kalama sin #17
nasin pi kama sona
tan soweli nata, tan jan Tepo
jan Tepo: o kama pona tawa kalama sin!
soweli nata: toki toki!
j.Tepo: mi jan Tepo. tenpo suno ni la soweli Nata li lon li wile toki e ijo, e nasin sona. toki. sina seme?
s.nata: toki a.
j.Tepo: nanpa wan la sina o toki e ni: sina seme? tenpo mute la jan li lon kalama sin lon tenpo nanpa wan la o toki e ijo.
s.nata: mi soweli nata. mi ijo. ni li pona anu seme?
j.Tepo: lon.
s.nata: pona.
j.Tepo: a a, ni li ken.
s.nata: mi sona ala e ijo toki ante. a...
j.Tepo: ale li pona!
s.nata: taso mi wile... mi wile toki e ijo. mi wile toki e ijo sona. mi wile toki e pana sona, e kama sona, e nasin sona pona. mi wile toki e lawa mi e lawa ante, e ijo pona. mi wile toki e ilo e lipu. mi wile e ni: ken la ona li pona tawa sona sina, li pona e nasin sina. a, ni li mi wile toki e ni: tenpo pini poka la mi kama sona e toki Esuka. mi lukin kama sona e ona. ni li awen ala lon tenpo suli. taso ona li awen pona tawa mi. tan wile sona la mi esun e lipu sona. lipu sona ni li suli li toki e ni: ona li pana e sona mute. taso, mi kama sona e ni: lipu ni li pona ala tawa lawa mi. mi ken ala kama sona pona tan nasin ona. ni la mi wile toki e nasin toki ike, e nasin sona ike, e nasin sona pona, e nasin sona lipu, e nasin sona mi. ken la ni li pona tawa jan ante. ni la mi wile toki e lipu lon tenpo nanpa wan. mi wile toki e lipu ni: mi esun e ona. ona li ike tawa mi. ona li pana e sona toki tawa mi. taso ona li pana e sona lon nasin nasa. lipu mute li pana e sona lon nasin ni. a... mi sona ala e tan. kulupu suli sona li wile e ona anu seme? mi sona ala. a, taso. ona li pali e lipu lili mute. ona ale li pana sona e ijo wan, li pana e ijo ante. ken la ona li pana e nimi mute. ona li pana e nimi soweli, e nimi ma, e nimi ante. sin la ona li pana e utala sona mute. ona li wile e ni: jan li kama sona kepeken pali. taso utala sona ona li nasa lili. ona li wile e ijo sama ni: sina lukin e nimi pali, sina ante lili e ona, li pana e ona lon toki ni. sina wile pali e ni lon tenpo mute mute. pali ale li ante lili taso, li sama.
j.Tepo: sina pali lon tenpo mute ale la sina kama sona pona ala anu seme?
s.nata: a. ken. mi sona ala. lipu ni li nasa tawa mi. a, ona li sama... lipu la mi toki e ni: ona li sama nasin tawa. sina tawa lon nasin wan suli la sina ken tawa lon nasin wan taso. nasin li lon sinpin sina. sina wile tawa ona. nasin lipu li sama e ni. sina ona li wile e ni: mi lukin e lipu nanpa wan. mi kama sona tan ona. mi pali e utala sona ona. mi pali sama lon lipu nanpa tu, lon lipu nanpa tu wan, lon lipu nanpa tu tu. taso ni ale li ike suli a tawa lawa mi, tawa lawa jan, anu seme? mi sona ala. a... ona li ike suli tawa mi.
j.Tepo: nasin ni li ike tawa mi kin. toki pona la mi kama sona kepeken nasin ni ala. suli la mi kama sona tan toki. mi kama sona e mute ala tan lipu.
s.nata: lon! mi pilin sama ni. a, nasin tawa ni. ni li ike suli tawa mi. a, tenpo suli la mi pilin e ni: mi wile kama sona e ijo la mi wile kama e sona e ona tawa wile lon. mi wile ala pali e ijo tan ala. taso tenpo mute la lipu li wile e ni: mi pali, tan ala. ona li wile e pali suli, e pali suli sama. a, ijo ala li musi la ijo li awen ala lon lawa mi. wile lipu en wile mi sama ala la ijo mute ala li awen lon sona mi. ken la jan mute li sama. mi sona ala. ni la mi wile toki e ni: nasin seme la mi kama sona pona e ijo? a, seme li suli e sona mi li pona wawa e ona? suli a, la mi kama sona e wile pali. mi ken ala kama sona e ijo kepeken wile pali ala. tenpo mute la mi ken ala kama sona tan ni: mi wile kama sona. mi wile kama sona tawa pali wan. ni la mi wile kama lukin e ijo wan musi. toki la ona li ken ni: mi wile toki e ijo. ken la ona li ni: mi wile lukin e lipu musi. ni li nasin. ni la mi kama sona e wile mi la ni li wawa e wile mi tawa ante.
tenpo mute la mi kama sona e ijo tan open lipu. open lipu li toki e nasin kalama lon tenpo mute. lon sona toki la ona li toki e kalama, e nasin kalama. ni la mi ken sona kalama e nimi lon toki ni. mi ken sona e ijo lili suli. sona mute a li kama tan sona noka tan sona suli ni. ni la mi wile kama sona e ijo open. wile la mi ken kama sona e ni tan lipu. taso tenpo la lipu li pana e sona ni kin. sona toki la lipu li pana e sona nasa lon tenpo mute.
ona li pana e sona ni: mi tawa ma ante li wile toki e tomo telo e moku e ijo ante tawa jan ma, la mi o sona e ni: nimi li seme? kulupu nimi seme? taso mi alasa e lipu pona li kama sona e ijo open. ni li pini la mi wile kama lukin e— mi wile kama sona e pali mi, e pali musi mi. ni li ken lukin lipu, li ken pali ante. mi kama sona e ni la mi wile mute e pali ni. mi wile ante e pali suli wan tawa pali lili mute. ni li ken pona tawa ni: mi kama sona e ijo lili mute. a, tan ni la mi lukin kipisi e ona. a...
j.Tepo: kipisi.
s.nata: kipisi. lon. mi wile ala toki e nimi kipisi. taso ona li kama lon lawa mi. ona li pona mute tawa uta: kipisi! kipisi!
j.Tepo: kipisi! lon. mi kepeken lon tenpo mute.
s.nata: lon a! taso mi wile mute e pali. mi wile kama e pali lili mute. mi lukin e lipu e toki kepeken toki sin mi, la ni li ken ni: mi kepeken lipu nimi, li kama sona e nimi lili ale. ni la mi ken kama sona e ijo e nasin toki kepeken ni. tenpo la mi kepeken lipu sona ante kin. lipu pona li lon tenpo lili... mi alasa mute e ona lon sona toki. ona li toki sama ni: mi lukin e nimi wan, li wile sona e ni: lipu seme li pana e sona ona, li toki mute e nasin ona? tenpo la lipu ni li ni: li lon pini lipu. ona li pini e lipu suli. ona li toki e nanpa lipu mute. ni li pona suli tawa nasin sona mi. mi ken lukin e nimi lili. mi ken kama tan toki wan. mi ken kama sona e kon ona e nasin ona. mi ken awen. mi kama sona e ijo lili ni! pona ni la mi ken kama lukin e wile sona ante. ken la wile pali ante li kama tan ni. mi lukin e nasin toki wan la mi wile sona e ni: nasin seme ante la mi ken toki e ijo sama? tenpo la lipu sona li toki e ijo lili musi li kama e wile sona ni. a, ni ale li awen. mi kama sona e ijo lili mute tan pali lili mute. ni li pini la mi kama pali e ijo lili wan. ken la mi kama sona e toki lili wan, e nimi lili wan. mi kama sona e ni: ni li toki e seme? ni, lili, mute. taso, ona li pana e sona suli tawa mi. mi kama sona e ijo lili mute la ni li ijo mute a. li sama... li ken nasin e sona kama mi. ni li awen wawa lon lawa mi. ona li awen tan ni: mi kama sona tan wile musi, tan wile lipu ala. ni li ken ike... ni li ken ike e nasin sona. tenpo la mi lukin e ijo li ken ala sona, li wile alasa e sona mute. nasin li ken nasa! taso ona li awen pona lon lawa mi, li pona pilin tawa mi. ijo mute li kama e ijo mute ante lon sona mi. ni li nasin mi lon tenpo mute! mi kama sona e toki pona lon tenpo pini, la mi kepeken ni. mi wile... nanpa wan la mi wile lukin sona e toki jan. mi tawa kulupu toki. mi lukin taso e toki sitelen jan. mi lukin e nimi ale lon lipu. mi lukin e lipu ni: ona li pana sona e nimi ni, e nasin ona. mi kepeken ni. mi kama sona e ijo. mi kute e ijo musi tan toki ni la mi kama wile toki e ijo. tan ni la mi lukin mute e lipu sona. mi wile sona e ni: nasin seme la mi ken toki e ni? nasin seme la mi ken e ijo ante? mi wile toki tawa jan! wile toki li suli mute li wawa mute e ni anu seme? sina sona e jan li wile toki tawa ona, la sina ken kama sona e toki. a... mi kama sona e toki ante kepeken ona kin. mi wile kama sona e toki Esuka la mi lukin e lipu ni: "jan lawa lili". mi lukin e toki open ona... mi lukin e nimi lili ale. mi pana e nimi lon lipu sona. mi alasa e sona ona. mi kama sona e nasin toki suli tan ni. a... sona mi li nasa lili. taso ona li pona tan wile. a, ona li awen lon lawa mi lon tenpo ni. kama sona li lon tenpo pini. taso sona li awen tan musi tan ijo ante. ni la mi wile toki e ilo e nasin e lipu. mi toki e nasin suli mi. taso mi toki ala e ni: mi wile kama sona e ijo la mi kepeken seme?
mi toki e ni: mi alasa e lipu sona pona. a, lipu sona la alasa li ken pali suli. lipu mute li tan ni: jan li wile e mani. ona li tawa ni: jan li wile tawa ma ante, li wile sona e toki lili. taso ona li pana ala e sona wawa e kon nasin. a ni li ken ike. taso a.... mi toki e ijo. lipu nimi pona li suli. mi jo e lipu nimi pona la mi ken alasa e nimi kepeken tenpo lili. kin la mi wile e lipu ni: mi lukin e nimi lili li wile sona e nasin ona la mi ken kama lukin e lipu suli. mi toki e ni kin. ni ale li pona. taso mi ken kepeken ante. ilo suli li lon. ilo pona li lon. ona nanpa wan li ilo Tatowepa. ilo Tatowepa li lipu. ona li lon kulupu ilo. jan ale li ken pana e ijo tawa ona li ken pona e ona. ni li suli. nasin ona li ni: jan li ken toki pana e toki, lon toki mama ona, lon toki ante kin. ona li ken pana e toki wan. ken la toki wan li sama ni: jan Ton li moku e pan. ni li ale. jan ante li ken pana e toki sama, lon nasin toki ona. mi toki ala e toki ante tan ni: kalama ni li kepeken toki pona. taso, ona li ken ante e toki tawa toki mama ona. kepeken ilo ni la jan li ken toki e ni: a, toki tu ni li toki e ijo sama. ni li wan e toki ona. ona li pona suli tan ni: mi ken alasa e ijo li ken kama sona e nasin toki tawa ona. mi kepeken ona lon tenpo ni: mi wile ala sona e nimi ijo. (lon tenpo ni:) mi wile sona e nimi nasin e nasin toki. a, ken la mi toki e nimi lili lon toki Inli. toki Inli la nimi ni li lon toki mute. ni la ilo Tatowepa li pana e toki. toki ale li kepeken nimi lili ni. ni la mi wile lukin e ante toki. mi kama sona tan ante toki ona. mi wile sona e ni: toki ale ni la seme li sama? nimi seme li sama lon toki wile? mi wile kama sona e toki la mi wile lukin e ijo sama. tan ni la mi ken lukin e nimi pona. mi ken sona e nasin. mi alasa e ijo sama lon lipu sona, la mi ken kama sona e ijo wile. ilo Tatowepa li pona suli tan ni: mi kama sona tan ale toki, tan nimi wan ala. lipu nimi li pana e nimi wan lon tenpo mute. nimi ale li wan li lili. ken la ona li nimi tu... taso ona ale li toki e ijo wan. ona li pana ala e nasin toki. taso mi lukin e toki suli wan li kute e suli wan, la ona li pana e nasin ale li pana e sona ni: nasin seme la mi wan e ijo lili ale ni? ni li pona suli. ilo Tatowepa li ken ike lili. jan li ken pana e toki pakala. toki pona la ni li lon. jan li sona pona ala e toki pona, li awen pana e ijo. ni li ken suli. jan li lukin pona e ni, li lukin weka e toki ike. taso ni li kepeken tenpo li kepeken wawa. ni la... pakala li ken lon. taso awen la, ijo li ken pona. jan li ken sona e ike e pona la ona li ken kama sona pona. toki Inli en toki Epanja en toki mute ma, la ona li pona. a, lipu ante li lon. ona li... tenpo mute la ona li lon ala toki pali. ona li lon toki ma li lon toki jan lon. taso ona li lon toki. ona li lon toki Epelanto. a, ona li lipu Wikipesija. a ken suli la sina sona e lipu ni. ona li suli lon ma mute anu seme... ona li toki e lipu sona lili mute - e lipu sona mute. ken la ona li lili ala. ona li toki e ijo ale ma, e jan suli, e ma suli, e ma lili! e toki, e kulupu, e moku, e ijo ale. jan li ken kama sona e ijo kepeken ona. jan ale li ken ante e ona li ken pana e sona tawa ona. lawa li lon. taso n. jan li ken pona e ona. ona li kama pona tan pali jan. ona li pona tawa sona toki tan ijo tu. nanpa wan la jan li ken lukin e lipu mute, li ken sona tan lipu mute lon toki wile ona. ni li pona. taso a.... mi kepeken ona lon ni: mi wile sona e ijo. ken la mi wile sona e ni: nasin seme la jan li toki e ijo wan? ken la ni li ijo nanpa. ken la ona li ijo sona. ken la ona li jan wan. ken la ona li ma wan. taso ijo ni... nimi ona li suli. toki ante la nimi li ante. a, tenpo mute ala la jan li toki e ijo ni. ken la ona li lon ala ilo Tatowepa. ni li lon tenpo mute. ilo Tatowepa li toki e nasin... ona li toki e soweli e moku... taso ken suli la ona li toki ala e ijo nanpa, e ijo suli, e ijo sama ni. a mi wile kama sona toki e ijo sama ni la mi kepeken lipu Wikipesija. mi ken alasa e lipu ijo kepeken toki mama mi. toki mama mi li toki Inli. mi lukin e lipu ni... taso poka lipu la lipu li toki e ni: lipu ni li lon, kepeken toki ante. ona li pana e toki ante ale. mi ken kama lukin e lipu ni kepeken toki ante. mi ken kama sona e ni kepeken ona: ijo ni li kepeken nimi seme? ken la ona li kepeken nimi sama. ijo ni li suli lon toki Inli, la tan nasin anpa, tan nasin utala ma, la toki Inli li kama suli. ijo mute li kama kepeken nimi tan toki Inli. ona li nasa lili. taso mi kama sona e ni: mi wile toki e ijo lili ni la mi kepeken seme? a, lipu li ken ike kin. a, toki li ken suli mute. ni la jan li kama sona e toki sin la ona li ken sona ala e toki. tenpo lili la lipu ante li lon tawa jan lili. ni li ken pona. a, toki Esuka la ni li lon. lipu li ken ike tan ni: tenpo lili la jan li sona pona ala e toki, li awen pali e lipu. ni li ike suli. kulupu Wikipesija li wile ala e ni. taso tenpo la ni li kama. a ken la ni li tan ni: jan mute ala li sona lawa e lipu Wikipesija. ni la jan li a, jan li wile e.... jan ante li wile pona tawa jan toki ni. taso ona li sona pona ala e toki. ni li pakala e ijo. taso ale la ona li ken pona... li ken pona e nasin toki e sona toki. nanpa pini la mi wile toki e nasin pona, e ken pona. mi wile toki e ni tawa toki pona. a mi pilin e ni: toki pona la jan li ken kama sona. taso lipu sona mute li ike lili. ona li kepeken nasin ike sama. ona li pana ala e kon toki... toki pona la kon li suli. taso, ona li wike lili lon toki. kin la jan li wile kama sona kepeken utala sona mute ala, la ken mute ala li lon. mi wile toki e ni: a, tenpo pini suli la mi kama sona e toki pona. a tenpo pini la lipu li lon. tenpo ni la ona li lon ala... mi weka e sona jan, e nimi pali. a taso, ona li lon tenpo pini. mi kepeken ona. lipu sona li nasa lili tawa sona mi. sona ona li ike lili tawa nasin kulupu, tawa nasin pu. a, taso ijo suli li lon ona, la mi awen kepeken. suli li ni: lipu li lon. ona li toki e nimi ale, li toki e ni: lipu seme li pana e sona nimi? li pana e sona pona lon nimi ni? ni la mi kama sona e ni: nasin seme la mi ken kepeken nimi lili ni lon toki suli? nasin seme la mi wan e toki? ni li sama lipu Tatowepa, lon nasin lili. ni li pona e sona mi, li ken nasin e mi. ona li ken... mi ken sona e ijo toki pona e toki mute pona, la mi ken kama sona toki sama ona. ni li pona suli. pilin mi la lipu sona o kama sama ni: o pana e nasin toki lon lipu nimi, lon sona nimi. ni li ken pona tawa ni: jan li pali e ijo ante li wile sona e nimi wan la ona li alasa kepeken tenpo lili. ni li ken wawa e wile, li ken awen pona. a, mi pilin e ante kin. lipu o lon sama lipu Tatowepa. lipu Tatowepa li ken pona. a, ona li kepeken toki pona lon tenpo ni. taso toki mute li ike. a, ken la jan mute o pona e ona. ken la, n. jan.... n kulupu lili o sona wawa e toki pona, o pana e toki mute. a ken la jan o pana e toki mute lon lipu sin ante. ken nanpa pini li ike lili. jan li pana e lipu sin la ni li lon ala: toki mama mute ante li lon. ken la jan li sona e toki pona e toki Inli li wan e tu ni. taso jan li pali e lipu sin, la toki Kanse en toki Esuka en toki Epanja en ante li ken ala lon. ni la lipu Tatowepa li pona suli. mi pilin e ni: jan o pona e ona. a.... ni li ale lon tenpo ni. a... mi toki e ijo lili. mi toki e ilo lili. taso mi pilin e ni: ni li ken pona e sona mi. mi kama sona pona e lawa mi la ni li wawa e sona mi. mi kama sona wawa e ijo mute. a... mi pilin e ni: jan li kama sona e lawa ona e nasin ona la ni li ken pona e ale ona. toki pona li pona e mi! mi kama sona e toki pona la mi kama sona e ijo sona! ni li suli. a... taso ale la, sona li suli. jan o sona e ona sama. ni li pona e nasin toki ona. ken la jan li sama ala mi. ken la jan li sama mi. taso suli li ni: jan li pilin e pali ona, li pilin e ni: ona li pona ala pona? ...li alasa e nasin pona. ni li ken wawa e ona.
j.Tepo: a! ni li ale anu seme.
s.nata: a, ni li ale mi! sina wile toki e ijo la sina ken. nasin seme la sina kama sona e ijo, e toki?
j.Tepo: mi o toki lili, a... mi kama sona e toki mute ala.
s.nata: mi kin.
j.Tepo: a a, lon. open mi la mi kama sona e toki Inli. taso ni li kepeken pali ala. mi awen ala sona e ni: nasin seme la mi kama sona e toki Inli?
s.nata: ni li kepeken pali mute. taso pali li weka tan lawa sina. lon la tenpo pini, la sina lili, li pali lon tenpo ale. taso pali li toki taso.
j.Tepo: a a lon. n, lon la mi awen ala sona e pali la ona li pali lili tawa pilin mi.
s.nata: lon.
j.Tepo: ni li lon a: mi sona mute e toki pona lon tenpo pini. taso mi sona mute ala e ni: nasin seme la ni li kama? ni li pali suli anu seme? mi awen mute ala e sona.
s.nata: lon.
j.Tepo: taso, n. nasin seme la mi kama sona e toki pona? a, mi lukin mute e lipu pu, e lipu sona ante sama. n, lipu ni li sama nasin mi. lipu wan mute li pana e sona wan. lipu li kipisi mute. kipisi wan li pana e sona pi nimi lili. utala sona li lon pini. taso, lipu pu la utala sona ni li mute ala li ken ala pana wawa e sona.
s.nata: lon...
j.Tepo: ni la mi lukin lili. mi kama sona mute ala tan utala sona ni. sona mute mute li tan kulupu!
s.nata: kulupu! ... li suli.
j.Tepo: ni li lon! mi pilin sama ni: sona toki la sina o toki tawa kulupu o lon kulupu, o lukin e toki.
s.nata: ni li lon.
j.Tepo: jan lon kulupu li toki la o lukin mute e toki ona. o lukin mute e toki. tan ni la sina kama sona: sina lukin e toki, la sina ken kama sona toki sama ona.
s.nata: lon.
j.Tepo: sina toki sama jan kulupu la jan kulupu li ken sona e toki sina.
s.nata: lon. lon!
j.Tepo: ni li nasin anu seme... mi wile toki e ijo. tenpo suli la.... tenpo mun tu anu seme, la mi lukin taso e toki lon kulupu, li toki ala.
s.nata: a.
j.Tepo: mi lukin sona e ijo... mi kute taso. mi lukin taso.
s.nata: mi awen e sona...
j.Tepo: mi sona ala e toki. mi wile ala toki, tan ni: ken la mi toki la toki li ike! mi pilin monsuta tan ni, lon tenpo suli. a, taso mi awen lukin la, mi awen kute la, mi.... mi kama sona toki la pilin monsuta ni li kama weka.
s.nata: lon.
j.Tepo: kepeken tenpo.
s.nata: sina wawa mute lon toki lon tenpo ni! a a a.
j.Tepo: a a a. ni li nasa mute tawa mi! tenpo pini la mi sona e ala. tan seme la sona li kama? tan seme la wawa— mi sona ala.
s.nata: a, mi wile toki e ijo kulupu. kulupu li wawa e sona. jan ale o kama sona lon kulupu. a, lon la ni li tan ni: kulupu taso li lawa e toki. a jan li kama sona tan lipu a taso la li toki ala. ni li ken sama ala kulupu. taso kin la, kulupu li ken wawa e wile. toki pona li musi tawa mi. taso mi awen toki pona tan seme? mi toki pona lon tenpo suli. mi pilin e ni: mi awen tan kulupu pona, tan pona kulupu!
j.Tepo: lon!!
s.nata: mi kama toki pona. mi lukin e lipu. a mi lukin pali e ijo. taso tenpo wan la mi wile toki e wile sona tawa jan sona. mi wile kute e sona ona. ni la mi kama lon, lon ma pona. a... mi kama lukin e ijo mute. tenpo ni la mi sona e toki pona lon tenpo suli! ona li weka ala tan wile mi, tan musi mi. a, kulupu pona li ken pona e ijo ale. kulupu ike kin li ken ike e ijo. mi kama sona lon kulupu la ona li ike tawa mi la mi wile ala awen sona. ni li nasin anu seme? kulupu li suli mute. jan li wile e kulupu e poka e jan toki, la ni li ken lawa e ijo mute li ken nasin pona e ijo.
j.Tepo: ni li lon. mi kin li awen toki pona tan kulupu. kulupu li lon ala la mi ken ala sona pona e toki pona. mi ken ala wile sona— open la mi kama sona tan ni: tenpo ala la mi kama sona e toki. mi wile ala e ni: mi moli la mi sona e toki wan taso.
s.nata: lon.
j.Tepo: a. taso, mi awen kama sona tan ni: kulupu li lon, li toki mute mute. mi wile sona e toki, anu mi wile lon kulupu! jan li pali e kalama musi e lipu! mi wile sona pona e ona!
s.nata: lon...
j.Tepo: mi wile lon kulupu a.
[ona tu li toki lon tenpo sama]
s.nata: a, mi wile toki e ni.
j.Tepo: n? lon lon...
s.nata: ni li tan anu seme?
j.Tepo: lon. toki Losupan la... a, lon. toki Losupan a a a, la tenpo wan la mi kama kute e kalama musi pi jan Selpahi. ona li pali... jan Selpahi li sona pona a e toki Losupan, li pali e kalama musi mute mute mute, pi pona suli, kepeken toki Losupan. mi kute e ni la mi wile kama sona e toki Losupan tan ni. awen la mi sona pona ala e toki Losupan. taso mi kama sona e ijo mute... mi ken kama sona e kon pi toki kalama. mi ken pilin e pilin wawa kalama.
s.nata: lon a.
j.Tepo: kalama ona li pona sewi a a. ni li nasa. ona li wawa mute a.
s.nata: lon. tenpo pini la mi pilin e ni: jan li ken ala toki pilin li ken ala toki wawa kepeken toki Losupan. taso ni li lon ala.
j.Tepo: ala! nimi pilin mute mute mute li lon!
s.nata: lon!
j.Tepo: a a. sina ken toki e pilin suli kepeken nimi wan taso!
s.nata: a, lon! jan li pali e nimi sin sama toki pona...
j.Tepo: "wi!"
s.nata: "wi!" lon a. n, sina sama lon toki Epelanto anu seme? jan Tepo li pali e lipu. ona li ante e toki lipu. ona li tan toki Epelanto. a nimi lipu li ni: "jan Keta li weka". lipu ni li tawa ni: jan li kama sona e toki Epelanto. taso ona li pana e ni tawa toki pona. a, sona mi la ni li pini ala. taso mi lukin e lipu. ona li pona. ona li kama sona e toki anu sem e?
j.Tepo: lon... lipu pini ale ala. taso pini li kama. a, open la mi o toki e ni: pali mute mi li tan ni: mi wile anpa e jan Antoni Mikasi.
s.nata: a, lon. jan ni li seme? o toki.
j.Tepo: a a a!
s.nata: o toki. o toki e jan ni.
j.Tepo: a! jan Misali li lon, li pali e sitelen tawa mute, lon ilo Jutu. a, jan mute li kama toki pona tan ona. taso ni li ijo ante. a, tenpo la ona li pali e sitelen tawa li toki e ni: "toki sin ni— toki pali ni li ike tan seme li pona tan seme?" tenpo wan la ona li pali e sitelen tawa ni tawa sama tawa toki Epelanto! ... li toki e ni: "ike mute li lon toki Epelanto."
s.nata: ona li pali e ni kin tawa toki Ito.
j.Tepo: lon, lon, lon. anpa pi sitelen tawa ni, la jan pi toki Epelanto li kama... a a a... ona li kute e toki utala... e toki ike pi toki Epelanto, li toki sama ni: "sina sona e ala! sina nasa mute! sina ike!" taso toki ni li ike ala tawa jan Misali, li musi taso. jan mute li toki tawa jan Antoni... a, jan Antoni li jan ni: ona li kute e ike pi toki Epelanto li wile utala e ni. jan ante mute li toki tawa jan Antoni. ni li musi mute tawa jan Misali. ona li suli e toki ni lon sitelen tawa. jan ale li lukin e sitelen tawa li kama lukin e toki ni. tan toki ni la ona li kama toki sama ni: "tok— sina... sina sona...." n, ona li toki e ni: "sina sona e toki pali seme? sina toki taso li sona ala anu seme?" jan Misali li kama toki tawa ona kepeken toki pona, a a a.
s.nata: lon.
j.Tepo: lon. ni la jan Antoni li lukin e ni: "a. sina sona e toki pona— ni li toki ala! sina ken ala toki e ijo kepeken toki pona."
s.nata: ni li lon. toki pona li toki ala.
j.Tepo: a a a. "sina ken ala toki e ijo kepeken toki pona. "sina ken ala kute e kalama sin lon tenpo esun ale kepeken toki pona!"
s.nata: a lon.
j.Tepo: tan ni la mi kama pali e kalama sin. "kin la, sina ken ala ante toki e ijo suli tawa toki pona! sina ken ala— lipu Gerda Malaperis!— sina ken ala toki pona e ni! ona li— lipu ni li tawa jan li tawa kama sona pi toki Epelanto. toki ona li wawa lili. taso awen la sina ken ala toki pona e ona! ona li wawa. toki pona li musi taso li ken ala toki e ijo lili pi toki Epelanto!" tan ni la mi kama ante toki e lipu.
s.nata: lon. mi kin li kama sona lili e toki sin tan wile pali. mi kama sona lili e toki Kanse.
j.Tepo: a mi toki e ni: tan pali ni la mi kama sona e toki Epelanto.
s.nata: a, lon. lon.
j.Tepo: nasin li sama ni: nanpa wan la mi sona e ni: toki Epelanto en toki Inli la nasin nimi li sama mute. a, nanpa tu la, mi lukin e lipu. taso mi lukin e nimi pi sona ala. mi sona ala e nimi la mi luka e nimi. ilo lukin lipu mi la mi luka e nimi la, la ona li pana e kon nimi tawa mi, kepeken toki Inli, la mi kama sona e nimi. mi pali mute e ni la mi kama pini e lukin lipu la mi sona lili e toki Epelanto.
s.nata: pona a! mi sama lon toki Kanse. tenpo pini la mi toki e lipu "jan lawa lili". mi jan lili la mi lukin e ona. taso mi sona ala e toki Kanse. mi wile toki pona e lipu ni. tenpo pini suli la toki pona li lili, li lili tenpo, li lili kulupu, la jan li pali e lipu. ona li ante toki e ale. taso ona li ike suli. ona li sona ala e nasin toki pona. toki ona li sama toki Inli, li pali e nimi sin tan nasa. ale ona li ken ala sona pona. a, taso lipu ni li lipu jan ni li suli mute tawa mi. kon ona li suwi a. ni la mi wile e ni: jan li ken lukin e lipu pona, li ken kama sona e toki pona tan lipu pona. mi wile e ni: lipu kon lipu ni li ken tawa jan kepeken toki pona kepeken nasin toki pona. ni la mi kama wile ante e toki ni. taso, mi wile ni, la mi wile kama sona e toki Kanse. mi sona e kon lipu la ni li pali suli ala. a, mi kama esun e lipu nimi. mi kama alasa e sona nasin lon ilo sona mi. mi toki lon jan pona. pona la mi kama sona e jan mute tan toki pona! a, mi kama sona e jan ni: ona li sona e toki Kanse. ni la mi ken toki e wile sona mute mi tawa ona kin. a, ale li kulupu anu seme? a... mi ale la mi kama sona e toki, la ni li tan wile. toki ala la ni li awen lon: mi wile kama sona e ilo e ijo ante la ni li ken tan wile lawa taso. pali musi li suli mute tawa sona lon nasin mi. a, toki li pona. a.
j.Tepo: lon...
s.nata: mi o sona pini e toki. mi sona ala pini e toki.
j.Tepo: a a a!
s.nata: mi toki sike...
j.Tepo: a sike ala li lon tenpo ni la... ijo mute li lon...
s.nata: sike lili li ken pona e sona.
j.Tepo: kalama li tenpo suli! ken la kalama sin ni li suli nanpa wan. tenpo ona li suli nanpa wan.
s.nata: ike a!
j.Tepo: ike ala!
s.nata: mi toki e ijo ala!!
j.Tepo: a a a! ni li lon ala.
s.nata: a...
j.Tepo: a, mi o pini.
s.nata: lon.
j.Tepo: a, sina... lon. sina kute e ni ale la sina pona mute!
s.nata: lon a.
j.Tepo: wile la toki ni li pona tawa sina, li sona pona, li pilin pona.
s.nata: o pakala e nena ni: ona li pana e pilin pona tawa sitelen tawa.
j.Tepo: lon. sina kute lon ilo Jutu la o ni.
s.nata: o kama e ilo kalama. o pana e mani mute tawa mi... a, o esun e len sin mi. ona li toki e "kalama sin".
j.Tepo: a a, len ni li lon ala lon? len ni o lon anu seme a a. o... o esun e... sina ken esun e nanpa ni: ona li toki e jo sina, li toki e ni: sina jo e kalama.
j.Tepo: a a a! ike la jan wan taso li ken jo e nanpa ni.
s.nata: a, lon. o jo e mani mute!
j.Tepo: lon. sina jo e mani mute la sina ken esun tan jan jo! a a. taso, a... sina kute kepeken...
s.nata: mani Nata mute taso la mi... a, o awen toki.
j.Tepo: a a! sina kute kepeken ilo Jutu taso la o ni ala. o kute taso. kute sina li pona mute tawa mi.
s.nata: ni li lon. mi pilin pona tan ni: jan li kute e kalama suli ni a.
j.Tepo: lon. ken suli la jan ala li kute, tan suli ona! taso... a a. ale li pona.
s.nata: ale li pona!
j.Tepo: sina kute la sina pona mute! o awen pona.
s.nata: mi ale li anpa tawa sina.
j.Tepo: a a a!
s.nata: jan ala li kute la, a... la kon sewi toki li pana ala e moku tawa poki mi.
j.Tepo: a a a!
s.nata: tomo mi li pimeja mute!
j.Tepo: a a a a!
s.nata: jan mute tu li kute la suno...
mi ken esun e suno lili, a a.
j.Tepo: a a a...
s.nata: o awen pona.
|
This work is licensed under the Creative Commons Attribution-ShareAlike 4.0 International (CC BY-SA 4.0) license.
|