Libro de Mormon - Introduction

LE LIBRO DE MORMON

UN ALTERE TESTAMENTO DE JESUS CHRISTO

HISTORIA SCRIBITE SUPRA PLATTAS PER MANO DE MORMON EXTRAHITE EX LE PLATTAS DE NEPHI

Il se tracta dunque de un compendio del historia del populo de Nephi, e anque del Lamanitas - Scribite al Lamanitas, que es un residuo del casa de Israel, como tamben al Judeos e al Gentiles - Scribite per commandamento, e anque per spirito de prophetia e de revelation - Scribite, sigillate e occultate pro le Senior a fin de non venir destruite - Pro comparer al luce e venir interpretate per dono e poter de Deo - Sigillate per mano de Moroni e occultate pro le Senior, pro comparer al luce al tempore debite per medio del Gentiles - Interpretate per dono de Deo.
In ultra un compendio extrahite ex le Libro de Ether, que es le historia del populo de Jared, dispersate quando le Senior confundeva le lingua del populo, dum illes construeva un turre pro arrivar al celo - Que es pro monstrar al resto del casa de Israel qual grande cosas le Senior ha facite pro lor patres, e perque illes pote cognoscer le alliantias del Senior, e que illes non es rejectate pro sempre - E anque pro convincer le Judeos e le Gentiles que JESUS es le CHRISTO, le Eternal Deo, que se manifesta a tote le nationes - e nunc, si il ha errores, il es errores human; vos ergo non condemna le cosas de Deo, a fin que vos potera star sin macula ante le sede del judicio de Christo.

Traducite ex plattas original al anglese per Joseph Smith junior
Prime edition anglese publicate in Palmyra, New York, USA, in 1830.
Publicate per le Ecclesia de Jesus Christo del Sanctos del Ultime Dies.

INTRODUCTION

Le Libro de Mormon es un libro de sacre Scripturas comparabile al Biblia. Il es le historia del relationes inter Deo e le antique habitantes del America e contine le plenitude del Evangelio eternal.
Le libro esseva scribite per multe antique prophetas per spirito de prophetia e de revelation, lor parolas, scribite supra plattas de auro, esseva citate e summarisate per un propheta-historic de nomine Mormon.
Le narration contine le historia de duo grande civilitates. Un veniva de Jerusalem in 600 a.C. e posta illo se divideva in duo nationes, cognoscite como Nephitas e Lamanitas. Le altere veniva multo ante, quando le Senior confundeva le linguas in le Turre de Babel.
Iste gruppo esseva cognoscite como Jareditas. Post milles de annos tote illes esseva destruite excepte le Lamanitas, e illes es le principal ancestrales del Indianos american.
Le advenimento culminante narrate in le Libro de Mormon es le ministerio personal del Senior Jesus Christo al Nephitas poco post Su resurrection.
Illo expone le doctrinas del Evangelio, delinea le plano de salvation e explica al homines lo que illes debe facer pro trovar pace in iste vita e salvation eternal in le vita a venir. Post que Mormon habeva portate a termino su scriptos, ille consignava le narration a su filio Moroni, que addeva alcun parolas sue e occultava le plattas in le Collina de Cumorah.
In 21 septembre 1823 le mesme Moroni, como un esser glorificate e resuscitate, appareva al propheta Joseph Smith e le impartiva instructiones sur le antique registros e lor final traduction in lingua anglese.
A tempore debite le plattas esseva consignate a Joseph Smith, que los traduceva per dono e poter de Deo. iste historia ha essite publicate in multe linguas como nove e ulterior testimonio que Jesus Christo es le Filio del Deo vivente, e que tote illes qui veni a ille e obedi le leges e le ordinantias del Evangelio pote salvar se.
Circa iste narration le propheta Joseph Smith diceva: "Io ha dicite al fratres que le Libro de Mormon es le libro plus juste de tote le libros sur le superficie del terra e le clave de volta de nostre religion, e que un homine se avicina de plus a Deo obediente a su preceptos que a illos de qualcunque altere libro".
Ultra a Joseph Smith (vide su testimonio), le Senior provideva que altere dece-un personas videva personalmente le plattas de auro e illes deveniva testes special del veritate e del divinitate del Libro de Mormon.
Lor testimonio scribite es ci includite como "le Testimonio de tres Testes" e "le Testimonio de Octo Testes". Nos invita tote le homines de omne loco a leger le Libro de Mormon, a meditar in lor corde le message que illo contine e post demandar a Deo, Patre Eternal, in le nomine de Christo si le libro proveni o non ab Deo. Illes qui lo face e pete con fide, illes obtenera un testimonio de su veritate e divinitate per le poter del Spirito Sancte (vide Moroni 10:3-5).
Illes qui recipe iste divin testimonio del Sancte Spirito venira anque a cognoscer per medio del mesme poter que Jesus Christo es le Salvator del mundo, que Joseph Smith es Su revelator e propheta in iste ultime dies e que le Ecclesia de Jesus Christo del Sanctos del Ultime Dies es le regno del Senior novemente stabilite sur le terra in preparation del secunde venita del Messia.

TESTIMONIO DE TRES TESTES

NOS NOTIFICA a tote le nationes, tribos, linguas e populos al qual arrivara iste opera: que nos, per gratia de Deo patre e de nostre Senior Jesus Christo, nos vide le plattas que contine iste registros, que es le historia del populo de Nephi e anque del Lamanitas, lor fratres, e anque del populo de Jared, qui veniva del turre ja mentionate.

E nos sape tamben que illos esseva traducite per dono e poter de Deo, perque Su voce lo ha declarate a nos; ergo nos sape con certitude que iste opera es ver.

Nos attesta tamben que nos ha vidite le scriptos supra le plattas; e illos nos esseva monstrate per le poter de Deo e non del homine. E nos declara con parolas sobrie que un angelo de Deo descendeva del celo portante le plattas e los poneva ante nostre oculos e nos los poteva contemplar e vider le scriptos; e nos sape que es per gratia de Deo patre e de nostre Senior Jesus Christo que nos los videva e nos rende testimonio del veritate de iste cosas.

E iste es un prodigio a nostre oculos. Nonobstante le voce del Senior nos ha commandate de dar testimonio; ergo, pro esser obediente al commandamentos de Deo, nos rende testimonio de iste cosas. E nos sape que si nos essera fidel a Christo, nos purificara nostre vestes del sanguine de tote le homines e nos trovara sin macula ante le sede del judicio de Christo, e nos vivera eternemente con ille in celo. Sia gloria e honor al Patre, al Filio e al Spirito Sancte, que es un unic Deo. Amen.

OLIVER COWDERY
DAVID WHITMER
MARTIN HARRIS

TESTIMONIO DE OCTO TESTES

NOS NOTIFICA a tote le nationes, tribos, linguas e populos al quales arrivara iste opera: que Joseph Smith junior, traductor de iste opera, nos ha monstrate le plattas in question, que illos ha le aspecto de auro; e nos le ha toccate con nostre manos tote le folios que le referite Smith ha traducite; e nos ha vidite le scriptos, e toto iste ha le aspecto de un opera antique, de singular factura.

E nos rende testimonio con parolas sobrie que le referite Smith los ha monstrate a nos, e que nos los ha vidite e toccate, e nos sape con securitate que le referite Smith ha recipite le plattas del qual ille nos ha parlate.

E nos da nostre nomines al mundo, in testimonio que nos los ha vidite. E nos non mente, Deo es nostre teste.

CHRISTIAN WHITMER.
HIRAM PAGE.
JACOB WHITMER.
JOSEPH SMITH, SEN.
PETER WHITMER, JUN.
HYRUM SMITH.
JOHN WHITMER.
SAMUEL H. SMITH.

BREVE ANALYSE DEL LIBRO DE MORMON

Le Libro de Mormon es le sacra historia del populos del antique America gravate sur plattas de metallo. in le libro mesme se parla de quatro genere de plattas de metallo:

1. Le plattas de Nephi, que esseva de duo typos: le Parve plattas e le Grande plattas. Le primas esseva plus particularmente dedicate al questiones spiritual e al ministerio e al inseniamentos del prophetas, dum le secundas contineva per le magis parte le historia secular del populos interessate (1 Nephi 9:2-4). totevia, desde le tempore de Mosiah, le Grande plattas includeva anque questiones de grande importantia spiritual.

2. Le plattas de Mormon, que contine un summario facite per Mormon del Grande plattas de Nephi, con multe commentarios. Iste plattas contine anque le continuation del historia de Mormon e le adjuncte de su filio Moroni.

3. Le plattas de Ether, que contine le historia del Jareditas. Iste registros esseva resumite per Moroni, que addeva anque su commentarios personal e addeva iste registros al historia general sub le titulo "Libro de Ether".

4. Le plattas de bronzo, portate per le populo de Lehi ab Jerusalem in 600 a.C. Iste plattas contineva "le cinque libros de Moses... E anque un historia del Judeos, desde le principio usque al initio del regno de Zedekiah, rege de Juda. E anque le prophetias del sancte prophetas" (1 Nephi 5:11-13). Multe partes de iste plattas, que cita Isaia e altere prophetas biblic e non biblic, compare in le Libro de Mormon.

Le Libro de Mormon comprende dece-cinque partes o divisiones principal, cognoscite, con un unic exception, como libros, cata un designate con le nomine de su autor principal.

Le prime parte (le prime sex libros, usque a Omni incluse) es un traduction del Parve plattas de Nephi. Inter le libros de Omni e de Mosiah on trova un insertion appellate Parolas de Mormon. Iste insertion conjunge le historia scribite sur le plattas con le summario facite per Moroni del Grande plattas de Nephi.

Le parte plus longe, desde Mosiah usque al capitulo 7 de Mormon inclusive, es un traduction del summario facite per Mormon del Grande plattas de Nephi. Le parte conclusive, desde le capitulo 8 de Mormon usque le fin del volumine, esseva scribite per le filio de Mormon, Moroni, que, post haber terminate le narration del vita de su patre, faceva un summario del historia del Jareditas (appellate Libro de Ether) e pois addeva le partes cognoscite como Libro de Moroni.

Circa le anno 421 d.C. Moroni, le ultime del prophetas-historic nephite, sigillava le sacre registros e los celava pro le Senior, pro venir al luce in le ultime dies, como habeva essite predicite per le voce del Senior per medio de su antique prophetas. In 1823 d.C. iste mesme Moroni, que alora esseva un personage resuscitate, appareva al propheta Joseph Smith e le consignava le plattas gravate.

Libros del Libro de Mormon

Intro | 1Nephi | 2Nephi | Jacob | Enos | Jarom | Omni | Parolas | Mosiah | Alma | Helaman | 3Nephi | 4Nephi | Mormon | Ether | Moroni