La .alis. cizra je cinri zukte vi le selmacygu'e/mumo'o

by Lewis Caroll

no'i la ciftoldi ku joi la alis ze'a simxu le nu smaji catlu i bazubo la ciftoldi cu bevri le nargile fo le moklu gi'e o'udai a'inaidai cusku fi abu

i lu do du ba'e ma sei la ciftoldi cu cusku li'u

i di'u na xamgu mukti le nu co'a casnu i la alis toldarsi spusku lu mi y i mi na'e mulno djuno doido'u ga'inai ca le cabna isa'unai mi djuno le du'u mi du makau ca le nu mi ckana cliva ca le cabycerni iku'i pe'i mi so'oroi se galfi ba la'e di'u

i lu ma di'u do smuni sei la ciftoldi cu tolxendo cusku i ko ko ciksi li'u

i lu u'u mi na kakne le nu mi mi ciksi doido'u ga'inai sei la alis cusku iki'ubo uadai mi na du mi li'u

i lu uanai sei la ciftoldi cu cusku li'u

i lu u'u mi na kakne le nu xagmau cusku de'u sei la alis clite mutce spuda ki'u le nu zu'u mi na jimpe la'e de'u ije le nu mitre so'ida ze'a lo donri cu cfipu mutce li'u

i lu na go'i sei la ciftoldi cu cusku li'u

i lu o'ocu'i i'a do za'o na facki sei la alis cusku iku'i pe'i do ca le nu binxo lo todbi'olanka to ju'odai do baca'a binxo ca da toi gi'ebabo binxo lo toldi cu ba milxe le ka se cizra pe'ipei li'u

i lu pe'inaisai sei la ciftoldi cu cusku li'u

lu o'ocu'i ju'ocu'i do cinmo lo drata sei la alis cusku i mi djuno le du'u da'i ba'e mi cinmo lo'e se cizra li'u

i lu ba'e do ga'i sei la ciftoldi cu tolsi'a cusku i do du ba'e ma li'u

i di'u xrugau le remei le krasi be le nu ta'arsi'u i la alis milxe fanza le nu la ciftoldi cu cusku lo'e tordi mutce pinka kei gi'e sanli zenba gi'e junri mutce cusku lu pe'i ei do cusku puku le sedu'u ba'e do du ma li'u

i lu ki'u ma sei la ciftoldi cu cusku li'u

i la'e di'u ji'a cfipu preti i la alis na kakne le nu pensi lo xamgu krinu ijebo la ciftoldi cu simlu le ka na'e se zdile iseki'ubo abu co'a cliva

i lu ko xruti sei la ciftoldi fa'a abu krixa i ei mi cusku le vajni li'u

i la'e di'u cinri simsa ju'o i la alis torni gi'e xruti

i lu ko surla stali sei la ciftoldi cu cusku li'u

i lu xu la'e di'u cu mulno sei la alis cusku li'u i abu ralte le nu fengu tai le xagrai nu abu kakne

i lu na go'i sei la ciftoldi cu cusku li'u

i la alis jdice le du'u denpa kei ki'u le nu ge noda se zukte gi cumki fa le nu cy jungau abu lo se vamji be le nu tirna i cy ze'a lo mentu be li so'o ca'o damva'u gi'e na tavla i romai cy tolpolje lei birka gi'e za'ure'u lebna le nargile le moklu gi'e cusku lu ja'o do jinvi le du'u do ba'o cenba i xu go'i li'u

i lu oi mi ba'o cenba doido'u sei la alis cusku i mi na kakne le nu morji lo'e du tai le nu mi pu na'o no'a i ji'a mi na stodi le ka mitre kei ze'a lo mentu be li su'opano li'u

i lu na kakne le nu morji ba'e ma sei la ciftoldi cu cusku li'u

i lu mi pu troci le nu sitna lu ua le cmalu gunkybifce li'u i ku'i ri se bacru ja'e lo frica sei la alis badri mutce voksa spuda li'u

i lu ko sitna lu do tolcitno doi paf uiliam li'u sei la ciftoldi cu cusku li'u

i la alis polje lei xance gi'e co'a co'e di'e

      do tolci'o doi paf uiliam sei le citnau cu cusku
      i le kerfa be do ca'a blabi
      i ue do le loldi le stedu cu sanli
      i do jinvi xu le du'u drani

<!--      i ku'i do ru'i lolsanli le stedu  -->

<!--  Poetic license, I suppose. That means "you stand on a head which is on the floor", -->
<!--  or something like that; in prose we say "do sanli fi le stedu", but that doesn't fit the meter. -->
<!--  I was thinking: lolsanli: "x1 floor-stands using limbs x2". {loldi} fills the -->

<!--  x2 of sanli, so it doesn't appear in the place structure of lolsanli. -->
<!--  But I changed it anyway. -->


      i ca le mi nunci'o sei la uiliam spuda
      mi terpa le nu mi se benxai
      i caku ju'osai mi noda se besna
      i uisai mi roroi ka'e co'e

      i sei le citnau cu cusku do ke'u tolci'o
      gi'e ba'o binxo lo plana
      i ku'i do plipe puzi vi le vorme
      i ma krinu le nu ka'e go'i

      i ca le mi nunci'o sei le ruskre prije
      cu cusku mi rotsu se xadni
      sepi'o le vi kruji noi fepni li pa
      i xu do te vecnu lo remei

      i do tolci'o sei cusku i se xedja co ruble
      fi ro da poi jarmau lo grasu
      i ku'i le gunse do mu'o se citka
      i a'u ta'i ma do snada

      i ca le mi nunci'o mi flara'a gunka
      gi'e darlu roda le speni
      i le jalge ke sluji kamtsa pe le xedja
      cu renvi fi le mi nunjmive

      i do tolci'o sei cusku i nandu co sruma
      le nu le do kanla cu vlipa
      i ku'i lo xasycurnu gau do nazbi lanxe
      i ma rinka le nu do tai certu

      i mi ba'o spuda ci preti noi banzu
      sei le patfu cu cusku i ko cumla
      i pe'ipei mi do ba tirna ze'esai
      i ko cliva inaja mi do tikpa

i lu di'u na drani se cusku sei la ciftoldi cu cusku li'u

i lu u'u na mulno drani sei la alis toldarsi cusku i su'o le valsi ba'o

se galfi li'u

i lu toldrani co'a le cfafanmo co'u le tolcfafanmo sei la ciftoldi cu birti cusku li'u i smaji ze'a lo mentu be li so'o

i la ciftoldi cu tavla pamoi

i lu aupei do clani mitre ma sei cy te preti li'u

i lu ue i le du'u mitre makau na vajni sei la alis sutra spuda i na nelci le nu tai cafne fa le nu cenba i do djuno li'u

i lu mi ba'e na djuno sei la ciftoldi cu cusku li'u

i la alis cusku noda i abu pu tai se fapro noroi le abu nunjmive gi'e ca cinmo le nu fengu binxo

i lu xu do ca se mansa sei la ciftoldi cu cusku li'u

i lu y au mi braze'a doi do'u sei la alis cusku i le nu cenmitre li ze cu mutce le ka mabla li'u

i lu iasai mutce le ka zabna sei la ciftoldi cu fengu cusku li'u i cy sanli binxo ca le nu tavla to cy satci cenmitre li ze toi

i lu ku'i mi na se tcaci sei la alis kecti tonga pante li'u i abu pensi lu au lei vi danlu na tai jai frili fai le nu se cnixrani li'u

i lu do ba se tcaci sei la ciftoldi cu cusku i cy punji le nargile le moklu gi'e co'a za'ure'u damva'u

i caku la alis denpa lenu cy di'a tavla iba lo mentu be li ji'ire la ciftoldi cu vimcu le nargile le moklu gi'e ji'ireroi sipfru gi'e desku i cy cliva le gumri gi'e cpare le srasu le darno gi'ecabo piksku po'o lu pa mlana do clazengau ije le drata mlana do torzengau li'u

i lu pa mlana be ba'e ma i le drata mlana be ba'e ma sei la alis pensi li'u

i lu le gumri li'u se cusku la ciftoldi tai le nu da'i cy tirna le abu selpensi ibazibo canci

i la alis pensi zgana le gumri ze'a lo mentu gi'e troci co facki le du'u le re mlana cu du makau i gy prane cukla iseni'ibo le nabmi cu nadycai iku'i ca le fanmo abu tengau lei birka ru'u le gumri ve'a le selku'e gi'e popygau sepi'o ro le re xance le korbi lo cmalu

i lu ma fa'u ma mo fa'u mo sei abu sezysku li'u i cmabatci le pritu cmalu tezu'e lenu cipra fi le selri'a ibazibo ganse lo vlile nundarxi le xejni'a i ri darxi le jamfu

i abu carmi terpa le suksa nunstika iku'i cinmo le nu ei na xaksu le temci imu'ibo abu sutra tolba'o ije zi co'a zukte lenu citka piso'u le drata cmalu i le abu xedja cu tai tagji te damre le jamfu ja'e le nu carmi nandu fa lenu kargau le moklu iku'i ca le fanmo cu kargau gi'e snada lenu tunlo lo pagbu be le zunle cmalu

        *       *       *       *       *       *       *

            *       *       *       *       *       *

        *       *       *       *       *       *       *

i lu ua le stedu be mi cu zifre li'u se cusku la alis fi'o tonga le ka gleki poi bazi binxo le ka tepselspaji kei ca lenu facki le du'u na ka'e tolcri le janco i abu fa'ani'a catlu gi'e viska lo tcebra clani cnebo po'o noi stani simsa sanli le xamsi be fi lo ni'avu crino pezli

i lu le va crino cu ba'e mo sei la alis cusku i lei mi janco ba'o klama ma i oi doi xance be mi ki'u ma mi nalka'e le nu viska do li'u i abu muvgau xy ca le nu tavla i ku'i se jalge lo po'o cmalu nu desku fa lei darno ke crino pezli

i le nu muvgau lei xance le stedu cu simlu le ka na cumki iseki'ubo abu troci le nu muvgau le stedu lei xance i abu mutce gleki le nu facki le du'u le cnebo cu jai frili fai le nu krobi'o fa'a roda tai tu'a lo'e since i abu ba'o snada le nu krobi'o ja'e lo melbi zigzagi kei gi'e bredi le nu sfubu le jbini be lei pezli noi abu facki le du'u ke'a na'e drata le gapru be lei tricu noi ni'a ke'a abu pu klama icabo lo kinli se bacru cu gasnu le nu abu sutra ti'ekla i lo barda tcacpi pu vofli fa'a le abu flira gi'e vlile darxi abu le nalci

i lu ii since sei la tcacpi cu krica li'u

i lu mi ba'e na since sei la alis fengu cusku i oi ko mi cliva li'u

i lu since ke'u sei la tcacpi cu mlimau rapsku li'u i ty klaku jmina lu roda poi mi troci zo'u da na mansa sy li'u

i lu mi jimpe noda le te tavla be fi do sei la alis cusku li'u

i lu mi troci tu'a lo'e tricu genja ije mi troci tu'a lo'e rirkoi ije mi troci tu'a lo'e spabi'u sei la tcacpi secau le nu jundi abu cu cusku iku'i noda pluka lo'e since li'u

i la alis zenba le ka cfipu ce'u iku'i abu pensi le du'u noda prali le nu jmina cusku pu lenu la tcacpi cu mo'u tavla

i lu nandu fa lenu kurji le sovda kei po'onai sei la tcacpi cu cusku ije ji'a ei mi mi kajde lo'e since ze'a le nicte e le donri i ze'e le jeftu be li ci mi sipna noda li'u

i lu mi mutce xenru le nu do se fanza sei la alis noi co'a jimpe le smuni be fi cy cu cusku li'u

i lu mi posycu'a le tricu galrai be le ricfoi sei la tcacpi cu krixa zenba ke ranji cusku icabo mi pensi le du'u uo mi zifre fi le nu sincycau i ue torni klama fi le tsani i oi since li'u

i lu ku'i ju'asai mi ba'e na since sei la alis cusku i mi y i mi li'u

i lu a'a do ba'e mo sei la tcacpi cu cusku i mi zgana le du'u do troci co finti da li'u

i lu mi y cmalu nixli li'u la alis se cusku co senpi ki'u lenu morji le nu so'iroi selstika ze'a le ca dorni

i lu lisri lakne ianai sei la tcacpi cu tolsi'arai tonga cusku i mi ze'epu viska so'i cmalu nixli iku'i nori se cnebo lo simsa be ta i ienaicai i do since ije e'enai do tolxu'a i la'a do bazi cusku le sedu'u do ze'epu na vu'izga lo sovda li'u

i lu mi ja'a vu'izga lo sovda sei la alis noi mutce jetsku verba cu cusku iku'i ka'u lo'e cmalu nixli cu dunli lo'e since le ni citka lo'e sovda li'u

i lu ianai sei la tcacpi cu cusku iseni'ibo lo'e cmalu nixli cu since da i mi ja'o cusku di'u li'u

i le sidbo tai cnino la alis ja'e le nu abu smaji ze'a lo mentu be li ji'ire i la'e di'u curmi le nu la tcacpi cu jmina lu ju'osai do sisku lo'e sovda i na vajni mi fa le du'u do cmalu nixli gi'ikau since li'u

i lu mutce vajni ba'e mi sei la alis sutra cusku i ku'i je'u mi na sisku lo'e sovda i ji'a mi romu'ei le du'u ja'a go'i cu na'e djica lei me do moi i mi na nelci lo'e nalseljukpa sovda li'u

i lu ko cliva va'oku sei la tcacpi cu tolxendo tonga cusku li'u i ty cu za'ure'u zutse le ty zdani i la alis dzikla le jbini be lei tricu serai le kamxamgu verai lei selka'e va'o le nu le abu cnebo ku joi lei jimca cu za'o se jgena i so'iroiku abu bilga le nu tolselto'i cy i baku abu morji le nu abu za'o jgari lei gumri spisa lei xance i abu co'a junri zukte le nu citka pa spisa pamai e le drata remai i abu su'oroi zenba gi'e su'oroi jdika iromai abu snada le nu tcaci clani

i abu pu mitre lo drani jibni zu lo tai mutce ja'e le nu cizra ca le cfari i ku'i abu se tcaci binxo ze'a lo mentu be li so'u gi'e di'a ta'e sezytavla i lu uo le xadba be le mi selpla ba'o se zukte i u'e lei bu'u nuncenba cu cizra i mi noroi birti le du'u mi ba binxo makau zi lo mentu i ku'i mi ba'o xruti le ka drani mitre icaku ei nerkla le melbi purdi i a'u ta'i ma zukte la'e di'u li'u i abu ca le nu cusku di'u cu suksa tolcliva lo klina noi vasru lo cmalu zdani noi mitre li ji'ipa i lu romu'ei le du'u makau xabju ta kei sei la alis pensi na drani fa le nu mi tolcanci tai le nu mi ca mitre i va'oku mi terpygau mutce li'u i seki'ubo abu co'a za'ure'u citka le pritu spisa gi'e na darsi le nu jbikla le zdani kei pu le nu ba'o jdika ja'e le nu cenmitre li reno