taso, ilo la mi o pali mute. ilo li pana e nimi tawa mi lon tenpo mute la mi o... o pali mute tawa awen sona nimi. a! ni li musi mute ala. toki pona li...
j.Tesa: a a a... toki pona la kama sona en nimi li wawa wawa.
j.Tepo: tenpo lili a.
j.Tepo: kama sona mi pi toki Wijosa la mi kepeken ilo ni ala. mi kute taso. mi kama sona e nimi tan ni: jan li kepeken lon tenpo mute. ni li pali suli ala. taso, tan ni la mi sona e nimi mute mute ala... tenpo mute la mi o alasa e nimi.
j.Tesa: mi kama sona e toki Wijosa lon tenpo pi sike suno wan.
j.Tepo: a! kepeken sike suno wan. ni li... ni li tenpo suli.
j.Tesa: tenpo pi... suli lili a a. tenpo pi suli lili.
j.Tepo: a, mi sona e toki pona lon tenpo sama ni.
j.Tesa: a! sina pona! sina kama sona wawa!
j.Tepo: a a a.
j.Tesa: mi kama sona e toki pona lon tenpo pi sike suno... pi nanpa tu tu wan?
j.Tepo: ni li mute.
j.Tesa: ken la ni li lon. ken la ni li powe. jan tu: mi sona ala.
j.Tepo: pilin mi la sina sona e toki pona! pona.
j.Tesa: a, mi ken toki e ijo ante pi toki Wijosa.
j.Tepo: n! o toki. o toki e ijo ale.
j.Tesa: lon linluwi [la] "RISSKOLI" li lon. ni li suli tawa mi.
j.Tepo: a! ni li seme?
j.Tesa: ni li lipu nimi pi nimi Wijosa kepeken [toki] Wijosa taso.
j.Tepo: a!
j.Tesa: sitelen en nimi en kon nimi kepeken toki Wijosa taso. ni li ilo wawa pi kama sona e toki Wijosa.
j.Tepo: a pilin mi la mi lukin e lipu ni lon tenpo! ni li pona mute! mi ken kama sona e nimi kepeken nasin pona.
j.Tesa: ni li nasin pona.
j.Tepo: tenpo mute la lukin e nimi sin nasa la mi alasa e ona lon kulupu pi ilo Siko kepeken ilo alasa lon ilo Siko. ni li ken pana e sona wawa.
j.Tesa: a.
j.Tepo: jan ante li toki e ni: "nimi ni li seme?" la mi ken lukin e toki ni pi tenpo pini.
j.Tesa: lon, lon. toki pona la sina ken pali e ni. toki Wijosa la [lipu] "RISSKOLI" la sina ken kama sona e nimi tan sitelen nimi. kama sona e kon nimi.
j.Tepo: ni li lon, ni li lon. sitelen pi ijo nimi li lon poka nimi. ni li pana a e sona!
j.Tesa: ni li lon. sina sona.
j.Tepo: sitelen li suli tawa pana sona pi toki Wijosa. a, mi sona ala e ijo ante... ken la mi pini lon tenpo ni?
j.Tesa: sina pona!
j.Tepo: sina pona kin, jan Tesa o.
j.Tesa: sina pali e ni. sina toki tawa mi. sina pona kin.
|
This work is licensed under the Creative Commons Attribution-ShareAlike 4.0 International (CC BY-SA 4.0) license.
|