Libre de Memorias/1383
| ← 1382 | 1383 Libre de Memorias |
1384 → |
L'an MCCCLXXXIII foron Cossols,
- Senhor Ramon Cabot, per Taulas et per Mesies.
- Senhor Andrieu Astrebo, per Mercadies, Notaris et Canabassies.
- Senhor Jacme Sicre, per Mazel, Pararies et Aludies.
- Senhor Daude Abby, per Sabaties, Coyraties, Fabres, Monies et Peyralies.
- Senhor Peyre Brenguie, per Lahor, Fusties et Orgies.
Foron Clavaris.
- Senhor Johan Reynaut, per Canabassies.
- Senhor Bernat Fabre, per Sabaties.
Feron de talha aquel an, mieg franc per denier.
Foron levayres de Bans.
- Aymeric Barba, per Taulas.
- Frances Barrieyra, per Mazel.
- Johan Jotglar, per Lahor.
Foron Carrayries.
- Ramon Cotelie, per Taulas.
- Veria Londras, per Sabaties.
Foron Caritadies.
- Berthomieu P. per Taulas.
- Jacme Emengau, per Mercadies.
- Perrin de Rems, per Sabaties.
- Brenguie Cesseno, per Mazel.
Lan sobre dig, los senhors Cossols se vestero dun drap blan de melinas, e foron taxatz a XXIIII franx per Cossol, e els escudies a VI franx.
Aquel an meteis davan dich, passet a Bezes lo Rey d'Erminia que sen era fugit de son pais, perso que los Sarrazis li avian pres tot son reialme, et li avian pres sa molher e sos effans, et anava al Rey de Fransa.
Aquel an meteis, moric et trespasset mossenhor Sicart dAmbres, Avesque de Bezes, lo jorn de Santa Maria Magdalena, a hora de terssia.
Aquel an mezeis MCCCLXXXIII, fouc fach Evesque de Bezes mossenhor Symon de Gramaut, et pres la pocessio de lavesquat, lo segon jorn de setembre.
Aquel an dessus dig los sobre-ditz senhors Cossols de Bezes vendero lo pes del blat: et vendet se II melia e CC libras; et comprero ho los ereties enfans del senhor Bernat Guitart, perso que se paguesso dels LXXX e XII marx V onsas e III deniers dargent, que avian prestat e lur mayre al comu de Bezes, aissi cum dessus es dig.
Item aquel an mezeis paguet tot hom de la dicha viela, soes a saber, de bona bestia mieg gros, et de careta VI patx, e dase IIII patx.