Nuns (VpN 1934:6)
- Sekü §
3433 dalebüda cifala de 1934 nüm: 3 lecifef feda Vpaklubas e cifef diläda valemik feda Vpaklubas binädons me söls sököl:
- ‚Prof. Dr. Albert Sleumer‛: presidan,
- ‚Dr. Arie De Jong‛: sekretan, e
- ‚J. G. M. Reynders Sr.‛: kädan.
- Peselons ünü foldil 3id yela: 1934 Vpamäks 300, e peseagivons demü reklam 200.
- Söl: ‚J. G. M. Reynders, Sr.‛ in ‚Den Haag‛ (Nedän) ‚Goudsbloemlaan‛: 120, potakal: 199061, konletom ya dü tim lunik literati: lebuks, periodapenäds, yegeds dela- e vigagasediks, pämods, pamfläts, bukiliseds, lids, reklamapenäds, ed i fotografotis e yegis votik, kels tefons Volapüki e sitis valemapükas votik, efe tefü valemapüks votik dinis, kels tefons è disinis sitas è sitis ya pelemeköl e pagebölis. Konletom dinis valik at in disein ad bevobön mögädo skäti lovelogamik Volapüka e valemapükas votik demölo sitis difik onas, gebädi onas e paki onas. Desänom ad gividön latikumo konleti lölik oka stide nolavik seimik.
- Nu begom valikanes, kels fägons ad yufön omi ön jäfüd at, ad stütön omi dub lüsed ladete omik nünis u yegis it dinis löpo pemäniotölis tefölis. If zesüdosöv, klienom ad pelön givulotis smalik tökü yegs ome pusedöls. Begom i ad lüsedön ome notetis tefü dabin klubas, bukemas e kadämas valemapükis distik tefölas.
- (pämod = brochure)
- Nu lised lafabik gretik telid Vpavödas nulik blümon. De lised at Vpans anik ya dalabons kopiedis. If Vpans votik desirons ad kopiedön lisedi at, okanons loenön oni de redakan balid Vpagaseda at; omutons ye promön ad ogesedön oni ünü mul bal pos dät, tü kel ugetons oni, dat votikans no nedons stebedön tu lunüpiko lüsedi liseda at. Nems utanas, kels vilons loenön lisedi, poregistarons, e lised posedons ones ma sökaleod, in kel begs at lüsed pugetons.
Se Volapükagased pro Nedänapükans 1934, Nüm: 5, Pad: 39.