La .alis. cizra je cinri zukte vi le selmacygu'e/somo'o

by Lewis Caroll

i lu do ka'enai pensi le nu sela'u makau mi gleki le nu mi do za'ure'u viska doi dirba slabu sei la noltroni'u cu cusku li'u i ny xendo tagygau le ny birka le me la alis moi i ny joi abu kansi'u le nu cadzu cliva

i la alis mutce gleki le nu zgana le nu ny pluka tarti i abu pensi le du'u ju'ocu'i le tsaprpiperi cu rinka le nu ny cilce ca le nu abu penmi ny le jupku'a

i lu ca le nu ba'e mi noltroni'u kei sei abu to sepi'onai ku'i lo pajna mutce tonga toi sezysku nosai tsaprpiperi ba zvati le mi jupku'a i lo'e stasu cu xamgu secauku i cumki fa le nu roroiku lo'e tsaprpiperi cu rinka lo'e nu lo'e prenu cu cpina tarti sei abu mutce se pluka be le nu facki lo cnino javni i lo'e sarvanju cu rinka le nu py slari tarti i lo'e spatrkamomili cu rinka le nu py kurki tarti i y i lo'e bavmi sukta a lo'e simsa cu rinka lo'e nu lo'e verba cu titla tarti i au lo'e prenu cu djuno la'e di'u ja'e lo'e nu py na mobdu'a sy li'u

i caku abu nalmo'i fi la noltroni'u gi'e milxe se spaji ca le nu tirna le ny voksa noi jibni le abu kerlo i lu do da pensi doi dirba i la'e di'u rinka le nu do tolmo'i le nu ei tavla i mi ka'enai ca cusku le sedu'u la'e di'u makau madni'i i ku'i mi bazi morji li'u

i lu ju'ocu'i madni'i noda sei la alis darsi te pinka li'u

i lu e'i doi verba sei la noltroni'u cu cusku roda de madni'i i sarcu fa le nu facki li'u i ny la'irze'a la alis ca le nu tavla

i la alis na mutce nelci le nu tai jibni ny gepamai ki'u le nu la noltroni'u cu mutce le ka tolmelbi giremai ki'u le nu ny satci ke galtu mapti le nu vregau le firji'o le abu janco i se tolkufra kinli firji'o i ku'i abu na nelci le nu tolclite iseki'ubo abu renvi serai le ka xamgu kei verai lei selka'e be abu

i lu le nunkei ca'o xagze'a sei abu seta'i le nu stogau le nunsnu cu cusku li'u

i lu ie go'i sei la noltroni'u cu cusku i la'e di'u madni'i la'e lu u'e nu prami i le nu prami cu rinka le nu le munje cu carna li'u li'u

i lu ti'e rinka sei la alis lauble cusku fa le nu roda jundi le cuntu be da li'u

i lu i'a a'unai mintu fi le ka smuni sei la noltroni'u noi ca'ergau le kinli je cmalu firji'o le janco be la alis cu cusku i la'e di'u madni'i la'e lu ko kurji le smuni iseva'obo le sance vo'a kurji li'u li'u

i lu ua ti nelci le nu facki le du'u ro da makau madni'i sei la alis pensi li'u

i lu ju'o do pensi sezretsku le sedu'u makau krinu le nu mi na srupunji le mi birka le do xadmidju sei ba lo nundenpa la noltroni'u cu cusku i krinu fa le nu mi na'e lacri le do fagycpi le nu tarti i e'upei mi troci le nu cipra li'u

i lu cumki fa le nu fy batci sei la alis noi nasai xankydji le nu troci le nu cipra cu spuda li'u

i lu je'usai sei la noltroni'u cu cusku ge lo'e fagycpi gi lo'e sansrmustardo cu batci i la'e di'u madni'i la'e lu lo'e cipni poi pimlu dunli ckaji cu roroi jmaji li'u li'u

i lu ku'i lo'e sansrmustardo na cipni sei la alis te pinka li'u

i lu drani uecu'i sei la noltroni'u cu cusku i i'o le nu do cusku cu klina le nu jimpe li'u

i lu sy kunra ba'e pe'i sei la alis cusku li'u

i lu li'a go'i sei la noltroni'u noi simlu le ka bredi le nu tugni la alis roda cu cusku i lo barda ke sansrmustardo terkunra vi jibni i la'e di'u madni'i la'e lu le nu lo'e memimoi cu zenba cu panra le nu lo'e medomoi cu jdika li'u li'u

i lu ua ka'u sei la alis noi na jundi le romoi pinka cu krisku i sy stagi i sy le ka go'i cu na catlu gi'eku'i ja'a ckaji li'u

i lu mi do ja'asai tugni sei la noltroni'u cu cusku i la'e di'u madni'i la'e lu ko ckaji le se simlu be do li'u i va'i sa'u lu ko noroi se xanri le nu do na ckaji na'eboda poi do simlu fi lei drata fe le ka de poi do ca'a ja nu'o ckaji ke'a na drata di poi do simlu ke'a lei drata lo drata li'u li'u

i lu pe'i mi ka'e xagmau jimpe la'e di'u sei la alis clite mutce cusku va'o le nu ciska i ku'i mi ka'enai jimpe ca le nu do cusku li'u

i lu di'u nova'e ci'u lo'e mi ka'e se cusku be va'o le nu mi cuxna sei la noltroni'u cu se pluka tonga spuda li'u

i lu e'o ko ko na raktu le nu cusku sepi'o lo clamau sei la alis cusku li'u

i lu o'a na raktu sei la noltroni'u cu cusku i mi dunda ro ca ba'o se cusku be mi do li'u

i lu tolkargu seldunda sei la alis pensi i mi gleki le nu na ta'e tai dunda ca le jbedetri te salci li'u i ku'i abu na darsi le nu cladu cusku

i lu xu za'ure'u pensi sei la noltroni'u ca le nu za'ure'u ca'ergau le kinli je cmalu firji'o cu te preti li'u

i lu mi zifre le nu pensi sei la alis noi co'a xanka cu kinli cusku li'u

i lu du'i lo'e nu zifre sei la noltroni'u cu cusku fa lo'e xarju le nu vofli i la'e di'u madni'i li'u

i caku la alis mutce se spaji le nu le voksa be la noltroni'u cu canci caji'asai le midju be le ny se nelrai valsi no'u zo madni'i i le birka poi jorne le abu birka cu co'a desku i la alis catlu i la noltruni'u cu ca'u sanli i ny se polje se birka gi'e lindi simsa frumu

i lu xamgu donri doi nolba'i sei la noltroni'u co'a lauble je ruble voksa cusku li'u

i lu o'i pa'e sei la noltruni'u ca le nu darxi le loldi le jamfu cu krixa do a le do stedu cu ei se vimcu i go'i ze'i pimu lo temci nomei i ko cuxna li'u

i la noltroni'u cu cuxna gi'e zi ba'o cliva

i lu e'u mi'o di'a kelci sei la noltruni'u fi la alis cusku li'u i la alis cu dukse le ka terpa kei gi'e cusku no valsi gi'eku'i masno jersi ny fa'a le kelcrkroke foldi

i le nu surla bu'u le ctino cu prali lei drata vitke le nu la noltruni'u cu nalzvati i ku'i vy ca le nu viska ny cu zi sutra le nu xruti le nu kelci i la noltruni'u cu te pinka fi po'o le du'u lo mokca nunlerci cu se jdima lei vy nunjmive

i ze'a piro le nunkei la noltruni'u noroi de'a damba lei drata kelci gi'e noroi de'a krixa lu ko le stedu ta vimcu li'u a lu ko le stedu tu vimcu li'u i lei se dapma be ny cu se klagau lei sonci noi li'a de'a bargu i ba za lo cacra be li ji'ipimu ge no bargu cu zvati gi ro le kelci po'u na'ebo la noltrunau a la noltruni'u a la alis cu pinfu gi'e se dapma fi le nu se selmi'ecatra

ibabo la noltruni'u cu tatpi cliva gi'e cusku fi la alis fe lu xu do pu viska la jitfa cakyrespa li'u

i lu na go'i sei la alis cusku i mi na djuno ji'asai le du'u makau jitfa cakyrespa li'u

i lu te zbasu lo'e jitfa cakyrespa bo stasu sei la noltruni'u cu cusku li'u

i mi pu noroi ga viska cy gi se tavla fi cy sei la alis cusku li'u

i lu e'e mi'o klama sei la noltruni'u cu cusku i ba lisri cy boi cy do li'u

i la alis ca le nu cliva cadzu cu tirna le nu la noltrunau cu lauble voksa cusku fi lei zvati fe lu ro do se fraxu li'u i lu ri'e la'e ba'e di'u xamgu sei abu sezysku i abu pu cinmo le nu tolgei le nu la noltruni'u cu minde xokau nuncatra

i bazibo penmi la cpicinfo noi sipna mutce vreta le se solgu'i to e'u ko va'o le nu na djuno le du'u makau cpicinfo cu catlu le pixra toi i lu ko sanli doi lazni sei la noltruni'u cu cusku i ko klagau le vi citno ninmu le nu viska la jitfa cakyrespa gi'e tirna le cy lisri i ei mi xruti gi'e jitro so'o nuncatra noi mi pu minde li'u i ny cadzu cliva la alis noi stali tu'a la cpicinfo i la alis na mutce le ka nelci le jvinu be le danlu i ku'i abu pensi le du'u se snura dunli fa le nu stali cy kei le nu jersi le cilce noltruni'u i seki'ubo abu denpa

i la cpicinfo cu tsebi'o gi'e mosra lei kanla gi'ebabo catlu la noltruni'u co'u le nu ny na ka'e se viska kei gi'ebabo cmila i lu u'isai sei la cpicinfo cu cusku se'i se'inai li'u

i lu u'i ba'e mo sei la alis cusku li'u

i lu ue tu sei la cpicinfo cu cusku i roda tu xanri i ju'o noroi selse'icatra da i ei klama li'u

i lu roda cusku zo ei bu'uku sei la alis ca le nu masno jersi cy cu pensi i mi pu tai se minde noroi le mi nunji'e li'u

i le remei pu le nu ve'u klama cu viska la jitfa cakyrespa noi zu badri je nonkansa zutse lo cmalu ke rokci ctebi i la alis ca le nu jbikla cu tirna le nu jycy vruva'u tai le nu mutce badri i abu carmi le ka kecti jycy i lu tu ma badri sei abu fi la cpicinfo cu retsku li'u i le cpicinfo cu spuda sepi'o lei valsi poi jibni mintu lei pu valsi ku'o lu roda tu xanri i ju'o tu node badri i ei klama li'u

i le remei cu klama la jitfa cakyrespa noi catlu sepi'o loi barda je selkakclu kanla gi'eku'i cusku noda

i lu le vi citno ninmu zo'u sei la cpicinfo cu cusku ti djica le nu djuno fi le do lisri i go'i li'u

i lu mi ti ly tavla sei la jitfa cakyrespa cu condi je kunti tonga cusku i e'u le re do tsebi'o gi'enai cusku lo valsi pu le nu mi mo'u co'e li'u

i le remei cu tsebi'o i no da tavla ze'a lo mentu be li so'o i la alis pensi lu mi na jimpe le du'u ta ka'e mo'u co'e ta'i makau va'o le nu ta na co'a co'e li'u gi'eku'i tolxanka denpa

i lu puku sei la jitfa cakyrespa cu condi vruvasxu cusku mi jetnu cakyrespa li'u

i lei di'u valsi cu se jersi lo nu ze'u smaji noi zunti ke'a fa po'o le ru'inai me zo xyjyckryrx se krixa be la cpicinfo e le ru'i tilju nunvruvasxu be la jitfa cakyrespa i la alis pu'o sa'irbi'o je cusku lu ki'e doi prenu mi do ckire le do cinri lisri li'u gi'e ku'i na ka'e rivbi le nu pensi le du'u ei daji'a jersi i seki'ubo abu smaji zutse gi'e cusku noda

i lu ca le nu mi'a cmalu sei la jitfa cakyrespa noi ca surla zenba gi'e ku'i ru'inai za'o milxe vruvasxu cu di'a cusku mi'a ve ckule le xamsi i le ralju cu junri je tolcitno cakyrespa gi'e se cmene lu ractu cafmi'a li'u mi'a li'u

i lu ki'u ma do'o te cmene ra lu ractu cafmi'a li'u va'o le nu ra genai ractu ginai cafmi'a sei la alis te preti li'u

i lu mi'a te cmene ra lu ractu cafmi'a li'u ki'u le nu ra ctuca mi'a sei la jitfa cakyrespa cu fengu cusku i je'u do bebna mutce li'u

i lu ei do ckeji le nu cusku lo tai sampu preti sei la cpicinfo cu jmina cusku li'u ibabo le remei cu smaji zutse gi'e catlu la alis uu noi cinmo le nu bredi le nu se tunlo le terdi ibazubo la cpicinfo cu cusku fi la jitfa cakyrespa fe lu e'e doi slabu ko na co'e ze'a piro le donri li'u i jycy di'a cusku di'e

i lu ke'u mi'a te ckule le xamsi iju do la'e di'u na krici li'u

i lu mi noroi cusku le sedu'u mi na krici sei la alis cu zunti li'u

i lu do ja'a go'i sei la jitfa cakyrespa cu cusku li'u

i lu ko ri'urgau le tance sei la cpicinfo pu le nu la alis ka'e za'ure'u tavla cu jmina cusku li'u i la jitfa cakyrespa cu di'a co'e

i lu mi'a cilre fu le xagrai i je'u mi'a zvati le ckule ca ro donri li'u

i lu mi ji'a zvati lo donri ckule sei la alis cusku i ei do na tai jgira li'u

i lu xu cilre fi le seljmina sei la jitfa cakyrspa cu xanka milxe retsku li'u

i lu go'i sei la alis cusku i mi'a cilre fi le fasybau e le zgike li'u

i lu xu go'i fi le nu lumci sei la cakyrespa cu cusku li'u

i lu li'a na go'i sei la alis fengu cusku li'u

i lu ua le medomoi na mutce le ka xamgu ckule sei la jitfa cakyrespa cu surbi'o mutce tonga cusku i le dejnoi be fi le memi'amoi cu se fanmo lu le fasybau e le zgike ba'e e le nu lumci cu seljmina li'u li'u

i lu do na mutce le ka nitcu ly sei la alis cusku va'o le nu xabju le xamsi loldi li'u

i lu mi na kakne le nu pleji sei la jitfa cakyrespa cu vruvasxu cusku i mi cilre le fadni po'o li'u

i lu fy mo sei la alis retsku li'u

i lu li'a pamai nu ctidu'e gi'e ci'iska sei la jitfa cakyrespa cu spuda i remai le vo pagbu be le nacycmaci be'o no'u le nu jmina'e e le nu vimcu'a e le nu pilji'e e le nu fende'a li'u

i lu mi na jimpe fi zo jmina'e sei la alis cusku darsi i ki'a li'u

i la cpicinfo cu spaji lafti le re xance i lu ue paunai xu na jimpe fi zo jmina'e sei cy ki'asku i ru'a je'upei do jimpe fi zo natfe li'u

i lu go'i sei la alis senpi cusku i le du'u da de natfe cu se smuni le du'u da onai de ka'e jetnu li'u

i lu ja'o sei la cpicinfo di'a cusku do natfe jimpe i do ja'a bebna va'o le nu do na jimpe natfe jimpe li'u

i la alis na darsi le nu za'ure'u te preti la'e di'u i abu fa'a la jitfa cakyrespa cu cusku lu do cilre fi ma ji'a li'u

i lu le cridyske sei la jitfa cakyrespa noi kancu lei seltadni sepi'o lei limna'i cu cusku i le cridyske no'u le prutce e le cabna ge'u e le xasyske i ji'a le nu pixra'i zo'u le pixra'i ctuca cu tolci'o sincyfi'e noi zvati paroi ro jeftu i ctuca fo le nu pixra'i gi'e grasu'u cintai finti li'u

i lu a'u la'e di'u mo sei la alis cusku li'u

i lu ba'e mi ka'enai jarco sei la jitfa cakyrespa cu cusku i mi dukse le ka tinsa i ji'a la cpicinfo noroi cilre li'u

i lu claxu lo'e temci sei la cpicinfo cu cusku i mi zvati le dzeklu ctuca i ri tolci'o xasyjukni i go'i li'u

i lu mi ri noroi zvati sei la jitfa cakyrespa cu vruvasxu cusku i ri ctuca fo ti'e le clacmo e le geisto li'u

i lu go'i i go'i sei la cpicinfo noi ji'a vruvasxu cu cusku li'u i le re danlu cu gairgau le vo'a xance le vo'a flira

i lu pau do cilre ca ro donri ze'a lo cacra be li xo sei la alis noi djica le nu sutra galfi le selsnu cu cusku li'u

i lu ze'a lo cacra be li pare ca le pamoi donri e le remoi donri sei la jitfa cakyrespa cu cusku i li so le cimoi e le vomoi i li xa le mumoi e le xamoi i li'oli'o li'u

i lu cinri selpla sei la alis ki'asku li'u

i lu la'e di'u krinu le nu zo CIlRE cmene i jdika le ka temci kei lo cacra be li ba'e CI ca ro djedi be li ba'e RE li'u

i le sidbo cu mutce cnino la alis i abu ze'a pensi pu le nu te pinka fi lu ja'o je'upei ca le somoi donri e le panomoi donri cu zifre li'u

i lu je'u li'a go'i sei la jitfa cakyrespa cu cusku li'u

i lu mo ca le papamoi donri sei la alis di'a kucli cusku li'u

i lu la'e di'u banzu sera'a le nu ckule sei la cpicinfo cu jditce tonga zunti i caku ko ta tavla lei nu kelci li'u